ئه‌ڤرۆ نيوز:
ئه‌نجلينا جۆلى و براد بێت ستێرێن ناڤدارێن هۆليۆدێ و هه‌ڤژينێن ئێك ب هه‌لكه‌فتا هاتنا جه‌ژنا كرستيانان و سه‌رێ سالا نوو وێنه‌يێن خوه ل سه‌ر تۆرا جڤاكيا فه‌يسبۆكى به‌لاڤكرينه.
د دو وێنان دا كو ئێك ل گه‌ل هه‌ڤژينێ خوه به‌لاڤكريه و نڤيسيه ئه‌ڤينيێ زێده‌تر بده و ئێك ژى ب تنێ بێ ى كو چو تشتى ل سه‌ر بنڤيسيت ده‌بڕين ژ هاتنا سه‌رێ سالا نوو و جه‌ژنا كرستيانان كريه.
ئەڤرۆ:
بەرپرسەکێ وەزارەتا ناڤخوە یا یەمەنێ بۆ ئاژانسا رویترز راگەھاند کو دوھی ل پایتەختا یەمەنێ د ئەنجاما ٥ پەقینێن جودا جودا ھژمارەک وەلاتی ھاتینە کوشتن و گەلەک کەس ژی بریندار بووینە و ژ بەر ڤێ یەکێ نھا بارێ پایتەختی ئاسایی نینە و دەست ب پێرابوونێن ئێمناھی ھاتینە کرن دا کو بزانین چو ھێزەکی ئەو پەقین کرینە و مە دڤێت رێگریێ ل پەقینێن دیتر ژی بکەین.
ل ئالیێ ھێزێن پۆلیسێن یەمەنێ ل باژارێ سەنعا و گەلەک دەڤەرێن دی دەست ب ئۆپەراسیۆنێن مەزن کرینە و بەحسێ وێ یەکێ دھێتە کرن کو گرۆپێن سەر ب قاعیدە دخوازن چالاکیێن تیرۆرستی ل یەمەنێ ئەنجام بدەن.
چاڤدێرێن سیاسی دیار دکەن کو پشتی حوسیێن شیعە ل یەمەنێ شیان گەلەک دەڤەران کۆنترۆل بکەن لقێ رێکخراوا تیرۆرستی یا قاعیدە و گرۆپێن دی یێن چەکدارێن سوننە دیار کربوون کو ئەو ب چو رەنگەکێ قەبوول ناکەن حوسی وەسا کۆنترۆلا ھەموو وەلاتی بکەن و دێ ل ھەمبەر وان بێدەنگ نەبن و رەنگە ئەڤ چالاکیێن نھا ل پایتەختی ژی دھێنە کرن ب دەستێ وان بیت و ئارمانج ژێ ئەڤە دا حوکمەتا یەمەنێ سنۆرەکێ بۆ دەستێوەردانێن شیعە دانێن.
ئەڤرۆ:
رێکخراوا قەدەغەکرنا چەکێن کیمیاوی دوھی راپۆرتەک سەبارەت ب بکارئینانا چەکێن قەدەغەکری ل سووریێ بەلاڤ کر و دا راپۆرتێ دا ھاتیە کو ل حەلەب و چەندین باژارێن دی یێن سووریێ ھێزێن رژێما سووریێ و چەکدارێن داعش چەکێن قەدەغەکری بکار ئیناینە و ژ بەر ڤێ یەکێ ژی ب سەدان وەلاتیێن مەدەنی جانێ خوە ژ دەست داینە.
د بەردەوامیا راپۆرتێ دا ئاماژە ب ڤێ یەکێ ھاتیە کرن کو داعشێ شیایە ل عیراق و سووریێ ھندەک چەکێن قەدەغەکری بدەستڤە بینیت و نھا ل سووریێ بکار دھینیت و ژ بەر ڤێ یەکێ ژی دڤێت ھێزێن ھەڤپەیمان بزاڤا ژناڤبرنا وان چەکان بکەن و دڤێت رژێما بەشاری ژی دەستان ژ بکارئینانا وێ چەکی بەردەت، چونکو ئەو چەک ژ بلی ھندێ زیانەکا خوە یا مەزن بۆ مرۆڤان ھەیە و وان دکوژیت، ل ئالیێ دی زیانەکا مەزن دگەھینتە سروشتی و ب سالان ژی کاریگەریا وێ دێ ل سەر ژیانا مرۆڤان ھەبیت و ژ بەر ڤێ یەکێ فەرە د زووترین دەم بکارئینانا وان چەکان بھێتە راگرتن و یێن د دەستێ داعشێ دا ژی ھەنە دڤێت بھێنە ژناڤبرن.
