ئەڤرۆ نیوز، عەلی حاجی :

رێڤەبەرێ ئاسایشا زاخۆ د داخویانیەکێ دا بۆ ئەڤرۆ نیوز دیار کر، ل بەریا دەمەکێ کێم وان شیا کچکەکێ ژیێ وێ دناڤبەرا ١٣-١٤ سالیێ دا رزگار بکەن کو دخاست داویێ ب ژیانا خوە بینیت.

زێدەتر شڤان سندی گوت : ل دەمژمێر ٧ شەڤ ئەم هاتینە ئاگەهدار کرن کو کچکەکا سنێلە ل جهەکێ زاخۆ دخاست داویێ ب ژیانا خوە بینیت هەر ئێکسەر مە خوە گەهاندە وی جهی یێ وێ کچی دخاست داویێ ب ژیانا خوە بینیت و پشتی گەهشتینە وی جهی پشتی ماندیبونەکا زێدە و زێدەتری دەمژمێر و نیڤان مە شیا وێ کچێ پاشگەز بکەین ژ خوە کوشتنێ و وێ کچێ ڤەگەریننە دناڤ کەس و کارێن وێ دا و ژ نێزیک ڤە ژی من ب خوە سەرپەرشتیا وان پێنگاڤان دکر و بوینە رێگر ژبەریا ئەنجام دانا وێ چەندێ،جودا ژ کارێن ئەمنی وەکو ئاسایشا زاخۆ دێ بەردەوام بین ل سەر پاراستنا گیانێ وەلاتیان ل زاخۆ .

 
ئەڤرۆ نیوز، عەلی حاجی:
نوونەرێ قایمقامێ زاخۆ د لژنا دووڤچوونا بازاریدا ل زاخۆ بۆ ئەڤرۆ نیوز دیار کر. لدووڤ فەرمانا قایمقامێ زاخۆ لژنا مە سەر ب ٦ کەرتان ل زاخۆ و دەوروبەرێن وێ ڤە هاتنە بەلاڤ کرن.

زێدەتر وەلات هەجەر گوت : ئەڤرۆ دوشەمبی مە هەلمەتەکا بەرفرەهـ ل سەنتەرێ باژێرێ زاخۆ و ناحیێن سەر ب قەزا زاخۆ ڤە دەست پێکر،،د وێ هەلمەتێ دا مە شیا سەرەدانا ٢١٠ جهان بکەین ژ خوارنگەهـ و نانپێژ و گوشتفروش و سەرتراشخانە و مارکێتان بکەین و مە شیا حەفت جهان ب کوژمەیەکێ پارەیی سزادان و هەر دیسان سەرتراشخانەیەکا زەلامان ژی گرت ژبەر کو نابیت د ڤی دەمی سەرتراش بهێنە ڤەکرن و سزادانا جهێن دیتر ژی ژبەر نەپێگیریا وان جهان بوو ب رێنمایێن هاتینە دەرکرن ب مەرەما خوە پاراستن ژ ڤایروسێ کورونایێ و کارێ لژنا مە ژی دێ یا بەردەوام بیت تا کو بشێن ب شێوەیەکێ باشتر رێنمایان جێبەجێ بکەین .