ئەڤرۆ، مللەت جەمال:

بریارە ئەڤرۆ یاریێن گەرا سیێ ژ قوناغا ئێکێ یا خولا نایابا عیراقێ بھێنەکرن، د کوما دویێ دا یانا دھۆک ل باژێرێ سلێمانیێ دێ بیتە مێڤانا یانا دسلێمانیێ ئەوا د گەرا بوری دا توشی خوسارەتیێ بوی ل سەر دەستێ یانا تەلەبە ب گولەکێ.

یانا دھۆک دێ بزاڤێ کەت مفای ژ بێھنڤەدانا خوە ببینیت د گەرا بوری دا، پشتی کو یاریا وێ ل گەل مینا ھاتیە پاشخستن، لێ سێ یاریکەرێن دھوک یێن سەرەکی پشکداری ڤێ یاریێ نابن ژبەر پشکداریا وان ل گەل ھەلبژارتیێ لاوێن عیراقێ ئەوێن نوکە د قارەمانیا لاوان یا  ئاسیا دا ل وەلاتێ میانمار و بڤێ چەندێ ئەرکێ باسم قاسم و قوتابیێن وی یێ ب ساناھی نابیت بو ھەڤرکیکرنا یانا سلێمانیێ د یاریگەھا وێ دا ئەوا دێ ژلایێ خوەڤە پشتبەستنێ کەتە سەر جەماوەرێ خوە و یاریگەھا خوە و ھەروەسا نوکە یاریکەرێن وێ د باشترین ئاستێ خوە یێ دەرونی دانە، پشتی دوھی ئێکەم قستێ ھەڤبەستێن خوە وەرگرتین، لەورا دێ ب زاخەکا مەزن پشکداری یاریێ بن و ژلایەکێ دووڤە ئەو گوتنێت ل سەر یانا سلێمانیێ دھاتنە گوتن ھەمی د یاریا گەرا بوری دا بەرامبەر تەلەبە ھاتنە رەتکرن، پشتی شیاین ئاستەکێ باش نیشان بدەن و د گەلەک ھەلکەفتان دا پتر نێزیکی سەرکەفتنێ بو ژ یانا تەلەبە لەورا ھەتا فیرکا داداڤانێ یاریێ نەھێتە لێدان پێشبینی یا ڤێ یاریێ ناھێتە کرن.

لدور ڤێ یاریا خوە بەرامبەر یانا سلێمانیێ جاسم محەمەد سلێمان یاریکەرێ یانا دھوک بۆ رۆژناما ئەڤرۆ گوت: دێ یاریەکا ب زەحمەت بیت بو تیما مە چونکو یاریکەرێن سلێمانیێ ژ خوسارەتیێ زڤرینە، لەورا دێ بزاڤێ کەن قەرەبوویا خوسارەتیا خوە بکەن لێ تیما مە ژی ژ ھەمی لایەکی ڤە یا بەرھەڤە و دێ بزاڤێ کەین خالێن خوە زێدە بکەین بو شەش خالان

بەرامبەر یاریکەرێ یانا سلێمانیێ ھوزان ئازاد بۆ رۆژناما ئەڤرۆ گوت: یانا دھۆک ب ھەمی لایانڤە ژ تیما مە باشترە، لێ مە باوەری ب شیانێن خوە ھەیە دێ ھەڤرکیا وان کەین و دەستا نا داھێلین تایبەت پشتی یاریکەران ھەمی یا قستێن ھەڤبەستێن خوە وەرگرتین و نوکە دەروونێ مە گەلەکێ ئارامە و دێ ھێز خوە نیشا یانا دھوک دەین.

زێدەتر ھوزانی دیارکر کو ب خالەکێ د رازینە چونکو دەستپێکا خولێ یە و تیما وان ھەتا نوکە ب دروستاھی نەگەھشتیە رادێ تەمام یێ بەرھەڤیان لەورا دێ زێدەتر پشتبەستنێ لسەر ھێزا جەماوەرێ و ئەردێ خوە کەن.