ئه‌ڤرۆ نیوز:
ڕۆژناما گاردیان یا بەریتانی ڕاپرسییەک بۆ دەستنیشانکرنا باشترین یاریزانێن ساڵی ٢٠١٤ ئەنجامدا وکریستیانۆ ڕۆناڵدۆ یێ پورتوگالی ب باشترین یاریزانێ سالا ٢٠١٤ دەستنیشانکر.
و رێزبه‌ند هه‌تا ده‌هێ ب ڤى ره‌نگى بوو:
١. ڕۆناڵدۆ
٢. میسی
٣. نۆیەر
٤. ڕۆبن
٥. مۆلەر
٦. سوارێز
٧. نێیمار
٨. بەیل
٩. گۆتزە
١٠. ئەگوێرۆ
جهێ ئاماژێ یه كو پار سال، مێسى ببوو باشترین یاریزان ل گۆر راپرسیا ڤێ رۆژنامێ.
ئه‌ڤرۆ نیوز، ره‌وان نهێلى
به‌ها ئه‌عره‌جى، جێگرێ سه‌رۆك وه‌زیرێن عیراقێ راگه‌هاند كو لژنا راستڤه‌كرنا چه‌ند برگێن بودجه‌ى، دووماهى ب كارێن خوه ئینا و بڕیار دا دو دولاران ژ هه‌ر به‌رمیله‌كێ بۆ پارێزگه‌هێن نه‌فتێ دئینن، بهێته ته‌رخانكرن.
ئه‌عره‌جى ئاماژه ب وێ یه‌كێ دا: لژنێ بڕیار دا دو دولاران بۆ هه‌ر به‌رمیله‌كێ ژ پروژێ پترولار بۆ پارێزگه‌هێن نه‌فتێ به‌رهه‌م دئینن بهێته ته‌رخانكرن، به‌رى هه‌موویان ژى بۆ به‌سره.
هه‌ڤده‌م نه‌جیبا نه‌جیب ئه‌نداما په‌رله‌مانێ عیراقێ بۆ ئه‌ڤرۆ نیوز راگه‌هاند كو ئه‌و دو دولاره دێ هه‌موو پارێزگه‌هێن نه‌فتێ به‌رهه‌م دئینن ڤه‌گریت، یێن كوردستانێ ژى و پارێ وێ دێ بۆ پرۆژێن وه‌به‌رهێنانێ ل پارێزگه‌هان هێته ته‌رخانكرن.
نه‌جیبا گۆت: به‌رى نوكه حكومه‌تا عیراقێ ئه‌و پاره بۆ هه‌رێمێ نه‌دهنارت، به‌لێ پشتى رێككه‌فتنا د ناڤبه‌را به‌غدا و هه‌رێمێ، ئه‌و پشكا هه‌رێمێ دێ هێته هنارتن.
ئه‌ڤرۆ نیوز:
مه‌سعود بارزانى، سه‌رۆكێ هه‌رێما كوردستانێ ب هه‌لكه‌فتا سه‌رێ سالا نوو یا زانینى و ژ دایكبوونا مه‌سیح په‌یامه‌كا پیروزباهیێ ئاراسته‌ى مه‌سیحیێن كوردستانێ كریه و گوتیه: من دڤێت بێژمه خوشك و برایێن خوه یێن مه‌سیحى كو هوون پێكهاته‌كا خوشتڤى و ره‌سه‌نێن ڤى وه‌لاتى نه و ژ ئێش و ئازارێن هه‌وه دگه‌هم و هه‌وه پشتراستدكه‌م كو تیرورێ چ ئاینده نینه و دێ هه‌موو ده‌ڤه‌رێن مه‌سیحیان ژ ده‌ستێ داعش ئینینه ده‌ر.
