ئەڤرۆ نیوز:
وەزارەتا ساخلەمیا هەرێمێ راگەهاند، کچەکا د ژیێ ١٣ سالیێ دا ل ناحیا بازیان تووشی کۆرۆنا یێ بوویە، ب ڤێ چەندێ هژمارا تووشبوویێن کۆرۆنا یێ ل هەرێما کوردستانێ گەهشتە ٢٨٩ کەسان.
ئەڤرۆ ٧ نیسانا ٢٠٢٠ وەزارەتا ساخلەمیا هەرێمێ راگەهاند، د بەردەوامیا پشکنین و لێگەریانێ لدووڤ گۆمانلێکریان، توشبوویەکێ کۆرۆنا یێ ل باژێرێ سلێمانیێ هاتە دەست نیشانکرن.
گۆت ژی، تووشبوو یی کچەکا د ژیێ ١٣ سالیێ دایە و خۆجها ناحیا بازیانە و بەرکەفتیا توشبوویەکێ بەرێ یە.
ئەڤرۆ نیوز:
فەخرەدین کۆجا، وەزیرێ ساخلەمیا توركیا ئامارا 24 دەمژمێرێن بوری یێن كۆرۆنا یێ راگەهاندن و گۆت، 76 كەسێن دیتر ب کۆرۆنا یێ گیانێ خوە ژ دەستدان، هەتا نوکە 725 كەسان گیانێ خوە ژ دەستدایە.
هەروەسا گوتیە: د دەمێ شەف و رۆژەکێ دا 3 هزار و 892 حالەتێن نوو یێن تووشبوون ب كۆرۆنا یێ ل تورکیا هاتینە تۆماركرن، هەتا نوکە 34 هزار و 109 کەس تووشی کۆرۆنا یێ بووینە.
ئەڤرۆ نیوز:
سەرۆكێ ئەمریكا رەخنە ل رێكخراوا ساخلەمیا جیهانی گرت، ژبەرکو زانیاریێن خەلەت داینە وان دەربارەی ڤایرۆسێ كۆرۆنا و لایەنگری بۆ وەلاتێ چینێ كریە.
ئه‌ڤرۆ سێشه‌مبی دۆنالد ترەمپی ل تۆرا جڤاکی یا تویتەری نڤێسی یە، کو رێكخراوا ساخلەمیا جیهانی ل دەستپێکا بەلاڤبوونا كۆرۆنا یێ دا، ئەمریكا راسپارد کو ئەسمانێ خوە ڤەکری بهێلیت، د دەمەکێ کو ئەڤ رێكخراوە پشکا زۆر پارێن خوە ژ ئالیێ ئەمریكا فە دابین دکەت.
ترەمپی گۆتیە، خۆشبەختانە من شیرەتێن رێکخراوا ساخلەمیا جیهانی رەتکرینە و هەر زوو من گەشتێن وەلاتێ خوە ل گەل چینێ دا راگرتن.
ئەڤرۆ نیوز:
وەزارەتا ساخلەمیا عیراقێ راگەهاند، د دەمێ ٢٤ دەمژمێرێن بوری دا ٨٠ حالەتێن نوو یێن توشبوون ب کۆرۆنایێ و ئێک حالەتێ گیان ژ دەستدانێ و ١٢ حالەتێن ساخبوونێ هاتینە تۆمار کرن.
ئەڤرۆ سێشەمبی، وەزارەتا ساخلەمی و ژینگەها عیراقێ راگەهاند، د دەمێ ٢٤ دەمژمێرێن بوری دا ٨٠ حالەتێن توشبوون ب کۆرۆنا یێ هاتینە تۆمارکرن، کو ٤٤ ل نەجەف، ٢١ ل بەغدا، شەش ل بەسرا، پێنج ل زیقار، دو ل موسەنا، ئێک ژی ل دیالە و ئێک ژی ل واست، دیسان حالەتەکێ گیان ژ دەستدانێ ل باژێرێ نۆشداری یێ بەغدا هاتیە تۆمارکرن.
هەروەسا هەتا نوکە هزار و ١٢٢ کەس ل عیراقێ تووشی ڤایرۆسێ کۆرۆنا یێ بووینە.
ئەڤرۆ نیوز:
وەزارەتا ئەوقافا هەرێما کوردستانێ راگەهاند، وەزارەتا حەجا سعودیێ پارێ هەموو وەلاتیێن هەرێما کوردستانێ ڤەگەراندنە سەر حیسابا کۆمپانیان، کو بۆ هەر عومرەکارەکێ کۆژمێ ٢١٠ دۆلاران بوون.
ئەڤرۆ سێشەمبیێ وەزارەتا ئەوقافا هەرێمێ د راگەهاندنەکێ دا دیار کر، ئەو وەلاتیێن کو پارە داینە کۆمپانیان ب مەرەما ئەنجامدانا گەشتا عومرێ، لێ گەشتێن وان نەهاتنە ئەنجامدان، د نوکە دا ئەو کەسە دشێن سەرەدانا کۆمپانیان بکەن و پارێن خوە وەربگرن.
هەروەسا گۆتیە، سعودیێ گەشتا عومرێ بۆ هەموو جیهانێ ژبەر کۆرۆنایێ راوەستاندیە، ل گەل ڤێ چەندێ نێزیکی هزار و ٧٠٠ وەلاتیێن هەرێمێ ب رێیا کۆمپانیێن تابیەت ب عومرێ ڤیزا گەشتا عومرێ وەرگرتبوو.
