غه‌یاس سورچی به‌رپرسێ راگه‌هاندنا مه‌لبه‌ندێ ئیكه‌تیێ ل موسل بو ئه‌ڤرۆ نیوز راگه‌هاند: د شه‌رێ دوهی یێ میحوه‌رێ ناوه‌ران دا 18 داعش هاتبوونه كوشتن و 34 ژی برینداربوون .
ناڤبری ئه‌و چه‌نده ژی دیاركر د ناڤا ئه‌وان كوشتیێن داعشێ دا دوو ئه‌میر هه‌بوینه و سه‌ركرده‌یێن سه‌ربازى یێن ئه‌وێ ده‌ڤه‌رێ بوون و كوردن و ئێك ژ برینداران ژی سه‌ركرده‌یه‌كێ وان بوویه ب ره‌گه‌ز كوردبویه .
ئه‌ڤرۆ نیوز:
ئه‌ڤرۆ چه‌ند رێكخراوێن كومه‌لگه‌هێ مه‌ده‌نى ب نوونه‌راتیا چوار باژێرێن كوردستانێ، سه‌را قونسولخانا به‌ریتانیا ل هه‌ولێرێ دان و ژ ئالیێ جێگرێ قونسولێ به‌ریتانى ڤه هاتنه پێشوازیكرن و یاداشته‌كا نه‌رازیبوونێ ل دۆر نه‌داخوازكرنا كوردستانێ بۆ كۆنگرێ له‌نده‌ن یێ دژى تیرورێ پێشكێشكرن كو 22 وه‌لاتان پشكدارى تێدا كربوون و هه‌رێما كوردستانێ نه‌هاتبوو داخوازكرن.
كاوار نێروه‌یى به‌رپرسێ سه‌نته‌رێ باگێرا یێ روشنبیرى بۆ ئه‌ڤرۆ نیوز دیاركر كو د وان سه‌ره‌راى ده‌ستخوشى و سوپاسیا خه‌لكێ كوردستانێ بۆ وان هه‌ڤكاریێن ( سه‌ربازى و لوجستى و مروڤى) یێن پێشكێشى حكومه‌ت و گه‌لێ كوردستانێ هاتینه كرن، وان نه‌رازیبوونا خوه د یاداشته‌كێ دا گه‌هاندێ كو خه‌لك و حكومه‌تا هه‌رێما كوردستانێ د نه‌رازینه ژبه‌ر كو نوونه‌رێ هه‌رێما كوردستانێ بۆ وى كۆنگرێ له‌نده‌ن نه‌هاتنه داخوازكرن، د ده‌مه‌كى دا كو تاكه هێزا ل سه‌ر ئه‌ردێ واقع، شه‌رێ تیرورێ دكه‌ت، هێزا پێشمه‌رگێ كوردستانێ یه كو زوورترین قوربانى و شه‌هید داینه.
كاوار نێروه‌یى دیاركر كو قه‌نسولخانێ پشته‌ڤانیێ خوه بۆ داخوازى و گازاندا وان دیاركر و ئاماژه دا وێ چه‌ندێ كو ئه‌و ب رێیا بالیوزخانا خوه ل به‌غدا دێ حكومه‌تا عیراقێ ئاگه‌هدار كه‌ن كو ره‌فتارێن ب ڤى ره‌نگى دووباره نه‌بن كو پێدڤیبوو حكومه‌تا عیراقێ نوونه‌ره‌كێ هه‌رێمێ ژى داخوازى كۆنگره‌ى كربا.
ئه‌ڤرۆ نیوز:
عه‌مید مسلح زێبارى فه‌رماندێ هێزێن پێشمه‌رگه‌ى ل كوبانێ دیاركر كو پشتى دوهى باژێرێ كوبانى ب تمامى ژ تیرورستێن داعش هاتیه پاقژكرن، ئێكسه‌ر شه‌رڤان و هێزێن پێشمه‌رگه‌ى سێ گوندێن دى ژى ل ده‌وروبه‌رێن گرێ مشته‌نوور، ته‌رمك مه‌میت، حه‌لنج كو دكه‌ڤیته سه‌ر رێیا حه‌له‌بێ ل باشوورێ كوبانێ رزگاركرن و بۆ مالپه‌رێ پارتى گۆت: خه‌لك ده‌ست ب ڤه‌گه‌ریانێ كرینه بۆ كوبانێ.