رۆژا ئالایا كوردستانێ، جه‌ژنا كوردێن ئێزدی، ده‌ستپێكا ئۆپه‌راسیۆنا رێزگاركرنا شه‌نگال و نووچه‌یا كۆنترۆلكرنا وی باژاری ژ لایێ پێشمه‌رگه‌یێن كوردستانێ ب ئاماده‌بوون و سه‌رپه‌رشتیا یه‌كسه‌ری یا سه‌رۆكێ هه‌رێما كوردستانێ مه‌سعوود بارزانی (20-12-2014)، بوون ناڤونیشانا رۆژێن كوردستانێ یێن بووری.
هه‌لبه‌ت رێزگاركرنا شه‌نگال و قه‌هره‌مانیا هێزێن پێشمه‌رگه و جه‌نگاوه‌رێن چیایێ شه‌نگالێ و شه‌رڤانێن كورد ژ هه‌ر ئالی و ب هه‌ر هاوی نیشانا هه‌ست و ئێكه‌تیا گه‌لێ كورده و ئه‌ڤ تشته‌كی پیرۆزه، دلێ مرۆڤ دكه ب شه‌هنازی. ب ڤێ مزگینیێ وێ مۆرالا هێزێن پارێزڤانێن مه هوون به‌رز ببه و هه‌ر وه‌سا مۆرالا گه‌لێ مه ل هه‌ر چار په‌رچێن كوردستان.
ب تایبه‌ت ل باژارێ كۆبانێ كو ئیرۆ چاڤێن ب مه‌لیۆنان كورد ل وێ ده‌رێ نه و ب ئۆمیدا رێزگاركرنا وێنه ژی.
ب راستی رێكا كو پێشمه‌رگه ددن سه‌ر ئه‌و رێكه دبه رێكه‌ك پیرۆز و سه‌ركه‌فتنا پێشمه‌رگه ل گه‌ل سه‌رۆك بارزانی ل پیرۆزبوونا شه‌نگال پیرۆزه‌كه دن زێده‌كر.
ئه‌ز دخوازم بێژم كو كار و خه‌باتا مه‌زن هوون ل پێشیا مه كوردان مایه و رێزگاركرنا خاكا پیرۆز ژ پیسیا داعش پێنگاڤا یه‌كه‌مینه، لێ كارێ گرینگ ژی ئه‌وه كو پاراستنا ڤێ ده‌ڤه‌رێ و ئاڤاكرنا وێ یه، د زۆترین ده‌م دا كو ئه‌م مله‌تێ خوه ژ كامپان رێزگاركن و به‌ر ب مال و سامانێن خوه ده ڤه‌گه‌رن.
هه‌روسا سزاكرنا هه‌ر كه‌سه‌كی ان ده‌زگه‌هه‌كێ كو ل گه‌ل داعش ئالیكاری كربه، ب ره‌نگه‌كی ئاشكه‌را و د بن سیا دادگه‌هێن كوردستانێ ده وه‌ره كرن.
رێگرتن ل پێشیا چ ته‌ڤلهه‌ڤیه‌كێ ئانژی چ پلانێن كو هه‌بن و بخوازن كاریسه‌تا شه‌نگالێ وه‌ك بهانه بكاربینن.
توماركرنا جه‌نگاوه‌رن چیایێ شه‌نگالێ وه‌ك پێشمه‌رگه د ناڤ ره‌فێن هێزا پێشمه‌رگه‌یێن كوردستانێ ب ره‌نگه‌كی فه‌رمی.
دارشتنا ستراتیجیه‌كێ د ناڤبه‌را هێزێن كوردی ل هه‌ردو پشكێن كوردستانێ رۆژاڤا و باشۆر ده، ده‌ربارێ تێكبرنا تێرۆرێ و پاراستنا ئارامیێ ل هه‌ردو ئالیێن سینۆری.
هه‌ر كه‌سه‌كی ژ پێڤی ئالا كوردستانێ د ناڤ هێزێن پێشمه‌رگه دا هلدا بێ ئاگاهكرن یانژی سزاكرن چونكی پێشمه‌رگه هێزا كوردستانێ یه و نه هێزا تو پارتیێن سیاسی یه(1).
