مرۆڤ به‌رده‌وام د ناڤ روودانان دایه‌ و كارتیكرنێ لێ دكه‌ت ئه‌و ژی وه‌سا كارتیكرنێ لێ دكه‌ن، ئه‌ڤ روودانه‌ ل چ ئاست بن یان ب چ وارێ ژیانێ ڤه‌ گرێدای بن و زۆربه‌ی جاران ئه‌ڤ گوهۆرینه‌ ب مفانه‌ ب رێژه‌كا كێم ژ ئه‌ندامێن جڤاكی و یێن مای دبنه‌ قوربانی ئه‌ڤان روودانان و ب نه‌چاریڤه‌ و بۆ پاراستنا ژیان و سامان روومه‌تا خوه‌ جه و وه‌لاتێ خوه‌ ب جه بهێلیت و به‌ر ب چاره‌نڤێسه‌كێ نه‌دیار بچیت و ل ژینگه‌هه‌كا ئارام بگه‌ریت دوور ژ هه‌ر مه‌ترسیه‌كێ ل سه‌ر وی و خێزانا وی و د ئه‌نجامێ ڤان روودانان دا گه‌ل و جڤاكێن جیهانێ تێهكه‌ل دبن، ئه‌ڤ روودانا لڤینا مرۆڤی ژ جهه‌كی بۆ یێ دی ب ئه‌گه‌رێن هه‌بوونا جه‌نگا و دوبه‌ره‌كیا شه‌رٍِێن ناڤخوه‌ و یێن تائیفی و ره‌گه‌زپه‌رستی.. . هتد، دهێته‌ نیاسین ب دیاردا كۆچبه‌ریێ هه‌كه‌ ئه‌وی مرۆڤی سنۆرێن ده‌وله‌تا خوه‌ به‌زاندن و هه‌كه‌ ل ناڤ وه‌لاتێ خوه‌ بیت په‌نابه‌ره‌ و ئه‌ڤێ دیاردێ كارتیكرنێن خراب ل سه‌ر ره‌وشا ژیانا مرۆڤی هه‌نه‌ ژ هه‌می لایه‌كی ڤه‌ (سیاسی، ئابووری، جڤاكی، ره‌وشه‌نبیری، مێژوویی، ئێمناهی) و مرۆڤ نه‌چار دبیت ب هه‌ر بارودۆخه‌كی د ژیانێ دا رازی بیت بۆ پاراستانا گیان و سامانێ خوه‌ و زۆر جاران ته‌نها گیانێ خوه‌، ئه‌و ژیانا چ بنه‌مایێن ژیانێ نه‌بن تایبه‌ت ل ده‌سپێكێ هه‌تاكو هاریكاری بۆ دهێته‌كرن ژ لایێ خێرخواز و رێكخراو و جڤاكێ نێڤده‌ولی.
بێگومان ده‌مێ مرۆڤ وه‌ك تاك یان گه‌ل ب كۆمه‌ل خاك و وه‌لاتێ خوه‌ بجه دهێلن شوونوارێ ئابووری وجڤاكی یێن خراب ل دووڤ خوه‌ دئینیت و ژ لایێ ئێمناهیێ ڤه‌ كارتیكرنێن زۆر نه‌باش هه‌نه‌ وه‌ك:
 هه‌بوونا ڤێ دیاردێ نیشانه‌ كو ده‌ڤه‌ره‌ك هه‌یه‌ ئارامی تێدا به‌رقرار نینه‌ و كوشتن و توندوتیژی و تالانكرن و ره‌ڤاندن سیمایێن وێ ده‌ڤه‌رێ نه‌ و دوور نینه‌ زۆر جاران په‌نابه‌ر یان كۆچبه‌ر ئه‌وێ نه‌ئارامیێ ل گه‌ل خوه‌ دئینین، ژ لایه‌كێ دی ڤه‌ ئه‌و ده‌ڤه‌ر دبیته‌ ئارمانج ب كارێن تێكده‌ر بۆ ره‌وشا ئێمناهیێ.
 ب په‌یدابوونا ڤێ دیاردێ ژمارا كه‌سان ل وێ ده‌ڤه‌رێ بلند بیت و بێگومان كونترۆل و پێرابوونێن ئه‌منی یێن ژ لایێ ده‌زگه‌هێن ئه‌منی ب ساناهی نابن، ئانكو كارێ دابینكرنا ئێمناهیێ بۆ ژیانێ ب زه‌حمه‌ت دبیت.
 زۆربه‌ی جاران كه‌سێن داخوازكری ژ لایێ دادگه‌هێ ڤه‌ چ ل ئاستێ ناڤخوه‌ یان ده‌رڤه‌ د ناڤ په‌نابه‌ر و كۆچبه‌را ندا هه‌نه‌ و ل بن په‌ردێن جودا خوه‌ ڤه‌دشێرن ب مه‌ره‌ما خوه‌قورتالكرنێ ژ سزایێن قانوونی و ئه‌ڤان كه‌سان تاوانێن جۆراوجۆر ل وه‌لاتێن خوه‌ ئه‌نجامداینه‌ و كارێ لێگه‌ریان و گرتنا ئه‌وان یێ ساناهی نینه‌ و پێدڤی هاریكاریا په‌نابه‌ران و كۆجبه‌رانه‌.
