ئەڤرۆ:
ئەف شەڤە دێ چاڤ ل تورینو بن بو دیتنا یاریا ئێکێ یا قوناغا پێش دووماھیا قارەمانیا یانێن ئوروپا قارەمانێن خولان دەمێ یانا یوڤانتوس یا ئیتالی مێڤانداریا یانا ریال مەدرید یا ئسپانی ھەلگرا ناسناڤی دکەت.
یانا یوڤانتوس دێ ب مورالەکا بلند چیتە د ناڤا ڤێ یاریا ئێکێ یا قوناغا پێش دووماھیێ دا پشتی ل روژا شەمبیا بوری ب ناسناڤێ خولا ئیتالیا بو جارا چارێ ل دووڤ ئێک و یانا ئیتالی یا ب ئومێدە سیناریویا سالا ٢٠٠٣ دوبارە بکەت دەمێ گەھشتیە ھەمان قوناغ و دووڤدا ل سەر کیستێ ریال مەدرید گەھشتیە یاریا دووماھیێ بەری د گەل میلان خوسارەت بیت ب لێدانێن پەنەلتیان کو ل وی دەمی کارلو ئەنشلوتی راھێنەرێ یوڤانتوس بوو راھێنەرێ نوکە یێ ریال مەدرید، ھەر چەندە چاڤدێر وەسا دبینن کو یانا ریال مەدرید زێدەتر چەنس و دەلیڤە یا ھەی ژ ڤێ یاریێ دەربازبیت بەری یاریا دویێ ل یاریگەھا خوە سانتیاگو بێرنابیو بکەت و بو جارا چاردێ د دیروکا خوە دا ب گەھیتە یاریا دووماھیێ و دیسان ببیتە ئێکەم یانە پاراستنێ ل سەر ناسناڤی بکەت د سیستەمێ نوو یێ قارەمانیێ دا.
بو ڤێ یاریێ یاریکەرێ یوڤانتوس یێ ئسپانی ئالفارو موتا ئەوێ ل ھاڤینا سالا بوری رێزێن ریال ب جە ھێلاین خویاکریە ئەو ل قوناغا پێن دووماھیێ نە و بەری نوکە وان خویاکریە د ناڤا باشترینێن ئوروپا دانە.
ل بەرامبەر راھێنەرێ ریال مەدرید کارلو ئەنشلوتی خویاکریە دێ یاریەکا ب ھێز بیت و نابیت بیاڤ د یاریگەھێ دا بھێنە دروستکرن و چارەنڤێس د ماوێ ١٨٠ دەقیقان دا دێ دیاربیت و پشتگەرمیا خوە ژی دیارکریە کو دەلیڤا دەربازبونێ یا ھەی بو یاریا دووماھیێ.
زێدەتر ئەرکێ یانا یوڤانتوس یێ ب ساناھی نابیت ل ھەمبەر یانا ھژمارەکا ستێرێن جیھانی ھەین مینا کریستیانو رونالدو یێ پرتوگالی و گارس بێل یێ وێلزی و خامیس رودرێگز یێ کولومبی و یاریکەرێ ل ڤێ دووماھیێ پێشکەفتی یێ مەکسیکی خافیێر ھێرناندز ئەوێن دوپاتکرین کو ب سفکاتی یاریێ ل ھەمبەر یانا ئیتالی ناکەن و پێنگاڤ پێنگاڤ دێ بەر ب بەرلین جھێ یاریا دووماھیێ چن.
یانا یوڤانتوس ئەوا دێ ل ڤێ یاریێ دا ھەڤرکیا راھێنەرێ خوە یێ بەرێ کەت دێ شیانا مەزێخیت بەردەوامیێ ب دەتە کاروانێ خوە یێ سەرکەفتی د قارەمانیا ئوروپی دا و تایبەت ل ناڤا جەماوەرێ خو کو ھەتا نوکە د ١٢ یاریێن دووماھیێ دا خوسارەت نەبویە و دیسان ژ پێنج یاریێن ل ڤی وەرزی د ناڤا یاریگەھا خوە دا کرین چار سەرکەفتن تومارکرینە و ل ھەمبەر یانا ریال مەدرید د یازدە یاریێن دووماھیێ دا ھەشت سەرکەفتن تومارکرینە ژ دەرڤەی یاریگەھا خوە سانتیاگو بێرنابیو ل بەرامبەر دو وەکھەڤیان و خوسارەتیەکێ.
