ئه‌ڤرۆ نیوز:
عەمید ئەحمەد ڕەزا پوردەستان گه‌فێن هێرشا بۆ سه‌ر ده‌وله‌تا عه‌ره‌بستانا سعودى دكه‌ت ئه‌گه‌ر بهێت، ریاز ده‌ستبه‌ردارى هێرشێن خوه بۆ یه‌مه‌ن نه‌بیت.
عەمید ئەحمەد ڕەزا پوردەستان فه‌رماندێ هێزێن پیاده یێن ئیرانێ راگه‌هاند كو ئه‌و ناخوازن ململانێ و نه‌خوشى ل گه‌ل سعودیێ هه‌بیت، به‌لێ داخواز كر كو ده‌ستبه‌ردارى كوشتنا برایێن وان یێن یه‌مه‌نى بئینن، ژبه‌ر ب ڤى كارێ ئه‌و دكه‌ن، شه‌ره‌كێ رێتنا خوینێ برێڤه دبه‌ن.
ئه‌ڤرۆ نیوز: ڤه‌ده‌ر ره‌شاڤایی:
سه‌رۆكێ گرۆپێ به‌لاڤكرنا مریشكێت توركی موجده‌ت سه‌زه‌ر راگه‌هاند كو هاورده‌كرن و گه‌هشتنا مریشكێن توركی بۆ ئیراقێ هاتیه راگرتن و چه‌ندین پێرابوون بۆ راوه‌ستاندنا وان هاتینه دانان.
موجده‌ت سه‌زه‌ر بۆ مالپه‌را (Global Meat) خویاكریه كو حكومه‌تا ناڤه‌ندی يا ئیراقێ ئینانا هه‌می مریشكێن توركی بۆ ئیراقێ راوه‌ستاندینه و هێشتا ئه‌گه‌ر نه‌هاتیه زانین و لێكولین ژ ئالیێ وان ڤه بۆ زانینا ئه‌گه‌ران هاتینه ده‌ستپێكرن، لێ چێدبیت بۆ گه‌شه‌پێدانا به‌رهه‌مێ مریشكێن خۆمالیێن ئیراقی بیت، تێ چاڤه‌رێكن ئاریشه چاره‌سه‌ر ببیت لێ دێ پیچه‌ك ده‌م پێڤه‌چیت.
لدووڤ زانیاریێن نه‌ته‌وێن ئێكگرتی ل سالا رابووری به‌رهه‌مهێنه‌رێن توركی 227,000 دوسه‌د و بیست و حه‌فت هزار ته‌نێن مریشكان هنارتینه ئیراقێ.
`ئه‌ڤرۆ نيوز:
وه‌زاره‌تا دارايى و ئابوورى ل حوكمه‌تا هه‌رێما كوردستانێ ژڤانێ دانا مووچێ هه‌يڤا دو يێ هه‌موو وه‌زاره‌تان ئاشكه‌را كر كو دێ ب ڤى ره‌نگێ ل خوارێ بيت:
دوشه‌مبى 20ى نيسانا 2015ێ
1- وه‌زاره‌تا ئاڤه‌دانكرن و بنه‌جهكرنێ
2- وه‌زاره‌تا ڤه‌گۆهاستن و گه‌هاندنێ
3- وه‌زاره‌تا پلاندانانێ
4- وه‌زاره‌تا كاره‌بێ
5- وه‌زارتا سامانێن سرۆشتى
6- وه‌زاره‌تا پێشه‌سازى و بازرگانى
7- وه‌زاره‌تا ره‌وشه‌بيرى و هۆنه‌رى و وه‌رزش و لاوان
8- ده‌سته‌يا وه‌به‌رهێنانێ
9- جڤاتا دادوه‌رى
10- ده‌سته‌يا ده‌سپاكيێ
11- ده‌سته‌يا مافێ مرۆڤى
12- ده‌سته‌يا ده‌ڤه‌رێن ده‌رڤه‌يى هه‌رێما كوردستانێ
13 ده‌زگه‌هێ مين
14 ده‌سته‌يا ژينگه‌هێ
15- ديوانا چاڤدێريا دارايى
سێشه‌مبى 21ى نيسانا 2015ێ
1- وه‌زاره‌تا شه‌هيد و ئه‌نفالكريان ل گه‌ل خێزانێن شه‌هيدان و ئه‌نفالكريان و زيندانيێن سياسى.
