ئه‌ڤرۆ نیوز:
ئه‌ڤرۆ نێچیرڤان بارزانى سه‌رۆك وه‌زیرێن هه‌رێما كوردستانێ ل گه‌ل هه‌ر ئێك ژ بان كى مون سكرتێرى گشتى یێ نه‌ته‌وێن یه‌كگرتى و نوونه‌رێن 93 وه‌لاتان پشكدارى د رێوره‌سمێن ڤه‌كرنا كوپیتكا حكومى یا دوبه‌ى دا كر.
ئه‌ڤ كوپیتكه ژ چه‌ندین كۆڕ و سمينار و په‌نه‌لێن جودا پێكدهێت، به‌حسێ كاروانێ پێشكه‌فتى یێ حكومى بۆ به‌ره‌ڤ پاشه‌رۆژێ دكه‌ت و دیسا به‌حسێ پێشكه‌فتنا حكومه‌تێن زیره‌ك و نه‌ڤیێن داهاتى یێن حكومه‌تێن زیره‌ك و دیزاینكرنا پێشوه‌خته یا پاشه‌رۆژێ دكه‌ت.
ئه‌ڤرۆ نيوز:
به‌رى ده‌مه‌كێ كێم كۆمبوونا پارتى ديموكراتى كوردستان و بزاڤا گۆڕان و ئێكه‌تى نشتيمانى كوردستان ل باره‌گايێ سه‌ره‌كى يێ بزاڤا گۆڕان ل سلێمانيێ ده‌سپێكر و بڕياره تێدا پارتى به‌رسڤا ئێكه‌تى و گۆڕان ل سه‌ر حوكمه‌تا خۆجهيا سلێمانيێ بده‌ت.
پێشتر پارتى ديموكراتى كوردستان راگه‌هاند بوو كو بۆچوونێن وان و شاندێ گۆڕان و ئێكه‌تيێ ل هه‌ڤ د نێزيكن و ب تنێ چه‌ند گوهۆڕينێن ئيدارى يێن بچووك دخوازن بكه‌ن.
پارتى ل جڤاتا پارێزگه‌ها سلێمانيێ ل رێزا چارێ دهێت و خودانا سێ كورسيێن وێ جڤاتێ يه.
ئه‌ڤرۆ نيوز:
به‌رپرسێ مه‌كته‌با رێكخستنێ يا پارتى ديموكراتى كوردستان هژمارا ئه‌و كه‌سێن كورد يێن چووينه ناڤ رێزێن داعش به‌لاڤ دكه‌ت و ب هژماره‌كا ترسناك دده‌ته زانين و ئاماژێ ب وێ چه‌ندێ ژى دكه‌ت كو هنده‌ك ژ وان شانازيێ ب چوونا خوه بۆ ناڤ وێ رێكخستيێ دكه‌ن.
جه‌عفه‌ر ئيبراهيم، به‌رپرسێ مه‌كته‌با رێكخستنێ يا پارتى ديموكراتى كوردستان، د ديداره‌كێ دا بۆ رووداو ئاماژه ب وێ چه‌ندێ دكه‌ت كو ل ده‌سپێكا شه‌رێ ل دژى داعش هژمارا گه‌نجێن كورد د ناڤ رێزێن وان دا يا كێم بوو، به‌لێ نوكه يا زێده‌كرى.
جه‌عفه‌ر ئيبراهيم كو د هه‌مان ده‌م دا جێگرێ سه‌رۆكێ په‌رله‌مانێ كوردستانێ ژى يه دبێژيت: “ب گۆره‌يى نووترين دووڤچوونا مه كرى، هه‌تا نوكه نێزيكى 500 گه‌نجان چووينه ناڤ رێزێن وێ رێكخستيێ، كو هنده‌ك شانازيێ ب خوه د به‌ن د ناڤ وێ رێكخستيێ دا، ئه‌ڤه ژى تشته‌كێ ترسناكه”.
مخابنيا خوه ژى ده‌بڕى هه‌مبه‌ر وان گه‌نجان كو پتريا وان خه‌لكێ باژێرێ هه‌له‌بچه نه و گۆت: “هه‌له‌بچه باژێره‌كێ قوربانيده‌ره و هه‌موو كورد ل سه‌رانسه‌رى جيهانێ شانازيێ پێ دكه‌ن و ب وى باژێرى د سه‌ر بلندن”.
