ئەڤرۆ:

پشتی کو رێککەفتنا د ناڤبەرا ھەرێما کوردستانێ و عیراقێ دا دا بەحس ل پێشمەرگەی ھاتیە کرن و کوردان دخواست موچێ پێشمەرگەی ل بەغدا بھێت و پێشمەرگە نەھێتە ھژمارتن وەکو زێرەڤانێن نیشتمانی، ژبەرکۆ دستورێ عیراقێ ب ئاشکرا بەحس ل زێرەڤانێن ھەرێمێ (پێشمەرگەیی) کریە و شارەزایەکا قانوونا دستوری ژی دبێژیت عیراق چ منەتان ل پێشەرگەی ناکەت و ئەرکێ وێ یە پێتڤیێن وی دابین بکەت .

دکتورە ئەڤین خالد بسپۆر دوارێ قانوونا دستوری دا و مامۆستا کولیژا قانوون و رامیاری بۆ ئەڤرۆ دیارکر کو پێشمەرگە بەرگریێ ژ ئاخا عیراقێ دکەت و چەکدارێن داعشێ مەترسینە ل سەر ئاخا عیراقێ ھەموویێ نەکو ل سەر کوردستانێ ب تنێ و گۆت ” دەمێ پێشمەرگە وان چەکداران لاواز دکەت، ئانکو داعشێ ل ھەموو عیراقێ بەر ب لاوازبوونێ ڤە دبەت” .

ئەڤینێ ئەوژی دا دیارکرن کۆ پێدڤیە ل سەر عیراقێ بودجەکا تایبەت بۆ پێشمەرگەی دابین بکەت و ل گەل ھندێ ژی دا چەکی ژی بۆ فرێکەت و گۆت ” عیراق چ منەتان ل پێشمەرگەی ناکەت و دەمێ بودجێ پێشمەرگەی ژ بەغدا بھێت، ژ بەر کوو ئەڤە بنیاتەکێ دستۆری یێ ھەی و ل مادا ١٢٢ ل برگا (٥) دا ماف دایە ھەرێمێ کو رابیت ب رێکخستن و دامەزراندنا پۆلیس و ئاسایش و زێرەڤانێن ھەرێمێ (پێشمەرگەی) , ھەر ژبەر ڤێ چەندێ ئەرکێ عیراقێ یە و چو منەتان ل سەر پێشمەرگەی ناکەت مادەم پارەی و چەکی ددەتە میلیشیاتێن شیعی، چاوا نادەتە پێشمەرگەی کو دستوری رێ دایی”.

ئەڤین خالد زێدەتر گوت” دستورێ عیراقێ ب دروستی ناھێتە بجھئینان، ژ بەر کو ھەر پارتەکا سیاسی دخوازیت بەرژەوەندیا وێ بھێتە پاراستن ل سەر کیستێ پارتێن دن و ئەڤە ژی بوویە ئەگەر کۆ ھەڤرکی بکەڤیتە د ناڤبەرا پارتێن سیاسی دا ل عیراقێ و دستور نەھێتە بجھئینان ب تایبەتی ھندەک مادێن گرنگ یێن ڤی دستوری دا کو ھندەک پارت دترسن بەرژەوەندیا وان ژناڤ بچیت”.
ل دووڤ بوچوونا ڤێ بسپۆرا قانوونا دستوری” بەری داعش ژی، پێشمەرگەی رۆلەکێ مەزن دیتیە ل عیراقێ، ژ بەر کو ھەرێما کوردستانێ دەڤەرەکا ئارام بۆ، ئەو ئارامی ژی ببو ئەگەر کو دەولەتێن دی ب رێیا ھەرێمێ بھێن کاربکەن ل عیراقێ و ئابوورێ عیراقێ بەرب پێش بچیت .”