هەروەسا ل هەرێما کوردستانێ ٦٥ کۆمپانی ژ ئالیێ وەزارەتا ئەوقافێ ڤە رێک پێ هاتیە دان کو عومرەکاران بۆ ولاتێ سعودیێ ب مەرەما بجهئینانا عومرێ ڤەگوهێزن.
ئەڤرۆ نیوز:
ژێدەرەكێ ژ وەزارەتا دارایی و ئابووری یا هەرێما كوردستانێ راگەهاندیە: ل حەفتیا بهێت دێ دابەشكرنا مووچێ هەیڤا ئێك یێ سالا 2020 دەست پێكەت و ئێكەم وەزارەت ژی دێ وەزارەتا ساخلەمیێ بیت.
هەروەسا گۆتیە: بەرهەڤی دهێنە كرن بۆ دابەشكرنا مووچێ هەیڤا ئێك، ل حەفتیا بهێت دێ مووچێ وەزارەتێن ساخلەمیێ و ناڤخۆ هێتە دابەشكرن.
ئەڤرۆ نیوز:
رۆژناما تیلگراف یا بریتانی د راپۆرتەکێ دا دیار کریە کو مەترسیەکا مەزن ل سەر ژیانا بۆریس جۆنسۆن سەرۆک وەزیرێن بریتانیا هەیە کو نها ژ بەر ڤایرۆسێ کۆرۆنا ل ژێر چاڤدێریا توند دایە.
هەمان رۆژنامێ دیار کریە کو ٥٠% شانسێ سەرۆک وەزیران هەیە کو باش ببیت و ئەو یەک ژی نیشا ددەت کو مەترسیەکا مەزن ل سەر ژیانا وی هەیە، چونکو ژ بەر کۆرۆنایێ نها ل ژێر چاڤدێریا توند دایە.
ئەڤرۆ نیوز، هۆشەنگ تاجر:
حەمزە رەزیکی بەرپرسێ راگەهاندنا ساخلەمیا دهۆکێ بۆ ئەڤرۆ نیوز دیار کر کو ٥ نەخوشێن دی یێن کو بەری نها تووشی ڤایرۆسێ کۆرۆنایێ ببوون ئەڤرۆ ب تەمامی رەوشا وان باش بوو و ڤەگەریانە مالێن خوە و گۆت: (هەتا نها ل دهۆکێ ١٢ نەخوش ب تەمامی چارسەر بووینە و تنێ ئەو سێ نەخوشێن ئەڤرۆ کو هاتنە راگەهاندن ل نەخوشخانێ دانە و یا پێدڤی بۆ چارەسەریا وان دهێتە کرن).
ئەڤرۆ نیوز:
هێمن قادر پەیڤدارێ ژوورا ئۆپەراسیۆنێن هەولێرێ راگەهاند کو ل سەر داخوازا داواکارێ گشتی فەرمانا دەستەسەرکرنێ بۆ ٥ کەسێن ئاکنجیێن تاخێ کارێزان ل هەولێرێ دەرچوویە کو وان کەسان ل رۆژا ٢١ ئادارێ دو تازی دانابوون و بریارا حوکمەتێ پێشیل کربوون و بوونە ئەگەرێ هندێ کو گەلەک کەس ل هەولێرێ و دەڤەرێن دی تووشی ڤایرۆسێ کۆرۆنایێ بووینە.
ناڤهاتی راگەهاند کو هندەک ژ وان کەسان تووشی کۆرۆنایێ بووینە و پشتی کو رەوشا وان باش ببیت دێ هێنە دەستەسەرکرن و گۆت: (کەسێن دی ژی نها د کەرەنتینێ دانە و پشتی دەمێ کەرەنتینا وان ب دووماهی بهێت دێ هێنە دەستەسەر کرن).
هەروەسا ئەڤرۆ رێڤەبەریا گشتی یا ساخلەمیێ ل هەولێرێ راگەهاند کو تاخێ کارێزان ل هەولێرێ دێ ب تەمامی هێتە کەرەنتینکرن.
ئەڤرۆ نیوز:
مەسعود پزشکیان جێگرێ ئێکێ یێ سەرۆکێ پەرلەمانێ ئیرانێ راگەهاند کو ل گۆر پشکنینێن کو هەتا نها هاتینە کرن دەرکەفتیە ١١ ئەندامێن پەرلەمانێ ئیرانێ تووشی ڤایرۆسێ کۆرۆنایێ بووینە.
ناڤهاتی راگەهاند کو هەکە هەماهەنگیەکا باش د ناڤبەرا حوکمەتێ و خەلکی دا هەبیت ئیران دشێت د ماوەیێ ئێک هەیڤ دا ب تەمامی ل سەر کۆرۆنایێ زال بیت، لێ مخابن ئاریشێن مەزن هەنە و ل گەلەک دەڤەران خەلک پێگیریێ ب رێنمایان ناکەن و هندەک سازیێن دەولەتێ ژی خەمساریێ دکەن و ژ بەر هندێ ژی رێژا تووشبوویا وەلاتیان ب کۆرۆنایێ زێدەتر لێ هاتیە.
نيشاندان