ئه‌ڤرۆ نيوز:
رێڤه‌به‌ريا گشتيا كه‌شناسيێ ل هه‌رێما كوردستانێ راگه‌هاند كو سوبه‌هى ئه‌سمان دێ ب تمامى ئه‌ور بيت و سپێدێ زوو دێ يا به‌رده‌وام بيت و پاشان بۆ هنده‌ك ئه‌ورێن ناڤنجى هێته گوهۆڕين.
پشكا پێشبينيان ل رێڤه‌به‌ريا گشتيا كه‌شنايا هه‌رێمێ راگه‌هاند كو ژ ئه‌نجامێ سستيا هه‌ردو فشارێن نزمێن ده‌ريا سۆر و ده‌ريا ناڤه‌راست يێن وه‌لاتێ توركيا بۆ سه‌ر هه‌رێما كوردستانێ ئه‌و پێشبينى دكه‌ن كو سوبه‌هى رێكه‌فتى 2015.2.10 ئه‌سمانێ دهۆكێ دێ ب تمامى ئه‌ور بيت و سپێدێ زوو دێ يا به‌رده‌وام بيت و پاشان بۆ هنده‌ك ئه‌ورێن ناڤنجى هێته گوهۆڕين.
رێڤه‌به‌ريا گشتيا كه‌شناسيێ ل هه‌رێما كوردستانێ ئاشكه‌را ژى كريه كو پلا گه‌رماتيێ دێ پيچه‌ك بلند بيت هه‌ڤبه‌ركى ل گه‌ل رۆژێن به‌رى نوكه ب ره‌نگه‌كى د ناڤبه‌را 14 بۆ 5 دا.
ل دۆر پێشبينيا رێژا هه‌وايى و مه‌ودايێ ديتنێ ژى دايه زانين كو دێ ئاراسته‌يێ وى دێ باكوورێ رۆژهه‌لات بيت ب ره‌نگه‌كى دێ يێ ل سه‌ر خوه و ناڤه‌ندى بيت د ناڤبه‌را 5 بۆ 20 كلم د ده‌مژمێره‌كێ دا و ماوێ ديتنێ ژى دێ 8 بۆ 10 كلم بيت.
ئەڤرۆ:
بەرپرسێ لیژنا ناوچا دیجلە یا پارتی دیمۆکراتی کوردستان دیار کر ل دو تاخێن رۆژئاڤایێ رووبارێ دیجلەی ل ناڤ باژێرێ مووسل، ھندەک کەسان درووشمێ (بژی پێشمەرگە) ل سەر دیواران نڤیسیە و ب ڤێ تۆمەتێ ژی داعش چەند کەس دەستەسەرکرن.
حەسەن خەلۆ، بەرپرسێ لیژنا ناوچا دیجلە یا پارتی دیمۆکراتی کوردستان ل سنوورێ ناحیا زومار بۆ باسنیۆز راگەھاند، ل ناڤ باژێرێ مووسل وەلاتی ھەنە، پشتەڤانیا ھێزێن پێشمەرگەی دکەن، بەری دەمەکی ژی ئالایێ کوردستانێ د ناڤ باژێرێ مووسل دا بلند کربوو و گۆت “پێزانین گەھشتینە مە، کو دوھی ٨/٢/٢٠١٥، ل ھەردو تاخێن (سەورە و نەھرا) یێن رۆژئاڤایێ باژێرێ مووسلێ درووشمێ (بژیت پێشمەرگە) ل سەر دیواران ھاتیە نڤیسین”.
بەرپرسێ لیژنا ناوچا دیجلە یا پارتی دیمۆکراتی کوردستان خویا ژی کر، ل ھەمبەر ڤێ کریارا تیرۆرستێن داعش چەند کەسەک ل وان ھەردو تاخان ب تۆمەتا نڤیسینا درووشمان دەستەسەر کرینە و گۆت “ڤەکۆلینێن وان دگەل وان کەسان دبێ ئەنجام بوون و ب نەچاری ئازادکرن”.
بەرپرسێ لیژنا ناوچا دیجلە یا پارتی ئاشکرا ژی کر، نوکە داعش یا ب دووڤ وان کەسێن ئەو درووشمە نڤیسی دگەریێت، داعش ترسەکا زۆر ژی ل زێدەبوونا ھژمارا پشتەڤانێن ھێزێن پێشمەرگەی د ناڤ مووسل دا ھەیە.
