ئەڤرۆ:
عائیشا تاھا ئوسمان ھزر نەدکر کو دێ رۆژێن کوشتنا ب ھوڤ زڤرنە ڤە، بەلکی ھزرا وێ چەندێ کر بیت کو شەرێ ھەرێما کوردستانێ بۆ باشترکرنا سەقامگیری و بەر ب پێشچوونێ یە. نەھاتبوو ھزرا وێ کو بکوژ دێ سێ ژ پێنج کورێن وێ د ئێک دەمدا ژێ ستینیت.
ئەڤە ل ٢٥ی تشرینا دویێ یا سالا بۆری چێبوو، دو ژ کورێن وێ چوونە سەرەدانا برایێ خوە یێ نەقیبێ پێشمەرگەی ل دەڤەرا زومار، دەمێ ئەو ل وێرێ، شەرەکێ مەزن ل گەل داعش روویدا، وان ژی ل گەل برایێ خوە پشکداری کر. رۆل د رزگارکرنا چەند بەشەکێن باژێرکێ زومارێ دا گێرا و دەمێ گەھشتینە جھەکێ دەستنیشانکری، ترومبێلەکا بومبەکری پەقی و پرتێن وان بلند بوون. د ئێک دەمدا عائیشایێ ھەر سێ کورێن خوە مەولود، ئەحمەد و نەجاد ژ دەست دان و ھێزێن پێشمەرگەی ژی ئەو ژ دەست دان.
ئەڤە ژلایێ مەسعود بارزانی سەرۆکێ ھەرێما کوردستانێ ڤە د ژوورا ئۆپەراسیونان ڤە ل نێزیک سەنگەرێن روو ب رووبوونێ ل گەل داعش بۆ رۆژناما (الحیاە) ھاتە ڤەگێران.
د پشکەکا ھەڤپەیڤینێ دا سەرۆکێ ھەرێما کوردستانێ بەحسێ روودانێن شەھید بوونا چەند پێشمەرگەیەکان دکەت و ل دۆر دایکا سێ شەھیدان دبێژیت: (رووداوا شەھیدبوونا ھەر سێ برایان ل بیرا من ناچیت، ئەز چوومە مالا خێزانا وان ل سۆران دایکا وان، خاتوون عائیشایێ پێشوازی ل من کر، ل وی دەمی ھەڤژینێن سێ شەھیدان و نەڤیێن وێ ل دەوروبەری وێ بوون. بارودۆخ گەلەک یێ ب ئێش بوو و نوزانم چاوان بەحس بکەم. من گۆتێ ئەم ھەموو دێ ب وێ چەندێ سەربلند بین، تو دایکا مە بی و ئەم کورێن تە بین، ئەو شەھیدێن مللەتی نە. ھەموو ئەوێن شەھید بووین کورێن تە نە).
بارزانی زێدەتر دبێژیت: (دایکا سێ شەھیدان گۆت: نەخوەشیا نە ھەلگرە. ئەڤە سەربلندیەکا مەزنە بۆ خێزانا مە، مە دو کورێن دی یێن ھەین و د ئامادەنە خوینا خوە بۆ کوردستانێ ببەخشن).
بارزانی د ئاخڤت و بزاڤ دکرن رۆندکێن خوە رابگریت. بارزانی گۆت: (ئێک ژ پێشمەرگان زانی کو برایەکێ وی شەھید بوویە و بابێ وی بریندار بوویە. پەیوەندی ب برایەکێ دی یێ خوە کر کو ئەو ل بەرەیەکێ دی یێ شەری بوو و گۆتێ: (د گەل روفاتێ برایێ مە ھەرە و ھەکە باب ژی مر ڤەشێرن و ڤەگەرە بەرۆکێن شەری و گیرو نەبە، لێ ئەز بەرۆکێن شەری بەرنادەم).
