ئەڤرۆ نیوز:

ل سالا ٢٠٠٥ ھەتا نوکە رێیا بەردەڕەش بۆ کەلەک و قەزا خەبات بوویە رێیا سەرەکی د ناڤبەرا دھۆک و ھەولێرێ دا ب سەدەما زۆربوونا ترومبێلێن بار ھەلگر، د ڤێ رێیێ دا نوکە ئەو رێیا ئێک ساید بەر ب نەمانێ دچیت و ئەفسەرەکێ ھاتن و چوونا بەردەڕەش داعش بۆ ھۆکاری ڤێ چەندێ دزانیت.
نەقیب مامەند سابر، ئەفسەرێ بنگەھێ ھاتن و چوونێ ل قەزا بەردەڕەش بۆ ئەڤرۆ راگەھاند، نوکە رێیا بەردەڕەش گەلەک فشارەکا زۆرا ترۆمبێلان ل سەر ھەی و حەفتیانە چەندین روودانێن ھاتن و چونێ لێ دھێتە روودان، ژ بلی وێ چەندێ ژی رێ بەر ب نەمانێ دچیت.
وی ئەفسەری زێدەتر بۆ ئەڤرۆ گۆت: بەری ھاتنا داعشێ پشکا ھاتن و چونێ پلان ھەبوون و مە رێ ل ترومبێلین بارھەلگر نە ددا ب وێ رێیێ دەرباز ببن، چونکو رێ ئێک ساید بوو و فشارەکا زۆر ل سەر ھەبوو، لەورا ھەموو ترومبێلێن بارھەلگر و تانکەر ھاتن و چوونا وان بۆ ھەولێرێ ب رێیا بەرتلە دابوو.
مامەند دیار ژی کر، پشتی داگیرکرنا ناوچا باشیک و بەرتلە، ھەموو ئەو ترومبێلێن بارھەلگر بەرێ خوە دانە رێیا بەردەڕەش کەلەکێ و مە ب ناچاری رێ بۆ وان ڤەکر و ئەڤە سەرێ سالەکێ یە ئەو رێ تووشی قەلەبالغەکا زۆر بوویە و نوکە شۆفێر ھەموو گازندان ل رێ دکەن.
وەلاتی کامل فەرخۆ عوسمان، وەکی شوفێرەک رۆژانە ھاتن و چوونێ ب وێ رێیێ دکەت بۆ ئەڤرۆ دیار کر، ئەو ھەست دکەت ژیانا وی د مەترسێی دایە، چونکو قەرەبالغیەکا زۆر ل سەر رێیی دا ھەیە و حەفتیانە چەندین روودانێن ھاتووچۆیی ل سەر دھێتە روودان.
کاملی دیار کر، ئەو رۆژانە ل گوندێ قاتێ سێ یە کو ٨ کم ل بەردەڕەشێ دوورە ب وێ رێیێ ھاتووچۆیی دکەت، چونکو ئەو فەرمانبەرە ل بەردەڕەشێ دیار کر کو ب تنێ ل ماوەیا حەفتیا چوویی ئەوی ل سەر رێیا خوە دا دو روودانێن ھاتووچۆویێ دیتینە، ژ بلی وی چەندێ ژی فەرمانبەرەکێ گوندێ وان ل وێ رێیێ تووشی روودانێ بوویە.
نەقیب مامەند سابر، سەبارەت ب ڤەکرنا رێیا رۆڤیا ئێکسەر بۆ ھەولێر بۆ ئەڤرۆ دیار کر، ئەگەر ئەو رێ ڤە ببیت، ھاتن و چوون ل سەر رێیا بەردەڕەش بۆ کەلەکێ کێم دبیت و ئەڤ کێشەیە چارە دبیت و رێیا خەلکێ دھۆکێ بۆ ھەولێرێ ژی نێزیکتر لێ دھێت، لێ ھەتا نووکە ئەو رێ تمام نەبوویە، نووکە ب تنێ پرا چەمە ل سەر رووبارا زێیا مەزنێ بادینان ھاتیە چێکرن و ھێشتا رێ تمام نەبوویە.
رەمەزان سلێمان شوفێرەکێ دی یە ل سەر وی رێیێ بۆ ئەڤرۆ دیار کر، ئەو رێ نووکە بەر ب نەمانێ دچیت و ھیڤی دکەم حوکمەت ب زووترین دەم چارەیەکێ لێ بکەت، ھۆکار ژی ھەموو ترومبێلێن بار ھەلگرن، ژ بلێ تێکچوونا رێیێ روودانێن ھاتن و چوونێ ژی تێدا زێدە بوویە.
ل گۆر زانیارین رۆژنامەیا ئەڤرۆ ل ھەیا ٢ سالێن بۆری دا ٨٣٦ روودانێن ھاتن و چوونێ ھاتیە تۆمار کرن ل بنگەھێ ھاتن و چوونا بەردەڕەشێ و تێدا ٥٢٣ کەس بریندار بووینە و ٧٤ کەسێن دی ژی ژ ژن و زەلامان مرینە.

ئه‌ڤرۆ نيوز:

سەرۆکێ سەندیکا زێرنگریان ل دھۆکێ شیخ عبدالسلام بۆ ئەڤرۆ دیارکر پشتی وەلاتێ چینێ گەلەک زێر رەوانەی بازارێن جیھانێ کر ل سەرانسەری جیھانێ و بھایێ زیری ئینا خوار و نوکە زێر زۆر ئەرزان بوویە بەرامبەر چەند ھەیڤێن بۆری و پتر خەلک یێ زێرێ خوە دفروشیت.
شیخ عبدالسلام سەرۆکێ سەندیکا زێرنگریا ل دھۆکێ دیارکر نوکە گراما زێرێ عەیار ٢١ ل بازاری دھۆکێ ب ٣٩ ھزار و٥٠٠ دیناران دھێتە فروتن و زێری عەیار ٢٢ ژێ گراما وێ ب ٤١ ھزار و ٥٠٠ دیناران دھێتە فروتن،بەری نوکە بھایێ زێری گەھشتبوو دۆرین ٤٦ ھزار دیناران لێ نەشێن پیشبینیێ بکەین کا دێ بھایێ زێری ئەرزانتر بیت یان ژی گران،چونکو بھایێ زێری گرێدایی بورێا جیھانێ یە و ھەکەر ل جیھانێ گەلەک داخوازی ل سەر زێرێ ھەبیت دێ گران بیت، ھەکە داخوازی ل سەر یا کیم بیت روو ئەرزانیێ دکەت.
شیخ عبدالسلام زێدەتر گۆت: بتنی ژ ١/٨ ھەتا دووماھیا ھەیڤا ھەشت ژ ئەڤ سالە دۆرێن ١٥٠ کیلویێن زێری یێ ھاتیە دناڤ بازارێ پارێزگەھا دھۆکێ دا، لێ چەند ھاتیە فروتن ئەم نەشێن دیاربکەین، چونکو ھەر زێرنگرەک ھندەکێ دفروشیت لێ شیوەیەکێ گشتی نوکە خەلک یێ پتر زێرێ خوە دفروشیت و کرینا زێری گەلەک یا کێمە و ١٥٠ کیلیویێن زێرێ یی ھەیڤا بۆری دا ھاتیە ناڤ بازاری و ھەموو ژ دوبەی ھاتیە.