ل ئالیێ دی وەلید موعەلیم وەزیرێ دەرڤە یێ سووریێ دیار کر کو بەری نھا مە دیار کربوو د دەستێ تیرۆرستان دا چەکێن قەدەغەکری ھەنە و دڤێت رێگری لێ بھێتە کرن و گۆت: (مە ب چو رەنگەکێ چەکێن کیمیاوی بکارنەئینایە و ھێزێن سازیێن نێڤدەولەتی دشێن ل ھەر جھەکێ ڤەکۆلینێ ل دۆر ڤی بابەتی بکەن).
ئەڤرۆ:
پاولۆ جێنتیلۆنی وەزیرێ دەرڤە یێ ئیتالیا شڤێدی د پرێس کۆنفرانسەکی دا ل گەل نێچیرڤان بارزانی سەرۆکێ حوکمەتا ھەرێما کوردستانێ راگەھاند 280 شیرەتکار و راھێنەرێن ئیتالی بۆ مەشقدانا پێشمەرگەی دێ ھێنە ھەرێما کوردستانێ و نوکە 35یێن گەھشتین و گۆت: “مە ھەتا نوکە 23 بارێن ھاریکاریێن سەربازی بۆ کوردستانێ ھنارتینە و دێ ل سەر ھنارتنا وان د بەردەوام بین”.
د ھەمبەر دا، نێچیرڤان بارزانی سوپاسیا حوکمەتا ئیتالیا کر و گۆت: “ئۆپەراسیۆنێن سەربازی ل ناڤ مووسل نەھێنە ئەنجامدان، ئەم نەشێین خەلکێ دەشتا نەینەوا بپارێزین”.
ئه‌ڤرۆ نیوز: له‌يلان
میدیاكارا به‌رنیاس ئه‌ڤین ئاسو، رادگه‌هینیت كو ل نێزیك دێ دیار بیت و ده‌ست ب پرۆگرامێ خوه كه‌ته‌ڤه.
ئەڤین ئاسۆ د په‌یجێ خوه یێ فێسبوكێ دا نڤیسى یه: جهێ داخێ یه د ماوێ چوویى دا، ژ ئه‌گه‌رێ ره‌وشا كوردستان تووش بووى، چ به‌رسڤه‌كا روون ل ده‌ف مه نه‌بوو بۆ سه‌ر ژ نوو ده‌ستپێكرنا پرۆگرامێ ئه‌ڤین ژن و ژیان، به‌لێ من دڤێت بێژمه هه‌وه ل نێزیك دێ ده‌ست ب پرۆگرامى كه‌مه‌ڤه.
ئه‌ڤرۆ نیوز:
په‌یڤدارێ وه‌زاره‌تا خواندنا بلند راگه‌هاند كو وه‌زاره‌تا خواندنا بلند ژى یا پابه‌نده ب بهێنڤه‌دانێن فه‌رمى كو ژ ئالیێ ئه‌نجومه‌نێ وه‌زیران ڤه دهێته دیاركرن و گۆت: رۆژێن 25 و 1/1 بۆ وان ژى بهێنڤه‌دانه.
سه‌باره‌ت ده‌واما ماموستا و قوتابیان، فوئاد عه‌لى په‌یڤدارێ وه‌زاره‌تا خواندنا بلند گۆت: زانكۆیێن كوردستانێ یێن سه‌رپشكن د رێكخستن و دیاركرنا بهێنڤه‌دانان دا ل گۆر سالناما زانكۆیێ.
