ل گور ژێدەرێن رۆژناما “شرق الاوست” پتر ژ 70 فەسیلێن ئۆپۆزسیۆنا سووریێ یێن سەرەکی نوکە شەرێ رژێمێ دکەن و ژ وان ژی فەسیلێن توندرەو نوکە کونترۆل یا ل سەر 60% ژ جوگرافیا سووریێ کری.

ژێدەرێن د ناڤ لەشکرێ سووریێ یێ ئازاد دا دوپات دکەن کو کونترۆلکرنا وێ جوگرافیا بەرفرەھا سووریێ ژلایێ گرۆپێن توندرەو ڤە یا بوویە رێگریەکا سەرەکی بەرامبەر پلانا راھێنانا شەرڤانێن سووریێ یێن میانرەو یێن کو تورکیا سوز دایێ کو ل دەستپێکا بھارا بھێت د ناڤ ئاخا خوە دا راھێنان پێ بکەت. تورکیا وەسا ل قەلەم د دەت کو ئەڤ ھێزا میانرەو بەھرا وێ چەندێ ھەیە کو بشێت بەر سینگێ توندرەوێن سووریێ ب راوەستیت.

د چارچوڤێ پێکئینانا ھەڤپەیمانیا نێڤدەولەتی دا بۆ روی ب روی بوونا داعشێ ل سووریێ و عیراقێ، بریار ھاتبوو دان کو ئەمریکا ب ھاریکاریا تورکیا و چەند وەلاتەکێن عەرەبی راھێنانان ب لەشکرێ ئازاد یێ سووریێ بکەت، بۆ ڤێ چەندێ بریار ھاتبوو ستاندن کو راھێنان ل تورکیا و ھەروەسا ل سعوودیێ و ئوردنێ ب لەشکرێ ئازاد بھێنە کرن. لێ چاڤدێرێن رەوشا سووریێ ب دوور دبینن کو د دەمەکێ نێزیک دا لەشکرێ ئازاد یێ سووریێ و ھێزێن میانرەو بشێن کونترۆلا بارودوخێ سووریێ بکەن، ژ بەر کو رۆژ بۆ رۆژێ توندرەوێن ئیسلامی ل سووریێ یێ سنۆرێ دەستھەلاتا خوە بەرفرەھتر لێ دکەن و خەلکەکێ پتر یێ دچیتە د ناڤ رێزێن وان دا، ئەڤە ژلایەکێ و ژلایەکێ دی ڤە ژی رژێما سووریێ ب سەرۆکاتیا بشار ئەسەد ئەو ژی ب پشتەڤانیا ئیرانێ و حزبوللا یا لوبنانی یێ شیایی بەرامبەر ھەڤرکێن خوە یێن ناڤخوە و دەرڤە رابگریت و بالادەستیا گرۆپێن توندرەو یا وەکری کو میانرەێن سووریێ بەرامبەر رژێما بەشار ئەسەدی لاواز ببن.

ل دووڤ ژێدەرێن سەرکردایەتیا لەشکرێ ئازاد یێ سووریێ کو ھندەک پێشبینی بۆ ھژمارا چەکدارێن توندرەوێن سووریێ بەلاڤکریە کو ل دووڤ پێزانینێن دووماھیێ پشتی ژێکڤەبوون و ئێکگرتنا و گوھۆرینان نھا چەکدارێن گرۆپێ دەولەتا ئیسلامی ل عیراقێ و شامێ “داعش” زێدەتر ژ 20 ھزار کەسانە، ئەڤە ژی پشتی کونترۆلا داعش ل سەر دەوروبەرێن دیرەزور و نەچارکرنا شەرکەرێن ھەڤرکێن خوە کو پەیوەندیێ ب رێزێن وان بکەن، یان ژی ل دەڤەرێ دوور بکەڤن. ھەروەسا ل گۆر ئۆپۆزسیۆنا سووریێ 15 ھزار شەرکەرێن ل بن ناڤێ گرۆپێ جەبھەت ئەلنوسرە یێ گرێدای رێکخراوا قاعیدە ل سووریێ شەری دکەن.

سەرەرای ھەبوونا چەند گرۆپەکێن توندرەوێن ئیسلامی کو نوکە د ناڤ سووریێ دا شەری دکەن، ھەر دو گرۆپێن داعش و جەبھەت ئەلنوسرە ب کاریگەرترین گرۆپێن توندرەو د ناڤ سووریێ دا دھێنە نیاسین، ژ بەر کو د گەل وێ چەندێ دا کو ژمارەکا مەزن یا شەرڤانان ھەنە، ژ روویێ ماددی و چەکی ڤە ژی ژ گرۆپێن دی د جودانە و چەکێن پێشکەفتی تر د دەستێن وان دانە و یێن بووینە رێگرێن سەرەکی بەرامبەر ھیڤیێن میانرەوێن سووریێ بۆ رزگارکرنا وی وەلاتی ژ دەستێ رژێما بەعس.