2- وه‌زارتا ئه‌وقاف و كاروبارێن ئاينى
3- وه‌زاره‌تا خواندنا بلند و ڤه‌كۆلينێن زانستى
4- وه‌زاره‌تا چاندنێ
چارشه‌مبى 22ى نيسانا 2015ێ
1- سه‌رۆكاتيا هه‌رێما كوردستانێ
2- په‌رله‌مان
3- سه‌رۆكاتيا جڤاتا وه‌زيران
4- وه‌زاره‌تا باژێرڤانى و گه‌شتوگۆزار
5- وه‌زارتا داد
پێنجشه‌مبى 23ى نيسانا 2015ێ
وه‌زاره‌تا ناڤخۆ
ئێكشه‌مبى رێكه‌فتى 26ى نيسانا 2015ێ
خانه‌نشينكريێن پێشمه‌رگه‌يى و ئيلۆنێ
دوشه‌مبى 27ى نيسانا 2015ێ
خانه‌نشينێن شارستانى
ئه‌ڤرۆ نیوز: ڤه‌ده‌ر ره‌شاڤایی:
ئه‌ڤرۆ رۆژا ئێكشه‌مبی ته‌رمێ هه‌ردو كوردێن باكۆرێ كوردستانێ یێن د په‌یقینا عه‌ینكاوا – هه‌ولێرێ دا هاتیه شه‌هید كرن ل ناوچا دێركێ سه‌ر ب مێردینێ ڤه هاتن ڤه‌شارتن.
ته‌رمێن شه‌هید سه‌عده‌دین شان و بلند ئونه‌ن دوهی راده‌ستی مالێن وان هاتبوو كرن و ئه‌ڤرۆ د رێوره‌سمه‌كا مه‌زن دا و ب بلند هه‌لدان و هه‌ژاندنا ئالایێ كوردستانێ پشتی رێپیڤانه‌كێ هاتنه ڤه‌شارتن.
بابێ شه‌هید بلندی ژی خویاكر ئه‌و سه‌ربلندن كورێ وان ل بن ئالایا كوردستانێ و خزمه‌تكرنا كوردستانێ دا شه‌هید بووی و كریارا تیرۆرستان بتوندی ئیدانه‌كر.
ئەڤرۆ نیوز، زنار:
د یاریەکا پشخستی دا یێن کوما ئێکێ ژ خولا عیراقێ یا تەپا پێ یانا ھەولێر شیا پاشکەفتنا خوە بکەتە سەرکەفتن ل سەر یانا کارەبا ب سێ گۆلان بەرامبەر دو گۆلان و خوە نێزیکی دەربازبوونێ بکەت بۆ قوناغا چارگوشا زێرین د یاریا ئەوان دا ئەوا ل یاریگەھا فرەنسو حەریری ھاتیەکرن.
د ڤێ یاریێ دا یانا ھەولێر زەحمەتەکا مەزن دیت ھەتا شیای سەرکەفتنێ توماربکەت پشتی یانا کارەبا دو گۆل تومار کرین بەرامبەر گۆلەکێ بۆ یانا ھەولێر ئەو ژی برێکا یاریکەرێ خوە سەعەد عەبدول ئەمیر تومارکربوو، د نیڤا دویێ دا یانا ھەولێر ب پشتەڤانیا جەماوەرێ خوە شیا باشتر یاریێ بکەت و دو گۆلان ب رێکا یاریکەرێ خوە سەعەد عەبدول ئەمیر و لوئەی سەلاح تومار بکەت و ڤێ یاریێ ب ئەنجامێ سێ گۆلان بەرامبەر دو گۆلان ب دووماھی بینت.
ب ڤێ سەرکەفتنێ یانا ھەولێر ھژمارا خالێن خوە کرنە ٢٤ خال و پێشڤە ھاتە رێزا پێنجێ و پێدڤی شەش خالێن دیە ژ سێ یاریێن مای داکو ب فەرمی دەرباز بیتە قوناغا چارگوشا زێرین.
ئەڤرۆ نیوز، زنار زوبێر:
تیما تەپا پێ یا دھۆک شیا دەرباز بیتە قوناغا چارگوشا زێرین پشتی وەکھەڤ دەرکەفتی ل گەل یانا شورتە ب دوگۆلان د چارچوڤێ یاریێن گەرا د یاریێن گەرا بەری دووماھیا خولا عیراقێ یا تەپا پێ دا د وێ یاریێ دا ئەوا ل یاریگەھا یانا دھۆک یا وەرزشی ھاتیە کرن.