ئه‌ڤرۆ نیوز، ناجی به‌ده‌ل:
رێناس جانو ئه‌ندامێ په‌رله‌مانێ عیراقێ ژ پارێزگه‌ها دهۆكێ بو ئه‌ڤرۆ نیوز راگه‌هاند:پێنگاڤ ب رێكا لیژنه‌كا تایبه‌ت هاتیه هاڤێتن بو ئاواره و ده‌ربه‌ده‌ران و نها ژی ره‌نگه دچارچوڤێ به‌رنامێ ڤێ لیژنێ دا، خه‌لكێ ل چیایێ شنگالێ و شێوازێ چه‌وانیا ڤه‌گه‌راندنا وان بو ناڤ شه‌نگالێ و هنده‌ك كارێن دی هه‌نه ره‌نگه نه‌راسته‌وخو كارێ په‌رله‌مانتاران بیت.
په‌رله‌مانتاره‌ك دبێژیت كو ئه‌و مژوولى دارێژتنا راپۆرته‌كێ نه كو پاشان دێ ژ ئالیێ هنده‌ك ئه‌ندام په‌رله‌مانان ڤه هێته بلندكرن ل سه‌ر شه‌نگالێ، كو ده‌ڤه‌ره‌كا پاراستی بو شنگالێ بهێته درۆست كرن و ره‌نگه هنده‌ك ده‌ڤه‌ر تایبه‌یتمه‌ندیه‌ك پێ بهێته دان و شنگال ژی دێ ئێك ژ ئه‌وان ده‌ڤه‌ران بیت
رێناس جانو ئه‌ندام په‌رله‌مانێ عیراقێ بۆ ئه‌ڤرۆ نیوز گوت:پیدڤیه ل سه‌ر رێكخراوێن مرۆڤی و نێڤ ده‌وله‌تی كاره‌كێ جدی و بكردار بكه‌ن ژبوی رۆحیه‌ت و ده‌رۆنێ ئاواران ئارام ببیت و ڤه‌گه‌ریا وان بۆ ناڤ شنگالێ.
رێناس جانو دا زانین : پێدڤیه ئه‌م ئه‌وێ زه‌مینه‌یێ ساز بكه‌ین كو ترسه‌كا دی یان وه‌همه‌كا دی بڤی شێوه‌یی درۆست نه‌بیته‌ڤه ئه‌و ژی ب داخازكرنا مه ژ هه‌مو لایه‌نێن په‌یوه‌ندیدار چ لایه‌نێن ئه‌منی یان له‌شكه‌ری بو درۆستكرنا بازنه‌یه‌كێ بو پاراستنا ئه‌ڤی باژێركی و پاراستنا ژیانا ئه‌ڤان مرۆڤان كو ئه‌ڤه دێ هنده‌ك خال بن ل داهاتی دا داخواز بكه‌ین ژ سه‌رۆكاتیا په‌رله‌مانێ عیراقێ كو بكه‌ڤنه بیاڤێ بجهكرنێ .
ئه‌ڤرۆ نيوز:
د روونشتنا ئه‌ڤرۆ يا ئاسايا حوكمه‌تا عيراقێ دا بودحێ سالا 2015 يێ عيراقێ په‌سه‌ند بوو كو دگه‌هيته 123 ترليۆن دينار و بهايێ ئێك به‌رميلا په‌ترۆلێ ژى 60 دۆلاران هه‌ژمارت.
سه‌عد حه‌ديسى، ئاخفتنكه‌رێ ب ناڤێ جڤاتا وه‌زيرێن عيراقێ راگه‌هاند: د روونشتنا ئه‌ڤرۆ رۆژا سێشه‌مبى رێكه‌فتى 23\12\2014 دا، جڤاتا وه‌زيرێن عيراقێ ده‌نگدان ل سه‌ر پرۆژێ قانوونا بودجێ عيراقێ بۆ سالا 2015 دا كودگه‌هيته 123 ترليۆن ديناران.
