راوێژکارێ حوکمەتا ھەرێما کوردستانێ بۆ کارۆبارێن وزێ بۆ بەرپەرێ ئابووریێ رۆژناما ئەڤرۆ دیارکر کو ھەر دو حوکمەتێن بەغدا و ھەولێرێ یێ بزاڤا دکەن کو دەستورێ عیراقێ بیتە بنەما بۆ چارەسەرکرنا کێشێن دناڤبەرا ھەر دو کاندا و ب رونشتن و ئاخفتن کێشە بھێنە چارەسەرکرن و ئێکلاکرن.
ئەڤرۆ ، سالار دۆسکی:
د. بێوار خنسی زێدەتر گۆت: شەرەکێ گەلەک مەزن ل عیراقێ دھێتەکرن و تیرۆرێ دەڤەرەکا مەزن گرتیە و داعش نێزیکی 50 ھزار مەترێن چارگوشە ل عیراقێ دەستەسەرکرینە کو دبیتە چارێکەکا عیراقێ، ل دووڤ ئامارێن وەزارەتا پەترۆلا عیراقێ خوسارەتیێن پەترۆلێ 20 ملیار دۆلارن و ھەکە پێشمەرگە نەبا دبیت خوسارەتیا عیراقێ ژ 40 ملیارا دا دەربازبیت، پێنگاڤا نێزیکبوونا ھەولێرێ و بەغدا دێ گەلەک باش بیت چونکە شەرێ دولا ل گەل عیراقێ دەست پێکریە، دابەزینا پەترولێ 100 دۆلاران بۆ کێمتر ژ 70 دۆلاران، ب ڤێ چەندێ میزانیا عیراقێ 27% کێمتر لێ ھاتیە، چونکە داھات 95% ژ پەترۆولێ یە و کارتێکرن ل ھەرێما کوردستانێ ژی ھاتیەکرن.
ناڤبری ئاشکراکر کو ھەرێما کوردستانێ نوکە 320 ھزار بەرمیلان بەرھەم دھینت و دفرۆشت و شیانێن ھەین دووماھیا ئەڤ سالە بکەتە 400 ھزار بەمیل د رۆژەکێ دا ، پێنگاڤا رادەستکرنا 150 ھزار بەمیلان د رۆژەکێ دا بەرامبەر 500 ملیۆن دۆلاران کارەکێ باش بوویە ھاتیەکرن، قۆناغا بھێت 500 ملیۆن دۆلارێن دی ژی دێ ھێن بەرامبەر بەردەوام بوونا 150 ھزار بەرمیلێن پەترۆولێ ب رێیا کۆمپانیا سۆَمۆ، ئەڤە ھەموو بەرامبەر ھنارتنا ڤی پارەی یە دا ھەرێما کوردستانێ بشێت مووچێن فەرمانبەرێن خوە بدەت.
ناڤبری ھێشتا ژی گۆت: شەرێ پێشمەرگێ ل کوردستانێ ل گەل داعش پێدڤی ب مەزاخیتەکێ زۆرە و زێدەباری ھاتنا نێزیکی 2 ملیۆن ئاواران ژ سورویا و باشور عیراقێ و دەڤەرێن کوردستانیێن دەرڤەیی ھەرێمێ بۆ کوردستانێ، ھەکە پێشمەرگێ کوردستانێ نەبا دا ئاوارە گەھەنە 4 ملیۆنان ل کوردستانێ چونکە ژ خانەقین و کەرکووک و ھەتا دگەھیتە شنگال ھەموو دا بەر ب کوردستانێ ھێن.
بێوار خنسی ھێشتا ژی گۆت: دەڤەرێن پەترۆلێ یێن دەستێ داعش دا ژ فەتحە ھەتا دگەھیتە کەسکێ و رێک و ھێلا بۆ جیھان دچیت ھاتیە راوستاندن، دیسا پێنچ زەڤیێن پەترۆلێ ل گەیارە د دەستی دانە، دیسا زەڤیەک ل ھەمان دەڤەر ھەیە د دەستی دایە، حەمرین، حوکمەتا عیراقێ نەشێت پەترۆلێ دەربێخیت و کەفتیە د دەستێ تیرۆرستێن داعش دا.
