ئه‌زرۆ نیوز: ڤه‌ده‌ر ره‌شاڤایی:
وه‌زاره‌تا ئه‌وقاف و كارۆبارێن ئایینی یا هه‌رێما كوردستانێ دێ وان حه‌جیێن كورد یێن د روودانا مه‌كه‌هێ دا بریندار بووی قه‌ره‌بوو كه‌ت.
وه‌زیرێ ئه‌وقاف و كارۆبارێن ئایینی گۆت هه‌رچه‌نده وه‌لاتێ سعودییه ئه‌و بریندار قه‌ره‌بووكرنه لێ یا ژ ده‌ستێ وان ژی دهێـت دڤێ مژارێ دا ئه‌و دێ بۆ كه‌ن.
ئه‌ڤرۆ نیوز:كاروان باعه‌درى:
پشتى ب دوماهیك هاتنا فێستیڤالا دهۆك یا نێڤده‌وله‌تى باشترین خه‌لات هاتنه پێشكیشكرن و خه‌لاتێ باشترین به‌لگه‌فیلم (ڤلمێ دیكومیتنى) یێ كاره‌ساتا شنگال (73) ب سینه‌ماكار رێكێش شه‌هبازى هاته‌دان.
سینه‌ماكار رێكێش شه‌هبازى هزرا فى فلمى بۆ ئه‌ڤرۆ نیوز ئاشكه‌را كر : دده‌مێ هاتنا كاره‌ساتا ئه‌ز چۆمه پرا سێمالكا ل سه‌ر سنۆرێ من كه‌سه‌ك دیت ده‌ما ل خێزانا خۆ دگه‌ریا ئه‌ڤه ژى بوویه هزرا فلمێ من و من فلم ژێ به‌رهه‌م ئینا.
شه‌هبازى گۆت: من ئه‌ڤ خه‌لاته پێشكێشى قوربانێن كاره‌ساتا شنگالێ كر.”
بۆزانین ئه‌ڤێ فێستیڤالا ژ 9/9/ 2015 ده‌ستپیكربوو و ب 17/9/2015 ب دوماهیك هات و ژ 143 فلمان پێكدهات ژ وان ژی 44 یێن كوردى بوون و 99 یێن جیهانێ بوون.
هه‌ڤده‌م شه‌وكه‌ت ئه‌مين كوركی خه‌لاتێ باشترین ده‌رهێنه‌ر بۆ فلمێ بیرهاتنێن لسه‌ر به‌ری بده‌ستڤه‌ئینا.
ئه‌ڤرۆ نیوز،زنار تۆڤى:
نوونه‌رێ حوكمه‌تا هه‌رێما كوردستانێ ل ئێكه‌تیا ئورۆپا دلاوه‌ر خالد ئاژگه‌یى بۆ ئه‌ڤرۆ نیوز دیاركر: پشتى شانده‌كێ سیناتا به‌لجیكا سه‌ره‌دانا هه‌رێمێ كرى،ل ده‌مێ ڤه‌گه‌ریانێ وان داخوازا هاریكاریێن زێده‌تر یێن سه‌ربازى و مرۆڤى بۆ هه‌رێمێ كریه،
د راگه‌هاندنه‌كا رۆژنامه‌ڤانى دا شاندێ سیناتۆرێن به‌لجیكى كو سه‌ره‌دانا هه‌رێما كوردستانێ كربوو،به‌حسێ بارودۆخێ هه‌رێما كوردستانێ دكه‌ن و داخواز ژ حوكمه‌تا به‌لجیكى دكه‌ن كو هاریكاریێن كاراتر و باشتر یا هه‌رێمێ بكه‌ن ژلایێ سیاسى و سه‌ربازى و مرۆڤى،دخوازن ب ره‌نگه‌كێ راسته‌وخۆ چه‌كى بۆ كوردستانێ ره‌وانه بكه‌ن.
ئه‌ڤرۆ نیوز:
فوئاد حسێن سه‌رۆكێ دیوانا سه‌رۆكایه‌تیا هه‌رێمێ ئه‌ڤرۆ راگه‌هاند” د كومبوونا بهێت دا، پارتى ل دور پرسا سه‌رۆكاتیا هه‌رێمێ دێ به‌رسڤا پرۆژێ چار لایه‌نێن سیاسى ده‌ت.
