ئەڤرۆ:
رێکخراوا زەلامێن کوردستانێ یا داخاز دکەت دەستیردان بۆ زەلامان بھێتە دان دەمێ ھەڤژینا وی زارۆ دبیت و رێکخراوا ناڤبری ئەڤێ چەندێ ب مافەکێ زەلامی ل قەلەم د دەت بۆ پشتەڤانی و ھاریکاریکرنا خێزانێ و ل بەرامبەر، ئێکەتیا ئافرەتێن کوردستانێ پشتەڤانیێ ل ڤێ خواستێ دکەت.
بورھان فەرج، بەرپرسێ رێکخراوا زەلامێن کوردستانێ بۆ بەرپەرێ جڤاکی یێ رۆژناما ئەڤرۆ دیارکر کو ل گەل ھەژمارەکا ئەندامێن پەرلەمانێ کوردستانێ بەحسێ دانا موولەتا بابینیێ بۆ زەلامان کریە، وەک قانوون ل پەرلەمانێ کوردستانێ بھێتە پەسەندکرن و ھەر چەوا نەبیت (30) رۆژان دەستیردان بۆ زەلامان بھێتە دان ھەکە فەرمانبەر بیت ل فەرمانگەھەکا حوکمەتێ و ئەڤە ب مەرەما وێ چەندێ کو ھاریکاریا خێزانێن خوە بکەن.
بورھانی گۆت ژی: نابینم کارتێکرن ل دەوامان بھێتەکرن و ب ئەنجامدانا ڤی کاری دێ پتر خزمەتا خێزانان ھێتەکرن و دبینم دێ مالێن باش و بەختەوەر و پر ڤیان ھێنە ئاڤاکرن و دێ بڤێ چەندێ حوکمەت پشتەڤانیەکا باش ل خێزانێ کەت.
ل دۆر بابەتی خانم بەیان سالح بەرپرسا ئەنجوومەنێ قەزا دھۆک یا ئێکەتیا ئافرەتێن کوردستانێ گۆت: پێدڤیا بەری نوکە ھەبا و دەستیردان بۆ زەلامان ھەبا دەمێ ژن نەخوەش ببا ب زارۆکی، نەکو ژ نوو ئەم پێشنیار بکەین، یا بۆچوونا وەربگرین، دبینم پێدڤی یە دەمێ ئافرەت نەخوش دبیت ب کێماسی زەلامێ وێ چاڤدێریا مالێ بکەت ھەتا (40) رۆژان، چونکە کەسەک نوزانیت وەک ھەڤژینی د ئافرەت و زارۆیێن وێ بگەھیت، کا چ ھاریکاری پێدڤی یە، دیسان دبینم دەمێ دەستیردان بۆ ژنێ دھێتەدان دەمێ زارۆک بوونێ، باشترە جارێ بھێنڤەدان بۆ ئێک ژ وان بیت، پێدڤی یە جوداھی د ناڤبەرا ژن و زەلامان دا نەھێـەکرن چونکە مەرەما ھەرد وکان پەروەردەکرنا زارۆیانە، بەری نھا زەلامی شەرم دکر زارۆیێ خوە خودا بکەت، لێ نوکە ئەو سنور ھاتینە برین و ئافرەت ژی وەک زەلامی یا رۆژانە دەردکەڤیت و فەرمانبەر و مامۆستایە و ھەلبەت ئەوژی وەکی وی دوەسیت لەوما پێدڤی یە زەلام ژی ئەڤان کاودانان ل بەر چاڤ وەربگریت و ھەر دو ھاریکار و تەمامکەرێن ئێک دو بن د خوەشی و نەخوەشیان دا و حوکمەت ژی ئەڤان نەخوەشیان پێدڤی یە ھاریکاربیت.
کیڤی عارف، بەرپرسێ رێکخراوا رێکخستنا خێزانێ/سێمێل ھەمبەر بابەتی گۆت: بێ گۆمان پێدڤیە زەلام ئەوان نەخوەشیێن ژنێ برین ل دەمێ زارۆک بوونێ ژبیر نەکەت، ژبەر کو ئەڤ ژنە رحە و گیان و پێدڤی ب چاڤدێریێ ھەیە، لەوا نێزیکرین کەس ژی ھەڤژینێ وێ یە ھاریکاریێ بۆ بکەت، دبینم ئەڤ ھاریکارەیە دبیتە ھۆکار ڤیان دناڤبەرا ژن و زەلامان دا زێدەتر لێ بھێت.