مەسعود بارزانی ھەڤدەم چیرۆکەکا دی ڤەگێرا کو ل ١٧ی ١٢ یا سالا بۆری روویدا بوو و پالەوانێ وێ شێخ ئەحمەد مزووری بوو یێ بەرنیاس ب (شێخ ئەحمۆ). ترومبێلەکا بومبەکری نێزیک بوو، وی دەمی شێخ ئەحمەد چوو پێش بۆ رێگرتنێ ل ترومبێلێ، لێ دەمێ وێ چەندێ نەمابوو، فەرمان دا سەربازێن خوە کو خوە بێخنە سەر عەردی و خوە بەربلاڤ بکەن، ل وی دەمی ترومبێلا بومبەکری خوە ب ترۆمبێلا وی یا سەربازی ڤە پەقاند، ئەو شەھید بوو و گیانێ ب سەدان ژ برادەرێن خوە رزگار کر.
رۆژنامێ پرسیار ژ بارزانی کر ل دۆر نەخوەشترین دەمێن رووی ب رووبوونا نوکە، گۆت: (ھەر دلۆپەکا خوینێ بھێتە رشتن، زیانەکا مەزنە، ھزر بکە تو سپێدێ ئەفسەرەکێ ببینی و ئێڤاری خەبەرێ شەھید بوونا وی بۆ تە بھێت. و ل ھندەک دەمان کورێ شەھیدی بیت، یان نەڤێی شەھیدی بیت).
بارزانی دیار کر کو زیانێن پێشمەرگەی ھەتا نوکە ژ ٨٠٠ شەھیدان دەرباز بووینە، د ناڤ وان دا ٣٠٠ ئەفسەر بوون. دو ئەفسەر ب پلا لیوا یێن شەھید بووین و ١٠ ژی ب پلا عەمید و گەلەکێن دی ب پلەیێن جودا.
زێدەتر گۆت: (باج زور یا گرانە، لێ دڤێت بھێتە دان، ژ بەر کو بەرگریکرنە ژ ھەبوونا گەلەکی و کەرامەتا وی گەلی. بوونا ھەرێما کوردستانێ رووی ب رووی مەترسیەکا گەلەک ترسناک بوویە، بەلێ ئەز ب باوەری ڤە دشێم بێژم کو مە ھەیبەتا داعش شکاند و مە نێزیکی ١٧ ھزار کیلۆمەترێن دوجا ژ داگیرکرنێ رزگارکرن. خوسارەتیێن وان ژ ٣ ھزار شەرکەران کێمتر نینن. من بەغدا و چەند لایەنەکێن دی ئاگەھدار کرینە کو ئەم د ئامادەینە شەرێ ئێکلاکەر ل گەل تیروریستان ئەنجام بدەین، ھەکە ئەو چەکێ قورسێ مە پێدڤی پێ بۆ مە بھێتە دابینکرن، رێ نادەین ئەوا روویدای بھێتە دووبارەکرن، من دڤێت ب ئاشکرای بێژم ل وان کەسان نابۆرین یێن بێتاوان سەربرین و ژنێن ئێزدی رەڤاندین. ل وان ژی نابۆرین یێن ھاڤپشکێن وان درندان بوون و ھاریکاریا وان کری. مەبەستا من ب چ رەنگان تولڤەکرن نینە، بەلکی مەبەستا من دادپەروەریە).
بارزانی پەسنا قوربانیێن خەلکێ کوردستانێ ددەت د ھەموو بواران دا. گۆت: (شەری دەمەکێ دەستپێکر، حکوومەتا مالکی مووچێن خەلکێ ھەرێمێ راگرتبوون. سەرباری وێ وەلاتیان ب لەز پشتەڤانیا پێشمەرگەی کر، ھندەک جاران خەلکێ زەنگین دەستپێشخەری دکر و خوارنا بەرەیەکێ شەری بتمامی دابین دکر.
بارزانی ئاماژە ب وێ یەکێ کر کو ھەماھەنگیا وان ل گەل لەشکرێ عیراقێ باشتر بوویە، لێ یێ ئامادەنەبوو پێشبینیا ب دووماھی ھاتنا شەری بکەت. بارزانی دانپێدان ب وێ چەندێ کر کو شەرێ نوکە ژ شەرێ ل گەل رژێما بەرێ یا (سەدامی) ب زەحمەتتر و جوداترە، لێ باوەریا خو دوپاتکر کو دشێن داعشێ بشکێنن).