 ب هه‌بوونا ژماره‌كا زۆر ژ په‌نابه‌ر و كۆچبه‌ران ل ده‌ڤه‌ره‌كێ (ده‌وله‌ته‌كێ) دبیته‌ ئه‌گه‌ر بۆ په‌یدابوونا تاوانیێن جۆراجۆر وه‌ك (دزی، شه‌لاندن، كوشتن. .. هتد) زێده‌باری ئاریشێن ئابووری و جڤاكی وه‌ك شه‌ركرن و رێژا تاوانێ پیڤه‌ره‌ بۆ دابینكرنا ئێمناهیێ.
 ب هه‌بوونا ڤێ دیاردێ تاوانا قاچاغیا مرۆڤان و ده‌ربازكرنا ئه‌وان ل سنۆران په‌یدا دبیت ژبه‌ر كو ئه‌ڤ كه‌سه‌ به‌رده‌وام ل جهه‌كێ ئارام دگه‌ریێت ل به‌رامبه‌ر وه‌رگرتنا پاره‌ی و ئه‌ڤ كه‌سێ قاچاغیێ دكه‌ت هه‌می پرنسیپێن ژیانێ بن پێ دكه‌ت و بازرگانیێ ب مرۆڤان دكه‌ت و تنێ ئارمانجاوی پاره‌یه‌ و ئه‌ركێ ده‌زگه‌هێن ئه‌منی قورس دبیت ب د ووڤچوون و گرتنا ئه‌وان و ئه‌نجامدانا پێرابوونێن قانوونی.
 ژ ئه‌نجامێ ئه‌ڤێ دیاردێ و ژبه‌ر باودۆخێ په‌نابه‌ر و كۆچبه‌ر تێدا د بوورن زۆربه‌ی جاران دبنه‌ نێچیره‌كا ب ساناهی بۆ ده‌زگه‌هێن سیخۆری یێن بیانی (ل گه‌ل رێزگرتنا من) بۆ مه‌ره‌مێن خوه‌ یێن تایبه‌ت بكاردئینن وه‌ك كۆمكرنا پێزانینان و ئه‌نجامدانا كریارێن تێكده‌ر.. . هتد.
دبیت خرابیێن دیتر هه‌بن به‌لێ ئه‌ڤه‌ یێن سه‌ره‌كینه‌ ژبه‌ر كو ئه‌ڤ دیارده‌ یا كه‌ڤنه‌ و ب دیرۆكا مرۆڤایه‌تیێ ڤه‌ گرێدایه‌.
ل ده‌مێ سالێن بووری هه‌رێما كوردستانێ بوویه‌ لاندكا په‌نابه‌ر و كۆجبه‌ران ژ به‌ر ئه‌وێ ئێمناهیا به‌رقرار و پێدڤی یه‌:
ـ ل دووڤ پیڤه‌ر و پره‌نسیپێن نێڤده‌ولی ره‌فتار ل گه‌ل په‌نابه‌ر و كۆجبه‌ران بهێته‌ كرن.
ـ پێرابوونێن ئه‌منی یێن توند بهێنه‌ وه‌رگرتن بۆ پاراستنا وان ویێن سه‌رپێچكار.