د نیڤا ئێکێ دا یانا ئاستێ یانا شورتە باشتر ھاتە دیتن و شیان ل دەقیقەیا ١٤ گۆلەکێ ب رێکا یاریکەرێ خوە مەروان حسێن تومار بکەن، پشتی ڤێ گۆلێ یاریکەرێن دھۆک خوە نەدا دەست و شیان گۆلا وەکھەڤیێ ب رێکا یاریکەرێ خوە زیاد ئەحمەد تومار بکەت ل دەقیقەیا ١٩ و نیڤا ئێکێ ب ڤی ئەنجامی ب دووماھی ھات.
د نیڤا دویێ دا ھەردو یانا یاری زێدەتر ل نیڤا یاریگەھێ دکر ل گەل پەیداکرنا چەندین دەلیڤەیێن کێم ژ لایێ ھەردو تیمان ڤە ھەتا دەقیقەیا ٦٤ کەرار محەمەد شیا گۆلا دویێ بۆ شورتە تومار بکەت پشتی ڤێ گۆلێ جەماوەرێ یانا دھۆک بەردەوام پشتەڤانیا تیمێ کر دەرئەنجام یاریکەرێن دھۆک شیان چەندین دەلیڤەیان پەیدابکەن ھەتا دەقیقەیا ٨١ ژ یاریێ یاریکەرێ پێگوھۆر محەمەد زوھێر شیا گۆلا وەکھەڤیێ ژ خەلەتیا گولچیێ یانا شورتە محەمەد گاسد تومار بکەت و دەمێ مای چو ژ ئەنجامی نە ھاتە گوھۆرین یاری ب دووماھی ھات ب ئەنجامێ دو گۆلان بۆ ھەردو تیمان کو ئەڤ ئەنجامە د بەرژەوەندیا یانا دھۆک دابوو کو پێدڤی تنێ خالەکێ بوو داکو دەرباز بیتە قوناغا چارگوشا زێرین کو نوکە ل رێزا سیێ یە ب ٢١ خالان د کوما دویێ دا و دو یاریێن پاشخستی ژی ماینە.
ئه‌ڤرۆ نيوز، نيوار محه‌مه‌د سه‌ليم:
به‌رپرسێ لقێ دهۆك يێ كۆمه‌لا كۆرته‌بالايێن كوردستانێ بۆ ئه‌ڤرۆ نيوز گۆت: “رۆژا سێشه‌مبى رێكه‌فتى 21ى نيسانا 2015ێ ب هه‌لكه‌فتا دامه‌زراندنا كۆمه‌لا كۆرته‌بالايێن كوردستانێ دێ كه‌رنه‌ڤالێ شيانێن كۆرته‌بالان ل دهۆكێ نيشان ده‌ن”.
وه‌حيد چيچۆ، به‌رپرسێ لقێ دهۆك يێ كۆمه‌لا كۆرته‌بالايێن كوردستانێ، زێده‌تر گۆت: “سالرۆژا دامه‌زراندنا كۆمه‌لێ هه‌ر سال ب ره‌نگه‌كى بوو، به‌لێ ئه‌ڤ ساله ژ به‌ر قه‌يرانا دارايى يا هه‌رێما كوردستانێ ڤه‌گرتى نه‌شێين وه‌كو پێدڤى ڤێ رۆژێ ساخ بكه‌ين ژ به‌ر هندێ ژى وه‌كو سالێن به‌رى نوكه نابيت”.
به‌رپرسێ لقێ دهۆك يێ كۆمه‌لا كۆرته‌بالايێن كوردستانێ ئاماژه ب وێ چه‌ندێ ژى كر كو د ڤێ كه‌رنه‌ڤالێ دا دێ كارێن كورته بالان ب ره‌نگه‌كێ به‌رچاڤ هێنه نيشادان ئه‌وێن ژيانا خوه يا رۆژانه پێ دابين دكه‌ن و گۆت: “ئه‌م وه‌كو كۆمه‌له گه‌له‌ك گرنگيێ ب وى كارى دده‌ين يێ كۆرته‌بالا دكه‌ن”.
ئه‌ڤرۆ رۆژا ئێكشه‌مبى رێكه‌فتى 19ى نيسانا 2015ێ ل پيرمام مەسعود بارزانی سەرۆکێ ھەرێما کوردستانێ پێشوازیا ژان کوبس نوونەرێ نوو یێ تایبەتیێ سکرتێرێ گشتییێ رێخستنا نەتەوەیێن ئێکگرتی و شاندەکی ل گەل کر.
