ئه‌ڤرۆ:

رۆژنامەڤانەکێ ئیسرائیلی د وارێ ئاسایشا نەتەوەیی دا د دیدارەکێ دا ل گەل ئەڤرۆ دبێژیت، ب تنێ کورد شەری ل سەر ئەردی دژی داعشێ دکەن و ھێزێن پێشمەرگەی پتر پێدڤی پێشخستنێ نە و خەلکێ ئیسرائیلێ دخوازیت کورد داعشێ بشکێنن و پێنگاڤان بەر ب سەرخوەبوونێ ب ھاڤێژن.

وەزیرێ دەرڤە یێ ئیسرائیلی (ئەفیغدور لێبرمان) د کۆنگرێ میۆنخێ یێ ئێمناھیێ و ئاشتیێ دا ل ئەلمانیا داخوازکر جڤاکێ نێڤدەولەتی چەکی پتر بدەتە ھەر ئێک ژ مسر، ئوردن، لەشکرێ ئازادێ سووریێ و ھەرێما کوردستانێ، ل دۆر گرنگیا ڤێ داخوازیا ئیسرائیلێ و ئینانا ناڤێ ھەرێما کوردستانێ بێ کو ئاماژێ بدەتە عیراقێ، رۆژنامەنڤیسێ ئیسرائیلی د وارێ ئاسایشا نەتەوی دا ( لازار بیرمان) بۆ ئەڤرۆ دبێژیت” ئیسرائیل حوکمەتا عیراقێ وەکو ھەڤال یان ھەڤپەیمان نابینیت، د دەمەکێ دا کوردان ب ھەڤپشکەکێ سرۆشتی دبینیت. د سەر ھندێ ڕا ژی ئیسرائیل بزاڤێ دکەت کو ب ئاشکرا ڤی بابەتی بەحس نەکەت، ھەتاکو ئاریشە ژلایێ جیرانێن کوردان ڤە بۆ دروست نەبن، سەرکردێن ئیسرائیلێ و خەلکێ ئیسرائیلێ دخوازن کورد داعش بشکێنن و پێنگاڤا بەر ب سەربەخوەبوونێ ب ھاڤێژن”.
ل دۆر ھەبوونا ھاریکاریێن ئیسرائیلێ بۆ ھەرێما کوردستانێ د شەرێ وێ دا دژی تیرۆرستێن داعشێ، گوت” قەبارێ ھاریکاریا نوکە یێ دیار نینە و یێ نھێنی یە. وەکی ئەز تێ دگەھم ھندەک ھەماھەنگی یا ھەی، بەلێ وەسا یا ب ھێز نینە”.
مە ژ لازاری پرسی ئایا حوکمەتا ئیسرائیلی بەرھەڤیا خوە دیارکریە بۆ ھنارتنا چەکی بۆ ھەرێما کوردستانێ، د بەرسڤێ دا گوت” ژلایێ حوکمەتێ ڤە، من چو بۆچوون ل سەر نینن، لێ ژلایێ کومپانیێن تایبەت ڤە، بەلێ راستە”.
لێ گوت ژی” وەکی ئەز تێدگەھم حوکمەتا ھەرێما کوردستانێ یا دو دلە کو ھاریکاریێ ژ ئیسرائیلێ قەبوول بکەت و ئەڤە جھێ مخابنیێ یە”.