ناڤبری ھێشتا ژی گۆت: فرۆتنا 150 ھزار بەرمیلێن گازێ ب رێیا بەغدا گەلەک ب ساناھی کەتیە و دێ ڤالاھی ھێتە پڕکرن چونکە حوکمەتا بەغدا نوونەرێ خوە ھەیە، لێ تشتێ باش کلیلا بریارێ د دەستێ کوردان دایە و ھەر دەمێ پارە نەھات دێ ھێتەگرتن و دێ فرۆشین و دێ مفا ژێ ھێتـە وەرگرتن، دیسا نوکە پەترۆلا ھەرێما کوردستانێ ب رێکا تورێ و ب رێیا ھێلان و دیسا ب رێکان تانکەران ژی دھێتە فرۆتن و بەر ب زێدەبوونێ یە..کوردستان ژ 320 ھزار بەرمیلان دێ 150 ھزار بەرمیلان ل بەندەرێ جیھان رادەستی بەغدا کەت و 170 ھزاران دێ فرۆشیت و حوکمەتا ھەرَما کوردستانێ ئازادی ھەیە و ئەڤە ژی پێنگاڤەکا باشە ژلایێ قانوونی ڤە و رێکەفتنەکا فەرمی یە کو ھەرێم ماف ھەیە پەترۆلا زێدە ب فرۆششیت.
ناڤبری ئاشکراکر ژی کو ل دووڤ قانوونا ئوپێک وەلاتێ دبیتە ئەندام دڤێت دەولەت بیت و ژ 13 وەلاتان پێک دھێت و عیراق ئەندامە دوی وێ رێکخراوێ دا و ئەە نەکێشە بۆ فرۆتنا پەترۆلێ چونکە جیھانێ 33 وەلات ھەنە پەترۆولێ دفرۆشن، دیسا عیراق ب رێکا سۆمۆ ھەر سال پەترۆلێ دفرۆشیتە نێزیکی34کۆمپانیێن بیانی یێن بناڤ و دەنگ و راستەوخۆ ناھێتە فرۆتن بۆ وەلاتان.
د.بێوار خنسی ئەوچەندەژی گۆت: دڤێت پەترۆل گران بیت چونکە چ فاکتەر نین پەترۆل ئەرزان ببیت و بازارێ جیھانی نوکە رۆژانە پێدڤی ب 90 ھزار بەرمیلانە، شەرێ ھاتیەکرن شەرێ ئابووری یە و تایبەت دگەل رووسیا و ئیرانێ، روسیا نێزیکی 10 ملیۆن بەرمیلێن پەترولێ رۆژانە دەردێخیت و داھاتیێ وێ ل سەر پەترولێ یە، بۆ بەرمیلێ 110 دولار دانابوون و نوکە ئینا بن 80 دولاران دا ئەڤە فشارە بۆ سەر وەلاتان کو کێشێن خوە دگەل ئوکرانیا چارەسەرکەن، دیسا پشتەڤانیا ئیرانێ نەھێتەکرن دا لاواز بیت دبیاڤێ وزێ دا وپێشڤەچوونێ نەکەت، پێشبینی دکەم ھەتا دووماھیا ئەڤ سالە پەترۆل گران بیت ژ 100 دۆلاران ھەتا 110 بچیت.
نووترين نووچه
- نەخوەشخانەیا پەنجەشێرێ ب ئاست و كوالێتییەكا بلند دێ كەڤیتە د خزمەتا وەلاتییاندا
- پەرلەمانتارەك: ئەمریكا و ئۆپێك فشارێن ل ئیراقێ دكەن بۆ هنارتنا پەترۆلا هەرێما كوردستانێ
- ل نێزیك پارتی دێ بارەگەهێ مەكتەبا رێكخستنێ ل كەركووكێ ڤەكەت
- دەلیڤەیا سەختەكاریێ ب رێكا تەكنەلۆژیایێ یا هاتیە كێمكرن و دەنگ ب دەستی ژی دێ هێنە هەژمارتن
- پێدڤییە نیازپاكی و ئیرادەیەكا راستەقینە بۆ چارەسەركرنا كێشەیان هەبیت
- پێدڤییە هەوا هەلبژارتنان د سەقایەكێ ئازاد دا و دوور ژ گرژیێ بهێنە ئەنجامدان
- مەسرور بارزانی: ب هێزبوونا پارتی ب هێزبوونا كوردستانێیە
- گرنگە پڕۆژەیێ (هەژمارا من) بەردەوام بیت
- سەرۆكێ حوكمەتا هەرێمێ بۆ گوپیتكا جیهانییا سەقای هاتە ڤەخواندن
- پترییا كێشەیان دێ هێنە چارەسەركرن
سهرهكى Twitter
دولار و يۆرۆ هاتنه خوار
زێر بلند بوو
چا و شیری تێکەل نەکەن
ئه‌ڤرۆ:
ژبەرکو چا ژ بەربەلاڤترین جورێن ڤەخوارنایە ل سەر ئاستێ جیھانێ، و ب گەلەک رەنگ و تامان ھەیە و بۆ بەرھەڤکرنا چایێ ژی گەلەک وەخت پێ نەڤێت، لەورا خەلک ب رەنگەکێ گشتی ھەر ئێکی بووچونەک ھەیە دەربارەی ڤەخوارنا چایێ.