ئه‌ڤرۆ نیوز,ره‌زوان رۆژبه‌یانى:
كومپانیا ئه‌فرێن بۆ وه‌به‌رهێنانا نه‌فتێ ل سنورێ قه‌زا به‌رده‌ره‌ش چه‌ند كه‌ل و په‌لێن پێدڤى یێن زڤستانێ ب سه‌ر ئاواران دا دابه‌ش كرن.
صالح عیسى به‌رسێ راگه‌هاندن ل قایمقامیا قه‌زا به‌رده‌ره‌ش بۆ ئه‌ڤرۆ نیوز گوت: ئه‌ڤرۆ ل رێكه‌فتێ 27/1/2015 كومپانیا ئه‌فرێن بۆ وه‌به‌رهێنانا نه‌فتێ ل سنورێ قه‌زا به‌رده‌ره‌ش چه‌ند كه‌ل و په‌لێن پێتڤى یێن زڤستانى ب سه‌ر په‌نابه‌ران دابه‌ش كرن كو هه‌ر خێزانه‌ك سێ به‌تانى و ئێك زۆپا بۆ هاتبوونه دابین كرن.
ئه‌ڤرۆ نیۆز، قائید میرۆ
د شه‌ڕێ ئه‌ڤرۆ یێ قه‌زا شنگالێ دا، كو داعش ل سێ تاخان هێرش كره سه‌ر چه‌په‌رێن پێشمه‌رگه‌ی ، ئه‌میره‌كێ داعش هاتیه كوشتن و گومان هه‌یه كورد بیت.
عه‌مید به‌هرام دۆسكی، فه‌رماندێ میحوه‌رێ شنگال بۆ ئه‌ڤرۆ نیۆز دیاركر، د شه‌ڕێ ئه‌ڤرۆ یێ قه‌زا شنگالێ د نێڤبه‌را هێزێن پێشمه‌رگه و تیرۆرستێن داعش، ئه‌میره‌كێ داعش بناڤێ ئه‌بو عومه‌رێ كوردی هاتیه كوشتن و لاشه‌یێ وی كه‌فتیه دده‌ستێ پێشمه‌رگه‌ی دا.
دۆسكی خویاژیكر، گۆمان هه‌یه ئه‌ڤ ئه‌میرێ داعش كوردبیت، ژبه‌ركو ناڤێ وی یێ كورددانه، به‌لێ ده‌مێ شه‌ڕێ پێشمه‌رگه‌ی دكر، ب زمانێ عه‌ره‌بی دئاخفت، هێشتا رۆهن نینه كورده یان عه‌ره‌ب.
ئه‌ڤرۆ نیوز:
وه‌زیرێ دارایى و ئابوورى راگه‌هاند كو مووچێ هه‌یڤا 12 یێ سالا 2014 یێ به‌رهه‌ڤه و دێ ده‌ست ب به‌لاڤكرنا وێ هێته كرن.
رێباز محه‌مه‌د وه‌زیرێ دارایى و ئابوورى ل حكومه‌تا هه‌رێما كوردستانێ راگه‌هاند رۆژا 5 شه‌مبى یان ئێكشه‌مبى، دێ ده‌ست ب به‌لاڤكرنا مووچێ هه‌یڤا 12 یێ فه‌رمانبه‌رێن هه‌رێما كوردستانێ هێته كرن و گۆت: مووچه ژ داهاتێ ناڤخو هاتیه دابینكرن.
ئه‌ڤرۆ نیوز، بارزان مزوورى
به‌رى چه‌نده‌كێ ل سه‌ر جووت سایدێ سه‌ره‌كی یێ شێخان بۆ كومه‌لگه‌ها چره ل نێزیك گوندێ پیربب روودانه‌ك د ناڤبه‌را سێ ترومبێلێن سه‌ربازى و ترۆمبێله‌كا پاس یا ڤه‌گوهاستنا قوتابیان رویدا.