ئاماژه ب وێ چه‌ندێ ژى كر كو د پرۆژێ قانوونا بودجا سالا داهاتى دا، بهايێ ئێك به‌رميلا په‌ترۆلێ ب 60 دۆلاران هاتيه خه‌ملاندن و گۆتژى: “د پرۆژێ قانوونێ دا، ته‌ماميا په‌ترۆلا دێ ل عيراقێ هێته هنارتن سێ مليۆن به‌رميلێن په‌ترۆلێ نه د رۆژێ دا كو په‌ترۆلا هه‌رێم و كوردستانێ ژى تێدايه و ئه‌ڤ رێژه قابلى گوهۆڕينێ يه”.
پشتى ڤێ په‌سه‌ندكرنێ ژى پرۆژه دێ بۆ جڤاتا نوونه‌رێن عيراقێ هێته ره‌وانه كرن دا كو ژ لايێ وان ژى ڤه بهێته په‌سه‌ندكرن.
نها پێشمه‌رگه ل كوردستانێ هێمایێ به‌رخودان و شه‌ره‌ف و سه‌ربه‌رزیێ یه، ئه‌ڤ ناڤێ پیرۆزێ كو ساله‌ها ساله یێ هه‌ی رۆژ ب رۆژ ب هه‌یبه‌تتر و مه‌زنتر لێدهێت، دیاره كو ئه‌وان ژیانا خوه كو ب نرخترین به‌ها پێشكێشی خاك و وه‌لاتێن خوه كرینه، به‌لێ ژبلی هندێ كو روحا خوه كرینه قوربان، هه‌كه بچینه سه‌ر ته‌وه‌ره‌كێ دیتر كو به‌رده‌وامیا ژیانا خوه ب ستویێ خوه ڤه دگریت، ئه‌و ژی لایه‌نێ ئابووریه، راسته د ڤان هه‌ل و مه‌رجان دا، كوردستان د مه‌زنترین قه‌یرانا ئابووری دا ده‌بازدبیت، دبیت ئه‌و ژی نه‌مانا بودجه‌ی و ل دووماهیێ نه‌مانا مووچه‌یان بوو، ده‌مه‌كێ درێژ بوو پیشمه‌رگه ژ گیرۆكرنا مووچه‌یان ده‌نالی و به‌رده‌وام ده‌نگێن نه‌ره‌زایبوویان به‌رزكرن، ژ وان ژی نها گیرۆكرنا مووچه‌یان كو بۆ وان دبیت ته‌شته‌كێ ئاسایی و نوو نه‌بیت! مووچێ پێشمه‌رگه‌ی 500 پینج سه‌د هه‌زار دیناره واته بۆ رۆژه‌كێ نێزیكی 17 هزار دینار دكه‌ڤن، دبیت كێشه نه ژ وی گۆژمێ پاره‌ی بیت، به‌لكو ئه‌رێ به‌هرا هه‌ر پێشمه‌رگه‌یه‌كی دكه‌ت كو كرێدار بیت؟ ئه‌م هه‌موو دئاگه‌هدارین كو چو كرێیه‌ك ژ 300 سێ سه‌د هه‌زار دیناران كێمتر نینه، واته ژ وی مووچه‌ی ته‌نێ 200 دو سه‌د هزار دینار بۆ وی دمینن، واته بۆ هه‌ر رۆژه‌كێ حه‌فت هزار دیناره!! ب چو پیڤه‌ره‌كی و ب چو شێوازه‌كێ ئابووری بشێین دابه‌شكرنێ بۆ بكه‌ین؟ هه‌كه چو به‌نده‌كا ئابووری نه‌شیا وی پارێ كێم رێكبێخیت ل گه‌ل ڤان بازاڕێن گران، ئه‌ڤجا باشه پێشمه‌رگه‌كێ دامایی چاوا بشێت خزمه‌تێن ژیانێ پێ دابنین بكه‌ت؟چاوا بشێت خێزانا خوه ژ پێدڤیێن سه‌ره‌كی یێن ژیانێ بێ به‌هر نه‌كه‌ت؟ د ئابووری دا هێله‌ك هه‌یه كو مرۆڤان پێ پۆلین ده‌كه‌ت بۆ كۆمه‌لگه‌هان دهێنه دانان، بێگومان ئه‌و ژی یا ئاشكرایه كو پێشمه‌رگه ل بن هێلا هه‌ژاریێ دا یه، چونكو هه‌ژاری ئه‌وه نینه كو ژ مرۆڤ ژ برسا بمریت، به‌لكو ئه‌و چه‌نده كو نه‌شێت ژ داهاتێ رۆژانه به‌هرا تشتێن سه‌ره‌كی یێن ژیانا ته پێ دابین ببیت، له‌ورا ل كوردستانێ ژبلی كو ژ خه‌لكێ هه‌ژاره مخابن پێشمه‌رگه ب گشتی ل ژێر هێلا هه‌ژاریێ دایه واته ژبلی كو ل به‌ره‌یێن شه‌ڕێ داعشێ دا یه و د ژیانێ ژی دا د شه‌رێ ئابووری دانه!