د ڤێ ھەڤدیتنێ دا کو ب مەبەستا خوە ناساندنێ ھاتبوو ساز کرن نوونەرێ نوویێ تایبەتیێ سکرتێرێ گشتییێ رێخستنا نەتەوەیێن ئێکگرتی بەحسا رۆلێ ھێزێن پێشمەرگەیى د روو ب روو بوونا تيرۆرستێن داعیش دا کر و بالکشاند ل سەر وێ یەکێ کو جیھان ئاگاھداری قوربانیدانا ھەرێما کوردستانێ و ھەولێن وێ یێن ژ بو شكاندنا تيرۆرستان و ھەروه‌سا هاريكاريكرن و ل خوە گرتنا سەدان ھەزار پەنابەرێن عيراقی و سووری و پاراستنا پێکھاتێن نەتەوەیی و ئۆلان کر.
نوونەرێ تایبەتیێ سکرتێرێ گشتییێ نەتەوەیێن ئێکگرتی و ھەنگاڤێن نێزیکبوونا بەغدا و ھەولێر و ھەروه‌سا وان پەیوەندیێن ھەڤسەنگێن ل ناڤبەرا ھەرێما کوردستانێ و جیران و ھەڤسوویێن ھەرێم ھەیە بلند نرخاند و ب فاکتەرەک ژ بۆ گەشبوونا ناڤچەیێ ل قەلەم دان. ھەروه‌سا سپاسیا حکومەتا ھەرێما کوردستانێ ژی کر کو ھەماھەنگیەكا باش ل گەل تیمێن نەتەوەیێن ئێکگرتیان دا ھەیە.
ل بەرامبەر دا سەرۆک بارزانی ھيڤیا سەرکەفتنێ ژ بۆ نوونەرێ نوویێ سکرتێرێ نەتەوەیێن ئێکگرتی خواست و ژ بلی وێ بالکشاند ل سەر رۆلێ ب باندۆرا نەتەوەیێن ئێکگرتییا ل هاريكاريكرنا پەنابەران و ھەروه‌سا نێزیککرنا ئالیێن سیاسیێن عيراقێ دا تەکەز ل سەر بەرفرەھتر کرنا ھەماھەنگیا د ناڤبەرا نەتەوەیێن ئێکگرتی و ھەرێما کوردستانێ کر. سەرۆک بارزانی ل درێژاھیا ئاخافتنا خوە دا سپاسیا ھەڤسۆزی و ب دەنگ ڤە ھاتنا جڤاکا نێڤدەولەتی کر و بالکشاند ل سەر قەھرەمانیا ھێزێن پێشمەرگەيى و ئه‌و يه‌ك خستە روو کو ھەرێما کوردستانێ ژ بۆ مانا خوە و پاراستنا دەستکەفتان قوربانی و خوینەکە زێدە دایە و د ڤێ شەرێ ژی دا پێشمەرگە ب ئازایەتیا خوە ئه‌و يه‌ك سەلماند کو تيرۆر ئەو ھێزا خوە نينه کو نەهێته شکاندن.
ھەر ل ڤێ ھەڤدیتنێ دە رەوشا ئەمنی و سەربازیا عيراقێ و گه‌ف و ھەرەشەیێن تيرۆرستان ل پارێزگەھا نه‌ینه‌وا، ئەنبار و سەلاحەدین خستن بەر بەحس و دانوستاندنان و پرۆسەیا ئازاد کرنا موسل و قۆناغاا پشتی ئازاد کرنا مووسل ھاتە نرخاندن.
ئه‌ڤرۆ نيوز:
ب گۆره‌يى راگه‌هاندنه‌كا حوكمه‌تا هه‌رێما كوردستانێ، ئه‌ڤرۆ رۆژا ئێكشه‌مبى رێكه‌فتى 19ى نيسانا 2015ێ جڤاتا بلندا په‌روه‌ردێ و خواندنا بلند ل حوكمه‌تا هه‌رێما كوردستانێ ب سه‌رۆكاتيا نێچيرڤان بارزانى سه‌رۆكێ حوكمه‌تا هه‌رێما كوردستانێ كۆمبوونا خوه يا ئێكێ ئه‌نجام دا و چه‌ند بڕياره‌كێن گرنگ بۆ پێشڤه‌برنا ئاستێ زانستى و په‌روه‌ردێ ل هه‌رێما كوردستانێ هاتنه دان.
