ئه‌ڤرۆ:

پشت ئێشان بەربەلاڤترین ئاریشەیە د ناڤ فەرمانبەر و کابانیێن مالێ دا و ھەتا زارۆیان ژی، ھندەک چارەسەریێن کێم یێن ل مال یێن ھەین بۆ پشت ئێشانێ.
کاروبارێن ژیانێ، گەشت و سەیران، رھێنانێن ووەرزشی و پیراتی – ھەمی بەرێ مرۆڤی ددەنە ئێک ئاریشە ئەو ژی پشت ئێشانە. بەلێ بەری تو لەزێ بکەی و قەستا نۆشداری بکەی، ئەڤە ھندەک چارەسەرینە تو دشێی ل مال خوە ژ پشت ئێشانا نەدۆمدرێژ قورتال بکەی:
* ھندەک زەیتا کافوورێ ل گەل زەیتا گووزا ھندێ بۆ دەمێ پێنج دەقیقان بکەلینە. بلا ئەو تێکەلە ب تەزیت و بکە د ئامانەکێ شووشەی دا. حەفتیێ دو جاران بەری نڤستنێ دێ بکارئینی بۆ تەناکرنا پشتێ.
* ھندەک ئاڤا گەرم یان یا تێنشیر دێ ھندەک زەیتا بیھووکێ کەیە سەر. ئەو ئاڤ دێ بۆ سەرشووشتنێ ھێتە بکارئینان دێ پشتێ و زەبلەکان ژ ئێشانێ تەنا کەت.
* دەمێ بەرێخوەدانا تەلەڤزیۆنێ، جەودکەکێ ئاڤێ یێ گەرم دانە پشت خوە ل گەل بالیفکێ، ئەو گەرماتی دێ پشتێ تەناکەت.
* ڤەمالینا پشتێ ب زەیتا خەردەلی ب سەعەتەکێ بەری سەرشووشتنێ، ل گەل سەرشووتنێ ژی پێدڤیە ھندەک ئاڤا گەرم ل خوە بکەی.
* کوپەکێ شیرێ گەرم، ھندەک رھا زەر و ھندەک چپکێن ھنگڤینی بکە سەر. ڤەخوارنا ڤی تێکەلەی ب شێوەکێ رێکخستی پشت ئێشانێ ناھێلیت، زێدەباری نەھێلانا ئێشانا لەشی و کوخکێ و نەخۆشیێن سەرمایێ.
* دەمێ تو چایێ ڤەدخۆی ھندەک تۆزا زەنجەبیلێ بکە ناڤ دێ یا ھاریکار بیت بۆ سڤککرنا پشت ئێشانێ.
* ڤەمالینا پشتێ ب زەیتێن گیایی چارەسەریا بلەز یا پشت ئێشانێ دکەت.
* ھندەک برەنجی بکە د ناڤ گوورەکا کەڤن دا و گوورێ باش گرێدە، بۆ دەمێ ٣ – ٥ەقیقان بکە د مایکروویێ دا، وێ گوورێ دانە سەر جھێ ئێشان تێدا و ئێکسەر دێ ھەست ب ئەنجامان کەی.

ئەڤرۆ:
کارتێکرنا حەبکێن “پاراسیتۆل” نە ب تنێ ل سەر ئێشانا لەشی ھەیە، بەلێ وەسا دیارە تێکبزڤینێن دەروونی ژی دراوەستینیت، ئەڤە ل دووڤ ڤەکۆلینەکا نوو وەسا ئاشکرا بوویە، کو تەناکەرێ ناسیار و نزمکەرێ گەرماتیێ کو ئەڤە 70 سالە مرۆڤ بکاردئینن، دبیتە ئەگەر بۆ تێکدانا ھەستان و کەیفخۆشیێ و خەمگینیێ وەکو ئێک کێم دکەت بێی مرۆڤ ھەست پێ بکەت.
پاراسیتۆل یان “ئەستامینوفین” ب ناڤێ پزیشکی، ئێک ژ پترین دەرمانان ل سەرانسەری جیھانێ دھێتە بکارئینان، ب شێوەکێ سەرەکی بۆ چارەکرنا تایا و سەرئێشێ و تەناکرنا ئێشانێن بچووک دھێتە بکارئینان.
ڤەکۆلینەکا سالا 2012 وەسا دیار کر بوو کو پاراسیتۆل ئێشانێن جەستەیی و دەروونی وەکو ئێک تەنا دکەت، بەلێ ئەڤ ڤەکۆلینا نوو ھندەک ئەنجامێن جودا دیتن کو پاراسیتۆل نە ب تنێ کارتێکرنێ ل ئێشانێن دەروونی دکەت، بەلێ مرۆڤی بێ خەم دکەت و ھەستان تێکددەت، ھەروەسا وە دکەت مرۆڤ گەلەک تێکبزڤینی ل گەل روودانێن دەوروبەر نەکەت.
زانا نزانن کا تەناکەرێن دی ژی ھەستان تێکددەن وەکو پاراسیتۆلێ یان نە، لەورا وەکو وان ئاشکرا کری کو وان ل بەرە ھەمان تاقیکرن ل سەر وان دەرمانان ژی بکەن.