ب دیتنا ڤی رۆژنامەڤانێ ئیسرائیلی کو پتر ل سایتێ (تایمز ئوف ئیسرائیل) دنڤیسیت، پێدڤیە ھەڤکاری د ناڤبەرا ھەرێما کوردستانێ و ئیسرائیلێ دا ھەبیت و گوت” ب تنێ دو حوکمەتێن نێزیکی وەلاتێن رۆژئاڤانە کو روو ب روویێ ئێک دوژمن دبن و پێدڤیە ل سەر وان رەفتارێ ل گەل وێ ئاستەنگێ بکەن کو وەکو کەمینە ژلایێ عەرەبان ڤە ل دەڤەرێ دھێنە نیاسین و پێدڤیە ھاریکاریێ بکەن د ھەموو واران دا، ژ ئێمناھیێ بۆ ئابوورێ و ھەتا ژلایێ کلتوری ژی ڤە” .
ناڤبری رەشبینیا خوە ژ ھەبوونا میلیشیێن (حەشد شەعبی) یێن شیعی دبینیت و دبێژیت” ئەڤ ئاریشە ب تمامی یا مەزن دبیت و چو ئەگەر نینن کو پێشبینی بکەین ئەو دێ ب ساناھی تر بن ژ داعشێ بۆ سەرەدەریکرنێ ل گەل، یان ژی بۆ کونترۆلکرنا وان. پشتەڤانیا وان ژلایێ ئیرانێ ڤە دھێتە کرن، ئانکو بەریکێن وان د تژی نە و ئەو د پێگیرن ب دۆزا خوە”.
سەبارەت زیانێن گیانی یێ پێشمەرگەی د شەرێ دژی داعشێ دا کو دووماھی ئامارا فەرمی ل ھەرێمێ دیارکر کو ٩٩٩ پێشمەرگە یێن شەھید بووین و زێدەتر ژ چار ھزار برینداران، لازاری شەرێ دژی تیرۆرستێن داعشێ ب شەرەکێ مەزن دا دیارکرن و ئاماژە دا وێ چەندێ ژی کر کو ب تنێ کوردان ل سەر ئەردی شەرکر د دەمەکی دا لەشکرێ عیراقێ خوە ل بەر تیرۆرستێن داعشێ نەگرت و رەڤی ب تایبەتی ل مووسلێ و گوت” ئەڤە شەرەکێ ترسناکە، پێدڤی گەنگەشێ نینە کو فەرە ژ چەند بوارەکان دا پێشمەرگە بھێتە پێشخستن، یا ئێکێ ژلایێ سەرکردایەتیێ ڤە، نابیت ئەفسەر ژلایێ مالباتان ڤە بھێنە دانان، پێدڤیە ل سەر بنیاتێ شیانان و شارەزایێ بۆ سەرکردایەتیێ بھێنە دانان کو چو گرێدان ب ناڤێ بنەمالان ڤە نەبیت”.
ب مەرەما کێمکرنا زیانێن گیانی ژی یێن ب پێشمەرگەی دکەڤن گوت” پێدڤیە ژلایێ نوژداریا بەرەیێن شەری ڤە شیانێن وان بھێنە پێشخستن. دکو ێ ژیانا گەلەک کوردان ھێـتە پاراستن ھەکە باشتر راھێنان ب وان نوژداران بھێـنە کرن یێن کو چارەسەریا قوربانیێن شەری دکەن.”
ل دۆر داخۆیانیا سەرۆکێ ھەرێما کوردستانێ بۆ رۆژناما (الحیاە) یا لەندەنی دەمێ گوتی” نەخشێن سایکس – بیکو دەستکردن و سنۆرێن نوو دێ ب خوینێ ھێنە دیارکرن” لازار بیرمان دبێژیت” ئێدی چ عیراق و سوریا نامینن، بەلکی ل سەر نەخشەی ئەڤ وەلاتە د دیار بن، لێ ئەو سنورێن ئورۆپیان بۆ رۆژھەلاتا ناڤین دروستکرین، یێ بێ مەعنا دبن و نوکە یا ب مەعنا نەژادە، عەشیرەتە و دینە”.

