ئەڤرۆ نیوز:
لژنا دارایی یا پەرلەمانێ عیراقێ کۆمبوویە، بڕیاردەرێ لژنا دارایی یا پەرلەمانێ عیراقێ گۆتیە، ل رۆژا ئێکشەمبیا بهێت حوکمەتا عیراقێ دێ دەست ب دابەشكرنا مووچێ فەرمانبەران کەت.
د. ئەحمەد سەفار، بریاردەرێ لژنا دارایی ل پەرلەمانێ عیراقێ راگەهاندیە، ل رۆژا پێنجشەمبی دێ پەرلەمانێ عیراقێ پرۆژە قانوونا پرکرنا کورتئینانێ ب دەستکاریڤە پەسەند کەت، راستەوخۆ ل رۆژا ئێکشەمبیا بهێت حوکمەتا عیراقێ دێ مووچە دابەش کەت.
ئەڤرۆ نیوز:
وه‌زاره‌تا ساخله‌میا عیراقێ ئامارێن 24 ده‌مژمێرێن بورى یا ڤایرۆسێ كۆرۆنایێ ل هه‌موو پارێزگه‌هێن عیراقێ و هه‌رێما كوردستانێ راگه‌هاندن.
ساخله‌میا عیراقێ راگەهاندیە، د دەمێ 24 ده‌مژمێرێن بورى دا سێ هزار و 577 كه‌س تووشى ڤایرۆسێ كۆرۆنایێ بووینه و 52 كه‌سان ژى گیانێ خۆ ژ ده‌ست داینه.
هژمارا گشتی یا تووشبوویێن ڤایرۆسێ كۆرۆنایێ ل عیراقێ گه‌هشته 505 و 310 كه‌سان، هه‌تا نوكه 434 هزار و 665 كه‌س چاره‌سه‌ر بووینه، دیسان 11 هزار و 432 تووشبوویان ژى گیانێ خوە ژ ده‌ست داینه .
ئەڤرۆ نیوز:
سەرئێشانا بێئارامیێ بەربەلاڤترین جورێن سەرئێشانێ یە، ژھەر چار كه‌سان سێ کەس د ژیێ سنیێله‌یى دا تووش د بنێ ، د پرانیا دەمان دا یا سڤکە یان پیچەک یا دژوارە و دوبارە نابیتەڤە و کێم کەس ب دژواری تووش دبنێ و ھندەک ژی ھەر حەفتیێ 3-4 جاران تووش دبنێ، ئەڤ جورێ نه‌خۆشیێ سه‌ر ئێشانێ ددەتە جێنیکان و دچیتە ھەردو ئالیێن سەری و شێوێ دژوارێ وێ ئێشانەکا زۆر پەیدا دکەت و ھەر وەکو سەرێ مرۆڤی دناڤ قافکەکێ ئاسنی دا و دبیت ھەردو ملێن مرۆڤی و ستوویێ مرۆڤى ژی ب ئێشن و ھندەک جاران ئەڤ چەندە ژ وەستیانێ پەیدادبیت،
هه‌روه‌سا ئاریشە د کەڤنە د زەڤلەک و گەھێن ستوویی و لامکێ و بۆ دەمێ 20 دەقیقان ھەتا دو دەمژمێران ژی بەردەوام دبیت، ھەکەر تو تووش بوویێ تو دشێی چاڤدێریا خوه بکەی ب خوارنا دەرمانان، باشتره مرۆڤ ئاڤا گه‌رم ل خوه بكه‌ت، دا ژی قورتال ببیت، ھندەک کەس ژی پشتی دانەکێ سڤکێ خوارنێ دخون ژێ چارەسەردبن.
ئەڤرۆ نیوز:
ھەموو کەس لدووڤ وان خوارنان دگەرن یێن ھاریکار بۆ کێمکرنا سەنگێ لەشەکێ جوان و بەژنەکا زراڤ ھەبیت، بەلێ تو دزانی ھندەک خوارن یێن ھەین ئەم رۆژانە دخوین و سستاھیێ دئێخنە مه‌ژى و ئاستەنگان ل بەر شانێن مه‌ژى چێدکەن و ناھێلن ئەرکێ خوە ب دروستی ئەنجام بدەن.
ئەڤە ژی ھندەک جۆرێن وان خوارنانە:
خوارنێن ب لەز: خوارنێن ب لەز کیمیایا مه‌ژى دگوھۆرن و د ئەنجام دا خەمۆکیێ و نیشانێن نەئارامیێ پەیدا دکەن، ئەو روونێن د ناڤ ڤان خوارنان دا باندۆرێ ل ھورمۆنێ دوبامین دکەن ئەوێ بەرپرس ژ خۆشیێ.