د كۆمبوونێ دا راپۆرتێن هه‌ردو وه‌زاره‌تێن خواندنا بلند و په‌روه‌ردێ ده‌رباره‌يى ره‌وشا په‌روه‌ردێ و خواندنا بلند هاته به‌رچاڤكرن و پاشان كارنامێ كۆمبوونێ كه‌فته به‌ر دانوستاندنێ و چه‌ند بڕياره‌ك ل دۆر خواندنا بلند و په‌روه‌ردێ ده‌ركرن.
ده‌رباره‌يى ره‌وشا خواندنا بلند، به‌حس ل پێدڤيێن ده‌سپێكى يێن حوكمه‌ت و كه‌رتێ تايبه‌ت كرن و دارشتنا پلانا خواندنا بلند بۆ خواندنا دبلۆم و ماسته‌ر و دكتورايێ و بۆ ڤێ مه‌ره‌مێ ژى بڕيار هاته دان وه‌زاره‌ت بهێنه ئاگه‌هداركرن كو هه‌موو پێدڤيان راده‌ستێ جڤاتا په‌روه‌ردێ و خواندنا بلند بكه‌ن. پاشان به‌حس ل كوالێتيا ئاستێ زانكۆيان هاته كرن و بڕيار دا سيسته‌مێ رێزبه‌نديا نشتيمانى بۆ زانكۆ و دامه‌زراوێن دى يێن سه‌ر ب وه‌زاره‌تا خواندنا بلند بهێنه كرن ب ره‌نگه‌كى ل سه‌ر پيڤه‌رێ زانستى و كوالێتيێ بيت دا كو هه‌ڤركيا زانستى په‌يدا ببيت.
سه‌باره وه‌زاره‌تا په‌روه‌ردێ ژى به‌حس ل دروستكرنا هه‌وه‌كا نشتيمانى بۆ دروستكرنا قوتابخان كر و بڕيار هاته دان كو پرۆژه‌ك بۆ ڤێ مه‌ره‌مێ بهێته ئاماده‌كرن و ژێده‌ره‌كێ نوو يێ پاره‌دانێ بۆ پرۆژێن دروستكرنا قوتابخانان بهێته ديتن و حوكمه‌ت ژى ئاسانكاريێن ته‌مام بكه‌ت. ديسا به‌حس ل كۆنفرانسێ په‌روه‌ردێ ژى كر ئه‌وێ ل به‌ره هه‌يڤا بهێت بهێته گێران و ته‌وه‌رێن كۆنفرانسى خستنه به‌ر دانوستاندنێ و پاشان ژى پرۆژێ په‌يره‌وێ خواندنا پيشه‌يى خسته به‌ر دانوستاندنێ و بڕيار هاته دان ئاراسته‌يى وه‌زاره‌تێن په‌يوه‌نديدار بهێته كرن دا كو ل داهاتى وه‌كو پرۆژه‌ك بچيته به‌ر سينگێ جڤاتا وه‌زيران و بڕيارێن پێدڤى ل سه‌ر بهێنه دان.
د ته‌وه‌ره‌كێ دژى دا به‌حس ل خواندنا ب زمانێ كوردى ل ده‌ڤه‌رێن ژ ده‌رڤه‌يى ئيدارا هه‌رێما كوردستانێ هاته كرن دا كو پتر گرنگى پێ بهێته دان و پتر بهێته پێشخستن، ديسا بڕيار هاته دان گرنگى ب وان قوتابخان ژى بهێته دان يێن سيسته‌ما خواندنا ئنگليزى په‌يره‌و دكه‌ن و به‌حس ل نووژه‌نكرنا قوتابخانان بهێته كرن و كارێ جدى بۆ ڤێ مه‌ره‌مێ ل وه‌رزێ هاڤينێ بهێته كرن و كار بۆ پتر مه‌شقكرنا مامۆستايان بهێته كرن.
جڤاتا په‌روه‌رده و خواندنا بلند ل هه‌رێما كوردستانێ ژ هه‌ر ئێك ژ نێچيرڤان بارزانى سه‌رۆك وه‌زيران و قوباد ته‌له‌بانى جێگرێ سه‌رۆك وه‌زيران و وه‌زيرێ خواندنا بلند و په‌روه‌ردێ و پلاندانانێ پێك دهێت و د كۆمبوونا جڤاتا وه‌زيران يا هژماره 6 يا رێكه‌فتى 19ى چريا ئێكێ يا 2014ێ هاتيه پێكئينان ب مه‌ره‌ما دارشتنا پلان و ستراتيژيه‌تا په‌روه‌رده‌يى و خواندنا بلند ل هه‌رێما كوردستانێ.
نيشاندان