ئه‌ڤرۆنیۆز ، هه‌رهین محه‌مه‌د:
سترانبێژێ گه‌نج سه‌لام نهێلى د دیداره‌كێ دا بۆ ئه‌ڤرۆ نیۆز دیاركر كو بۆ ماوێ ساله‌كێ یه مژوولى به‌رنامه‌كێ هه‌مه‌ره‌نگه دگه‌ل سترانبێژا كچ (كلارا زاى) .
نهێلى گۆت: ئه‌ڤ به‌رنامه دێ به‌حسێ ئێك بوونا براینى د ناڤبه‌را هه‌موو ئول ونه‌ته‌وێن ل سه‌ر ئاخا كوردستانێ كه‌ت و ل هه‌موو چارشه‌مبا ب بۆ ماوێ ده‌مژمێره‌كێ ب ره‌نگه‌كێ زیندى ل رادیویا دهوك ب زمانێ كوردى وسریانى دێ هێته پێش كێش كرن.
ئه‌ڤرۆ نیۆز، قائید میرۆ
وه‌زیرێ كاروبارێن كۆمه‌لایه‌تی ته‌كه‌ز كر، گیرۆبوونا موچێ كێم ئه‌ندامان نه دده‌ستێ وان دایه و گۆت: بزاڤێ دهێته كرن مووچێ كێم ئه‌ندامان بهێنه زێده‌كرن.
مه‌حه‌مه‌د هاودیانی، وه‌زیرێ كاروبارێن كۆمه‌لایه‌تی دیاركر، وه‌زاره‌تێ ل به‌ره موچێ خۆدان پێدڤیێن تایبه‌ت و كێم ئه‌ندامان زێده بكه‌ت، به‌لێ پشتی چاره‌سه‌ربوونا قه‌یرانا دارایی .
هاودیانی دیاركر ژى كو هه‌موو هه‌یڤێ وه‌زاره‌تا كاروبارێن كۆمه‌لایه‌تی لیستا موچێ خۆدان پێدڤیێن تایبه‌ت به‌رهه‌ڤ دكه‌ت، به‌لێ تنێ وه‌زاره‌تا دارایی و ئابوری ده‌ستهه‌لاتا به‌لافكرنا موچه‌ی هه‌یه ” مه‌ژی گازنده گه‌هاندیه وه‌زاره‌تا دارایی كو موچێ كێم ئه‌ندامان گیرۆ نه‌كه‌ن.
ل گوره‌ی راگه‌هاندنه‌كا وه‌زاره‌تا كاروبارێن كۆمه‌لایه‌تی كو وێنه‌یه‌ك گه‌هشتیه مالپه‌ڕێ ئه‌ڤرۆ نیۆز تێدا هاتیه: وه‌زیرێ كاروبارێن كۆمه‌لایه‌تی ئه‌ڤ ئاخفتن پشتی پێشوازیا سه‌رۆكێ كۆمه‌لا كورته بالا كرینه و وه‌زیرى گۆتیه” ئه‌م یێ كار دكه‌ین بۆ راستڤه‌كرنا قانوونا كێم ئه‌ندامان و نه‌هێلانا كێماسیان بۆ كێم ئه‌ندامان، هه‌ر وه‌ختێ ره‌وش ئاسایی بۆ قه‌یرانا دارایی چاره‌سه‌ربوو، ئه‌ڤه دێ موچێ كێم ئه‌نداما دده‌مێ خوه‌دا هه‌یڤانه هێته به‌لاظكرن و موچه دێ زێده‌ژی بن.
ئه‌ڤرۆ نیوز:
د روونشتنا ئه‌ڤرۆ ئێڤارى دا، په‌رله‌مانێ عیراقێ چه‌ند برگێن پرۆژه قانوونا بودجێ گشتى یێ عیراقێ یێ 2015 په‌سه‌ند كرن ژ وان ژى، بودجێ په‌رله‌مانێ عیراقێ و ده‌سته‌یا سه‌ربه‌خویا مافێن مروڤى و بودجێ ئه‌نجومه‌نێ گشتى یێ دادوه‌ره‌یێ و ته‌رخانكرنا 540 ملیاران بۆ وه‌به‌رهێنانێ، هه‌روه‌سا 17% ژ به‌هرا هه‌رێمێ ب پرانیا ده‌نگا هاته په‌سه‌ندكرن و هه‌روه‌سا ده‌نگ ب وى بودجه‌ى هاته دان كو بۆ هێزێن پێشمه‌رگه‌ى هاتیه ته‌رخانكرن.
