ئەڤرۆ:
سەعید کەریمی ئەندامێ رێکخراوا مافێ مرۆڤی یا رۆژھەلاتێ کوردستانێ بۆ رۆژناما ئەڤرۆ دیار کر کو پشتی رێککەڤتنا لۆزان یا د ناڤبەرا ئیران و ئەمریکا دا گڤاشتنێن ل سەر چالاکڤانێن کورد ل ئیرانێ زێدە بووینە و ھەروەسا رێژا سێدارەدانا گرتیێن سیاسی ژی گەلەک زێدە بوویە و گۆت: (نھا ترسەکا گەلەک مەزن ل دەف چالاکڤان و رەوشەنبیرێن کورد و یێن کو دژبەریا سیستەمێ نھا ل ئیرانێ دکەن، دروست بوویە و ئەو دبێژن کو ھەکە گڤاشتنێن دەرەکی ل سەر ئیرانێ نەبن دەستھەلاتا نھا دێ رۆژانە ب دەھان کەسان ل سێدارە بدەت و مخابن چو سازی و دەزگەھەک ژی بەحسێ بنپێکرنێن مافێ مرۆڤی ل ئیرانێ ناکەن و ئەوە ژی وەسا دکەت ئیران ل گۆر خوە دژبەرێن خوە ژناڤ ببەت).
ناڤھاتی ئەو یەک ژی نەڤەشارت کو دەە رۆژن ل پرانیا باژارێن رۆژھەلاتێ کوردستانێ ھێزێن ئێمناھیێ دەست ب ئۆپەراسیۆنان کرینە و ب بەھانێن جودا جودا چالاکڤانێن مافێ مرۆڤی، رۆژنامەڤان و نڤیسەرێن کورد دەستەسەر دکەن و گەفا وێ یەکێ ژی ل مالباتێن وان دکەن کو نابیت ئەو چو ئاگاھیەکێ بدەنە دەزگەھێن راگەھاندنێ و ھەروەسا گەلەک مالپەرێن کوردی یێن کو ل ھەرێما کوردستانێ و ئورۆپا ڤەشانێ دکەن نھا ژ ئالیێ دەزگەھێ ھەوالگێریا ئیرانێ ڤە ھاتنە فیلتەر کرن و ئەم نەشێین سەرەدانا وان مالپەران بکەین دا بزانین کا ل کوردستانێ چ روو ددەت و گۆت: (ئیران نەرماتیا رۆژئاڤا و ئەمریکا بۆ خوە وەک دەلیڤەکا باش دیتیە دا ھەم کوردان و ھەم ژی دژبەرێن خوە ژناڤ ببەت و بشێت سیستەمێ خوە ب ھێز بکەت و ب باشێ کۆنترۆلا خوە ل سەر ھەموو پێکھاتێن دی دروست بکەت، چونکو سێدارەدانا پتر ژ سی کەسان د ناڤ دەە رۆژێن بۆری دا نیشا ددەت کو حوکمەتا ئیرانێ ب رەنگەکێ بەرنامەکری کار بۆ ژناڤبرنا گرتیێن سیاسی دکەت و ھەروەسا دخوازن ب ڤی رەنگی خەلکێ ژی چاڤترسی بکەن).
د دووماھیا ئاخڤتنا خوە دا ئەندامێ رێکخراوا مافێ مرۆڤی یا رۆژھەلاتێ کوردستانێ ئەو یەک ژی نەڤەشارت کو خەلک دبێژن کو ئەمریکا و وەلاتێن رۆژئاڤا ژ بەر بەرژەوەندیێن خوە یێن ئابووری و سیاسی ل ھەمبەر ئیرانێ نەرماتی نیشا داینە و ژ بەر ڤێ یەکێ ژی ئیران دێ ب ھەموو ھێزا خوە بزاڤێ کەت کو کورد و بەلوچی و کێم نەتەوێن دی ل ئیرانێ تەپەسەر بکەت دا ئەو نەشێن چو چالاکیەکێ بکەن و نھا ژی ب ھەموو رەنگەکێ مافێ خەلکێ دھێتە بنپێکرن و گۆت: (رێژا گرتن و سێدارەدانێ گەلەک زێدە بوویە، ئەو یەک ژی مەترسیەکا گەلەک مەزنە و ئەم ھیڤیدارین کو رێکخراوێن جیھانی یێن مافێ مرۆڤی و یێن کو بەرێ پشتەڤانیا خەلکێ دکرن ل ھەمبەر ڤێ یەکێ بێدەنگ نەبن).
نيشاندان
