ئەڤرۆ:
ل ئەلمانیا، سوید و بریتانیا و گەلەک وەلاتێن دی یێن ئورۆپی ب سەد ھزاران وەلاتی دەست ب خوەنیشادانان کرن و داخواز ژ ئێکەتیا ئورۆپا کرن کو یاسایەکا نوو ل دژی ھزرا توندرەویێ ل ئورۆپا دەرخینیت و کەسێن کو دەست ب کارێن وەسا ژی دکەن دڤێت بھێنە سزادان و ھەروەسا خوەنیشادەران داخواز کرن کو ب توندی چاڤدێریا مزگەفتان ل ئورۆپا بھێتە کرن دا نەھێلن ئەو ببنە ناڤەندێن بەلاڤکرنا ھزرێن توندرەوی و تیرۆرستی ل جیھانێ دا.
بسپۆرێن ئورۆپی یێن د بیاڤێ ئیسلاما سیاسی و تیرۆرێ دا دیار دکەن کو روودانا ل ئوسترالیا زەنگلا مەترسیا تیرۆرێ ل سەر ئورۆپا ژی نیشا ددەت و دڤێت پێرابوونێن باش ل ھەمبەر وان گرۆپ و کەسان بھێتە وەرگرتن کو کار بۆ بەلاڤکرنا ھزرێن توندرەویێ ل ناڤ جڤاکێ دا دکەن، چونکو چوونا ب سەدان کەسان ل ئورۆپا بۆ ناڤ رێزێن داعشێ مەترسیا وان کەسان ل ئورۆپا نیشا ددەت و ھەکە سەد کەس بەرێ چوونە ناڤ داعشێ دیارە ب ھزاران کەسێن دی ژی ل ئورۆپا ماینە و ئەو کەسە دشێن پتر ژ چەکێن ئەتۆمی مەترسیێ بۆ ئورۆپا دروست بکەن و دڤێت سازی و دەزگەھێن ھەوالگێریێ ب باشی کار بکەن دا ئەو کەس بھێنە گرتن.
ل ئالیێ دی ل چەند باژارێن ئورۆپا دادگەھێ بریار دا کو مزگەفت بۆ دەمەکێ بھێنە قەپات کرن و چاڤدێرێن سیاسی ژی دیار دکەن ھەکە کارەکێ وەسا بھێتە کرن دێ رێژا چوونا کەسێن توندرەو بۆ ناڤ داعشێ زێدەتر بیت و دڤێت وەلاتێن ئێکەتیا ئورۆپا پێکڤە بەرنامەکا رێک و پێک ئامادە بکەن دا کو ل رەخ شەرێ چەکداری ب ھزری ژی شەرێ داعشێ و گرۆپێن دی یێن تیرۆرستی بھێتە کرن.

ئه‌ڤرۆ نيوز:

دادگه‌ها ئه‌ورۆپى ئه‌ڤرۆ رۆژا چارشه‌مبى 17\12\2014 بزاڤا حه‌ماس ژ ليستا تيرۆرێ يا تايبه‌ت ب ئێكه‌تيا ئه‌ورۆپى ڤه‌ ده‌رخست و دهه‌مان ده‌م دا رێ ناده‌ت نوكه‌ بگه‌هيته‌ ئه‌ورۆپا.

دادگه‌ها داد يا ئه‌ورۆپى د به‌ياننامه‌كێ دا راگه‌هاند كو ئه‌وان حه‌ماس ژ ليستا تيرۆرێ يا سالا 2001 ئيناده‌ر، ب تۆمه‌تا وێ چه‌ندێ كو ل سه‌ر بنياتێ قانوونى نه‌چوو بوو د ناڤ ليستا تيرۆرێ دا، به‌لكو پشت به‌ستن ل سه‌ر پێزانينێن راگه‌هاندنێ و ئه‌نترنێتێ كربوو.

ژ لايێ خوه‌ ڤه‌ بزاڤا حه‌ماس پێشوازى ل ڤێ بڕيارێ كر و ب پێنگاڤه‌ك بۆ سه‌ركه‌فتنا كێشا فه‌لستينێ دا زانين.

ئاخفتنكه‌رێ ب ناڤێ حه‌ماس، فه‌وزى به‌رهۆم، بۆ فرانس پرێس راگه‌هاند: “ئه‌ڤه‌ سه‌ركه‌فتنا كێشا فه‌لستينێ و مافێن گه‌لێ فه‌لستينێ يه‌”، زێده‌تر گۆت: “سۆپاسيا دادگه‌ها ئێكه‌تيا ئه‌ورۆپى دكه‌ين بۆ ڤێ بڕيارا ئه‌رێنى ئه‌وا پێدڤيه‌ بڕيارێن نێڤده‌وله‌تى ژى ڤێ زولمێ ل سه‌ر گه‌لێ فه‌لستينى راكه‌ن”.

ژ لايێ خوه‌ ڤه‌ بنيامێن نه‌ته‌نياهۆ راگه‌هاند كو پێدڤيه‌ دادگه‌ها ئێكه‌تيا ئه‌ورۆپا پێداچوونێ د بڕيارا خوه‌ دا بكه‌ت و ب زووترين ده‌م بكه‌ته‌ د ناڤ ليستا تيرۆرێ دا.

نه‌ته‌نياهۆيى د به‌ياننامه‌كێ دا كو ژ نڤيسينگه‌ها وى به‌لاڤبوويه‌ راگه‌هانديه‌: “ئه‌م ل سه‌ر بڕيارا دادگه‌ها ئه‌ورۆپى ب ده‌رخستنا حه‌ماس ژ ليستا تيرۆرێ د رازى نينين، ئه‌ڤه‌ خه‌له‌تيه‌كا هۆنه‌رى يه‌، پێدڤيه‌ دووباره‌ بكه‌نه‌ د ناڤ ڤێ ليستێ دا”.