ئەڤرۆ نیوز:
ل گۆر راپۆرتەکا ئاژانسا فرانس پرێس یا نووچەیان ھەرچەندە ھەتا نھا روسیا و ئیران سەبارەت ب پاشەرۆژا سووریایێ خوەدان ئێک ھەلویست بوون لێ نھا روسیا قۆمارێ ل سەر پاشەرۆژا بەشاری دکەت و وەک بەرێ ھەموو تشتەکێ ب مانا بەشاری ڤە گرێ نادەت و ئەو یەک ژی بوویە ئەگەر کو ئیران نەرازیبوونا خوە ل ھەمبەر ھەلویستێ روسیا دیار بکەت، چونکو بەرپرسێن ئیرانێ دبێژن د رەوشا نھا دا ل سووریایێ بەشاری چو بەدیل نینن و دڤێت روسیا ژی ب ھەموو رەنگەکێ پشتەڤانیێ ل مانا بەشاری بکەت.
پەیڤدارا وەزارەتا دەرڤە یا روسیا ماریا زاخاروڤا د پرێس کۆنفرانسەکی دا راگەھاند کو مە نەگۆتیە کو دڤێت بەشار ھەر ل سەر دەستھەلاتێ بیت، بەلکو مە دڤێت قەیرانا سووریایێ دوور ژ شەری و دەستێوەردانێن دەرەکی بھێتە چارەکرن، ھەکە ئەو یەک بھێتە کرن مەرج نینە کو بەشار ئەسەد ل سەر دەستھەلاتێ بیت، بەلکو بۆ روسیا یا گرنگ ئەوە کو شەرێ نھا ل سووریایێ ب دووماھی بھێت و رەوشا وی وەلاتی ئارام بیت.
چاڤدێرێن سیاسی دبێژن کو گوھۆرینەک بەرچاڤ د ھەلویستێ روسیا دا سەبارەت ب پاشەرۆژا ئەسەدی دروست بوویە و داخۆیانیێن پەیڤدارا وەزارەتا دەرڤە یا روسیایێ نیشا ددەت کو روسیا دێ دەستان ژ بەشاری بەردەت و رەنگە سەرەدانا بەشاری بۆ روسیایێ ژی ھەر بۆ وێ مەبەستێ بیت، چونکو روسیا ل گەل ئەمریکا دانوستاندنانێن بەرفرەە دکەت و روسیا بەرھەڤە بۆ بەرژەوەندیێن خوە دەستان ژ بەشاری بەردەت، چونکو ئەمریکا و وەلاتێن رۆژئاڤا دبێژن ھەتا بەشار ئەسەد ل سەر دەستھەلاتێ بیت قەیرانا سووریایێ چارە نابیت و بەردەوامیا قەیرانا سووریایێ زیانێن مەزن دگەھینتە بەرژەوەندیێن روسیا و ژ بەر ھندێ رەنگە روسیا دەستان ژ بەشاری بەردەت.
ل ئالیێ دی محەمەد عەلی جەعفەری سەرۆک ئەرکانێ لەشکرێ ئیرانێ د داخۆیانیەکێ دا راگەھاند کو روسیا وەک مە ھزر ناکەت، ئەو تنێ ھزرا بەرژەوەندیێن خوە ل سووریایێ دکەن و ژ بەر ھندێ ژی ھێرشێن ئەسمانی ل سووریایێ ئەنجام ددەن، ژ بۆ روسیا گرنگ نینە کو بەشار ئەسەد ل سەر دەستھەلاتێ بیت یان نە، لێ مە بۆ مانا بەشاری ل سەر دەستھەلاتێ ھەتا نھا گەلەک قوربانی داینە و بۆ مە یا گرنگە کو بەشار ئەسەد ل سەر دەستھەلاتێ بیت، چونکو بەشاری نھا چو بەدیل نینن و شەرێ تیرۆرستان دکەت، ھەکە روسیا دەستان ژ بەشاری بەردەت ژی ئیران دێ ھەتا دووماھیێ بەرەڤانیێ ژ بەشار ئەسەدی کەت. چونکو پاشەرۆژا مە و سووریایێ پێکڤە د گرێداینە و ئەم ب چو رەنگەکێ قەبوول ناکەین کو کەسەکێ دی ل جھێ بەشاری ل سووریایێ بھێتە دانان دا ئەو کەسە سووریایێ رادەستی رۆژئاڤا و ئەمریکا بکەت.

ئەڤرۆ نیوز:
جێگرێ سەرۆکێ AKP پشتی کۆمبوونا سەرکردایەتیا AKP ل ئەنقەرە راگەھاند کو سەرکەڤتنا وان بۆ گەشەپێدانا تورکیا گەلەک گرنگە و سیاسەت و ژیانا ئابووری و پاشەرۆژا وەلاتی ب پاشەرۆژا AKP ڤە گرێدایە و ئەم دێ ھەموو پرسگرێکێن تورکیا چارە کەین، ب تایبەت پرسا بێکاریێ، ھەژاریێ و پرسگرێکا کوردی د بەرنامەیێ مە یێ سەرەکی دانە.