ئه‌ڤرۆ لایه‌نێن سیاسى، گوران، ئێكه‌تى، پارتى، كومه‌ل، یه‌كگرتوو دیسان كومبوون و نه‌گه‌هشتنه چ ئه‌نجامه‌كێ و بریاره كومبوونا بهێت 6 هه‌یڤا بهێت بهێته سازكرن و ژڤانه پارتى به‌رسڤا پرۆژێ هه‌ر چار لایه‌نێن سیاسى بده‌ت.
ئه‌ڤرۆنیۆز، سالار دۆسكى:
ل دووڤ ئامارێن رێڤه‌به‌ریا په‌روه‌ردێ ل قه‌زا سێمێلێ، مامۆستایێن بێ مووله‌ت ئه‌ڤ ساله ده‌وامێ نه‌كه‌ن (151) مامۆستانه و پتر ژ (300) مامۆستا مووله‌تا ژ دایك بوونێ هه‌یه، ئه‌ڤه دبیته مه‌زنترین ئاریشه ل په‌روه‌ردا ناڤبرى .
عه‌بدوللا حه‌سه‌ن رێڤه‌به‌رێ په‌روه‌ردا قه‌زا سێمێلێ د دیداره‌كا رۆژنامه‌ڤانى بۆ مالپه‌رێ ئه‌ڤرۆ نیۆز گۆت” مامۆستایێن موله‌تا بێ مووچه وه‌رگرتین، نه هه‌موو چووینه ده‌رڤه، دبیت گه‌له‌كا نه‌خوه‌ش هه‌نه و گه‌له‌كا كاره‌كێ دى هه‌یه و مووله‌تا بێ مووچه وه‌رگرتیه، هه‌تا نوكه ل سنورێ په‌روه‌ردا سێمێلێ (151) مامۆستایێن موله‌دار هه‌نه كو بێ مووچه وه‌رگرتینه، بتنێ ل ئاماده‌یا خوانكێ(9) مامۆستا و (2) فه‌رمانبه‌ر مووله‌تا بێ مووچه وه‌رگرتینه ئانكو (11) ژ ئاماده‌یه‌كێ، ئه‌ڤ ڤالاهیه ب به‌رهه‌ڤ بێژان دێ هێنه پركرن.
ئه‌ڤرۆ نیوز: كاروان باعه‌درى:
ئه‌ڤرۆ ده‌مژمیر 5 ئیفارێ فرۆكه‌یین هه‌ڤپه‌یمانان دگه‌ل هێزێن پێشمه‌رگه‌هى چه‌ندین بنگه‌هێن داعشێ ل ناوچه‌یا به‌ندافا موسل و فلفیلێ تۆپاران كرن
رۆژنامه‌ڤان كاوه عیدۆ دنافا هێزێن پیشمه‌رگه‌هى دایه بۆ ئه‌ڤرۆ نیوز گۆت: هێزێن پیشمه‌رگه‌هى ل گه‌ل فرۆكه‌یێن هه‌ڤپه‌یمانا چه‌ندین بنگه‌هێن داعشێ تۆپارانكرن ل به‌ندافا مو.سل و فلفیلێ و و زیانێن مه‌زن ل وان دان چه‌ندین ترمبیلێن وان سوتن.
ئه‌ڤرۆ نیوز: ڤه‌ده‌ر ره‌شاڤایی:
به‌رپرسێن وه‌زاره‌تا به‌ره‌ڤانییا ئه‌مریكا بۆ ئێكه‌م جار پشت راستكر كو هێزێن تایبه‌ت یێن ئه‌مریكی لسه‌ر عه‌ردی ل رۆژئاڤایێ كوردستانێ هاریكارییا هێزێن كوردی دكه‌ت.
هه‌روه‌كی كه‌نالێ (NBC) یێ ئه‌مریكی به‌لاڤ كرییه: جه‌نه‌رال لوید ئوستن بۆ لژنا سه‌ربازییا جڤاتا پیران یا ئه‌مریكی ئاشكرا كر كو هێزێن تایبه‌ت یێن به‌ژاهی یێن ئه‌مریكی لسه‌ر عه‌ردی لگه‌ل هێزێن كوردی (یه‌په‌گێ) ل رۆژئاڤا كوردستانێ هه‌بوونا خوه هه‌یه، لێ دیاركر ژی ئه‌و هێز بتنێ بۆ شیره‌تكاریێ و هاریكاریكرنێ نه و پشكداریێ د شه‌ران دا ناكه‌ن.
ئه‌ڤرۆ نیوز: ڤه‌ده‌ر ره‌شاڤایی:
بریاره سوبه‌هی 17 ئیلۆنێ ده‌مژمێر 11 سپێدێ پێنج ئالیێن سیاسیێن هه‌رێما كوردستانێ لدۆر پرسا سه‌رۆكاتییا هه‌رێمێ كۆم ببن.