ئەڤرۆ:

رۆژنامەکا تورکیا د راپۆرتەکێ دا دیار دکەت بەلگە د دەستێ وان دا ھەنە کو داعش تورکیا بەرپرسیارێ شکەستنا خوە یا ل کۆبانێ دبینیت و نھا گەلەک بەرپرسێن داعشێ دبێژن کو تورکیا خیانەت ل مە کر و بۆ ئەگەرێ کوشتنا چەند ھزار چەکدارێن مە ل کۆبانێ و ژ بەر ڤێ یەکێ دڤێت تورکیا باجا وێ شکەستێ بدەت و داعشێ دڤێت ھێرشی تورکیا بکەت.
رۆژناما ڤەتەن یا تورکیا د راپۆرتەکێ دا کو نڤیسەر ناڤدار حسێن یەمان ئامادە کریە دیار دکەت کو پشتی داعش ل کۆبانێ تووشی شکەستنەکا مەزن ھاتی و نێزیک چار ھزار چەکدارێن وان ھاتنە کوشتن، نھا چەندین بەرپرسێن داعشێ دبێژن کو تورکیا رێ دا پێشمەرگە ب چەکێن گران بھێنە کۆبانێ و ژ بەر وێ یەکێ مە نەشیا ئەم کۆبانێ وەربگرین و ھەکە تورکیا رێ نەدابا ھاتنە پێشمەرگەی مە دشیا ئەم کۆبانێ بگرین و تورکیا خیانەت ل مە کریە و دڤێت تورکیا باجا وێ خەلەتیا خوە بدەت.
د بەردەوامیا راپۆرتێ دا ھاتیە دیار کرن کو داعشێ دڤێت ھێرشی ھندەک جھێن ستراتیژی ل تورکیا بکەت، چونکو پشتی شکەستنا داعشێ ل کۆبانێ ھەموو پیلانێن وێ رێکخراوا تیرۆرستی ژناڤ چوون و نھا نزانن کا دێ چاوا جارەکا دی ل سووریێ خوە ب رێکخستن بکەن و ژ بەر ڤێ یەکێ ژی ئەو چەکدارێن تورک یێن کو نھا ل ناڤ داعشێ دانە دشێن ببنە مەترسیێن گەلەک مەزن ل سەر پاشەرۆژا تورکیا و نھا پرانیا چەکدارێن داعشێ دبێژن کو ئەگەرێ سەرەکی یێ شکەستنا مە ل کۆبانێ تورکیا بوویە و بەرپرسێن تورکیا خیانەت ل مە کرینە و دڤێت ئەوە بۆ تورکیا نەمینیت.
د راپۆرتێ دا ئاماژە ب ڤێ یەکێ ژی ھاتیە کرن کو پشتی یەپەگێ شیا پەیوەندیێن خوە ل گەل لەشکرێ ئازاد یێ تورکیا باش بکەت، نھا ئەو یەک ژی ترسەکا مەزن ل دەف تورکیا دروست کریە، چونکو پلانا تورکیا یا بۆ سووریێ ل سەر بنەمایێ ب ھێزبوونا لەشکرێ ئازاد و ھەموو گرۆپێن دی یێن کو دژبەریا بەشاری دکرن ھاتبوو ئاڤا کرن، لێ پاشی تورکیا خەلەتیەکا مەزن کر و ھاریکاری دا جەبھەت ئەلنوسرە و داعشێ و وێ یەکێ ژی وەسا کر کو لەشکرێ ئازاد خوە نێزیکی یەپەگێ بکەت و نھا پەیوەندیێن وان باشن و ئەمریکا ژی گەلەک حەز دکەت کو یەپەگە و لەشکرێ ئازاد پێکڤە ل سووریێ ل دژی رژێما بەشاری و داعشێ شەری بکەن و ئەڤە ژی زیانەکا مەزن گەھاندیە ستراتیژیا تورکیا ل سووریێ.
د دووماھیا راپۆرتێ دا ھاتیە دیار کرن کو ھەکە تورکیا سیاسەتا خوە ل ھەمبەر سووریی بەرچاڤ دەرباز نەکەت و دەریێن خوە بۆ ھاتن و چوونا چەکدارێن داعشێ ڤەکری بھێلیت دێ داعش چالاکیێن مەزن ل تورکیا ئەنجام دەت و وی دەمی دێ رەوشا تورکیا گەلەک ئالۆز بیت.