روونێن ڤەگۆھاستی: ئەو روونێ د ناڤ شرینیان و پسکێت و چبسان دا ھەی، ئاریشان د بیردانکێ دا پەیدا دکەت و دبنە ئەگەرێ ژبیرکرنا تشتان.
روونێ چەور: ئەڤ جۆرێ روونی یێ د ناڤ زەیتێ و خوارنێن قەلاندی دا ھەی و شانێن مه‌ژى ژ ناڤ دبەن.
گۆشتێن کارخانێ : وەکو گۆشتێ ھوت دوگ و برگەر و لانشون، ئەوێن کارێ شانێن دەماران دراوەستینیت و باندۆرێ ل مێشکی دکەن.
خوێ: دبیتە ئەگەرێ بلندبوونا فشارا خوینێ و ئاستەنگان دئێخیتە لڤینا لەشی و ھشا مرۆڤی کێم دکەت.
ماسیێ تون: خورانا تونێ پتر ژ سێ جاران د حەفتیێ دا ئاریشان بۆ بیردانکێ چێدکەت.
خوارنێن نیڤ کەلاندی: ئەڤ خوارنە باندۆرێ ل کوئەندامێ دەماران دکەت و دبیتە ئەگەرێ نەخۆشیا زوھایمەرێ.
ئەڤرۆ نیوز:
چەندین خێزانێن هەلەبجە ل سه‌ر ره‌ڤاندنا زارۆیێن وان ژ ئالیێ په‌كه‌كێ ڤه، سكالا ل دەستەیا مافێ مرۆڤی یا هەرێما کوردستانێ تۆمار کرینە.
رێڤه‌به‌را گشتی یا ده‌سته‌یا مافێ مرۆڤی ل هەرێما کوردستانێ راگەهاندیە، كۆمه‌كا سكالایان ژ ئالیێ چه‌ندین خێزانێن هه‌له‌بجه گه‌هشتینه وان، كو زارۆیێن وان ژ ئالیێ رێکخراوا تیرۆریستیا پەکەکێ ڤه هاتیه ره‌ڤاندن، دیسان چەندین خێزانێن دیتر هه‌نه، دترسن سكالایان تۆمار بکەن.
تاڤگه عومه‌ر زێده‌تر دبێژیت: ئەو خێزانه ژ ره‌وشا زارۆیێن خوه د دلگرانن و هه‌تا نوكه چ ژ چاره‌نڤیسێ وان نزانن، وان خێزانان بۆ ئاگه‌هداربوون ل سه‌ر ره‌وشا زارۆیێن خوه سه‌ره‌دانا په‌كه‌كێ كریه، به‌لێ وان رێك نه‌دایێ زارۆیێن خوه ببینن.
ئەڤرۆ نیوز:
سەرۆکێ رووسیا رێککەفتنا راوەستاندنا شەرێ ناگۆرنۆ کاراباخ راگەهاند.
ل شه‌ڤا بورى ڤلادیمێر پۆتینى راگەهاند، ئێدی شەر د ناڤبەرا هێزێن ئازەربایجانێ و ئەرمەنستانێ دا ل هەرێما ناگۆرنۆ کاراباخ ناهێتە کرن و سەرۆکێن هەردو وەلاتان ئاگربەستا راوەستاندنا شەری ب سەرپەرشتیا رووسیا ئیمزا کریە.
پۆتینی دیار کر ژى: هێزێن ئاشتى پارێز یێن رووسی دێ ل هەرێما کاراباخ و تایبەت ل سەر هێلا تەماسێ د ناڤبەرا سۆپایێن هەردو وەلاتان دا بەلاڤ بن.
د هه‌مان ده‌مدا، سەرۆکێ رووسیا د راگەهاندنا خوه دا داخواز ژ ئازەربایجانێ و ئەرمەنستانێ کر، گرتیان ژى ل هەڤدو بگوهۆرن.
ئەڤرۆ نیوز:
رێکخراوا ساخلەمیا جیهانی دبێژیت: ل بهارا بهێت دێ ڤاکسینێ کۆرۆنایێ ل ناڤ خەلکێ گەلەک هەژار هێتە بەلاڤ کرن.
هه‌روه‌سا دیار كرییه: ڤاکسینێ کۆرۆنایێ ژ رەهـ وڕیشال دێ ئاراستەیێ بەلاڤبوونا کۆرۆنایێ گوهوریت کو ب رێژەیا ٩٠% سەرکەڤتن ب دەستڤەئینایە.
بەریۆس ئیلۆرد مەزنە شیرەتکارێ رێكخراوا ساخله‌میا جیهانى، د کۆنگرەکێ ڕۆژنامەڤانی دا گۆت: ئەنجامێ تاقیکرنێن هەردو کۆمپانیێن فایزەر یا ئەمریکی و بیۆنتیک یا ئەلمانی گەلەک د ئەرێنی بوون، لێ هێشتا گەلەک کار مایە ل سەر بهێتە کرن.