ئه‌ڤرۆ نیوز، بارزان سلیمان مزوورى
دگه‌ل ده‌ستپێكرنا وه‌رزێ نوو یێ كه‌نالی NRT كو ژڤانه 1 شوباتێ ده‌ست ب وه‌شانا خوه بكه‌ت، چار په‌یامنێران ل ده‌ڤه‌را به‌هدینان ده‌ست ژ كاری خوه به‌ردا.
ئیك ژ په‌یامنێرێن ده‌ست ژ كارێ خوه به‌ردایی ئه‌ڤ چه‌نده بۆ ئه‌ڤرۆ نیۆز پشت راست كر و گۆت: هه‌ر ئێك ژ یۆسف موسا په‌یامنێرێ NRT ل قه‌زا زاخو ،دلشاد ئه‌نوه‌ر ل سنورێ قه‌زا ئاكرێ،بریار نیروه‌یی په‌یامنێر ل ده‌ڤه‌را ئامیدی و به‌رواری بالا ،دیمان محمود په‌یامنێر ل سه‌نته‌رێ دهوكێ ده‌ست ژ كارى به‌رداینه.
ل گوری زانیاریان ئه‌گه‌رێ ده‌ست كاربه‌ردانا ڤان په‌یامنیران ژ كه‌نالی ئێن ئار تی ڤه‌دگه‌ریت كو NRT سوزا خوه پشتى وان گرێبه‌ست كرى ل گه‌ل بجه نه‌ئینایه.
ئه‌ڤرۆ نيوز:
ژ به‌ر هه‌بوونا خالێن هه‌ڤركى ل سه‌ر هه‌يى ب تايبه‌ت چاوانيا هنارتنا په‌ترۆلا هه‌رێما كوردستانێ، كۆمبوونا جڤاتا نوونه‌ران ل دۆر بودجه‌يى هاته پاشخستن.
حاكم سه‌رحان ئه‌ندامێ لژنا دارايى و ئابوورى ل جڤاتا نوونه‌رێن عيراقێ بۆ ئه‌ڤرۆ نيوز راگه‌هاند كو ژ به‌ر هه‌بوونا هه‌ڤركيان ل سه‌ر سێ خالان كۆمبوونا جڤاتا نوونه‌ران بۆ هه‌تا ده‌مژمێر 5ى ئێڤارى هاته پاشخستن.
زێده‌تر گۆت: “خالێن هه‌ڤركى ل سه‌ر گرێدايى حه‌شه‌د شه‌عبى و داد و ڤه‌كۆلينێ و په‌ترۆلا هه‌رێمێ بوون، رازيبوون ل سه‌ر هه‌ردويێن ئێكێ هاتيه كرن و بابه‌تێ فرۆتنا په‌ترۆلا هه‌رێمێ مايه وه‌سان”.
دا زانين ژى كو نوكه لايه‌نێن سياسى ل گه‌ل سه‌رۆكێ جڤاتا نوونه‌رێن عيراقێ د كۆمبوونێ دانه دا كو بگه‌هنه رێكه‌فتنه‌كا سياسى و پاشان ده‌نگدان ل سه‌ر بودجێ بهێته كرن.
ئه‌ڤرۆ نيوز، مه‌سعود خه‌له‌ف:
پشتی شوره‌شا سووری په‌نابه‌رێن كورد ل گه‌له‌ك وه‌لاتان به‌ربه‌لاڤ بوون كو ئێك ژ وا وه‌لاتان بولگاریا بوو و گه‌له‌ك ژ كوردێن رۆژئاڤا به‌رێ خوه دانه كامپێن بولگاریا، لێ ئه‌ڤ كامپه چ مه‌رجێن سلامه‌تی و خزمه‌تگوزاری تێدا نینن.
هه‌ر چه‌نده كو په‌نابه‌ر رازیبوون ب وان شه‌رت مه‌رجان، لێ مه‌ترسی هێشتا به‌رده‌وامن و ئه‌ڤ ده‌مه‌كه چه‌ند گروپێن شوفینی یێن بولگاری گه‌فین كوشتنێ ل وان دكه‌ین و ژ وان داخواز دكه‌ین كو ژ بولگاریا ده‌ركه‌ڤن.
