ئەڤرۆ:
دوھی شاندێ دانوستندکارێ لایەنێن سیاسی یێن پارێزگەھا سلێمانیێ ل جڤاتا سەرکردایەتیا پارتی ل باژێڕێ سلێمانیێ ل دۆر بەلاڤکرنا پۆستێن ئیدارا پارێزگەھا سلێمانیێ کۆمبوون و ئەندامەکێ جڤاتا سەرکردایەتیا پارتی دبێژیت، ئێکەتی و گۆڕان رازیبووینە پۆستێ جێگرێ پارێزگەرێ سلێمانیێ بدەنە پارتی.
فازل رەئوف، ئەندامێ جڤاتا سەرکردایەتیا پارتی دیموکراتی کوردستان ل پارێزگەھا سلێمانیێ بۆ رۆژناما ئەڤرۆ گۆت” کۆمبوون ل سەر پێشنیارا گۆڕانێ و ئێکەتیێ بوویە و سەرەدانا بارەگایێ پارتی کریە، مەژی ئەڤ چەندە ب پێنگاڤەکا باش زانی، ھەتا ھەموو لایەنێن سەرکەفتی د ھەلبژارتناندا پشکداریێ د حوکمەتا ناڤخوەیا سلێمانیێ دا بکەن، مە وەکی پارتی داخوازیێن خوە ب گۆرەی ئەنجامێن ھەلبژارتنان بەحسکرن و مە ب ئێکەتیێ و گۆڕان راگەھاند، پارتی دێ ب مەرجەکی پشکداریێ د حوکمەتا ناڤخوەیا سلێمانیێ دا کەت، ئەوژی ب گورەی ئەنجامێن ھەلبژارتنان پۆستێن پارێزگەھێ بۆ پارتی بھێنەدان، بەرۆڤاژی ئەم د بەرھەڤ نینین پشکداریێ د ئیدارا سلێمانیێ دا بکەین، ئێکەتیێ و گۆڕان دیارکرن کو ئەو دخوازن پارتی و ھەموو لایەنێن دی پشکداریێ د حوکمەتا سلێمانیێ دا بکەن و بەرھەڤن ھەتا رادەکێ زۆر ب مەرجێن پارتی رازیببن، ئەوژی پشتی دانوستاندنێن زۆر ھاتینەکرن، نەگەھشتینە چو ئەنجامێن دووماھیێ، چونکە ھندەک تشت ھەنە حەزناکەین نوکە ل راگەھاندنێ بھێنە بەلاڤکرن، ب دلێ مە نەبوون و بۆچوونا مە وەک پارتی یا جودابوو”.
فازلی گۆت ژی” ئەم گەھشتین رێککەفتنێ و ئاریشە ل سەر وێ چەندێ مایە، ئەو پۆستێن داینە مە جھێ وان وەکی پێدڤی نینە بۆمە، دەربارەی ڤێ چەندێ کو ئەڤ دێ ب گورەی ئەنجامێن ھەلبژارتنان بەھرا پارتی پۆستان دەن، نابێژم رازیبووینە ب ڤێ ھژمارێ، بەلێ زۆر نێزیکی ھەڤدو بووینە، شاندێ ئێکەتی و گۆڕان پێشنیارا پۆستەکێ بلند بۆ پارتی کر، ئەوژی جێگرێ پارێزگەرێ سلێمانیێ بوو، مە یا قەبوولکری، ھێشتا ھندەک ھووردەکاری دناڤبەرا مەدا ماینە و ئەم ژی دێ پێداچوونێ ل ڤان پێشنیارێن ئێکەتیێ و گۆڕانێ کەین و پشتی دو رۆژێن دی دێ بەرسڤا وان دەین”.
ناڤبری خۆیاکر ژی” ئەم گەشبینین دێ پشکداریێ د ئیدارا سلێمانیێ دا کەین و مە پێخۆشە پشکداربین و رۆلێ خوە وەک حزبەکا سەرەکی د ھەرێما کوردستانێ دا ل ئیدارا سلێمانیێ ببینین”.