رێکێن چێکرن و ئامادەکرنا چایێ د جودانە و ئەڤ جوداھی یە ژی ل سەر گێولێ وان کەسان دمینیت ئەوێن دڤێن ھەمەرەنگیێ بێخنە د رەنگێن وێدا، ئەڤێ ھەمەرەنگیێ ڤەکولینێن زانستی ژی ڤەگرتینە و ھندەک دبێژن چا یا باشە و گەلەک مفایێن ساخلەمیێ تێدا ھەنە و ھندەک ڤەکولین ژی گەلەک زیانێن وێ بەرچاڤ دکەن، دووماھی ڤەکولین یا وەلاتێ ھولەندا بوویە کو دیاردکەت ڤەخوارنا گەلەک چایێ یا ب مفایە بۆ ساخلەمیا دلی و تووشبونا مرۆڤی ب نەخوشیان کێم دکەت، دڤێ ڤەکولینێ دا ئەوا کو بۆ دەمێ ١٣ سالان ڤەکێشای و ٤٠ھزار کەس بخوڤەگرتین دیارکریە کو ئەو کەسێن رۆژانە ٤-٦ کوپێن چایێ ڤەدخون رێژا تووشبوونا وان ب نەخوشیێن دلی ب سێتکێ کێم بوویە و دیسان ئەو کەسێن رۆژانە دو ھەتا چار کوپێن قەھوێ ڤەدخون مەترسیا کێمبوونا وان ب نەخوشیێن دلی کێم بوو، بەلێ چ کارتێکرنێن پوزەتیف ژی نینن ھەکە مرۆڤ قەھوێ زێدە ڤەخوت، ھەروەسان زێدە ڤەخوارنا وێ نابیتە ئەگەرێ زێدەبوونا نەخوشیێن دلی و پەنجەشێرێ، دھێتە زانین کو ھولەندی پیچەک شیری ل سەر قەھوێ زێدە دکەن بەری ڤەخون، بەلێ چ تشتا ل سەر چایێ زێدە ناکەن.
پێزانێن ھەڤدژ ھەنە ل دور زێدەکرنا شیری ل سەر ئێک ژ پێکھێنەرێن چایێ کو دبێژنێ ( بولیفینول) و ھندەک زانا و شارەزا رابوون ب ئەنجامدانا ڤەکولینەکێ ل دور مفایێن ساخلەمیێ یێن زێدەکرنا شیری ل سەر چایێ و بۆ وان دیاربوو کو کاریگەریێ دگەل ھندەک دژەژەنگارێن دگەل چایێ دکەت و رێکێ ل چایێ دگریت کو ھەڤرکیا وان ھوکارێن دبنە ئەگەرێ پووچکرنا لەشی دکەن، زانایان تەکەز کر کو زێدەکرنا شیری ل سەر چایێ دبیتە ئەگەر کو مروڤ مفای ل چایێ نەبینیت و چا کاردکەت بو پاراستنا لەشی ژ نەخوشیێن دلی، دیسان چایێ شیان ھەنە بۆ باشکرنا خوینھنێرێن لەشی، و پاشی شیان ھەنە کو پاراستنا ئاستێ فشارا خوینێ دلەشیدا بکەت، ھەروەسان دەربارەی قەھوێ ژی پێک دھێت ژ ھندەک کەرستەیان کو ھندەک جاران رێژا تووشبونێ ب نەخوشیێن دلی زێدەدکەن یان کێم دکەن، ژبەرکو قەھوە رێژا کولیسترولی دناڤ خوینێ دا زێدەدکەت بەلێ رادەیەکی بۆ نەخوشیێن دلی دادنیت، بەلێ ئەنجامێن ڤەکولینێ ھەر وەک ئەنجامێن وێ ڤەکولینێ بوون ئەوا کو بشپورێن کومەلا نەخوشیێن دلی ل نەتەوێن ئێکگرتی گەھشتینێ کو دیارکربوو ڤەخوارنا دو ھەتا چار کوپێن قەھوێ رۆژانە ب رێژا ٢٠% نەخوشیێن دلی کێم دکەت، ژلایێ خوڤە پروفیسور ( یفون شوو) ئەوێ کو سەرپەرشتی ل سەر ڤەکولینێ دکر دیارکر کو ئەو کەسێن حەز ژ چا و قەھوێ دکەن مفای ل دلێ خو دکەن و چ مەترسی ل سەر نینە، ھەروەسان کورتیا ڤەکولینەکا بریتانی دیارکریە کو ڤەخوارنا ھەشت کوپێن چایێ رۆژانە نوبە و دربێن دلی کێم دکەت و د. کاری روکستون تایبەتمەندێ خوراکیێ دیاردکەت کو ئەو پێکھاتێن دناڤ چا و قەھوێ و کێکەوێ دا ھەین کارتێکرنەکا ئەرێنی بۆ مێشکێ مرۆڤی ھەیە و مرۆڤ پتر ھشیار دمینیت و بیردانکا مرۆڤی ب ھێز دئێخن.