د. فه‌رسه‌ت سۆفی ئه‌ندامێ یاسایێ شاندێ دانوستاندنكارێ پارتی دیمۆكراتی كوردستان ئاشكرا كر كو سوبه‌هی پارتی ب ئومێد ڤه دێ چیته كۆمبوونێ بمه‌ره‌ما رێككه‌ڤتنێ ل گه‌ل هه‌ر چار ئالیێن دی، ناڤهاتی هیڤی خاست داوی كۆم بوون بیت و هه‌می بگه‌هنه رێككه‌ڤتنه‌كێ.
ئه‌ڤرۆ نیوز: ڤه‌ده‌ر ره‌شاڤایی:
ئێكه‌یتا ئه‌ورۆپا توركیا كره د لیستا وه‌لاتێن نه‌ئارام دا و ب رێزا وان وه‌لاتان دانا یێن ئێدی بكێر حه‌واندنا په‌نابه‌ران نه‌هێت ژبه‌ر شه‌ر و په‌ڤچوونێن توركیا ل گه‌ل شه‌رڤانێن په‌كه‌كێ.
پشتی كۆمبوونا وه‌زیرێن ناڤخۆیێن وه‌لاتێن ئێكه‌تیا ئه‌ورۆپا د كۆنگره‌كێ رۆژنامه‌ڤانی دا وزیرێ ده‌رڤه‌یێ لوكسمبۆرگ جان ئه‌سێلبووم راگه‌هاند: بجۆركرنا توركیا بفه‌رمی هاته گوهرین و ئێدی ب جهه‌كێ ئارام و خودانا ره‌وشه‌كا بسلامه‌ت ناهێـه نیاسین. ”
ئێكه‌تیا ئه‌ورۆپا لسه‌ر چه‌ند پیڤه‌ران كو ب پیڤه‌رێن كۆپنهاگن دهێنه نیاسین دیار دكه‌ت كا وه‌لاته‌ك یێ ته‌نا و ئارامه یا نه ، بۆ ڤێ یه‌كێ دڤێت هه‌ر وه‌لاته‌كی ئه‌ڤ خاله لێ بهێنه بجئینان: مافێن دیموكراسییێن بنه‌ره‌تی، قانوون، مافێن مرۆڤان و رێزگرتن و پاراستنا مافێن كه‌مینه‌یان.
ئه‌ڤرۆ نیۆز، قائید میرۆ:
ژ ئه‌گه‌رێ دژواریا بۆردومانا فڕۆكه‌ییێن هه‌ڤپه‌یمانان بۆ سه‌ر چه‌كدارێن داعش ئه‌ڤرۆ ل به‌نداڤا مووسل هه‌تا پرا خازر دوازده بنگه‌هێن داعش بووینه ئارمانجێن هه‌ڤپه‌یمانان.
غه‌یاس سورچی، په‌یڤدارێ مه‌لبه‌ندێ ئێكه‌تی نیشتیمانی كوردستان ل نه‌ینه‌وا ب ئه‌ڤرۆ نیۆز راگه‌هاند” پشت چه‌كدارێن داعش ل میحوه‌رێن پێشمه‌رگه‌ی ده‌ست ب لڤینان كری، ده‌مژمێر 9ی سپێده‌هیا ئه‌ڤرۆ هه‌تا ده‌مێ ئێڤاری فڕۆكه‌یێن هه‌ڤپه‌یمانان بنكه و باره‌گایێن چه‌كدارێن داعش ل به‌نداڤا مووسل هه‌تا دگه‌هیته میحوه‌رێ خازر ب هویری بۆردومانكرینه و دوازده بنگه‌هێن تیرۆرستان بووینه ئارمانجا هه‌ڤپه‌یمانان.
غه‌یاسی گۆت ژی” گوره‌ی زانیاریێن گه‌هشتینه مه هه‌ژده چه‌كدارێن داعش هاتینه كوشتن و هژماره‌كا زۆرژی برینداربووینه و هاتینه ڤه‌گوهاستن بۆ نه‌خۆشخانه‌یێن مووسل، هه‌روه‌سا 11 ترۆمبێل و ئامیرێن سه‌ربازی هاتینه ژناڤبرن، ئه‌ڤرۆ فڕۆكه‌یان حه‌شر ب چه‌كدارێن داعشكرینه.”
نيشاندان