ب هه‌ر حالی د باوه‌ریا من ده جه‌نگا كوردان ل دژی هۆڤێن داعش و قوربانیێن كو وان دانین دبه‌ر كوردستان و مرۆڤاتیێ ده، وێ ببن یه‌ك ژ سه‌ده‌مێن گوهه‌رتنا هش و رامانێن كوردان و پێویستیا وان ب هێزه‌ك نشتیمانی دووری پرسگرێكێن سیاسی، هه‌روه‌سا ئه‌و قوربانیێن كو كوردان پێشكێشی وه‌لاتێ خوه و جیهانێ ب ته‌ڤایی كرن، به‌رامبه‌ری وێ كێمتر ژ مافێ ده‌وله‌تا سه‌ربخوه ئێدی گه‌ره‌ك نه‌یێ قه‌بوولكرن.
هه‌ولێر 20-12-2014ز رۆژا رێزگاركرنا شه‌نگال
1ـ تێ زانین كو بریار د ڤێ ده‌ربارێ ده هاتبوو ستاندن، لێ رۆژا رێزگاركرنێ و ل پێشیا كامیرا رووداو هن پێشمه‌رگه ئالا پارتی هلدابوون!
ده‌ما هێرشێن داگیركه‌ران ب سه‌رخاك و نیشتیمانێ ملله‌ته‌كی داگرت شه‌ر و جه‌نگ ل سه‌ر هاتن سه‌پاندن چاره‌نڤێسێ وان كه‌ته به‌رمه‌ترسیێ، پێویسته هه‌موو خه‌لكێ وی ملله‌تی ب هه‌ڤره بكه‌ڤن قاد ورمه‌یدانان د ئێك سه‌نگه‌ر دا به‌رگریێ ژ خاك و نیشتیمانێ خوه بكه‌ن، به‌رگری و خۆراگری نه تنێ ب هێزا چه‌كی و هژمارا له‌شكریه، به‌لكو ب هێز و هیمه‌تا هه‌موو چین و ته‌خێن جڤاكێ یه، پێدڤیه هه‌ر كه‌سه‌ك خوه ب خودانێ راسته‌قینه یێ وی ملله‌تی بزانیت. ئیرۆ كوردستان ب گشتی و باشوورێ كوردستانێ ب تایبه‌تی كه‌تیه به‌ر هێرشێن درنده‌ترین دوژمنێن مرۆڤاتیێ، هه‌كه گه‌لێ كورد ب هێزا هه‌ستا نه‌ته‌وه‌یی و ب دلسۆزی و هه‌ستیاری به‌رگریێ ل خاكا كوردستانێ نه‌كه‌ن دێ كه‌ڤینه به‌ر پێلێن ره‌شه‌بایێ جاران گه‌لێ كورد دێ به‌رب كنارێن مرنێ ره‌ڤینن. له‌وما ئه‌ركه‌ك نه‌ته‌وه‌یی و نیشتیمانی و مرۆڤاتیه كو ئه‌م هه‌موو ب هێز و شیانێن خوه ب بینه پارێزڤان و نووبه‌دارێن دلسۆز و وه‌فادار ل به‌ر داموده‌زگه‌هێن حكومی و حیزبی و مه‌ده‌نی، ب بینه په‌ژان و چه‌مبه‌ر ل هه‌مبه‌ر هه‌ر هێرش و بوویه‌ره‌ك نه چاڤه‌رێ. لێ مخابن هه‌ستا نه‌ته‌وه‌یی و گرێدان ب خاك و نیشتیمانڤه ل نك كوردان هێش زۆر یاكز و لاوازه. بۆ نموونه” ئیرۆ ژ به‌ر هێرشێن هێزێن تاریێ ل سه‌ر گه‌لێ مه پڕانیا هێزا ئاسایشا ناڤخوه‌یی، پۆلیس، هێزا زێره‌ڤانیێ و.. . ) قه‌ستا به‌رۆكێن شه‌ڕی كریه كو گیانێ مه بپارێزن، ل شوونا كو خه‌لكێ مه جهێ وان پڕ بكه‌ت و ئه‌ركێ وان بێخن سه‌ر ملێن خوه و به‌رگریێ ل خاك و نیشتیمانێ خوه بكه‌ن، سوحبه‌تا وان ل هه‌موو جه و جڤاتان ل سه‌ر نێچیرێ و گرتن و كوشتنا كه‌وان و په‌زێ كیڤێ بوویه. وان وه‌سا هزردكرن كو ده‌رفه‌ته‌ك باش بۆ وان چێبوویه كو ل جهی زره‌ڤانیێ ل كوردستانێ بكه‌ن، ژینگه و خوه‌زایێ خوه بپارێزن ئه‌ركێ نه‌ته‌وه‌یی و نیشتیمانی ل سه‌ر خوه راكه‌ن ب سه‌ربلندی به‌حسێ نێچیرا په‌زێ كیڤی و كه‌وادكرن كا هه‌ر ئێكی چه‌ند كه‌و و په‌زێن كیڤی كوشتنه!! وه‌سا ته‌خمین دكرن كو یێ بخوه حیلا ل حكوومه‌تێ دكه‌ن. ئه‌ڤه ل نك من پشكه ژ خه‌یانه‌تا نیشتیمانی و مه‌ترسیه ل سه‌ر ئه‌من و ئاسایشا نه‌ته‌وه‌یی، هه‌كه ل نك هه‌موو گه‌ل و نه‌ته‌وان خاك و نیشتیمان ژ دایك و دین و ده‌وله‌تان ب نرخ و بهاتره، ئه‌و كه‌سێ روومه‌تێ ل خاك ونیشتیمانێ خوه نه‌گریت، پارێزڤانیێ ل ژینگه‌ه و ئاڤ و هه‌وایێ خوه نه‌كه‌ت، ئه‌و رێزێ ل دایك و باب و دین و ده‌وله‌تا خوه‌ژی ناگریت. چاوا دینێ ئیسلامێ دا دبێژیت: (ڤیانا نیشتیمانی ژ ئیمانێ یه). له‌وما گرنگه ئه‌م هه‌موو ب بینه پارێزڤان و چاڤدێر و زێره‌ڤان، گرێدانا مه ب خاك و نیشتیمانێ مه ڤه‌بیت دا بكارین سه‌ركه‌فتی د ڤان ئه‌زموونان دا ده‌رباز ببین و به‌رسڤا دژمن و نه‌یارێن خوه بده‌ین.
ناحیا باعه‌درێ دكه‌ڤیته ل سه‌ر جادا گشتی (دهۆك ـ هه‌ولێر) ژ دووریاتیا (33) كم ژ دهۆك، ژ لایێ كارگێری ڤه گرێدایه ب قه‌زا شێخان ڤه‌پارێزگه‌ها دهۆك)، پشتی روودانێن هه‌یڤا هه‌شت و هێرشێن چه‌تێن داعشێ وه‌ك هه‌می قه‌زا و ناحیێن ده‌ڤه‌رێ كه‌ڤیته بن فشارا هاتنا ژماره‌كا زۆر یا ئاواران، ل دووڤ دووماهی ئامارا ژمارا وان گه‌هشتیه (3816) خێزان سه‌رجه‌م (19877) كه‌س ئه‌ڤه دابه‌شكرینه و ئاكنجینه ل (سێ) جهان (سه‌نته‌رێ ناحیێ، گوندێ سه‌ر ب ناحیێ ڤه، گوندێن ناحیا ئه‌لقووش) ژ وان (80%) خه‌لكێ ده‌ڤه‌را شنگالێ نه و (20%) خه‌لكێ ده‌ڤه‌رێن باشیك و به‌حزانێ و گوندێن ده‌ڤه‌را تلكێفێ!!
بۆ ریخستنا كاری سێ لیژنه هاتنه پێكئینان ل ده‌ڤ مه ل ناحیێ ئێك بۆ پێشوازیێ و توماركرنێ، یا دی بۆ پارڤه‌كرنا هاریكاری و كه‌لوپه‌لان و یا سیێ بۆ دووڤچوونا كێشان و پێشكێشكرنا خزمه‌تێن رۆژانه. .