ئەڤرۆ:
جێگرا سەرۆکێ فراکسیۆنا زەر ل پەرلەمانێ کوردستانێ ئامینا زکری دیارکر کو ئەو پشتگیریێ ل پارێزگەھبوونا زاخۆ، ئاکرێ، سۆران و گەرمیان دکەن و ژ نوکە پاش دێ کار کەن داکو ئەو ژی ببنە پارێزگەە.
ئامینا زکری بۆ مالپەرێ فەرمیێ پارتی دیموکراتی کوردستان ھەروەسا گۆت بریارەکا پەرلەمانێ کوردستانێ ل دۆر زاخۆ، ئاکرێ، سۆران و گەرمیان ژی یا ھەی کو ببنە پارێزگەە ئەم ژی وەکو فراکسیۆنا زەر ل پەرلەمانی دێ پشتەڤانیێ ل پارێزگەھبوونا وان کەین، چونکو پێدڤیە ئامادەکاری بۆ بھێنە کرن، ئەو ژی دیارکر کو بابەتێ پارێزگەە بوونا ھەلەبجە مافێ خەلکێ وی باژێری بوو، چونکو سمبولا بەرخوەدان و پاراستنا ناسناما کوردستانێ یە، بۆ گەشەسەندنا زێدەتر یا وی باژێری ئەو بریارە ھاتە دان.
ئاشکرا ژی کر کو ل سالا 1999 فراکسیۆنا زەر ل سەر راسپاردا سەرۆکێ ھەرێما کوردستانێ کارێ جدی بۆ پارێزگەھبوونا ھەلەبجە کریە، خۆشبەختانە ل کابینا ھەشتێ بۆ پارێزگەە، نوکە دێ کار کەین داکو زاخۆ، ئاکرێ، سۆران و گەرمیان ژی ببنە پارێزگەە.
ئەڤرۆ:
مەسعود بارزانی سەرۆکێ ھەرێما کوردستانێ د چارچوڤێ کۆنفرانسێ ئاسایشا جیھانی دا ل میونخ پشکداری د سمینارەکێ دا کر و راگەھاند کو ئەم شانازیێ دکەین کو پێشمەرگە و خەلکێ کوردستانێ شەڕێ ژ ناڤبرنا داعش دکەن و پێشمەرگەی ١٥ ھزار کیلۆمەترێن چارگۆشە یێن ژ دەستێن داعش ئیناینە دەر و گۆت:(داعش ب رێیا سەربازی ب تنێ بنبڕ نابیت، بەلکو پێدڤیە جڤاکێ نێڤدەولەتی ژێدەرێن تیرۆرستان ژ ناڤ ببەت و دژی وان راوەستیت و پێدڤیێن سازیێن ئاینێ ئیسلامێ ژی ل دژی وان راوەستن).
ل دۆر ئەو چەکێ بۆ ھەرێما کوردستانێ ھاتینە ھنارتن، سەرۆک بارزانی گۆت:(ئەو چەکێ مە وەرگرتی یێ کاریگەرە و سۆزا چەکێ زێدەتر ژی ب مە ھاتە دان).
ھەر دوھی ل میونخ سەرۆک بارزانی ل گەل جۆ بایدن جێگرێ سەرۆکێ ئەمریکا کۆمبوو و بەحسێ زێدەکرنا ھاریکاریێن ئەمریکا بۆ ھێزێن پێشمەرگەی کر.
ھەروەسا سەرۆکێ ھەرێما کوردستانێ ل گەل سیناتۆرێ ئەمریکی جۆن مەککەین کۆمبوو و د دیدارەکێ دا رۆناھی بەردانە سەر ھاریکاریکرنا ئاوارێن ل ھەرێمێ و سەرکەفتنێن پێشمەرگەی و چاوانیا روو ب رووبوونا تیرۆرستێن داعش.
جۆن مەککەین ھاریکاریکرنا وەلاتێ خوە بۆ ھێزا پێشمەرگێ کوردستانێ دوپات کر.
ئه‌ڤرۆ:
ئاژانسا BBC د راپۆرتەکێ دا ئاماژە ب ڤێ یەکێ دکەت کو پشتی حوسیێن شیعە شیان پەرلەمانێ وەلاتی ھەلوەشینن و ب رێیا کۆدەتایێ دەستھەلاتا یەمەنێ ژناڤ ببەن نھا وان دڤێت بۆ ماوەیەکێ ژی بیت حوکمێ ل وی وەلاتی بکەن، لێ سعوودیە و ئەمریکا دترسن کو یەمەن ژی وەک عیراقێ بکەڤیتە دەستێ ئیرانێ و رەوشا نھا ژی وێ یەکێ باش نیشا ددەت، ئیران ب ھەموو رەنگەکێ ھاریکاریا حوسیان دکەت و چەکێن گران ژی گەھاندینە دەستێ وان و ئیرانێ دڤێت نھا یەمەنێ ل دژی سعوودیێ و ئەمریکا بکار بینیت، یا یەکێ ئیران دخوازیت کو سعوودیە سیاسەتا خوە یا ل ھەمبەر ھاتنا بھایێ پەترۆلێ بدەتە گوھۆرین و ھەروەسا ئیران بزاڤەکا مەزن دکەت پێگەھێ سعوودیێ ل رۆژھەلاتا ناڤین لاواز بکەت.
د بەردەوامیا راپۆرتێ دا ھاتیە دیار کرن کو شاھێ نوو یێ سعوودیێ ھەر ژ رۆژا دەست ب کارێ خوە کری ب دژواری دژبەریا ئیرانێ دکەت و ژ بەر ھندێ ژی بەرپرسێن ئیرانێ ب رێیا حوسیان رەوشا یەمەنێ ئالۆز کر و دخوازن ب ڤی رەنگی سعوودیێ نەچار بکەن سیاسەتا خوە ل ھەمبەر ئیرانێ بدەتە گوھۆرین، ل ئالیێ دی ئیران بزاڤەکا مەزن دکەت کو سەبارەت ب دانوستاندنێن ل گەل ئەمریکا رەوشا یەمەنێ ژی وەک کارتەکا فشاری بکار بینیت دا ئەمریکا نەچار بیت ھندەک داخوازیێن ئیرانێ قەبوول بکەت و سعوودیە و ئەمریکا ژی دخوازن گەلەک کارتێن دی ل دژی ئیرانێ بکار بینن دا وی وەلاتی نەچار بکەن ئێدی پشتەڤانیا حوسیێن شیعە ل یەمەنێ نەکەت.
ل ئالیێ دی چاڤدێرێن سیاسی دیار دکەن کو رەوشا یەمەنێ تا رادەیەکێ وەک یا عیراقێ لێ ھاتیە و ئەو شۆرەشا بەری چار سالان ل گەل وەلاتێن دی یێن بھارا عەرەبی ل دژی دەستھەلاتا عەلی عەبدوللا سالح ھاتیە کرن چو ئەنجامێن خوە نەبوون و رەوشا یەمەنێ یا نھا ژ چار سالێن بەرێ خرابتر بوویە و ئالۆزی و شەرێ ناڤخوەیی ل وی وەلاتی زیانەکا مەزن گەھاندیە وەلاتیان و بارێ ئابووری یێ یەمەنێ ژی تێک چوویە. چونکو ئیران ل رەخەکێ و ل رەخێ دی ژی سعوودیە ھەر ئێک ژ وان پشتەڤانیا ئالیەکێ ل یەمەنێ دکەن و ب رەنگەکێ مرۆڤ دشێت بێژیت کو ئیران و سعوودیە شەرێ خوە ڤەگۆھاستینە ناڤ یەمەنێ و ژ بەر ڤێ یەکێ ژی رەوشا ئالۆز یا یەمەنێ دێ ب سالان ڤەکێشیت.
ل ئالیێ دی وەلاتێن کەنداڤی ژی د داخۆیانیەکێ دا دژبەریا خوە ل ھەمبەر کۆدەتایا حوسیان ل یەمەنێ دیار کرن و راگەھاندن کو ئەو تنێ وێ حوکمەتێ ناس دکەن کو ب دەنگێ خەلکێ ھاتیە سەر دەستھەلاتێ و ئەو دانپێدانێ ب وێ دەستھەلاتێ ناکەن کو حوسیان ژ ئالیێ خوە ڤە راگەھاندینە.