سەروکێ یانا دھوک: پارێزگارێ دھۆکێ و لایەنێن پەیوەندیدار بەرپرسیارن ژ ژناڤچونا یانێ
ئەڤرۆ:
سەروکێ یانا دھوک یا وەرزشی تایبەت بو روژناما ئەڤرۆ دیارکر ھەکە تیمێن یانا دھوکێ ژ ناڤچون پارێزگارێ دھوکێ و لایەنێن پەیوەندیدار بەرپرسیارن چونکو نوکە د رەوشەکا گەلەک خراب دایە.
ئەف داخویانیە ژلایێ سەروکێ یانا دھوک ھاتە پێش پشتی پارێزگارێ دھوکێ بو دەزگایەکێ راگەھاندنا ھەرێمێ دیارکری ئەو ب سیتەمێ نوکە یێ رێڤەبرنا یانا دھوک نەشێت پشتەڤانی و ھاریکاریێ بکەت و چو خوشی و تام د وی ناسناڤی نابیت ھەکە پرانیا یاریکەران یێن بیانی بن.
زێدەتر کاوە فەیسەل بو روژناما ئەڤرۆ گوت: ئەف کارێ ھەتا نوکە ھاتیە کرن مە ب رەزامەندیا پارێزگارێ دھوکێ و لایەنێن پەیوەندیدار کریە و مە کارگێریا یانێ کومبون د گەل پارێزگارێ دھوکێ کربوو و دووڤدا دەست ب کار بووین و ناڤبری ل دەمێ سەرەدانا یانێ کری بو مە دوپاتکربوو دێ پشتەڤانیێ کەت.
زێدەتر ناڤبری خویاکر ئەف داخویانیا پارێزگاری یا بەری دو روژان دێ کارتێکرنا 100% ل سەر دەروونێ یاریکەران ھەبیت و ھەکە تیم داکەفت یان ژ ناڤ چوو پارێزگارێ دھوکێ و لایەنێن پەیوەندیدار بەرپرسیارن.
ل دووماھیێ ئەو چەندە ژی ئاشکەرا کر ل پێنجی ڤێ ھەیڤێ دێ دەرگەھێ ڤەگوھاستنا زڤستانێ یێن یاریکەران ھێتە ڤەگوھاستن و ھەر یاریکەرەکێ بچیت نەشێن رێکێ لێ بگرن و مافێ وایە چونکو ھەتا نوکە چو پشکەک ژ ھەڤبەستێن وان بو نەھاتینە دان.
كه‌نگی دێ مه نه‌خۆشخانه‌كا له‌شكری هه‌بیت؟
هه‌كه مرۆڤ ب گشتی ته‌ماشه بكه‌ته بنه‌مایێن ده‌وله‌تبوونێ هه‌بوونا ئاخ و زمان و هێزا له‌شكری و كولتوری یه و دگه‌ل چه‌ند بنه‌مایێن دن، دیسا هه‌كه ئه‌م ته‌ماشه‌ی ملله‌تێ كورد بكه‌ین دێ بینین چ بنه‌مایێن ده‌وله‌تێ ژێ دكێم نینن، نه‌مازه ژ سالا 1992 وه‌ره ئه‌م خودان په‌رله‌مان و حوكمه‌تین، لێ هنده‌ك تشت هه‌نه هه‌تا نها هزر لێ نه‌هاتیه‌كرن یان ژی هاتینه پشتگوهخستن! و ئێك ژ وانا هه‌بوونا نه‌خۆشخانێن له‌شكریه ل هه‌رێما كوردستانێ. ل ده‌مه‌كی هه‌ر وه‌لاته‌كێ هه‌بیت و سوپا یان له‌شكرێ خوه هه‌بیت نه‌خۆشخانێن له‌شكری هه‌نه.