كه‌نه‌دا رۆژ ب رۆژ یا پتر رژد دبیت ل سه‌ر پشتگیریا ژ ناڤبرنا هێزێن رێكخروا داعش ل ته‌ماما رۆژهه‌لاتا ناڤین ب تایبه‌تی ل هه‌رێما كوردستانێ. هه‌ر ژ رۆژێن ده‌ستپێكا هاتنا رێكخراوێ ڤی وه‌لاتی ده‌ست ب هه‌ڤكاریان بۆ په‌نابه‌ران و هنارتنا دراڤی و د دووڤ دا په‌رله‌مانێ كه‌نه‌دی ب ده‌نگدانه‌كا زۆرینه‌ بریاردا وه‌كو كریار پشكداری د شه‌ریدا بكه‌ت، ئه‌و ژی بوو ئه‌گه‌ر هنارتنا شه‌ش فرۆكێن شه‌ڕی و نوكه‌ ب شێوه‌یه‌ك كاریگه‌ر پشكدارن د شه‌ریدا. لێ ل ڤان رۆژان وه‌سان خوه‌یا دبیت كو نه‌ ته‌نێ كه‌نه‌دا وه‌كو حوكمه‌ت دخوازیت پشكداریێ د سه‌نگه‌رێن شه‌ڕی دا بكه‌ت، لێ وه‌لاتیێن كه‌نه‌دی ژی خوه‌به‌خشانه‌ نها ده‌ست دایه‌ توماركرنا ناڤێن خوه‌ بۆ روودانا وان دا پشكداربن ل گه‌ل هێزێن پێشمه‌رگه‌ی و ل گه‌ل شه‌ڕڤانان ل رۆژئاڤایێ،
خۆبه‌خشێ كه‌نه‌دی دیلۆن هیللری
پشتی ولاتێ كه‌نه‌دا چه‌ند گاڤێن ئه‌رێنی هاڤێتین بۆ پشكداریه‌كا به‌رفره‌هتر و كاریگه‌رتر د شه‌ڕێ دژی رئكخروا تێرۆرستی یا دعش كری. ئه‌ڤان پێنگاڤان قه‌ناعه‌ته‌كا باش ل جه‌م گه‌له‌ك وه‌لاتیێن وان دروست بوویه‌ كو به‌لێ دڤێت كه‌نه‌دا پتر رۆلێ خوه‌ ببینه‌ و بۆ شكاندن و تێكدانا ته‌ڤنێ رێكخراوا ناڤكری. هه‌كه‌ ژی دزڤرن هندێ ئه‌ڤ وه‌لاته‌ و وه‌لاتتێن وێ وه‌سان باوه‌ردكه‌ن كو ئه‌ڤ ئارێشا هه‌نێ گه‌ر سنۆره‌ك بۆ نه‌هێت دانان سوبه‌ وێ ببن مه‌زنترین مه‌رترسی ل سه‌ر وه‌لاتێن وان ژ وان ژی كه‌نه‌دا. هه‌ر ژبه‌ر ڤێ ئێكێ ژی هه‌تا نوكه‌ دو وه‌لاتی ل مه‌یدانا شه‌ڕینه‌ ل كوردستانێ دژی هێزێن تاریێ ئێك ژ وان ب ناڤێ (دیلۆن هیلله‌ر) كو به‌ریا نوكه‌ ئێك ژ سه‌ربازێن كه‌نه‌دی بوو ل ئه‌ڤغانستانێ بوو. ئه‌و دا خۆیا كرن كو ئه‌و نكاره‌ ده‌ستڤالا بمینه‌ و ئه‌و هێزێن تێرۆرست ب ڤان كارێن هۆڤانه‌ رابن. وه‌لاتیه‌ك دن یا كه‌نه‌دی كو ژ نوكه‌ ل كۆبانێ یه‌ و ل گه‌ل شه‌ڕڤانان به‌رخۆردێ دكه‌ت. لێ یا ژ هه‌ژی گۆتنێ یه‌ ل چه‌ند رۆژێن چووی ب ده‌هان كه‌سان ناڤێن خوه‌ داینه‌ڤ حوكومه‌تا كه‌نه‌دا و نوكه‌ فۆرمێن خوه‌ پركرینه‌ و د ئاماده‌نه‌ ل ده‌مه‌ك نێزیك بێن ڤه‌گوهاستن خوه‌به‌خشانه‌ بۆ كوردستانێ داكو پشته‌ڤانیا گه‌لێ كورد بكه‌ن بۆ ژناڤبرنا داعشان ژ ناڤا ئاخا وان. وه‌كو خوه‌یا دبیت كو كه‌نه‌دا سیاسه‌تا خوه‌ یا نه‌رم و جاران به‌ر ب گوهۆرینێ یه‌ ل دژی گرۆپێن تیرۆرستی، نه‌مازه‌ پشتی دو روودانێن تیرورستی ل سه‌ر ئاخا وێ چێبووین، ئه‌و ژی ب كوشتنا دو پۆلیسێن وان كو ئێك ل باژێرێ مۆنتریال بوو و یا دویان ل باژێرێ پایته‌خت بوو كو دكه‌ته‌ باژێری ئۆتاوا ئه‌ڤ هه‌ردو روودانه‌ هاتن ئه‌نجامدان پشتی كه‌نه‌دا بریار دای كو پشكداری د شه‌ڕیدا بكه‌ت ل دژی رێكخراوا داعش.
ب ڤی ئاوای كه‌نه‌دا رۆژ ب رۆژ یا پتر رژدبیت بۆ هه‌ڤكاریا كوردان و هه‌موو هێزێن نێڤنه‌ته‌وی كو رێكخراوا ناڤكری ژ ناڤ ببه‌ن. هه‌تا ئه‌ڤرۆ گه‌ر ته‌نێ حوكمه‌ت بوویه‌ ئه‌ڤ حه‌زه‌ هه‌بوویه‌ لێ نوكه‌ ئه‌و خال چو بۆ خاله‌ك بلندتر ئه‌و ژی پشته‌ڤانیا وه‌لاتیانه‌ بخوه‌ بخه‌شكرنێ دا كو مل ب ملێ حوكمه‌تا خوه‌ڤه‌ ببن پشكه‌ك ژ پێنگاڤێن سه‌ركردێن وه‌لاتێ خوه‌ ل دژی تیرۆرێ.