کیڤی بگرنگی زانی حوکمەتا ھەرێما کوردستانێ ڤێ چەندێ بگرنگی ڤە وەربگریت، ب مەرەما پتر خزمەتکرنا زارۆیێن خوە و خێزانا خوە و رەنگە ھندەک ھوسا تێبگەھن کو ھاریکاریا ژنێ شەرمە، لێ بلا نەھێتە ژبیرکرن کو ژن ستوونا مالێ یە و خێزانێ یە و چ کێماسی نینە زەلام ھاریکاریا خێزانا خوە بکەت، گەلەک کاودان ھەنە ئەو سەردەریا ژن ل گەل دا دکەن، زەلام نەشێت وێ سەردەریێ بکەت، ھەکە گاڤا نەخوەشیێ دا زەلام ھاریکاریا خێزانا خوە کر و حوکمەتێ ماوەکی دەستردان دا زەلامی ب مەرەما ھاریکاریکرنا خێزانا خوە بێ گۆمان دێ خوشی و بەختەوەری دناڤبەرا ھەردویان دا پەیدابیت، دبینم ئەڤ بزاڤە دێ جڤاکێ کوردەواری بەر ب رەوشەنبیریەکا دی بەت، دبینم ھەکە ئەڤە بیتە قانوونەک ل پەرلەمانێ کوردستانێ ھەلبەت دێ گەلەک دەست خوەشی ل ڤی بابەتی ھێنەکرن چۆنکو ھەردەم خێزان پێدڤی ب شیانێن زەلامی یە، چوکە پتریا ئافرەتان نوکە فەرمانبەرن ئەڤجا زەلام ژی فەرمانبەرە و دەمێ زارۆک بوونێ گەلەک کێشە و ئاریشە پەیدا دبن و دبینم ب ھەبوونا ڤێ قانوونێ کێشەو ئاریشە دێ دناڤبەرا ھەردویان دا بن بڕبن.

بەرپرسەکی PKK راگەھاند کو چ پرسگرێک د ناڤبەرا وان و PDK دا نینن و دیار کر کو گەلەک ئاساییە د بەرنامە و فەلسەفە و دیتنا پارتێن کوردستانی دا جوداھی ھەبیت و ئەڤ ژی تشتەکی گەلەک ئاساییە و گۆت: (ئەم ب چاڤەکی براتی ل ھەمو پارتێن کوردی دنێرین و دوبارە ژی دکەم کو ژ ئالیێ مە ڤە چو ھزرەکی نە باش ل دژی پارتی دیموکراتی کوردستان و پارتێن دی یێن کوردی نینن).

ئەڤرۆ:
پشتی سەرەدانا شاندێ پارتا دیمۆکراسیا گەلان HDP بۆ قەندیلێ ئدریس بالوکەن ئەندامێ شاندێ د داخۆیانیەکی تایبەت دا بۆ رۆژناما ئەڤرۆ راگەھاند کو ل گەل سەرکردەیێن PKK ل قەندیلێ ل سەر رەوشا گشتی یا کوردستانێ، قۆناغا ئاشتیێ و بەرخوەدانا ل کۆبانێ و شنگالێ ئاخڤینە و گۆت: (بەرپرسێن کۆما جڤاکێن کوردستانێ یانکۆ پارتا کارکەرێن کوردستانێ ئاشکرا کرن کو ئەو ل دووڤ نەخشەرێیا ئۆجەلانی کار دکەن و بۆ وێ چەندێ ب رەنگەکی گەلەک ھەستیار نێزیکی قۆناغێ دبن لێ حوکمەتا تورکیا رژدە د پێنگاڤ نە ئاڤێتنێ دا و ئەڤ ژی دبیتە سەدەمێ ئالۆزیان و دبیتە ئاستەنگ ل ھەمبەر چارەکرنا پرسا کوردی و سەرکەڤتنا قۆناغا ئاشتیێ دا).
