ئەڤرۆ:
رۆژا چوار شەمبی پارتا کرێکارێن کوردستانێ PKK د کومبوونەکێ دا ئەنجومەنەک بۆ کانتونا شنگالێ دروست کر، ل دۆر ڤی بابەتی، عەلی عەونی ئەندامێ سەرکردایەتیا پارتی دیموکراتی کوردستان بۆ ئەڤرۆ گۆت”کانتۆن مودێلا ئیدارەیێن سەد سالا ١٥ ێ یە و ئێک ژ مەرەمێن پەکەکێ ئەوە دەستکەفتێن باشوورێ کوردستانێ بۆ پاشڤە بزڤرینیت د دەمەکێ دا کو کورد پێنگاڤان بەر ب سەرخەبوونێ د ھاڤێژن و دەرفەتەکا باش یا ھاتیە پێش کو کورد ئاستێ داخوازیێن خوە بلندتر لێ بکەن”.
عەلی عەونی ئەو یەک ژی دیار کر کو ئەو پێنگاڤا پەکەکێ دەستدرێژیە ل سەر ئیدارەیا دەستھەلاتەکا دانپێدان پێکری کو ژ ئالیێ نێڤدەولتی ڤە ب فەرمی ھاتیە نیاسین و د خزمەتا داگیرکەرێن کوردان دایە. و ھەروەسا دژایەتیکرنا پارتی دیموکراتی کوردستانە، ژ بەر کو پارتی یە ل گەل جڤاکا نێڤدەولەتی د ئاخڤیت و جیھانا دیموکرات ل دۆر ماف و پاراستنا گەلێ کورد دانوستاندنێ ل گەل پارتی دکەت و ئەو دخوازن پارتی ژ ڤێ ھەڤکێشێ دووربێخن.
ل گور ئاخفتنێن عەلی عەونی ھەکە وان ب راستی دڤێت خزمەتا کوردستانێ بکەن بلا بچن گوندەکێ باکوورێ کوردستانێ رزگار بکەن و بلا ل وێرێ “کارتونێن” خوە رابگەھینن.
د پشکەکا دی یا ئاخفتنێن خوە دا عەلی عەونی گۆت”بلا گەلێ کوردستانێ و ھەموو جیھان شاھد بیت کو پەکەکە یا (ئیبیتزازێ) دکەت کو لەشکرێ کوردستانێ بێخنە د شەرەکی دا و بێژن شەرێ براکۆژیێ چێبوو و یێ کوردستانێ بەر ب لێڤا شەر و کوشتنێ دبەن، لێ ئەم ھیڤی دکەین نەگەھیتە وی سنوری و ئەو پێ خوە زێدەتر درێژ نەکەن و راستیێ ب بینن کو ئەوا دکەن د خزمەتا داگیرکەرێن کوردستانێ دایە و من گۆمان یا ھەی کو ئەڤە بریارا وان بیت، بەلکو بریارا داگیرکەرا یە و ئەم ھەموو دزانین کو ل ڤێ دووماھیێ ئالیەکێ دەستھەلاتدار د ناڤ پەکەکێ و ئێکەتیێ دا کەفتینە د خەلەکا بەرژەوەندیێن وەلاتەکێ ئەقلیمی دا”.
ھەر ل دۆر ڤی بابەتی، قاسم شەشۆ فەرماندێ پێشمەرگێن ئێزدی ل چیایێ شنگالێ بۆ رۆژناما ئەڤرۆ گۆت”پەکەکە نە خودانا شنگالێ یە، چوار گەنجێن وان یێن ژ رۆژاڤا و چوار ژ تورکان ھاتین کانتۆنان چێکەن و ئەقلیما ئاڤا کەن ئەو نە بابێ شنگالێ و وەلی ئەمرێن شنگالێ نە و ئەڤە ناھێتە قەبوولکرن).
د پشکەکا دی یا ئاخفتنێن خوە دا قاسم شەشۆی گۆت”رۆژا دەستپێکێ دەمێ ھاتین گۆت ئەم دێ ھاری ھەوە کەین نە گۆت دێ وەکو سوریێ لێ کەین. بلا بچن وەلاتێ خوە چێ کەن، ھەر دەمێ ژ سەرجەمێ ١٩ ویلایەتێن تورکیا پەکەکە شیان ئێکێ رزگار کەن و کانتۆنەکا خوە لێ ئاڤا کەن، بلا دەستێ خوە بدانە سەر شنگالێ ژی. وان چ حەق د شنگالێ دا نینە و بلا ب ئەدەب و ئەخلاق ل جھێ خوە ب روونن و بلا باش بزانن شنگال نەجھێ وانە).
د بەردەوامیا ئاخفتنێن خوە دا قاسم شەشۆی گۆت”٧٢ فەرمان ھاتینە سەرێ ئێزدیان و یێ ڤێ دووماھیێ بۆ ٧٣، لەوما ھەکە پەکەکە بەلایا خوە ژ مە ڤە نەکەن مە و داعش چ ل ئێک و دوکر دێ وەل وان ژی کەین و ئەم ژ وان و غەیری وان ژی قەبوول ناکەین. ئەم ھەموو کوردین، ئەم برایێن ئێک و دوینە و ئەم ھیڤی دکەین ئەم تڤلێن خوە نەکەینە د چاڤێ ھەڤدو را”.
قاسم شەشۆی ئەو یەک ژی دیار کر کو چوار کەس د خانیەکێ دا یێن گەھشتینە ئێک دو و دبێژن مە جڤاتەک بۆ شنگالێ یێ پێکئینای، ئەو جڤات نەیا موعتەرەفە و کەس نوزانیت ئەو کینە و کورێن کێ نە و نە ئێزدی و نە چ حزب ژی وان ناس ناکەن و گۆت: (ئەم ب چو رەنگان وان قەبوول ناکەین).
پەکەکێ دڤێت لەشکرێ کوردستانێ بێختە د شەرێ براکۆژیێ دا
نيشاندان