رێزداران، ئاواره‌یا نه‌خۆشه پتریا خه‌لكێ كوردستانێ ئه‌ڤ (شه‌ربه‌تا ته‌حل یا ڤه‌خواری) ملله‌تێ كورد ب ده‌هان جاران تووشی ده‌ربه‌ده‌ریێ و مالوێرانیێ بووینه، بێگومان هه‌ڤڕكیه‌كا نوویێ یه نه‌خۆشترین تشت د ژیارێ دا ئه‌وه ده‌مێ مرۆڤ هه‌ست ب بێئۆمێدیێ دكه‌ت و مێشك وه‌ستێن و ئاینده پێش چاڤێن وی ره‌ش بیت!! ل دووڤ ئه‌وا هاتیه‌كرن و كه‌تواری ئه‌ڤه د تشته‌كێ ره‌وایه ژ به‌ر ئه‌و تاوانێن هاتینه ئه‌نجامدان دوورندانه بوون، كۆژه‌ك بوون دووری مرۆڤاتی و مافێن مرۆڤی بوون و هه‌می ره‌وشت و پێڤه‌رێن ژیاری، له‌ورا جڤاك شێلا و ئالۆزكر بۆچوونا گشتی یا ناڤخوه‌ی و جیهانێ حێبه‌تی و مه‌نده‌هۆش مان. سه‌ركرداتیا كوردی ب رێزڤه هه‌ست ب مه‌ترسیا ڤان پیلانان كر و گه‌هشتنه وێ راستیێ كو مه‌ره‌ما ڤان دوژمنان تێكدانا ره‌وشا كوردستانێ یه ژ هه‌می لایه‌كی ڤه و باشه یا پێدڤی بهێته‌كرن بۆ پاراستنا ده‌ستكه‌فتان و ئاخا كوردستانێ یا پیرۆز، ل دووڤدا ئێكسه‌ر ئه‌نجوومه‌نێ وه‌زیران زنجیره‌كا كۆمبوونان سازكر و هایداری دا هه‌می پارێزگه‌هان و داموده‌زگه‌هێن میری بۆ یا پێدڤی و جێبه‌جێكرنا كۆمه‌كا ئارمانجان ژ وان (قورتالكرنا خه‌لكێ سڤیل ژ ده‌ستێن دوژمنی ـ پێشوازی و تۆماركرنا ئاواران ل گه‌ل ڤه‌حه‌واندنێ ـ دابینكرنا پێداویستێن ژیارێ یێن فه‌ر (خوارن ـ ڤه‌خوارن) چێكرنا چه‌ندین خیڤه‌تگه‌هان ژ به‌ر هاتنا وه‌رزێ زڤستانێ ـ هه‌ولدان بۆ جینۆسایدكرنا تاوانێن هاتینه‌كرن ب رییێن یاسایی بۆ دادگه‌ها نێڤده‌وله‌تی) ل دووڤدا به‌رنامێ پارێزگه‌هێ كه‌فته كاری و كه‌لوپه‌لێن خوارنێ ل گه‌ل هاریكاریان و پێداویستیان هاتنه دابه‌شكرن ل سه‌ر خیزانێن ئاواران ل بێ ژمارا خیزانێ و ژمارا كه‌سان، د ڤێ پرۆسیسێ دا پارڤه‌كرن كاره‌كێ هه‌را زه‌حمه‌ت بوو ژ به‌ر كو ئاواران بژاله‌بوون ل گه‌له‌ك جهان؟ دڤیا هه‌ر خێزانه‌ك بگه‌هیته (به‌هرا خوه) یا دورست ل دووڤ رێنمایان، ئه‌ڤه ژ لایێ حوكمه‌تێ ڤه هه‌ڤكارێ ل گه‌ل حوكمه‌تا فیدرال، ژ لایه‌كی دی ڤه چه‌ندین لایه‌ن و ریكخراوا و مرۆڤێن خێرخواز قه‌ستا ده‌ڤه‌را مه كریه و هاریكاری ئیناینه بۆ ئاواران ژ وان (ده‌زگه‌هی بارزانی یی خێرخوازیێ ـ ریكخراوا قه‌ندیل ـ یۆنسیف ـ ریج ـ ئه‌وقافا ئێزدیان ل به‌غدا ـ ئێكه‌تیا مامۆستاێن ئاینی شێخان ـ كه‌نیسا قوپتی ل وه‌لاتێ مسرێ ـ ده‌زگه‌هێ ئاغاپا ئیسلامی ل بریتانیا.. . هتد). چاره‌سه‌ركرنا كێشان و پارڤه‌كرنا هاریكاریان و پێشكێشكرنا خزمه‌تێن رۆژانه ئه‌م نه‌چار كرین ب شه‌ڤ رۆژ كار بكه‌ین ل گه‌ل هه‌می فه‌رمانبه‌ران. مه هه‌ست ب وه‌ستیانی نه دكر ژ به‌ر كو براێن مه یێن تووشی كاره‌ساته‌كا مرۆڤاتیا مه‌زن بووین و هاریكاریا وان ئه‌ركه‌كێ نیشتمانی یه، د هنده‌ك هه‌لكه‌فت و قیرانان دا بهێن فره‌هیێ د خه‌مخۆری و دادپه‌روه‌ری سه‌ركه‌فتی ئینن، خه‌لكێ دگه‌ل ئاواران دیت ئه‌م یێ خزمه‌تا وان دكه‌ین ب گیانه‌كێ كورده‌واری و دلسۆزی ب رێزڤه، ژ به‌ر ڤان ئه‌گه‌ران ئاوارێن ناحیا مه د ره‌وشه‌كا ئه‌رینی دا بوون و ژیار ب سروشتی برێڤه‌چوو و چ ئاریشه په‌یدا نه‌بوون، باشه د ڤێ هه‌لكه‌فتێ دیاركه‌م، كو ناحیا مه یا ئێكێ بوو ل سه‌ر ئاستێ پارێزگه‌هێ د وارێ ڤاله‌كرنا خواندنگه‌هان ئه‌ڤه جهێ دلخۆشیی بوو ژ به‌ر خواندن ل ده‌مێ خوه برێڤه چوو و ده‌رباره‌ی ئه‌و خێڤه‌تگه‌ها نوكه دهێته چێكرن د سنوورێ ناحیا مه‌دا (ئیسیان ـ باعه‌درێ)، ئه‌ڤه دێ بۆ ئاوارێن د ناڤ داموده‌زگه‌هێن میری دا بیت و دووڤدا بۆ ئاوارێن جهێ وان زێده نه‌خۆش؟
ل دووماهیی سوپاسیا هه‌ر لایه‌نه‌كی ـ ریكخراویه‌كێ ـ كه‌سانه‌كی دكه‌ین ب ئه‌ركێ خوه یێ مرۆڤاتیێ رابوویی ـ سوپاسیا خه‌لكێ ده‌ڤه‌رێ و خودانێن مال و هه‌یكه‌لان دكه‌م بۆ رۆلێ وان و خه‌لكێ پاریزگه‌ها دهۆكێ ژی بۆ هه‌لویستێ وان یێ جوان و مه‌ردانه د ڤێ قه‌یرانێ دا.. ده‌ست خوش حوكمه‌تا هه‌ریما كوردستانێ به‌رێز ـ پارێزگه‌ها دهۆك ـ داموده‌زگه‌هێن میری بۆ خه‌مخوریا هه‌وه ئه‌وا د شیاندا بیت هاته‌كرن زێده بارێ هندێ كو ئه‌م قیرانه‌كا دارایی یا مه‌زن دا بووین.