عۆمەر چەلیک جێگرێ سەرۆکێ پارتا داد و گەشەپێدانێ (AKP) د داخویانیەکی دا راگەھاند کو گەلێ تورکیا ل دژی ھزرێن توندوتیژیێ و شەر و ئالۆزیانە و گۆت: (د ناڤا پێنج ھەیڤان دا گەلێ کورد و تورک واتە وەلاتیێن تورکیا دیتن کو ھەکە AKP نەبیت دێ رێکخستنا تیرۆرست وەلاتی کەتە مەیدانا کوشتن و رژێتنا خوینێ و ژ بەر ڤێ چەندێ ژی د ھەلبژارتنا یەکێ مژدارێ دا گەلێ تورکیا وەک نیشانا براتی، سیاسەتێ و پێکڤەژیانێ دەنگێ خوە دا پارتا مە و ئەم دێ ب کریاری بەرسڤا وەلاتیان دەین و پرسگرێکێن وان چارەسەر کەین).
جێگرێ سەرۆکێ AKP ھەروەسا راگەھاند ژی نھا ل بەر دەستێ وان سێ پرسگرێکێن گرنگ ھەنە و بجھکرنا ئارامی و ئاشتیێ ل ھەموو تورکیا، نەھێلانا ھەژاریێ، چارەکرنا پرسگرێکا بێکاریێ و بەری ھەموویان ژی ژ نوو ڤە نڤیسینا دستوورێ نوو یێ تورکیایە و گۆت: (ھژمارا پەرلەمانتارێن مە بۆ نڤیسینا دستوورەکی نوو یێ سڤیل تێر ناکەت و دڤێت ئەم ل پەرلەمانی ل گەل ئالیێن دی ژی ڤێ بابەتێ گەنگەشە بکەین و پێکڤە ل گەل ھەموو ئالیان دستوورەکێ نوو بەرھەڤ کەین، دیسان د بەرنامێ مە یێ سەرەکی دا چارەکرنا پرسا کوردی ژی ھەیە و ئەم دێ بزاڤێ کەین ب شێوازەکی نوو پرسا کوردی چارە کەین و تیرۆرێ ژ ناڤ ببەین).
جێگرێ سەرۆکێ AKP د پشکەکا دی یا ئاخڤتنا خوە دا ژی راگەھاند کو وان د کۆمبوونا جڤاتا سەرکردایەتیا پارتا خوە دا ل سەر پرسگرێکا پەنابەریێ، ژ نوو ڤە دەستپێکرنا قۆناغا ئاشتیێ، شەرێ ل ھەمبەر PKK و ل سووریێ ژی تێکۆشینا ل ھەمبەر داعشێ گەنگەشە کرینە و گۆت: (د ڤان مژاران دا نھا ئەز نەشێم داخویانیەکا بەرفرەە بدەم، ژ بەر کو ئەڤ مژارە ھەموو ب ئاڤاکرنا حوکمەتێ ڤە گرێداینە و پشتی ئاڤاکرنا حوکمەتێ ئەم دێ د چارچۆڤێ بەرنامەکێ دارێتی دا دەست ب کاری کەین و ھەموو پرسگرێکان چارە کەین و مە ئەڤ ھێز و زانین و ئەقلێ مەزنێ چارەکرنێ ھەیە).
ل سەر پەیوەندیێن ل گەل سووریێ، ئیرانێ، عیراقێ و ھەرێما کوردستانێ ژی جێگرێ سەرۆکێ AKP دیار کر کو د رەوشا نھا دا ل رۆژھەلاتا ناڤین پەیوەندی گەلەک ئاسای نینن ژ بەر کو رەوشەکا نەئاسایی ھەیە و قەیرانەکا مەزنا ئابووری، سیاسی، مرۆڤی و ژیانی ھەیە و گۆت: (تورکیا د ڤێ قۆناغێ دا وەک ھێزەکا مەزنا دەڤەرێ دێ رۆلێ خوە بۆ چارەکرنا قەیرانێن ل رۆژھەلاتا ناڤین گێریت و ل گەل عیراقێ و ھەرێما کوردستانێ ژی پەیوەندیێن مە جودا نە و ئەم دخوازین ل گەل عیراقێ ژی وەک ھەرێما کوردان پەیوەندیێن مە د ئاستەکی بلند دا بن).
د دووماھیا ئاخڤتنا خوە دا ژی ل سەر پرسا ئەرێ ھوون دێ ب کریاری ژی ل دژی تیرۆرا داعشێ و قاعیدە ل عیراقێ و سووریێ شەری کەن یان نە؟ جێگرێ سەرۆکێ AKP راگەھاند کو ئەو ل دژی ھەموو رێکخستنێن تیرۆرستی نە و ل سووریێ و عیراقێ و ل وەلاتێ مە نە ب تنێ قاعیدە و داعش ھەنە و گۆت: (بلا ئێدی ھەرکەس چاڤێن خوە ڤەکەن و راستیان ببینن ژ بەر کو قاعیدە و داعش چەند ریکخستنێن تیرۆرستی بن PYD، PKK و YPG ژی ئەو ھندە تیرۆرستن و چ پەیوەندیا وان کۆمێن تیرۆرست ب گەلێ کورد ڤە نینە و مەرەما وان ژی نە کارکرنا د بەرژەوەندا کوردا دایە و ئەم ل دژی ھەر بنگەھەکی نە کو ل ژێر دەستێ کۆمێن تیرۆرستی دا بیت و ئەم ب چو رەنگەکی رێ نادەین ھەرێمەکا ئۆتۆنۆمی، یان فیدرالی ل باکورێ سووریێ ئاڤا بیت و ئەم قەبوول ناکەین دەڤەرێن کورد و عەرەب و تورکمانان ل ژێر کۆنترۆلا PYD و YPG دا بن و ھەکە زێدەگاڤیان بکەن ئەم دێ ب دژواری بەرسڤا وان دەین).