ئه‌ڤرۆ نيوز:

رۆژنامەکا تورکیا د راپۆرتەکێ دا دیار دکەت کو بەرپرسەکێ وەزارەتا دەرڤە یا وی وەلاتی ھژمارا کەسێن کو ژ تورکیا چووینە ناڤ رێزێن داعش و جەبھەت ئەلنوسرە ئاشکرا کریە و ل گۆر وەزارەتا دەرڤە یا تورکیا 1200 کەس ژ تورکیا چووینە ناڤ رێزێن وان ھەر دو رێکخراوێن تیرۆرستی و ھەتا نھا ژی 400 ژ وان تیرۆرستان ھاتینە کوشتن و گەلەک ژی بریندار بووینە و ڤەگەرینە تورکیا.

رۆژناما حوڕیەت یا تورکیا دوھی راپۆرتەک بەرفرەە سەبارەت ب ھژمارا تورکێن کو چووینە ناڤ رێکخراوا تیرۆرستی یا داعشێ و ھەروەسا یا جەبھەت ئەلنوسرە ئاشکرا کریە و د راپۆرتێ دا ھاتیە دیار کر کو بەرپرسەکی وەزارەتا دەرڤە یا تورکیا ب بەلگە دیار کریە کو ھەتا نھا 1200 تورک چووینە ناڤ رێزێن ھەر دو رێکخراوێن تیرۆرستی یێن داعش و جەبھەت ئەلنوسرە و ھەتا نھا 400 کەس ژ وان تیرۆرستان ھاتینە کوشتن و ھژمارەک ژی بریندار بووینە و بەردەوام ژی ژ تورکیا خەلک دچنە ناڤ رێزێن داعش و جەبھەت ئەلنوسرە.

د بەردەوامیا راپۆرتێ دا ھاتیە دیار کرن کو سیاسەتا ئاکپارتی و سازیێن وێ ل ھەمبەر سووریێ و ب تایبەتی ژی سیاسەتا ئەردۆگانی وەسا کریە کو گەلەک کەس وەسا دبینن دڤێت بچنە سووریێ و ل دژی رژێما سووریێ شەری بکەن و وەک ئەرکەکێ ئایینی دبینن و حوکمەتا تورکیا ب وێ سیاسەتا خوە رێخوەشکەر بوویە کو لاوێن تورک بچنە ناڤ رێزێن داعشێ و ھەتا نھا ژی حوکمەتا تورکیا چو پێرابوونێن پێدڤی ل ھەمبەر چوونا وان کەسان بۆ ناڤ رێکخراوێن تیرۆرستی وەرنەگرتینە و گەلەک زانیاری ژی ھەنە کو وەزارەتا دەرڤە و سازیا ھەوالگێریا تورکیا ناھێلن کو بگەھنە دەزگەھێن راگەھاندنێ.
د پشکەکا دی یا راپۆرتێ دا ھاتیە کو دژبەریا ئەردۆگانی و حوکمەتا تورکیا یا ل ھەمبەر کوردێن رۆژئاڤا ژی ئێک ژ فاکتەرێن دی یێن کاریگەر بووینە کو تورکێن نەتەوەپەرست و یێن ھشکباوەر بەرێ خوە بدەنە سووریێ و شەرێ کوردان بکەن، لێ حوکمەتێ نەڤێت ھژمارا دروست یا کەسێن کو ژ تورکیا چوونە ناڤ داعشێ بۆ رایا گشتی ئاشکرا بکەت و تەرمێ ھندەک ژ وان تیرۆرستان کو ھاتینە تورکیا ژی ب نھینی ھاتینە ڤەشارتن دا کو کەس نەزانیت.
ل ئالیێ دی وەزیرێ دەرڤە یێ سووریێ وەلید موعەلیم ژی د پرێس کۆنفرانسەکێ دا راگەھاند کو بەلگێن دروست ل بەر دەستێ وان ھەنە کو تورکیا ھەم چەکی بۆ داعشێ دابین دکەت و ھەم ژی پارە ددەتە وان و رێ خوش دکەت کو وەلاتیێن تورکیا بچنە ناڤ داعشێ و ل سووریێ شەرێ مە بکەن و گۆت: (تورکیا داعش و جەبھەت ئەلنوسرە وەک کارتێن فشارێ ل دژی مە بکار دھینیت، لێ ھەتا نھا ژی نەشیایە بگەھیتە ئارمانجا خوە، لێ و سیاسەتا شاش یا تورکیا وەسا کر کو زیانێن گەلەک مەزن بگەھنە وەلاتێ مە، گەلەک دەڤەر وێران بوون و ب سەد ھزاران خەلکێ مە ژ بەر شەری و بۆ پاراستنا گیانێ خوە نەچار مان کو ژ سووریێ برەڤن).
ھەژی ئاماژەپێدانێ یە کو بەری نھا ژی چەندین رۆژنامە و دەزگەھێن راگەھاندنا ئورۆپا و ئەمریکا ب بەلگە دیار کربوون کو تورکیا ھاریکاریا داعش و جەبھەت ئەلنوسرە دکەت و سنۆرێ خوە بۆ چالاکیێن وان د ڤەکری ھێلایە. نھا ژی گەلەک چاڤدێرێن سیاسی یێن رۆژئاڤایێ دیار دکەن کو تورکیا ب چو رەنگەکێ شەرێ داعشێ نەکریە و ناکەت و ئارمانجا تورکیا ئەوە کو ب بەھانا شەرێ ل دژی داعشێ نەھێلیت ل سووریێ دەڤەرەکا کوردی بھێتە ئاڤاکرن.

