ئه‌ڤرۆ نيوز:

یا خویایە کو شەریعەتێ ئیسلامێ روژیگرتن نەکریە ئەرک ل سەر مرۆڤی ھەتا دبیتە مروڤەکێ بالق، بەلێ گەلەک ژ موسلمانان ھەر ژ زارۆکینی زارۆیێن خوە فێری رۆژیگرتنێ دکەن و ل دۆر ڤی بابەتی ھژمارەکا رێنمایێن نوشداری ھەنە داکو رۆژی کارتێکرنێ ل ساخلەمیا زارۆیان نەکەت.
ل بەراھیێ یافەرە دایک وباب بزانن، جوداھیەکا مەزن یا ھەی دناڤبەرا زارویان ژلایێ جەستەیی ڤە ل ئێک ژی دا، دەربارەی سەنگێ زارۆی و سەروبەرێن وی یێن ساخلەمی لەوما شیانێن زارویان بۆ روژیگرتنێ د جودا نە و پێدڤیە رێکێ نەدەنە زارویێن ژیێ وان کێمتر ژ حەفت سالان ب روژی بن، چونکو د ڤی دا ژی زارۆ پێدڤی ب رێژەکا باش یا شەکرێ ھەیە وەک ھێز بۆ ئەنجامدانا چالاکیێن روژانە و زارویێن ژیێ وان ژ حەفت ھەتا دەە سالا ن دێ شێن بۆ ماوێ چەند سەعەتەکا ب روژی بن، لێ نە ل پرانیا روژێ ب روژی بن و زارویێن ژیێ وان دەە سال و پێھەل دێ شێن ب روژی بن ھەر وەکی مروڤێن مەزن، پێدڤیە دایباب داکوکیێ ل زاروی بکەن بۆ خوارنا پاشیڤێ، چونکو ئەڤ خوارنە زور یا پێدڤیە بۆ زارویێ ب روژی داکو تووشی کێماتیا شەکرێ و ئاڤێ نەبیت نەخاسمە ل رەمەزانێن وەرزێ ھاڤینێ.
زارویێن نەخۆش ب ھندەک نەساخیان پێدڤیە ب روژی نەبن، مینا نەساخیا تەنگەنەفەسیێ یان رەبویێ، وزارویێن نەساخیێن خوینێ ھەبن وەک نەساخیا تالاسیمیا وکێماتیا خوینێ یا شالوکی، یان زارویێن نەساخیێن دلی ھەبن و ئەوێن پێدڤی ب کارئینانا دەرمانان دبن، یان زارویێن تووشی نەساخیێن گولچیسکا دبن، چونکو سەروبەرێن ڤان نەساخیا ب روژیگرتنێ ئالوز دبن، لەورا فەرە دەیک وباب دھایدار بن ب زیانێن روژیگرتنێ لسەر ڤان زارویان.
دیسا روژیگرتن زور یا ب زیانە بو زارویێن نەساخیا شەکرێ ھەبیت ل جورێ ئێکی ئەوا ب دەرزیکێن ئینسولینێ دھێتە چارەسەرکرن، چونکو روژیگرتن دگەل ب کارئینانا ڤان دەرزیا رێژا شەکرێ دناڤ خوینێ دا ب زەحمەت دەستەسەردکەت، بەلکو رێژا شەکری خوینێَ زور کێم بکەت تا رادەکی ژیانا زاروکی بکەڤیتە ژێر مەترسیێ، بەلێ روژیگرتن یا ب مفایە بو زارویێن قەلەو، چونکو دێ بیتە دەرفەت بۆ کێمکرنا کێشەیا وی ئەگەر زاروی پێگری ب نەخوارنا زور ل دەمێ فتارێ و پاشیڤێ کر .
پێدڤیە پاشیڤ و فتارێن زارویێ ب رۆژی ب خوارنێن کاربوھیدرات دەولەمەند بن وەکی نانی و برنجی پێخەمەت پاراستنا رێژا شەکرا خوینێ ل دەمێ روژێ، دیسان خوارنێن پری کەرستێ کالسیوم وەکی شیری و بەرھەمێن وی بۆ زارۆی د گرنگن، زێدەبارێ خوارنا فێقی و زەرزەواتی ل فتارێ و پاشیڤێ، ھەروەسا یا پێدڤیە خوارنا نیڤرو ب خوارنەکا دی دناڤبەرا فتارێ و نڤستنێ ل ھەیڤا رەمەزانێ بھێتە قەرەبوکرن.