سەبارەت ب روودانێن ل جزیرێ ژی ناڤھاتی راگەھاند کو ھەکە حوکمەتا تورکیا بەرپرسیارێن کوشتنا زارۆیێن کورد ئاشکرا نەکەت ئەو دێ حوکمەتێ وەک بەرپرسێ کوشتنان ببینن و گۆت: (گەلێ کورد ب ھشیاری نێزیکی قۆناغا ئاشتیێ دبیت لێ حوکمەتا تورکیا ب کریارێن خوە یێن دوور ژ قۆناغا ئاشتیێ ڤە ئالۆزیان دروست دکەت و ئەڤە ژی خزمەتا پێشڤەچوونا قۆناغا ئاشتیێ ناکەت و ژ بەر ڤێ چەندێ دڤێت د زووترین دەم دا کوشتارێن زارۆیێن کورد بھێنە ئاشکرا کرن و ئۆپەراسیۆنێن گرتنا لاوێن کورد بھێتە راوەستاندن و پێنگاڤ بھێتە ئاڤێتن).
د ڤان رۆژێن داوی دا ب دەستپێشخەریا دەولەتێن تورکیا، ئیران و وەلاتێن عەرەب د راگەھاندنێن وان وەلاتان دا نووچەیێن وەسا دھێنە بەلاڤکرن کو گۆیا PKK و PDK دۆژمنێن ھەڤدو نە، د ڤێ دەربارێ دا ل سەر پەیوەندیێن PKK و PDK ژی ئدریس بالوکەن دیار کر کو بەرپرسێن PKK راگەھاندن کو دەزگەھێن راگەھاندنێن تورکیا، ئیرانێ و یێن عەرەبی ب زانەبوون دخوازن پارتێن کوردی وەک دۆژمنێن ھەڤدو نیشا بدەن و گۆت: (چو پرسگرێک د ناڤبەرا مە و PDK دا نینن و گەلەک ئاساییە ھزر و دیتنێن مە و خواندنا مە د دەربارێ روودان و پاشەرۆژێ دا ژ ھەڤ جودا بن و ئەڤ ناھێتە واتەیا کو ئەم ل دژی ھەڤدو نە و جارەکا دی دوپات دکەم کو چ پرسگرێکا مە ل گەل چو پارتەکا کوردستانی نینە).
ئدریس بالوکەن ئەندامێ پەرلەمانێ تورکیا دیار ژی کر کو ل سەر رەوشا کۆبانێ و شنگالێ ژی سەرکردەیێن PKK ل قەندیلێ راگەھاندینە بەرخوەدانا گەلێ کورد ل دژی تیرۆرستێن داعشێ بەرخوەدان و قەھرەمانیەکا دیرۆکیە و دڤێت زێدەتر د ناڤبەرا ھێزێن کوردی ھەماھەنگی ھەبیت و گۆت: (ژ کەرکووکێ ھەتا شنگال و کۆبانێ لاوێن شەرڤان و پێشمەرگەیێن کورد د یەک سەنگەری دانە و دەمێ وێ یەکێ ھاتیە ھێزەکا مەزنا نەتەوی یا ھەڤپشک بۆ پاراستنا کوردستانێ بھێتە دروستکرن و ھێرشێن داعشێ و نێزیکبوونێن دەولەتێن داگیرکەر ڤێ یەکێ دسەلمینن کو ئێدی دەم دەمێ ئاڤاکرنا ھێزا سەربازی یا نەتەوییە).
ئدریس بالوکەن د دووماھیا ئاخڤتنا خوە دا ژی راگەھاند کو ئەو دێ د دەمەکی نێزیک دا جارەکا دی سەرەدانا زیندانا ئیمرالی بکەن و ل گەل سەرۆکێ PKK ھەڤدیتنەکی ساز بکەن و گۆت: (د ڤان رۆژان دا ئەم دێ ھەم ل گەل بەرپرسێن حوکمەتێ و ھەم ژی ل گەل ھندەک سازیێن سڤیل ل سەر نەخشەرێیا چارەکرنا پرسا کوردی گەنگەشە بکەین و پاشی ژی ئەنجامێن وان ھەڤدیتنا ل گەل ئۆجەلان ب ئاخڤین و ھزرا وی بۆ پێشکەڤتن و سەرکەڤتنا قۆناغێ وەربگرین و بگەھیننە جھێن پەیوەندیدار).