ئەڤرۆ:
ھەڤسەرۆکێ باژێرڤانیا مێردینێ د داخۆیانیەکی دا راگەھاند د سەدسالا ٢١ دا گەلێ کورد دیرۆکێ سەرەراست دکەت و ژ نوو ڤە دیرۆکا بەرخوەدانێ و سەرفرازیێ د نڤیسینیت و بەرخوەدان و سەرکەڤتنا کۆبانێ و شنگالێ سەلماند کو تاکە ھەڤپەیمانێ جیھانا پێشکەڤتی ل رۆژھەلاتا ناڤین کوردن و دڤێت بۆ ب تەمامی ژ ناڤبرنا تیرۆرستان و ژ نوو ڤە ئاڤەدانکرنا کۆبانێ و شنگالێ جیھان دەستێ ھاریکاریێ درێژی کوردان بکەت.
ئەحمەد تورک ھەڤسەرۆکێ باژێرڤانیا مەزن یا مێردینێ د داخۆیانیەکا تایبەت دا بۆ رۆژناما ئەڤرۆ ل سەر بابەتێن گەرم یێن رۆژەڤێ و ھەلبژارتنا بھێت یا تورکیا و رەوشا کۆبانێ و شنگالێ ئاخڤی و راگەھاند کۆ د سەدسالا ٢١ دا رەوشەکا زێرین و د ھەمان دەمێ دا ژی مەترسیدار ھاتیە پێشیا کوردان و گۆت: (ئەڤرۆ ھەموو دەرفەتێن ئازادیێ کەڤتیە دەستێ گەلێ مە و ھەکە ئەم یەکگرتنا خوە د وارێن سیاسی، سەربازی، دبلۆماسیێ و ژیانا جڤاکی دا دروست بکەین و بەرژەوەندێن نەتەوی بدەینە پێش ھەموو بەرژەوەندیێن دی ئەز باوەر دکەم ئەم دشێین ئازادیا خوە راگەھینن و ھەموو مافێن خوە گەرەنتی بکەین، ژ بەر کو رۆلێ گەلێ کورد ئێدی ل بەر چاڤە و بێی کوردان چو پرسێن رۆژھەلاتا ناڤین چارە نابن و گەلێ کورد بوویە کلیلا چارەسەریێ و ئەڤرۆ سەرکەڤتنا گەریلا، پێشمەرگە و شەرڤانان ل دژی تیرۆرستێن قاعیدە و داعشێ سەرنجا جیھانێ راکێشاندیە سەر کوردستانێ و بوویە سەدەم کو پشتەڤانێن ئازادیا گەلێ کورد د ئاستێ نێڤدەولەتی دا گەلەک زێدەتر ببن و دڤێت ئەم ڤێ دەرفەتێ بۆ خوە بکەینە دەرفەتا زێرین و بنگەھێ یەکگرتنا نەتەوی دروست بکەین).
ھەڤسەرۆکێ باژێرڤانیا مەزن یا مێردینێ ل سەر بەرخوەدان و سەرکەڤتنا ھێزێن کوردان ل کۆبانێ، شنگال و دەڤەرێن کەرکووکێ ژی راگەھاند دوژمنێن گەلێ کورد وەسا ھزر دکرن کو ھێزێن کوردان ناھێنە ل گەل ھەڤ و ناکەڤنە د یەک سەنگەری دا و دێ ل ھەمبەر تیرۆرستێن داعشێ تووشی شکەستنەکا دیرۆکی ببن و گۆت: (لێ ھەم ل باشورێ وەلات ب ھەوار چوونا ھێزێن گەریلا و ھەم ژی ل کۆبانێ ب چوونا ھێزێن پێشمەرگە ھاتە سەلماندن کو ئێدی گەلێ کورد ب ھەموو ھێزێن خوە ڤە پشتا ھەڤدو دگرن و ھیڤیێن نەحەز و دوژمنان د قرکا وان دا ھشت و باوەریەکا مەزن دا گەلێ کورد و رایا گشتی یا جیھانێ کو کورد ئێدی بۆ ئازادی و سەرفرازیا خوە یەک دەستن و پێکڤە نە، ل دووڤ ھزرا من کلیلا سەرکەڤتنا ھێزێن کوردی ل ھەمبەر داعشێ ژی ئەڤ یەکە).