ئه‌ڤرۆ نيوز:

ژنا دوگیان وەکو ژنەکا سروشتی یە ل دەمێ ساخلەمیا وێ یا باش بیت، ١٧ دەمژمێرێن رۆژیگرتنێ ھەکە کارتێکرن ل ساخلەمیا وێ کر، یانژی ھەکە ل ھەر سێ مەھێن دووماھیێ بوو و تووشی تەنگەزاریێن ساخلەمیێ بوو و رەوشا وێ تێکچوو، یان ھەکە دیت کارتێکرن دێ ل ساخلەمیا زارۆیێ وێ ھێتە کرن، رێک بۆ دھێتە دان رۆژیا نەگریت، ل حالەتێن سروشتی چو ئاریشە نینن و پێدڤیە رۆژیان بگریت.
د. ئەمەل عەبدولحەکیم، تایبەتمەندا نەخۆشیێن ژنان و زارۆبوونێ دیارکر کو رەمەزانا ئەڤ سالە د وەرزێ ھاڤینێ دایە و گەلەک یا ب زەحمەتە روژیگر ١٧ دەمژمێران ب روژینە، ژنا دوگیان ژی دڤێت روژیێن خوبگریت چونکی ژنا دوگیان وەک ژنا نەدوگیانە ئەگەر ساخلەمیا وێ یاباش بو و چ کارتێکرن لێ نەبوو دێ شێت روژیاخوە ب شَێوەکێ نورمال بگریت ب مەرجەکی ئەو دەمژمێرێن دناڤبەرا پاشیڤ و فتارێدا ھند خوارنێ و شلەمەنیا ڤەخوت کو ب روژێ کارتێکرنێ ل وێ و زارویێ وێ نەکەت.
د.ئەمەل عەبدولحکیم تایبەتمەندا ژنان و زاروبوونێ دیارکر ژی پێدڤیە ژنا دوگیان خوارنێ ب جارەکێ لسەر ئێک نەخوت، چونکی دێ کارتێکرنێ ل مەعیدا وێ کەت، بەلکو یا پێدڤیە خوارنا خوە بکەتە سێ (وەجبە) دناڤبەرا فتارێ و پاشیڤێدا و گۆت: پێدڤیە ژنا دوگیان خورمێ و قەسپا بخوت شووینا شرینیێن دی وەک زەلابی و بەقلاوێ، چونکی زور ب روین و شەکرن ئەڤەژی دێ کارتیکرنێ ل ساخلەمیا وێ کەت.
تایبەتمەندا نەخۆشیێن ژنان ئەوژی دیارکر پێدڤیە ژنا دوگیان گوشتی و فێقی و پروتینا بخوت و رێژەکا زورا ئاڤێ ڤەخوت کو نێزیکی ١٠ تا ١٥ گلاسا دپێڤینە و گۆت: یابێدڤیە ژنا دوگیان پاشیڤا خوە درەنگ بخوت دا ئەو دەمژمێرێن روژێ یێن درێژ کارتیکرنێ لێ نەکەن، ھەروەسا گەلەک کەسکاتیا بخوت، چونکی کەسکاتی ناھێلیت (قەبزبون).
ھەروەسا د.ئەمەلێ دیارکر کو ل سێ مەھێن دەستپێکێ (معیدا )ژنا دوگیان نەیا درستە بەردەوام دلێ وێ رادبیت و دگەل دلرابوونێ گەلەک شلەمەنی و (معادن)ژ لەشێ وێ دەردکەڤن، لەو را رەنگە ئەڤ دەمژمێرن درێژ کارتێکرنێ ل وێ و زارویێ وێ بکەت و گۆت: د ڤی حالەتی دا وێ مافێ ھەی روژیا خوە بخوت و پشتی زارۆیێ خوە ددانیت وێ روژیێ بگریتەڤە ،گوت: ھەرسێ مەھێن نیڤەکێ ئاسانترن بو ژنا دوگیان ژ مەھێن دەستپێک و دووماھیێ، چونکی ل مەھێن دووماھیێ فشارا خوینێ یا بلند بیت یان نەخوشیا شەکرێ ھەبیت یان میلاکێن وێ نە د دروست بن یان ژانێن بەری وەختی بێنێ، یان زارویێ وێ بەری وەختی ژ دایک بیت لڤی دەمی ژی ماف یێ ھەی روژیا خوە بخوت. دیسان پشتی ژنێ زارۆ دبیت پێدڤیە ل وی دەمی ژی گەلەک شلەمەنیا و خوارنێن باش بخوت دا شیر تێرا زارویێ وێ بکەت، ل دەمێ یا ب روژی، بەلێ ھەکە دیت ساخلەمیا وێ نە یا باشە و زارویێ وێ زور یێ زەعیفە و شیرێ وێ بەرەڤ کێمبوونێ ڤە دچیت درستە د ڤێ ماوەی دا روژیا خو بخوت.