هه‌ژی گۆتنێ یه كو په‌نابه‌ران چه‌ندین جار داخواز ژ لایه‌نێن په‌یوه‌ندیدار كرینه كو وان ببارێزن، لی چ گوهدان ب وان نه‌كرن و ژ وان را گۆتن، یێ ڤێرێ نه ب دلێ وی بیت بلا بۆ خوه بچیته وه‌لاته‌كی دی.
ئه‌ڤه چه‌ندین جاره كو په‌نابه‌رێن كورد ل بولگاریا دهینه لێدان و كوشتن ژ لایێ كه‌سێن شوفینی یێن بولگاری ڤه و ره‌وشا ڤان په‌نابه‌ران د كامپان دا گه‌له‌ك كامباخه و داخواز ژ رێكخراو و كومه‌له‌یێن ناڤنه‌ته‌وی دكه‌ین كو ب هاوارا وانڤه بچن.
ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ راگه‌هاند كو دهۆك كه‌يسه‌كا تايبه‌ته و دڤێت د پرۆژێ بودجا هه‌رێما كوردستانێ دا تايبه‌تمه‌ندى پێ بهێته دان.
محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ، د نڤيسينه‌كێ دا ل سه‌ر تۆرا جڤاكيا فه‌يسبۆكى به‌لاڤ كريه كو دڤێت حسابه‌كا تایبەت بۆ پارێزگەها دهۆکێ بهێتە کرن و رێژەیا بەریا نهۆ کو ٪٢٣ یە، ب هیچ رەنگەکی بەشی داخوازیێن پارێزگەها دهۆکێ ناکەت. هژمارا ئاکنجیێن پارێزگەهێ دووجارکی لێهاتیە و ئەڤە دڤێت بەرچاڤ بهێتە وەرگرتن.
ئه‌ڤه ژى ده‌قێ نڤيسينا وێ يه:
دهۆک کەیسەکێ تایبەتە!
د پرۆژەیێ بۆدجەیا هەرێما کوردستانێ دڤێت حسابەکا تایبەت بۆ پارێزگەها دهۆکێ بهێتە کرن و رێژەیا بەریا نهۆ کو 23% یە، ب هیچ رەنگەکی بەشی داخوازیێن پارێزگەها دهۆکێ ناکەت. هژمارا ئاکنجیێن پارێزگەهێ دووجارکی لێهاتیە و ئەڤە دڤێت بەرچاڤ بهێتە وەرگرتن. د ڤێدا، گشت پەرلەمانتارێن کوردستانێ، ب تایبەتی یێن پارێزگەها دهۆکێ، دڤێت پشتەڤان بن و بهەڤرا کار بۆ بکەین.
نهۆ پارێزگەها دهۆکێ سالەکا پڕی قەیران دەرباز دکەت. بارگرانیا ڤێ قەیرانێ و کێشەیێن سەرهلدایی ل سەرانسەری وەلاتی، دهۆک، ژ هەر جهەکێ پتر لێ بوویە خۆدان و کارتێکرن لێ هاتیە کریە. ئەڤرۆ پارێزگەها دهۆکێ نێزیکی ملیۆن و نیڤ ئاوارە و پەنابەرێن ناڤخۆیی و نێڤدەولەتی لێ هەنە کو ئەڤ هژمارە، ژ هژمارا ئاکنجیێن پارێزگەهێ بخوە مەزنترە. بڤی رەنگی، دهۆک دبیتە تاکە پارێزگەهـ ل سەرانسەری رۆژهەلاتا ناڤین کو وەک پەناگەهەکا ئێمن بۆ زیاندیتیێن قەیرانێن ناڤخۆیی دهێتە تەماشەکرن.
داخوازا سەرکەفتنێ بۆ سازی و دامەزراوەیێن دهۆکێ دکەین و ئەم هەموو بهەڤرا دڤێت بۆ زاڵبوون لسەر قەیرانان کار بکەین. ژ خۆدایێ مەزن دخوازین کو دڤێ قەیرانێ دا پشت و پەناهێ مە هەموان بیت.
محەمەدعەلی یاسین
ئەندامێ پەرلەمانێ کوردستانێ
29/01/2015
نيشاندان