د ڤان جورە یاریان دا یا بێ گومانە پشتبەستن ل سەر یاریکەریچن خودان شیان و ناڤ دھێتە کرن کو ل ناڤا ریال مەدرید دێ پشتبەستن ل سەر رونالدو و گارس بێل و یێ فرەنسی کەریم بنزیمای ھێتە کرن ئەوێ ڤەگەریایە راھێنانا زێدەباری رودرێگز و یێ ئەلمانی تونی کروس ئەوێ رولێ قارەمانا ل قوناغا چارێک دووماھیێ گێرای و گولا دەربازبونێ ل سەر ئەتلەتیکو تومارکری و ل ھەمبەر ل ناڤا پێکھاتیێ یوڤانتوس دێ کاپتنێ وێ و گولچی جانلویجی بوفون یێ ٣٧ سالی خودانێ ٨٥ یاریێن قارەمانیا ئوروپا و ئەندریا پێرلو و کارلوس تێڤێز یێ ئەرژەنتینی و ئارتو فیدال یێ چیلی ھێنە دیتن ل گەل ھیڤیا پشکداربونا یێ فرەنسی بول بوگبا.

ئەڤرۆ:
چاڤدێرێن وەرزشی ل کوردستانێ دبینن ئاستێ یاریکەرێن نافخوی چو ژ ئاستێ یاریکەرێن پیشەکار کێمتر نینە، ھەکە باشتر ژی نەبیت و چو زێدەھی ل پێشکەڤتنا خولێ نەکریە بتنێ ناف وەکو پیشەکارن.
دەستپێکێ شروڤەکەرێ وەرزشی جەمیل خەلیل بۆ رۆژناما ئەڤرۆ گوت: نابینم ئاستێ پیشەکارا زێدەھیەک ل یانێن مە کربیت و ئاستێ وان ھەتا رادەکێ مەزن یێ نورمالە و گەلەک یاریکەرێن کورد ھەنە ژ ئاستێ پیشەکارێن خولێ باشترە و یاریکەرێ یانا دھۆک محەمەد حەمەد ب باشترین پیشەکار دبینم ژبەرکو یاریکەرەکە کارتێکرنا خوە ل سەر تیمێ ھەیە.
بەرامبەر رۆژنامەڤانێ وەرزشی ل باژێرێ ھەولێرێ زاگروس نانە کەلی گوت: ب گشتی ئاستێ پیشەکارا یێ ناڤەندی یە و ژ ئاستێ یاریکەرێن مە یێن نافخوی باشترە ژبەرکو گەلەک یانا مفا ژ چەند یاریکەران دیتیە و ھەکە بەرەورد بکەین ل گەل یاریکەرێن نافخوی ب رێژەیەکا مەزنتر ژ یاریکەرێن مە باشترە.
رۆژنامەڤانێ وەرزشی ھیوا مەلا قادر ژلایێ خوڤە دیارکر چەند پیشەکار ھەنە دخولا کوردستانێ بتنێ بناڤ پیشەکارن و ئەو مەزاختی و ھەڤبەستێن دەنە وان پیشەکارا ب دەنە یاریکەرەکێ کورد یێ نافخوی گەلەک باشترە و سال بۆ سالێ ئەڤ خەلەتیە یێن دوبارەدبن ل یانێن کوردستانێ.
ھیوا ئاماژە ب وێ چەندێ ژی کر ب رێژەیەکا گەلەک کێم پیشەکار ھەنە تیما وان مفا ژێ وەرگرتبیت وەکو ھەردو پیشەکارێن زێرەڤانی و دیسان یێ ئارارات.
ل دووماھی وەحید رەشید شروڤەکارێ وەرزشی ژلایێ خوڤە گوت: ب گشتی نابینم پیشەکاران پێشکەفتنەک دخولا کوردستانێ دا کربیت و پیشەکارێن یانێن پارێزگەھێ ھەتارادەکی نە ل وی ئاستی نە تیم پشتبەستنێ ل سەر شیانێن وان بکەت و ژ نەچاری ھەڤبەست ل گەل وان پیشەکاران دھێتە ئیمزاکرن، چونکو گەلەک جاران یاریکەرێ نافخوی ب دەست ناکەفیت بۆ پرکرنا پێکھاتیێ خوە و ھەڤبەست ل گەل پیشەکاران ئیمزاکەن.
وەحید ئاماژە ب ھەردو پیشەکارێن یانا نەوروز کرن کو ھەتارادەکێ مەزن ڤێ یانێ مفا ژ پیشەکارێن خوە یێ دیتی یە ب تایبەت یێ سوری وەلات عومەر.