ئه‌ڤرۆ نيوز:

د جڤاکێ مەدا ھێشتا گەلەک خێزان وەک پێدڤی رێکێ نادەنە کچێ یا ئازاد بیت و بچیتە دەرڤە بخوینیت و باوەرنامێن بەرز بدەستخەڤە بینیت، د ڤی بواری ژی دا کوڕ دئازاد ترن، ماموستایەکێ زانکویێ ژی دبێژیت: نابیت گڤاشتن ل سەر کچێ بھێتەکرن، چونکو دێ ھەست ب زولم و زورداریێ کەت.
سارە کچەکە کو دایک و بابێن وێ رێک نەدایێ داکو بگەھیتە ئارمانجا خوە و گۆت: دەمێ من پۆلا دوزادێ تەمام کری و موعەدەلەکێ بلند ئینای، ب مخابنی ڤە دایک و بابێن من رێک نەدا من ل بەشێن ناڤخویی بینم و بچمە ئەوێ زانکویێ بخوینم ئەوا ناڤێ وێ بۆ من ھاتی و ب دلێ من، لەورا ئەز نەچار کرم بڤێ نمرا بلند ڤە بچمە پەیمانەگەھێ، ژبەرکو پەیمانەگەە ل نێزیک گوندێ مەیە.
زێدەترت ئەڤ کچە دبێژیت: ھەروەسا گۆتە من ھەکە بدلێ تە نەبیت، پیدڤیە تو ل مال بی و ئێدی نەخوینی و شوو بکەی، لەوا ئەز نەچاربوم بچمە پەیمانگەھێ بخوینم و ل پەیمانگەھێ ژی ئەز بومە دەرچویا ئێکێ و ھەرمالا مە نەھێلا ئەز بچمە زانکویی و ئەو چەندە ژی نەڤەشارت کو، ھەڤالا وێ ژی دڤیا بچیتە ژ دەرڤە بخوینت باوەرناما ماستەرێ بینیت، بەلێ پا بابێ وێ رَیک نەدایێ.
ماموستایێ زانکویا کومەلناسی د. محەمەد سەعید بەرواری دیار کر، ئەڤە گڤاشتنەکا دەروونی یە ل سەر کچێ و چەند گڤاشتن ل سەر وێ بیھێتەکرن، دێ بەرھەمەکێ خراپ ب دەست خوەڤە ئینیت و دێ تووشی کیشەیا بیت و گۆت: ئەڤرۆ ھەموو تشت یێن کەفتینە بەر دەستی کچێ، لەوا پێدڤیە خێزان ئازادیێ بدەتێ.
ل داویێ بەرواری دبینیت، دەمێ تشت ل کچێ دھێنە قەدەغەکرن ئەو خوینا مێشکێ وێ و دلێ وێ دھیتە زیندانکرن، لەوا باشترە ئازادیێ بدەنە کچێن خوە و بێ بەھر نەکەن ژ دەرکەفتنێ و گۆت: ژبەرکو دەمێ کچا گوندا دبینیت کو کچا باژێرا ھەموو تشتان بدەستخوەڤە دئینیت و ئەو نە، وی دەمی دێ ھەست ب زولم و زوورداریێ کەت، لەوا گرنگە دایک و باب د ھشیار بن.

ئه‌ڤرۆ نيوز:

