ئه‌ڤرۆ نيوز:
سه‌رۆكێ هه‌رێما كوردستانێ د ديداره‌كێ دا ل گه‌ل رۆژناما حه‌يات يا له‌نده‌نى راگه‌هاند كو سنورێن د رێكه‌فتناما سايكس بيكۆ دا هاتين د ده‌ستكردن و ئه‌و سنورێ، نوكه ل ده‌ڤه‌رێ دهێنه كێشان يێن ب خوينێ دهێنه كێشان د ناڤبه‌را ده‌وله‌تان دا يان د ناڤ وان دا، ته‌كست ژى ل سه‌ر وێ چه‌ندێ كر كو كه دڤێت عيراق يا ئێكگرتى بيت دڤێت دارشتنه‌كا دى يا ناڤخۆيى بۆ بهێته كرن.
بارزانى ل ژوورا عه‌مه‌لياتێن خوه يا پێشڤه ل به‌ره‌يێن شه‌رى ل گه‌ل داعش كو ب درێژاهيا 1050 كلم يێ درێژه بۆ رۆژناما حه‌يات دايه زانين كو سونه قوربانيێن مه‌زن يێن ڤى شه‌رى نه كو داعش ل سه‌ر ئه‌وان سه‌پانديه، چونكو ل ده‌ڤه‌را وان دهێته كرن و داخواز ژى كر كو زووى رووى ب روويێ وى گرۆپێ تيرۆرستى ببن و ژ ناڤ ببه‌ن و گۆت: “پێدڤيه سه‌ركرداتيا سياسى ل عيراقێ بهێته د رێ دا كو ب ناڤێ ئه‌وان بيت”.
بارزانى ته‌كست ل سه‌ر وێ چه‌ندێ كر كو پێشمه‌رگه‌يى ئه‌و سترى يێ ئينايه ده‌ر يێ ب ناڤێ داعش و ژ روويه‌كێ مه‌زن يێ مه‌يدانێ كريه ده‌ر.
داخواز ژى كريه كو چه‌كێ گران ب هێزێن پێشمه‌رگه‌يى بهێته دان هه‌تا بشێت ئه‌وى گرۆپى بشكێنيت و گۆت: “شه‌رێ دژى داعش گه‌له‌ك ژ وى شه‌رى دژوارتره يێ ل دژى سۆپايێ عيراقێ ل سه‌ر ده‌مێ سه‌دام حسێن دا دهاته كرن”.
گۆتژى: “نوكه داعش خودانا 50 هزار چه‌كدارايه و شاره‌زا و بسپۆرێن له‌شكرى يێن هه‌ين كو ژ چه‌ندين وه‌لاتان وه‌كو ئه‌فسه‌رێن خانه‌نشينكرى يێن سۆپايێ سۆڤيه‌ت يێن جاران و عيراق و سوريا و ئۆزپاكستان و كازاخستان و چيچانێ ڤه هاتينه”.
د هه‌مان ده‌م دا بارزانى راگه‌هاند ژى كو داعش خالێن ب هێز يێن هه‌ين وه‌كو ته‌قاندنا تۆپ و هاونان و راست و دروستيا ئامانجێن خوه دبينن ژ ئه‌گه‌رێ هه‌بوونا وان بسپۆرێن بيانى يێن چووينه ناڤ وى گرۆپى.
مه‌سعود بارزانى سه‌رۆكێ هه‌رێما كوردستانێ ئه‌و ئێك ژى نه‌ڤه‌شارت كو پشتى هنارتنا مۆشه‌كێن ميلان يێ فره‌نسى ژ لايێ حوكمه‌تا ئه‌لمانيا ڤه، كاودانێن شه‌رى يێن به‌ر ب پێشڤه چووين و شه‌ر يێ هاتيه گوهۆڕين.
گۆتژى: “پشتى من قاسم سلێمانى فه‌رماندێ سۆپايێ قودس يێ ئيرانێ ل باژێرێ هه‌ولێر ديتى، ئيرانێ دو فرۆكێن هاريكاريێن له‌شكرى گه‌هاندينه هێزێن پێشمه‌رگه‌يى و نوكه ژى ئه‌و هه‌ڤكارى ماوه بۆ ماوه‌يى د به‌رده‌وامن”.
ده‌رباره‌يى حوكمه‌تا عيراقێ ژى بارزانى گۆت: “ژ ئه‌گه‌رێ ئه‌ڤان كاودانێن نوكه ل عيراقێ نه‌شيايمه حه‌يده‌ر عه‌بادى سه‌رۆك وه‌زيرێن عيراقێ ببينم، هه‌كه بڕياره عيراق ئێكگرتى بمينيت، دڤێت دارشتنه‌كا گشتى بهێته كرن”، بارزانى مه‌ره‌م پێ سنورێن ناڤخۆيى يه.
ده‌رباره‌يى كه‌ركووك ژى مه‌سعود بارزانى سه‌رۆكێ هه‌رێما كوردستانێ گۆت: “ئه‌وى باژێرى پێشمه‌رگه يێن تێدا و پێدڤى ب چو هێزێن دى نينه، ته‌كست ژى كر كو كه‌ركووك چو جاران ناكه‌ڤيته ده‌ست داعش”.
نيشاندان