ناڤهاتى گۆت ژى: ل هەیڤا ئادارا بهێت دێ دەست ب دابەشکرنا وی ڤاکسینی هێتە کرن و ل پێشیێ دێ بۆ وان وەلاتان بیت یێن خەلکێ وان گەلەک هەژار و پێدڤی ب وی دەرمانی هه‌ى.
ئەڤرۆ نیوز:
بزاڤا تالیبان داخواز ژ جۆ بایدنێ سەرۆكێ نوو یێ ویلایه‌تێن ئێكگرتى یێن ئه‌مریكا كریه، كو ئەمریكا پێگیریێ ب رێككەفتنا ڤەكێشانا هێزێن خوه ل ئەفغانستانێ بكەت.
وێ بزاڤێ د كارڤەدانا خوه یا ئێكێ دا ل سەر ب دووماهی هاتنا هەلبژارتنێن ویلایه‌تێن ئێكگرتى یێن ئەمریكا و سەركەفتنا جۆ بایدنى، د به‌یاننامه‌كێ دا گۆتیه: ڤەكێشانا هێزێن ئەمریكی باشترین چارەسەریە و رێیەكا ئاقلانەیە بۆ ب دووماهی هاتنا شەر و پێكدادانان ل ئەفغانستانێ، كو ئەڤە ژی دێ ب ڤەكێشانا هێزێن ئەمریكی هێتە كرن.
ئەمریكا دەست ب ڤەكێشانا هێزێن خوه ل وی وەلاتی كریە و بریارە هەتا هەیڤا گولانا سالا بهێت، ئه‌مریكا هه‌موو سه‌ربازێن خوه ل ئەفغانستانێ ڤەكێشیت.
ئەڤرۆ نیوز،عەلی حاجی :
نوونەرێ قایمقامیا زاخۆ د لژنا سوتەمەنیێ دا بۆ ئەڤرۆ نیوز دیار کر بەلاڤ کرنا گازا سپی ل سنورێ قەزا زاخۆ یا بەردەوامە و ناحیا باتیفا بەرەڤ دوماهیێ ڤە دچیت .
زێدەتە نیشان باغوس گۆت : بۆ ناحیا باتیفا ٤٦٩٥ پلێتێن گازا سپی ب وەلاتیان هات بوونە دان و بتنێ ١٦٠ کەسان بارا خوە یا گازا سپی وەرنەگرتیە و ئەم چاڤەرێ نە ئەو کەسە ژی پلێتێن خوە ژ برێکارێن خوە وەربگرن و بارا خوو ژ گازا سپی یا ئەڤ سالە وەربگرن داکو ناحیا باتیفا ب دوماهی بهێت،د نوکە دا ل ناحیا دەرکارێ دەست ب بەلاڤ کرنا پلێتێن گازا سپی ژلایێ برێکارێن ئازوقەی ڤە دهێتە کرن و د ماوەیێ دوو روژێن بهێت دا دێ دەست ب بەلاڤ کرنا گازا سپی هێتە کرن و د ئەڤ سالە دا ٣٨١٨ پلێتێن گازا سپی بارا وێ ناحیایێ وێ بوو و رێژەیا پلێتێن ژ سالا بوری زێدەتر بوویە ل وێ ناحیێ و پشتی ناحیا دەرکارێ ب دوماهی دهێت دێ بیتە گەرا ناحیا رزگاری .
ناڤهاتی گۆت ژی : هنارتنا گازا سپی ژلایێ حکومەتا عێراقێ ڤە بۆ پارێزگەها دهوکێ یا بەردەوامە و رانەوەستیایە و حکومەتا هەرێمێ ژی ژلایێ خوە ڤە بەردەوامە ل سەر بەلاڤکرنا گازا سپی و ئەم پێشبینی ژی دکەین ئەو وەلاتیێن قەزا زاخۆ ل سالا بوری بارا خوە یا گازا سپی وەرنەگرتین د ئەڤ سالە دا بارا خوە وەربگرن .
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٧٦٥ کەسێن دی ل هەرێما کوردستانێ تووشی کۆرۆنایێ بووینە و هەروەسا ٢٧ نەخوشێن کۆرۆنایێ ژی مرینە.
وەزارەتا ساخلەمیێ هەروەسا دیار ژی کریە کو د ماوەیێ ٢٤ دەمژمێرێن بۆری دا ٥٩٣ نەخوشێن کۆرۆنایێ ژی ب تەمامی چارەسەر بووینە.
ل پارێزگەها دهۆکێ ژی ٢٠٧ کەسێن دی تووشی کۆرۆنایێ بووینە و هەشت نەخوشێن کۆرۆنایێ ژی مرینە، د هەمان دەمی دا ٤٣٠ نەخوشێن کۆرۆنایێ ژی ب تەمامی چارەسەر بووینە.
نيشاندان