گۆتنا نھێنیان گەلەک یا ب زەحمەتە مرۆڤ بۆ ئێکدو بێژیت، بەلێ ئەڤ چەندە د ناڤبەرا ژن و مێران دا زۆر یا ئاسانە، ڤەکۆلەرەکێ جڤاکی ژی دەربارەی ئەڤی بابەتی دبێژیت: ئەو ھەڤژینێن ھەڤالینی دناڤبەرا وان دا، دێ باوەری ھەبیت، و دێ پتر شێن نھێنیان بۆ ھەڤدو بێژن و گۆت: ئەو ژن و مێرێن نھێنیان بۆ ئێکدو دبێژن، دێ ڤیان لنک وان پەیدابیت، و دێ خێزانەکا سەرکەفتی و ئارام بیت.
عەلی حسین سادق، ل دۆر بابەتێ پاراستنا نھێنیان دبێژیت: ھەکە مرۆڤ ھەموو نھێنیێت خوە بۆ ھەڤژینا خوە بێژیت، دڤێت بەری ھەڤژینیێ پێکبینیت، ئەڤینیەک دناڤبەرا وان دا ھەبیت، دیسا دەمێ مرۆڤ ژ دل بۆ کەسەکی دئاخڤیت رامانا وێ ئەوە کو مرۆڤ حەزژ وی کەسی دکەت.
خانم زاھیدا مزووری ژ نڤیسینگەھا قەرزێن بچووک ل دۆر ھەمان بابەت گۆت: گەلەک یا پێدڤیە زەلام خوە بۆ ھەڤژینا خوە وەکو ھەڤالەکێ نێزیک بدانیت، چونکو بۆ ھەردو لایەنان باشترە، ھەروەسا دبیت پەیوەندیا وان یا خێزانی ژی بھێزتر لێ بھێت، و باوەریا وان پتر ب ئێکدو بھێت ھەتا بگەھیتە رادەیێ نھێنیان بۆ ئێکدو بێژن.
گەنجەک بناڤێ ھەوار زوبێر سلێمان، گۆت: ژن کەنگی نھێنیان ل زەلامێ ڤەدشێریت، دەمێ ژنێ باوەری ب وی نەبیت، لەورا ژن نەچار دبیت نھێنیێت خوە بۆ کەسەکا دی بێژیت، و ل ڤێرە یا پێدڤیە پەیوەندیێن د ناڤبەرا ژن و زەلامی دا ل سەر بنیاتی َھەڤالینیێ بیت، داکو پتر بشێن نھێنیان بۆ ھەڤدو بێژن، و ئەڤ نھێنیە بەھراپتر گرێداینە ب ژیانا ژنێ و زەلامی ڤە، ئەڤجا نێزیکترین ھەڤال بۆ ژنێ ھەڤژینێ وێ یە، و ھەروەسا نێزیک ترین ھەڤال بۆ زەلامی ژی ھەڤژینا وی یە دا کو ژیانا وان یا خوەش بیت.
ڤەکۆلەرێ جڤاکی حاجی بێسکی ل دۆر ھەمان بابەت گۆت: مرۆڤ وەکو ھەڤژینان نەشێت ھەموو تشتان بۆ ئێکدو بێژیت، لێ ئەو ھەڤژینێن وەکو ھەڤالان ل گەل ئێک، دێ بیتە پێنگاڤەک کو باوەری پەیدابیت، باشی دێ قوناغەکا ھێشتا مەزنتر ھێت ئەوژی، گۆتنا نھێنیان بۆ ھەڤدو، و ل ڤێرە ئەو ھەڤژینێن ب ڤی رەنگی سەرەدەریێ ل گەل ئێکدو دکەن، گەلەک د بەختەوەر و سەرکەفتی نە، ھەروەسا ئەڤ چەندە دێ بیتە فاکتەرێ بھێزکرنا پەیوەندیێن خێزانی دناڤبەرا ژن و مێران دا، و دێ ڤیان دناڤبەرا وان دا دروست بیت، و ئاریشێن وان دێ کێمتر لێ ھێن و گۆت: ھەکە ژنێ دڤێت خوە بکەتە ھەڤالا ھەڤژینێ خوە، دڤێت باوەریا خوە ب وی بینیت، و چ تشتان ل ئێک و دو نەڤەشێرن، دیسا پێدڤیە گرنگیەکا مەزن ب ھەڤژینێ خوە ژی بدەت.
ل دووماھیێ ڤەکۆلەرێ جڤاکی دبێژیت: ھەکە بەردەوام ژنێ نھێنیێت مالا خوە بۆ مالا دایکا خوە گۆتن، و باوەری نەما یان کێم بوو د ناڤبەرا ژن و زەلامی دا، دبیت زەلام بێژیتە ھەڤژینا خوە ئەز دێ بۆ خوە بەرێخوە دەمە ھەڤژینەکا دی، لێ دا ئەڤ چەندە چێنەبیت، پێدڤیە دایکا ژنێ ھەموو دەمان شیرەتان ل کچا خوە بکەت و نەھێلیت ئاریشێن خوە بۆ دایک و بابێن خوە و ھەموو کەسان بێژیت.