ئەحمەد تورک د پشکەکا دی یا ئاخڤتنا خوە دا ژی ل سەر ھەلبژارتنێن ٧-٦-٢٠١٥ یێ پەرلەمانێ تورکیا ژی راوەستیا و دیار کر، ھەلبژارتنێن ڤێجارێ یێن پەرلەمانێ تورکیا بۆ گەلێ کورد گەلەک گرنگن و دڤێت ئەم بەندا ١٠% یێ ھەلبژارتنان دەرباز بکەین و گۆت: (بۆ سەرکەڤتنا قۆناغا ئاشتیێ و چارەکرنا پرسا کوردی دڤێت گەلێ کورد د مەیدانا سیاسەتێ دا بن و ل پەرلەمانێ تورکیا بۆ وەرگرتنا مافێن گەلێ کورد کار بکەین و بۆ ڤێ یەکێ ژی دەربازکرنا بەندا ١٠% بۆ مە ژ ھەر تشتەکێ گرنگترە و ئەز باوەر دکەم ئەم دێ ب باشی لێ ب خەباتەکا گەلەک مەزن سەرکەڤتنا خوە راگەھینن و بۆ ڤێ یەکێ ژی داخواز ژ ھەر کوردەکی دکەم کو بەرژەوەندیێن خوە یێن تاکەکەسی یان مالباتی بدەنە رەخەکی و د بەرەیێ ئازادی و دیمۆکراسیێ دا جھێ خوە بگرن و دەنگێ خوە بدەنە پارتا دیمۆکراسیا گەلان، ژ بەر کو دۆزا گەلێ کورد ئێدی ھاتیە وێ ئاستی کو بگەھیتە ئەنجامەکا باش و بۆ ڤێ یەکێ ژی یەکگرتن پێدڤیە).
ھەڤسەرۆکێ باژێرڤانیا مەزن یا مێردینێ د ئاخڤتنا خوە دا ل سەر پاشەرۆژا گەلێ کورد ژی راوەستیا و دیار کر ئەو ژ ھەر پێشکەڤتنەکا گەلێ کورد ل باشور، رۆژئاڤا و رۆژھەلاتێ کوردستانێ دلخوەش دبن و گۆت: (ئەز گەلەک گەشبینم کو دۆزا گەلێ کورد ل ھەر چار پارچێن کوردستانێ ژی بگەھیتە سەرکەڤتنێ و دڤێت ھەر پارچەکا کوردستانێ پارچێن دی ژی حەمبێز بکەت و د رەوشا خراب دا بگەھیتە ھاوارا وێ و ئەزموونا کۆبانێ و شنگالێ ببیتە ئەزموونا یەکگرتنا نەتەوی و ھەموو ھێزێن کوردستانی د چارچۆڤێ بەرژەوەندیێن بلندێن کورد و کوردستانی دا دەستێ ھەڤدو بگرن و ژ سەرکەڤتنا ھەڤدو دلخوەش ببن و ئێش و ئازارێن ھەڤدو ژی پارڤە بکەن، ژ بەر کو دیرۆکێ رەوشەکا زێرین بۆ گەلێ کورد ئافراندیە و ھەکە ئەم ژ ڤێ رەوشێ مفایێ وەرنەگرین و نەگەھنە سەرکەڤتنێ و ئازادیێ دیرۆک چو دەمەکێ مە نابۆریت).
ئه‌ڤرۆ نیوز:
ژێده‌رێن سیاسى یێن عیراقێ ئاماژه ب وێ یه‌كێ دكه‌ن كو مالكى ده‌ست ب سیاسه‌تا پشته‌ڤانیا میلیشیا و حه‌شدا شه‌عبى كریه، و پشكه‌كا زور یا ڤان هێزان ئێخستینه د بن كونترۆلا خوه‌دا و ب فه‌رمانا وى ئه‌ڤ هێزه ڤه‌لڤینێ دكه‌ن و ئارمانجا مالكى ژ ڤێ چه‌ندێ ئه‌وه كو ده‌ستهه‌لاتا وى ل ناڤه‌ندێن سه‌ربازى دا هه‌ر بمینیت و هه‌ر نوكه ئاریشه په‌یدابووینه و ل چه‌ند رۆژێن بورى هێزه‌كا حه‌شدا شه‌عبى دو ئه‌ندامێن هوزه‌كا دلیمى ل عیراقێ كوشتن و ئه‌ڤرۆ ژى ل ئه‌نبار خونیشادانه‌كا مه‌زن هاته كرن و داخوازا ده‌رێخستنا هێزا حه‌شدا شه‌عبى ل وى باژێرى هاته كرن.
نيشاندان