دیاره پێشمه‌رگه ل به‌ره‌یێن شه‌ری ب فه‌وج هاتیه دانان، هه‌ر فه‌وجه‌ك ژی ژ پێنج سرییان پیكهاتیه هه‌ر سریه‌ك ژی ژ سێ (په‌ل) فه‌سیلان ب ڤی شیوه‌یی یه، هه‌ر فه‌سیله‌ك ژی ژ 34 پێشمه‌رگان پێكهاتیه ب شێوه‌یه‌كی سریه‌ك ژ 120 پێشمه‌رگان ب گشتی، واته فه‌وجه‌ك ژ 650 كه‌سان پێكدئێت، ل ڤێره دا بڕه پاره‌یه‌ك ب رێژه‌یا %70 ژ وێ 650 كه‌سان واته بۆ 455 كه‌سان بڕا 50 هزار دینار ته‌رخان دكه‌ت بۆ هه‌ر ئێكێ كو نزیكی 22. 750. 000 بیست و دو ملیۆن و حه‌فت سه‌د و پێنجی هه‌زار دینار بۆ مه‌هه‌كێ دده‌نه فه‌رماندێ فه‌وجێ بۆ پێداویستیێن خوارنێ وه‌كو گۆشت و زه‌رزه‌واتی و. . هتد، به‌لێ ئه‌و %30 ته‌رخانكریه بۆ خوارن و ئازۆقێ هشك وه‌ك برنج و فاسۆلی و هتد، دیاره ئه‌و پارێ كو هه‌ر پێشمه‌رگه‌ك بۆ خوارنا رۆژانه د به‌ریێن جه‌نگی دا دبیته 3. 33 ب نێزیكی چار هزار دینار بۆ رۆژێ د ماوێ 15 رۆژان دا ده‌وامی د هه‌یڤه‌كێ دا دكه‌ت، ئه‌ڤ گۆژمه د نێڕینا به‌رپرسان دا باشه ژ سه‌رجه‌مێ گشتی، به‌لێ د نێرینا پێشمه‌رگان دا خۆیایه كو گه‌له‌ك كێمه و ب تنێ گه‌له‌ك گلوگازاندان دكه‌ن ژ خۆرانان، دیاره خوارن بچووكترین مافه د شه‌ڕی دا، ل ده‌مێ خوه كو ئه‌مریكا ئه‌فسه‌رێن خوه دهنارتنه عیراقێ هه‌موو خوارنێن ساخله‌م بۆ وان دابین دكرن، ب تنێ كاغه‌زا هه‌لگرتنا خوارنا وی جۆره‌كێ سیسته‌مه‌كێ گه‌رمكرنێ تیدابوو! له‌ورا ب هه‌موو تیروانین و لێكدانا خورانان وان هه‌تا راده‌یه‌كی كه‌موكوری هه‌نه و گه‌له‌ك ژی نه د ساخله‌من، ژ بلی هندێ پرسیاریك ل ڤێره دا دهێته پێش، ئه‌و ژی ئه‌رێ گۆژمێ پارێ خوارنا پێشمه‌رگان ل ده‌مێ موله‌تێ ژ نشكه‌ڤێ ڤه و نه‌خۆشی و برینداركرن و نه‌هاتنی دێ چ ب سه‌ری هێت؟ ئه‌رێ پشتی وێ نه‌هاتنێ كو ب هه‌ر ئه‌گه‌ره‌كێ ژ نشكه‌كێ ڤه بیت، گۆژمێ وی پاره‌ی بده‌ته خوه؟ یانكو نامینیت؟ ژبلی وێ چه‌ندێ ژی، هنده‌ك هه‌نه ـ ب ناڤی ـ، به‌لێ هه‌بوونا خوه نینه د ئه‌ركان دا چاوا سه‌ره‌ده‌ی ل گه‌ل دهێته كرن؟ به‌هرا وان یا خوارنێ چ لێ دهێت؟
باشتر ئه‌وه ئه‌و گۆژمێ پارێ دهێته مه‌زاختن بۆ ئه‌فسه‌ران كو نێزیكی چار ملیۆن دینار ژ گۆژمێ مه‌زاختنا كارته‌كێ بۆ نموونه یان هه‌ر پیداویستیه‌كێ بۆ ئه‌فسه‌ر و پله‌داران، دشیان دایه چینا پیشمه‌رگه برێكه‌ك بۆ بهێته دابینكرن، هه‌كه كێمتر ژی بیت، دیاره ل ڤێ داویێ په‌رله‌مانێ كوردستانێ د جڤینه‌كێ دا به‌حسێ گرنگیا ڤێ گرفتێ كریه به‌ڵینا زێده‌كرنا مووچه‌ی و باشتركرنا ژیانا پێشمه‌رگه‌ی دایه، ئه‌ڤه ژی دڵخوشكه‌ریكه بۆ خه‌ڵكی، چونكو خه‌ڵك ب خۆشگوزه‌رانیا پیشمه‌رگه‌ی خۆشحال دبن، ب وێ چه‌ندێ كه ئه‌و پارێزه‌رێن خاك و نیشتمانن، ل ڤێره دا گرنگه جه‌ختی ل سه‌ر بهێته كرن و له‌ز لێ بهێته كرن، د به‌ڵینه‌یێن په‌رله‌مانی دا وه‌كو چاوا له‌ز هاتیه كرن د هنارتنا پێشمه‌رگه دا بۆ كۆبانی، بلا ده‌رمالێن مه‌ترسیێ بۆ بهێنه مه‌زاختن، گۆژمی وێ ژی نێزیكی 300 سێ سه‌د هزار دینارن كو تشته‌كێ یاساییه و د هه‌موو دونیایێ دا هه‌ر كاره‌كێ مه‌ترسی ل سه‌ر هه‌بیت بۆ ژیانا كه‌سه‌كی ئه‌و ده‌رماله پێ بهێنه به‌خشكرن، له‌ورا بلا ل دووڤ ڤێ چه‌ندێ وی گۆژمێ ده‌رمالان بهێته ته‌رخان.
