ئەڤرۆ نيوز، سالار دۆسکی:

ب ھەلکەفتا رزگارکرنا شنگال و دەڤەرێن سەر ب زممار ڤە ژ لایێ پێشمەرگێ کوردستانێ و بن سەرپەرشتیا سەرۆک مەسعود بارزانی سەرۆکێ ھەرێما کوردستانێ، ئەنجومەنێ سەرکردایەتیا دەڤەرا بەھدینان یا یەکگرتووی ئیسلامی کوردستان بەیان نامەک بەلاڤەکریە، دناڤا شەش خالان دا چەندین خواست و داخازی رێزکرینە بۆ خەلکێ دەڤەرێ، ژوانا خواستیە پشکەک ژ بۆدجا پارێزگەھا نەینەوا بۆ ئاڤەدانکرنا شنگال بھێتە تەرخانکرن، دیسا پێشمەرگێ بریندار و پێدڤی ب دەرڤە ھەبیت بۆ چارەسەریێ بھێتە ھنارتن،ئەڤە دەقەکێ بەیان نامێ یە.

بەیاننامەک ژ جڤاتا سەرکردایەتیا دەڤەرا بەھدینان یا یەکگرتووی ئیسلامی کوردستان بھەلکەفتا رزگارکرنا شنگال
بسم اللە الرحمن الرحیم

ب/ بەیاننامە

جەماوەرێ سەربلند و سەرفەرازێ کوردستانێ
خێزان و مالباتێن شەھیدان و پێشمەرگێن قارەمان و سەربلند

پشتی بۆرینا نێزیکی (٦) مەھان ل سەر داگیرکرنا ناوچەیێن شنگال و زوممار و دەشتا مویسل ژلایێ گرۆپێ تیرۆرستی یێ داعش ڤە و کوشتنا ب سەدان خەلکێ سڤیل و بێ گونەە و تالانکرنا ڤان دەڤەران و دەربەدەرکرنا سەدان ھزار گەنج و پیر و ژن و زارۆکان بۆ ئاخا ھەرێما کوردستانێ ب گشتی و پارێزگەھا دھوکێ ب تایبەتی د دیمەنەکێ تراجیدیدا ل پێش چاڤێن جیھانێ، ئەڤرو د داستانەکا دیرۆکیدا پێشمەرگێن قارەمانێن کوردستانێ شیان داستانەکا دی یا تومار بکەن وپتریا ڤان دەڤەرا رزگار بکەن و بزڤڕیننە باوەشا ھەرێما کوردستانێ و ل ژێر سیبەرا ئالایێ گەشێ کوردستانێ.
ب ڤێ ھەلکەفتێ ئەم دەستخوشیێ ل پێشمەرگێن قارەمان دکەین ب ھەمی پلەیێن وانڤە و ئەم پیرۆزباییێ ل گشت وەلاتیێن ھەرێمێ دکەین و ژ خودێ دخوازین ئەو پێشمەگێن شەھید بووین ب بحەشتا خۆ یا بەرین شاد بکەت و ھەدارێ ب دەتە کەس و کارێن وان و سلامەتیێ ب دەتە برینداران و بەرھەمێ خوینا وان ئاڤاکرنا دەولەتا کوردستانێ بیت.
ھەروەسا ب ڤێ ھەلکەفتێ ئەم ڤان داخوازیێن ل خوارێ ئاراستەی لایەنێن بەرپرس و پەیوەندیدار دکەین ھیڤیدارین ل بەرچاڤ بێنە وەرگرتن:
١- رێزگرتن ل شەھیدان و پشتەڤانیا برینداران ب تایبەتی ئەوێن پێدڤی چارەسەریێ ل دەرڤەی وەلاتی.
٢- پشکەک ژ بودجا پارێزگەھا مویسل بێتە تەرخانکرن بۆ ئاڤەدنکرن و خزمەتکرنا وان دەڤەرێن ھاتینە رزگارکرن نەخاسمە نوکە ئەم یێن ل وەرزێ زڤستانێ و داخواز ژ حوکمەتا عێراقێ بێتەکرن خزمەت و ھاریکاریا وان بکەت.
٣- داخوازێ ژ رێکخراوێن مافێ مرۆڤی و دەستەیێن سەر ب نەتەوەیێن ئێکگرتیڤە دکەین راببن ب تومارکرنا ھەمی وان پێزانینێن گرێدای ھەوا قڕکرنێ و دانەنیاسینا وان وەک جینوساید نەخاسمە گۆڕێن ب کۆمەل.
٤- داخواز ژ وەلاتێن بەشدار د ھەڤپەیمانیا نێڤدەولەتیدا بێتەکرن لەزێ بکەن ل پشتەڤانیا پێشمەرگەی ژلایێ لەشکەریڤە دا بشێت ئەو دەڤەرێن ماین ژی رزگار بکەت، ھەروەسا دا بشێت پارێزێ ل سەر وان دەڤەرێن رزگارکری بکەت دا دووبارە نەئێنە داگیرکرن ژلایێ تیرۆرستانڤە.
٥- داخواز ژ دەستەیێن ھەوارھاتنێ یێن جیھانی بێتەکرن د ھەوارا خەلکێ وان دەڤەرا بچن و پشتەڤانی و ھاریکاریا وان بکەن.
٦- داخوازێ ژ حکومەتا ھەرێما کوردستانێ دکەین پشتی زڤڕاندنا خەلکێ وان دەڤەرا بۆ سەر مال و جھێن وان خزمەتێن ژ ھەژی بۆ پێشکێش بکەت ژ ئاڤێ و کارەبێ و ھەمی خزمەتێن دی یێن سەرەکی وەک پشکەک ژ بەرپرسیاریا نیشتیمانی.

جڤاتا سەرکردایەتیا دەڤەرا بەھدینان
یەکگرتووی ئیسلامی کوردستان
20\12\2014