به‌رپرسێ پشكا هاتنوچونا قه‌زا شێخان، پێشه‌نگ به‌درخان محه‌مه‌د سه‌لیم، بۆ ئه‌ڤرۆ نیۆز دیار كر كۆ به‌رى چه‌ند خوله‌كان ل سه‌ر جووت سایدێ سه‌ره‌كیا شێخان بۆ كومه‌لگه‌ها چره ل نێزیك گوندێ پیربب رویدانه‌ك دناڤبه‌را سێ ترومبێلێن سه‌ربازى ژ ئێك جور و ترومبێله‌كا ژ جورێ پاس یا ڤه‌گوهاستنا قوتابیان رویدا ، د ئه‌نجام دا زیانێن مه‌زن ب ترومبێلا كه‌فتن و گیان بسلامه‌ت بوون.
ناڤبرى دیار كر كۆ ئێك ژوان ترومبێلا له‌زاتى بكار ئینا بوو و نه‌شیایه كونترولێ ل سه‌ر له‌زاتیا خوه بكه‌ت و تووشى لێكدانێ دبن .
ئه‌ڤرۆ نیوز ، نه‌وزاد زاده هلۆرى:
پشتى چه‌ند هه‌ول و بزاڤه‌كێن زور ژ بۆ دامه‌زراندنا رێكخراوه‌كا تایبه‌ت ب مافێن زارویان ڤه ، فه‌رمانا دامه‌زراندنا رێكخراوه‌كێ بناڤێ چاڤین ل به‌رده‌ره‌ش هاته ده‌ركرن.
عه‌بدوللا شكاك سه‌روكێ رێكخراوا چاڤین بو پاراستنا مافێن زارویان بو ئه‌ڤرۆ نیوز گۆت : ( ل گور هه‌ردوو ماده‌یێن 10 – 11 یا ژماره 1 یا سالا 2011 په‌رله‌مانێ كوردستانێ كو تایبه‌ته ب رێكخراوێن نه‌حكومى ڤه بریارا دامه‌زراندنا رێكخراوا چاڤین بو پاراستنا مافێن زاروان cocc ل به‌رده‌ره‌ش هاته ده‌ركرن)
زێده‌تر گۆت : ( ئه‌ڤ ریكخراوه دێ بیته ده‌رگه‌هه‌ك كو مافێن زاروان تێدا بهێنه گه‌رنتیكرن و د رێكخراوێ دا هه‌موو ته‌وه‌رێن مافێن زارویان هاتیه ده‌ستنیشانكرن و ل ئه‌ڤرو وێڤه دێ كار ژ بوو دابینكرن و گه‌رنتیكرنا مافێن زاروان هێته‌كرن )
ئه‌ڤرۆ نيوز:
وه‌زاره‌تا كاره‌بێ ل حوكمه‌تا هه‌رێما كوردستانێ د رۆهنكرنه‌كێ دا راگه‌هاند كو بهايێ كاره‌بێ نه نوكه و نه ژى د داهاتى دا ناهێته گران كرن، ئاماژه ب وێ چه‌ندێ ژى كريه كو زێده‌كرنا بهايێ كاره‌بێ د ده‌سته‌لاتا وه‌زاره‌تا كاره‌بێ دا نينه.
د ڤێ رۆهنكرنا وه‌زاره‌تا كاره‌بێ دا، يا دانه‌ك ب ده‌ست ئه‌ڤرۆ نيوز كه‌فتى هاتيه: ئه‌م نزانين كا نيه‌تا گرانبوونا بهايێ كاره‌بێ ژ كيڤه هاتيه، وه‌زاره‌تا كاره‌بێ نه نوكه و نه‌ژى د داهاتى دا، نيه‌ت نينه بهايێ كاره‌بێ ل سه‌ر وه‌لاتيان گران بكه‌ت
“.
ئه‌ڤ داخۆيانيا وه‌زاره‌تا كاره‌بێ د ده‌مه‌كى دا هات پشتى كو عه‌لى حه‌مه سالح په‌رله‌مانتارێ گۆڕان ل په‌رله‌مانێ كوردستانێ راگه‌هاندى كو نوكه بزاڤ دهێته كرن بهايێ كاره‌بێ بهێته گران كرن.
نيشاندان