به‌ری هاتنا هێزێن داعشێ بو عێراقێ سه‌رۆك بارزانی حوكمه‌تا عێراقێ هایدار كر كو دێ كاره‌ساتێن مرۆڤاتیێ ل عێراقێ روو ده‌ن، هه‌كه داعش عێراقێ بگرن و گۆتنا وی وه‌ك خوه هات، له‌ورا ده‌مێ هێزێن داعشێ باژێرێن عێراقێ گرتین دوور ژ هه‌می ره‌وشت و بوهایێن مرۆڤاتیێ كریارێن هۆڤانه و كاره‌سات ل دژی خه‌لكێ سڤیل ئه‌نجامدان، هه‌روه‌سا ده‌رباره‌ی هه‌رێمێ ژی سه‌رۆك بارزانی ل گه‌ل هه‌می ئالیێن سیاسی كۆمبوو، ره‌وشا كوردستانێ بۆ وان دیاركر، كو دڤێت سنۆرێن هه‌رێمێ بهێنه پاراستن، ژبه‌ر كو د زانی مه‌ترسیا هێزێن داعشێ ل سه‌ر كوردستانێ هه‌یه، لێ هنده‌ك لایه‌نان هه‌ر ژ ده‌ستپێكێ هێرش كرنه سه‌ر بارزانی و وان دڤیا سه‌رۆكی بێخنه د ناڤا ئاریشه‌كا مه‌زن دا و وی ئاگه‌ه ژ ڤێ چه‌ندێ نه، لێ پشتی قه‌یرانێن عێراقێ بۆ خه‌لكێ دیار بوو، كو مه سه‌رۆكه‌كێ زیره‌ك و ب وێر هه‌یه، بۆ چو تشته‌كێ ته‌نازول نه‌كر به‌رامبه‌ر دوژمنێن گه‌لێ كورد راوه‌ستیا و شیا پێنگاڤێن باش ژلایێ ئابووری ڤه بهاڤێژیت و ئه‌ڤ پشتگیریا نێڤده‌وله‌تی بۆ كوردان ب هیمه‌تا وی هاته كرن. له‌ورا ئه‌ركێ سه‌رۆكی د ڤی ده‌می دا دێ زۆرێ قورس بیت، ژبه‌ر كو تاكه سه‌ركرده‌یه ئه‌ڤرۆ د كوردستانێ دا خودان بریار و ئه‌ركێ سه‌ركردێن دی یێن كورد ژی كه‌فتینه سه‌ر ملێن وی، هه‌روه‌سا هه‌ولێن وی یێن به‌رده‌وام شیا وه‌لاتێن جیهانێ بینیته سه‌ر خه‌ت، كو هاریكاریا هێزێن پێشمه‌رگه‌ی بكه‌ن، بۆ هه‌می خه‌لكێ دیار بوو كو پێگه‌ه و قورسایا وی د جیهانێدا چه‌نده. هه‌روه‌سا گه‌له‌ك حزب و لایه‌نان هه‌ولدا هه‌ر وه‌ك پیشه‌یێ وان یێ جاران كو شه‌ڕێ راگه‌هاندنێ بكه‌ن و هه‌ر ئێك یێ دی تومه‌تبار بكه‌ت و پاڤێژنه هه‌ڤدو، گه‌له‌ك ژ وان لایه‌نان هه‌ول دده‌ن ده‌سكه‌فتێن ملله‌تێمه ژناڤ ببه‌ن و نه ئارامیێ په‌یدا بكه‌ن، لێ ئه‌و شیا ڤان هه‌می لایه‌نان نێزیكی ئێك بكه‌ت و ئێكرێزیێ په‌یدا بكه‌ت. د گه‌رمه‌گه‌رما هێرشێن داعشێ دا بۆ سه‌ر هه‌رێما كوردستانێ بارزانی سه‌را به‌رۆكێن شه‌ری دا و شیا چه‌كه‌كێ باش ب هه‌ڤكاریا وه‌لاتێن جیهانێ بۆ پێشمه‌رگه‌ی دابین بكه‌ت، سه‌ره‌اری هه‌بوونا كێشه و ناكۆكیێن هنده‌ك حزب و لایه‌نان، لێ شیا ڤێ هه‌ڤسه‌نگیێ راگریت و نه‌هێلا ئاریشه په‌یدا ببن. له‌ورا مه كوردان ئه‌و هیڤی هه‌یه كو سه‌رۆك بارزانی هه‌می ژیێ خوه بۆ دۆزا گه‌لێ كورد و ئازادیا كوردستانێ ته‌رخانكریه، نوكه ژی ب شه‌ڤ و رۆژ بزاڤێن وی د به‌رده‌وامن ژ پێخه‌مه‌ت خزمه‌تكرنا خه‌لكێ كوردستانێ، له‌ورا ئه‌م كورد ب شانازی دزانین كو سه‌رۆكاتیا هه‌رێما كوردستانێ مه برێڤه‌دبه‌ت. ژبه‌ر رۆلێ وی یێ به‌رچاڤ د هه‌می كاودانێن نه‌خۆشدا، كو به‌ره‌ڤانی ژ ئاخا كوردستانێ كریه و هه‌رده‌م خه‌مخورێ گه‌ل و وه‌لاتێ خوه بوویه.
نيشاندان