ئەڤرۆ نيوز:
بەربژارەکێ حزبا کۆماری بۆ سەرۆکاتیا ئەمریکا راگەھاند، ھەکە د ھەلبژارتنێن سەرۆکاتیا ئەمریکا دا ب سەرکەفتم، دێ ھێرشێ کەمە سەر عیراقێ و سووریێ ژبۆ ژناڤبرنا رێکخستیا داعش یا تیرۆرستی.
دونالد ترامب بەربژارێ حزبا کۆماری بۆ سەرۆکاتیا ئەمریکا د گۆتارەکێ دا ل سەر گەمیەکا لەشکرێ ئەمریکی ل کالیفورنیا، ل دووڤ عیراق تایمز گوت” تەنھا ڕێ بۆ ژناڤبرنا داعشێ بڕینا ژێدەرێن دارایی یێن وێ رێکخستیا تیرۆرستی یە و ژێدەرێ دارایی یێ سەرەکیێ داعشێ پەترۆلە و ھەکە پێدڤی بوو دێ ھێرشی عیراقێ و سووریێ کەم ژبۆ ژناڤبرنا داعشێ”.
ترامبی گوت ژی” چەندین جھێن پەترۆلی و دەڤەرێن عیراقێ د دەستێ داعشێ دانە و پێدڤیە ل سەر مە داعشێ بێ بەھر بکەین ژ پەترۆلێ، لەوما پێدڤیە ئەم پەترۆلا عیراقێ کونترۆل بکەین ب ڕێیا ھێرشکرنێ ل سەر عیراقێ و ھەکە بۆمە سەرۆکێ ئەمریکا دێ ھێزێن ئەمریکی ھنێرمە عیراقێ و دێ دەستێ خوە دانینە سەر پەترۆلا وی وەلاتی و فرۆشین”.
د بەرسڤا ئاخڤتنێن بەربژارێ سەرۆکاتیا ئەمریکا، سەرۆک ئەرکانێن بەرێ یێ لەشکرێ ئەمریکی جەنەرال (ریموند ئودیرنو) داخویانیێن دونالد ترامبی ب نە دووربینی ھژمارتن و گوت” داعش ب ملیۆنان دۆلاران ژ پەترۆلێ ب دەستڤەنائینیت، بەلکو پشکا ھەرە مەزن یا داھاتیێن داعشێ ژ دانا باجان ژ دەڤەرێن بن دەستێ وێ ڤە دھێت”.