ئەڤرۆ:

سەرۆکێ ھەرێما باسک یا ئیسپانیا راگەھاند کو ئەو د شەرێ ل دژی داعشی دا ب دل و جان ل گەل کوردا نە و دیار کر کو دڤێت جڤاتا نێڤدەولەتی زێدەتر ھاریکاریا کوردان بکەت و گۆت: “مافێ گەلێ کوردە چارەنڤیسێ خوە دیار بکەت چونکو کوردان د شەرێ ل دژی تیرۆرێ دا سەرێ جیھانا ئازادیخواز بلند کرینە و رومەتا مرۆڤاتیێ پاراستینە ئەڤ ژی دسەلمینیت کو دڤێت ھەرکەس رێزێ ل مافێ چارەنڤیسێ گەلێ کورد بگریت و پشتەڤانیێ ل ئاڤاکرنا دەولەتا کوردی بکەت”.
ئینیگۆ ئورکولو سەرۆکێ ھەرێما باسک یا سەر ب ئیسپانیا بۆ رۆژناما ئەڤرۆ راگەھاند ژ رۆژا کو ھێرشێن تیرۆرستان بۆ سەر کوردستانێ دەستپێکریە ئەو ژ نێزیک ڤە ئاگەھداری رەوشا کوردان دکەت و گۆت: “ئەم ئێش و ئازارێن کو گەلێ کورد ل ھەمبەر زۆلم و زۆرداریا دەولەتێن داگیرکەرێن کوردستانێ دکشینیت دبینین و ئەڤ نە بەس بوو ڤێجا تیرۆرستێن رادیکال یێن درندە ژی بەرێ خوە دانە گەلێ کورد و دەست ب زۆلمێ کرینە و ھەکە ھەتا ئەڤرۆ ژی تیرۆرست دشێن ھێرشێ بکەنە سەر کوردان ئەڤ شەرما جیھانێیە و ژناڤچوونا دیمۆکراسیا ئورۆپایە، دڤێت بەری ھەر تشتەکی ئورۆپا و ئەمریکا ب ھەموو رەنگان ھاریکاریا کوردان بکەن بۆ ژناڤبرنا تیرۆرستان، ژ بەر کو گەلێ کورد نە ب تنێ ئاخ و ناموسا خوە بەلکو د ھەمان دەمێ دا رومەتا مرۆڤاتیێ ژی د پارێزن و ئەم ھەموو قەردارێ گەلێ کوردین”.
سەرۆکێ ھەرێما باسک ھەروەسا دیار ژی کر کو ئەو ژ ئێشێن گەلێن بندەست باش تێدگەھن، ژ بەر کو د دەمێ خوە دا ئەو ژی تووشی ھەمان چارەنڤیسێ ھاتینە و گۆت: “ئەڤرۆ دەمێ ھەڤگرتنا گەلێن بندەست و یێن بێ دەولەتن و دڤێت بەری ھەر ئالیەکی ئەم وەک نەتەوێن بێ دەولەت ھاریکاریا ھەڤدو بکەین و برینێن ئێکدو سارێژ بکەین، ل وەلاتێ مە ژی کەمپینێن ھاریکاریێ بۆ شنگالێ و کۆبانێ برێڤە دچن و ھەر ھاریکاریەک دێ زێدەتر مە بگەھینیتە ھەڤدو و ھێزا بەرخوەدانا ل ھەمبەر زۆلمێ بلندتر بکەت”.
ئینیگۆ ئورکولو سەرۆکێ ھەرێما باسکێ د پشکەکا دی یا ئاخڤتنا خوە دا ژی راگەھاند کو ئەو وەک ھەرێما باسک خوە بۆ ئاڤاکرنا دەولەتا سەربخوە ئامادە دکەن و گۆت: “ژ بەر ڤێ یەکێ نھا ھەماھەنگیەکا گەلەک باش د ناڤبەرا مە و ھەرێما کەتالۆنیا دا دروست بوویە، ئەم ھەتا داوی پشتەڤانیێ ل ریفراندوما سەربخوە یا ھەرێما کەتالۆنیا دکەین و پشتی ریفراندوما وان ڤێجا ئەم دێ دەست ب کەمپینەکا وەسا بکەین، دیسان گەلەک نەتەوێن مەزن ھەنە کو ھەتا نھا بێی دەولەتن و د سەری دا ژی گەلێ کوردستانێ دھێت و ل دووڤ ھزرا من گەلێ کورد ژ ھەر خەلکەکێ دی زێدەتر ئاڤاکرنا دەولەتا سەربخوە حەق دکەت و دڤێت دەست ژ مافێن خوە یێ ئاڤاکرنا دەولەتەکا سەربخوە بەرنەدەن و بەرخوەدانا کوردان ل کوردستانا عیراق، سووریێ و تورکیا ل دژی داگیرکەران و کۆمێن تیرۆرست بۆ ھەموو جیھانێ سەلماندیە کو کورد ھێژایی ئاڤاکرنا دەولەتا سەربخوە و ژیانەکا ئازادن”.
د دووماھیا ئاخڤتنا خوە دا ژی سەرۆکێ ھەرێما باسک یا سەر ب ئیسپانیا راگەھاند کو پرانیا ئەندامێن پەرلەمانێ ھەرێما وان پشتەڤانیێ ل دەستپێکرنا کەمپینا ئازادیا گەلێ باسکێ دکەن و گۆت: “مە ژ بۆ بەرپرسێن ئیسپانیا گۆت، د دیرۆکێ دا ھەوە ب زۆلم و زۆرداریێ ئاخا مە داگیر کریە و ھەوە وەلاتێ مە کریە پشکەک ژ ئاخا ئیسپانیا و ئێدی ئەم ناخوازین ب زۆرێ ل گەل ھەوە بژین، بۆ وێ چەندێ ژی دەرفەتێ بدەنە گەلێ مە بلا ب ئیرادا خوە چارەنڤیسێ خوە دیار بکەت، ھەکە گەلێ مە ژ ئەنجامێ ریفراندومەکا ئازاد دەولەتەکا سەربخوە نەخاست و بریارا پێکڤەژیانێ ل گەل ئیسپانیا دا وێ دەمێ ئەم دێ ب رێزگرتن ڤە نێزیکی ئەنجامێ ریفراندومێ ببین، لێ ھەکە گەلێ مە بریارا ئاڤاکرنا دەولەتا سەربخوە دا وێ دەمێ دڤێت ھوون رێزێ ل ئیرادا گەلێ مە بگرن”.