ئەڤرۆ:
ئاژانسەکا فرەنسا ئاماژە ب ڤێ یەکێ دکەت کو کورد د شەرێ ل دژی داعشێ دا رۆلەکێ سەرەکی دگێرن و گازندا ڤێ یەکێ دکەن کو وەک پێدڤی ھاریکاریا وان ناھێتە کرن و ژ بەر ھندێ ژی سەرۆکێ ھەرێما کوردستانێ بۆ ڤێ کۆنفرانسێ ھاتە ڤەخواندن دا کو ھەموو پشکداربوویێن کۆنفرانسێ ژ راستیا شەرێ دژی داعشێ ئاگاھدار بن و پشتی کۆنفرانسێ ب دەستپێشخەریا ئەلمانیا دێ پتر ھاریکاریا کوردان ھێتە کرن.
ئاژانسا فرانس پرێس د راپۆرتەکێ دا ئاماژە ب ڤێ یەکێ دکەت کو ڤەخواندنا سەرۆکێ ھەرێما کوردستانێ مەسعود بارزانی بۆ کۆنفرانسێ میونخ پێنگاڤەکا گەلەک باش بوو و حوکمەتا ئەلمانیا نھا بزاڤێ دکەت کو ب رێیا ھاریکاری کرنا ھەرێما کوردستانێ و عیراقێ د شەرێ ل دژی داعشێ دا ھەموو ئورۆپا و ئەلمانیا ژ مەترسیا تیرۆرێ دوور بکەت و یا دی ئەلمانیا دخوازیت وەک ھەڤرکەکێ نوو یێ ئەمریکا ل دەڤەرێ خوە نیشا بدەت و بەرژەوەندیێن خوە یێن ئابووری و سیاسی زێدەتر بکەت و ژ بەر ھندێ ژی ئەو گرنگیەکا تایبەت ددەنە ھەرێما کوردستانێ.
د بەردەوامیا راپۆرتێ دا ئەو یەک ژی ھاتیە دیار کرن کو ئەڤ کۆنفرانسە ل دەمەکێ دا دھێتە گێران کو بەری نھا پەرلەمانێ ئەلمانیا بریار دا کو چەک بۆ ھەرێما کوردستانێ بھێنە ھنارتن و ئەڤە ھەموو پێکڤە دھێنە کرن و ئەلمانیا دخوازیت ب رێیا ھاریکاری کرنا عیراقێ و ھەرێما کوردستانێ سەرکێشیا شەرێ دژی تیرۆرێ بکەت و وەک وەلاتەکێ ب ھێز و سەرکەڤتی ل ھەمبەر تیرۆرا جیھانێ دەرکەڤیتە پێش و ژ بەر ڤێ یەکێ ژی پشتی کۆنفرانسێ میونخ ئەلمانیا دێ بزاڤێ کەت وەلاتێن دی یێن ھەڤپەیمانێ شەرێ داعشێ ژی پتر چەکان بدەنە ھەرێما کوردستانێ.
د ڤێ دەربارێ دا د. ئیبراھیم شەرەفانی مامۆستایێ زانکۆیا دھۆکێ ژی دیار کر کو ڤەخواندنا سەرۆک بارزانی بۆ کۆنفرانسێ میونخ نیشا ددەت کو ھێزێن جیھانی دخوازن د نەخشێ نوو یێ دەڤەرێ دا کورد خوەدان رۆل بن و نھا بزاڤەکا مەزن د ئاستێ جیھانێ بۆ بنەجە کرنا نەخشێ نوو یێ دەڤەرا رۆژھەلاتا ناڤین ھەیە و ئەو باش دزانن کو بێی کوردان ئێدی چو بەرنامێن وان برێڤە ناچن و سیستەمێ بەرێ ژی تووشی شکەستنێ ھاتیە و بۆ ئاڤاکرنا رۆژھەلاتا ناڤینەکا نوو ئەو پێدڤی کوردانە و ڤەخواندنا جەنابێ سەرۆک بارزانی بۆ کۆنفرانسێ میونخ ژی پەیاما ھێزێن جیھانی یە بۆ کوردان.