ئه‌ڤرۆ نيوز:

سه‌رۆكێ هه‌رێما كوردستانێ راگه‌هاند كو چاوانيا هه‌لبژارتنا ئه‌ندامێن كۆمسيۆنا بلندا سه‌ربه‌خۆيا هه‌لبژارتنان نه‌يا دروست بوويه‌ و حزبيانه‌ هاتيه‌ ئه‌نجام دا.

ب گۆره‌يى نووچه‌يه‌كێ مالپه‌رێ فه‌رميێ سه‌رۆكاتيا هه‌رێما كوردستانێ سه‌رۆك بارزانى د پێشوازيكرنا په‌رله‌مانتارێن مه‌سيحى و توركمان ل په‌رله‌مانێ كوردستانێ راگه‌هانديه‌ كو شێوازێ هه‌لبژارتنا ئه‌ندامێن كۆمسيۆنێ نه‌يا دروست بوو و ئه‌ڤه‌ دێ كارتێكرنێ ل پێگه‌هێ كوردستانێ ل جيهانێ كه‌ت.

راگه‌هانديه‌ ژى كو سه‌رۆكێ هه‌رێما كوردستانێ ته‌كست ل سه‌ر وێ چه‌ندێ كريه‌ كو كۆمسيۆنا هه‌لبژارتنێن هه‌رێما كوردستانێ ده‌زگه‌هه‌كێ نشتيمانى يه‌ و نابيت ب بيرا ته‌سكا حزباتى ته‌ماشه‌ بكه‌نێ.

سه‌رۆكێ هه‌رێما كوردستانێ ته‌كست ل سه‌ر وێ چه‌ندێ كريه‌ كو د نڤيسينا دستوورى دا ته‌كست ل سه‌ر پێداگريا مافێن كێم نه‌ته‌وه‌يان هاتيه‌ كرن و نوكه‌ ژى يێ رژدم ل سه‌ر كارێ خوه‌.

ئەڤرۆ:

ئەفسەرێ نڤیسینگەھا بەرھنگاربوونا  توندوتیژیا دژی ئافرەتێ ل قەزا شێخان دیار کر کو ژ دەستپێکا ھاتنا ئاوارەیان بۆ قەزا شێخان 29 ئاریشێن جڤاکی ل رێڤەبەریا وان ھاتینە تۆمارکرن.

رائیدێ مافپەروەر فازل فاخر ئەفسەرێ نڤیسینگەھا بەرھنگاربوونا  توندوتیژیا دژی ئافرەتێ ل قەزا شێخان بۆ رۆژناما ئەڤرۆ دیار کر  کو چار ژ وان ئاریشان رەڤاندن بوون و دو ژ وان کور و کچان خەلکێ شەنگالێ بوون و ئێک ژ وان خەلکێ  باشیکێ بوو و ئێک ژی خەلکێ تلەعفەر بوو و گۆت “ھەر چار ئاریشە ل دەف مە ھاتنە چارەسەرکرن”.

ناڤبری خویا ژی کر کو 25 ئاریشێن دی ژی ھاتینە تۆمار کرن کو ھندەک ژ ئالیێ نان ڤە ھاتینە تۆمارکرن و ھندەک ژ ئالیێ زەلامان ڤە و گۆت “ھندەک ھەڤژین ژ ئێک جوودا بووینە و دەمێ ئاوارە بووین ئێک ژوان ئەڤ مینحە وەرگرتیە، ئەڤجا ئالیێ وەرنەگرتی ئاریشە ل دەف مە  تۆمار کریە و مە ب رێکێن قانوونی ئاریشێن وان چارە کرینە”.

رائیدێ مافپەروەر فازل فاخر دیار کر کو ئێک ئاریشا کریارا سکسی ل دەف وان ھاتیە تۆمارکرن و گۆت “بەری ببنە ئاوارە ل شێخان ئەو کریارا سکسی ل شنگالێ دگەل کچەکێ ھاتبوو کرن و پشتی بووینە ئاوارە کچک دووگیان کەفتیە و مالا وان زانیە و ئاریشا وان ل دەف مە ھاتە تۆمارکرن و مە ژی ب رێکا قانوونێ کور و کچ ل ھەڤدو مارەکرن”.

ئەفسەرێ نڤیسینگەھا بەرھنگاربوونا  توندوتیژیا دژی ئافرەتێ ل قەزا شێخان گۆتژی: “بەری دو ئەینی یە کورەکێ ناحیا باشیکێ ژنەکا بەردایی کو ھەر ئەو ژی خەلکێ باشیکێ یە ژ لایێ وی کوری ڤە ھاتیە رەڤاندن و ھەتا نوکە جھێ وان نەھاتیە دیتن”.

ئەڤرۆ:
فەرماندێ ھێزێن پێشمەرگەی ل کۆبانێ دیارکر کو وەزیرێ پێشمەرگەی سۆزدایە ھەر پێشمەرگەکێ چوویە کۆبانێ دێ دەمانجەکێ ب دیاری وەرگریت.
عەمید ئەحمەد گەردی بۆ رۆژناما ئەڤرۆ گۆت فەرماندێ ھێزا پشتەڤانی ب مە راگەھاندیە کو وەزیرێ پێشمەرگەی دێ دەمانجان دەنە ھەر پێشمەرگەکێ چوویە کۆبانێ و شەڕێ داعش کری، بەلێ ھەتا نوکە دیارنینە دێ کەنگی و چاوا دەنێ، ئەو ژی دیارکر کو ھەر فەرمانەکا بۆ بھێت دێ ھێتە بجە ئینان و بۆ ئیمتیازاتان نەچووینە کۆبانێ، بەلێ وەکو ماف ھەر تشتەکێ بۆ وان بھێتە کرن ھەر کێمە، چونکو ئەوێن چووین سەرەرایی کێماسیان ژی ئەرکەکێ قەھرەمانی بجە ئیناینە و جھێ دەستێن وان یێ دیارە.
عەمید ئەحمەد گەردی گۆت ژی ھێشتار دیارنینە دوبارە ئەم دێ چینە کۆبانێ یان ھێزەکا دی، ئەڤ ھێزا نوکە چووینە جھێ مە ھێزەکا ھەڤبەشە ژ ھێزا پشتەڤانیا ئێک و دو، بەلێ ئەم بەرھەڤین دوبارە بچینە کۆبانێ و شەڕی ل دژی تیرۆرستان بکەین، ھەر ھێزەکا بچیت جۆداھی نینە و ھەموو ھێزێن پێشمەرگەی بناڤێ وەزارەتا پێشمەرگەینە دچنە کۆبانێ، ئەم حەز دکەین بچینە کۆبانێ، ھەر وەختێ فەرمان بۆ مە بھێت ئەم بەرھەڤین بجە بینین.