سلاڤ بۆ گیانێ شه‌هیدان و پێشمه‌رگێن قه‌رمان هه‌ر جهه‌كی، هه‌ر سه‌ركه‌فتی بن بۆ پاراستن و رزگاركرنا خاكێ پیرۆز.
ئەڤرۆ نیوز، ڤەگێر:
زەعیم عەلی بەرپرسێ میحوەرێ رۆژھەلات و رۆژاڤایێ دیجلە بۆ ئەڤرۆنیۆز دیار کر کو نوکە 30% ژ شنگالێ د دەستێن پێشمەرگەی دا یە و شەر یێ بەردەوامە.
زەعیم عەلی گۆت: “چەکدارێ داعش نەبتنێ ب قەناسان شەری دکەن، بەلکو پشتەڤانی یا بۆ وان ھاتی و شەر ب ھەموو رەنگێن چەکان بەردەوامە”.
ل دور وێ یەکێ کا بۆچی پێشمەرگەی د ماوێ 3 رۆژان دا 2700 کم کونترولکرن و کونترولکرنا سەنەتەرێ شنگالێ گیروبوو، زەعیم عەلی گۆت: “ئەو گرێدای پلانا مە یا لەشکریە”.
بەحسێ وێ یەکێ د ھاتە کرن کو سەنەتەرێ شنگالێ ناھێتە رزگارکرن ھەتا لەشکرێ عیراقێ ژی ھێرشێ بکەتە سەر بەعاج و تلەعفەر و ئەو دەڤەر ژی بھێنە رزگار کرن، ل دور ڤی بابەتی زەعیم عەلی گۆت: “ھەتا نوکە چ تشتێ وەسا نینە، د دو رۆژێن بھێت دا دێ بۆ مە دیار بیت کا دێ پلانا مە بۆ رزگارکرنا بتمامی یا شنگالێ چ بیت”.
ئەڤرۆ نیوز، سالار دۆسکی:
ب مەرەما پشتەڤانیکرن ل بزاڤا شانۆێێ ل باژێرێ دھۆکێ ،ژ بەرھەمێن رێڤەبەریا ھونەرێ شانۆیێ ل دھۆکێ سەر ب رێڤەبەریا گشتی یا رەوشەنبیری و ھونەری ڤە، ژڤانە رۆژێن بھێت سێ شانۆ بھێنە نمایشکرن.
میسەر عوبێد رێڤەبەرێ ھونەرێ شانۆیێ ل دھۆکێ بۆ مالپەرێ ئەڤرۆ نیۆز گۆت: سێ شانۆ دھێنە پێشکێشکرن و شانۆیەک ژ وانا ھەرسێ یان دو جاران دھێتە نیشادان و ھەموو دێ ل سەنتەرێ باژێرێ دھۆکێ بن.
میسەر ھێشتا ژی گۆت: شانۆگەریا (ئازارێن سترانەکێ) 25 و 26\12 دێ ھێتە نیشادان کو ژ دەرھێنانا (مەسعود عارف)ی، دیسا شانوگەریا (زیاتر ببینە) کو بەرھەمێ پەیمانگەھەکا ئەلمانی یە و مھێڤانن دێ ل دھۆکێ ھێتە نیشادان، 27\12، دیسا رێکەفتی 28\12 شانوگەریا (گیانەکێ بێ جە) ژ دەرھێنانا قاسم بەیاتی دھێتە نمایشکرن، ھەموو دەمژمێر پێنج ئێڤاری دێ ل ھۆلا چالاکیێن قوتابخانان ئانکو پەیمانگەھا ھونەرێن جوانا کەڤن ھێنە نیشادان، ئارمانج ەوە دووماھیا سالا شانۆیێ ل دھۆکێ ب دووماھی بینین، ئەڤە بەرسڤەکە بۆ دوژمنێن مللەتێ کورد کو کورێن ڤی باژێری خوە دەنە کوشتن ب وێ مەرەمێ کو ژیان ھەر یا بەردەوامە، چونکە کاودانێن دھۆک تایبەتبوون نەبوونا بودجێ و فشارا پەنابەران.
نيشاندان