بێگومان ب ده‌هان ساله ملله‌تێ كورد د خه‌بان و تێكوشینێ دایه، لێ وان هه‌می سالان ئه‌م نه خودان حوكمه‌ت بووین، به‌لێ مه هه‌ر نوشدار و برینپێچ د ناڤ پێشمه‌رگه‌ی دا هه‌بوون. ئه‌ڤجا هه‌كه ئه‌م به‌حسێ باژارێ دهۆكێ بكه‌ین، بێگومان هه‌ر ئه‌ڤ نه‌خۆشخانێن دهۆكێ بۆ خزمه‌تكرنا باژاری ب خوه دكێمن و دبه‌رته‌نگن، چونكی ب تنێ نه‌خۆشخانا ته‌نگاڤیان یا دهۆكێ بۆ حاله‌تێن ته‌نگاڤی هه‌یه. نه‌مازه ئه‌ڤه چه‌ند هه‌یڤه تیرۆرستێن داعش شه‌ره‌ك ل سه‌ر مه فه‌رز كریه و بێگومان شه‌ر ئانكو شه‌هیدكرن و برینداركرن و ئه‌و بارگرانی كه‌فتیه سه‌ر نوشدار و نه‌خۆشخانێن مه.
ب دیتنا من ب هه‌بوونا نه‌خۆشخانێن له‌شكری دێ پتر چاڤدێریا پێشمه‌رگه‌ی هێته‌كرن و ل هه‌مان ده‌می دێ پتر ده‌لیڤه ل نه‌خۆشخانێن دی هه‌بیت كو باشتر چاڤدێریا وه‌لاتیان ژی بهێته كرن، هه‌روه‌سا دێ گڤاشتن ل سه‌ر نه‌خۆشخانا و نوشداران كێم بیت، چونكی نه‌خۆشخانێن مه دبه‌رته‌نگن، ب تایبه‌تی نه‌خۆشخانا ته‌نگاڤیان ب ئێكجاری یا به‌رته‌نگه. چونكی ده‌مێ برینداران دئیننه نه‌خۆشخانێ كه‌س و كارێن وان هه‌می پێكڤه ل نه‌خۆشخانێ كۆم دبن، هه‌تا هنده‌ك جارا دبیته سه‌ده‌ما شه‌ره‌ده‌ڤی ل گه‌ل نوشداران و ئه‌ڤه نه‌دبه‌رژه‌وه‌ندیا گشتی دایه، ل ده‌مه‌كی هه‌كه مه نه‌خۆشخانێن له‌شكری هه‌بن ئه‌ڤ گڤاشتنه هه‌می نابیت و هه‌ر ئێك دێ ل جهێ خوه كارێ خوه كه‌ت، چونكی ل وی ده‌می پۆلیس و پێشمه‌رگێن چاره‌سه‌ریه‌ك هه‌بیت دێ قه‌ستا نه‌خۆشخانێن سه‌ربازی كه‌ن ل سه‌رانسه‌ری هه‌رێما كوردستانێ.
هه‌روه‌سا ب دیتنا من نوشدارێن مه ژی دێ دبه‌رهه‌ڤبن ل ڤان جۆره نه‌خۆشخانان كار بكه‌ن و ل گۆر بنه‌مایێن له‌شكری و سه‌ربازی كانێ چ ژ وان پێدڤیه و چ پێدڤیه بۆ وان بهێته‌كرن، بۆ نموونه هه‌كه خوله‌كا مه‌شق و راهێنان بۆ بهێته ڤه‌كرن و هه‌ر نۆشداره‌كی پله‌كا له‌شكری بده‌نێ، چونكی هنده‌ك كه‌س هه‌نه پلێن له‌شكری وه‌رگرتینه یان داینێ و ژ هه‌ژی وان پلانه، ئه‌ڤجا هه‌كه بده‌نه نوشداران ب دیتنا من باشتره، چونكی دێ بنه نوشدارێن له‌شكری و خزمه‌تا له‌شكری و پێشمه‌رگه‌ی كه‌ن.
هه‌كه ئه‌ڤ گڤاشتنه ل سه‌ر نه‌خۆشخانا رابوو، هینگێ هه‌می كارمه‌ند دێ شێن ب دروستی كارێ خوه كه‌ن و هه‌ر خه‌مساریه‌كا ژ ئالیێ نوشداران ڤه بهێته كرن پێدڤیه هینگێ كه‌س خوه ژ گازندێن وه‌لاتیان تۆره ناكه‌ت، لێ نها هندی گازنده و ره‌خنه ل نوشدار و ساخله‌میێ بهێته كرن ب دیتنا من شاشیه‌كه د ده‌رحه‌قێ ساخله‌میێ دا دهێته‌كرن.
بێ دیسا خوه هه‌بیت ل سه‌ر هنده‌ك دهێته هێزا له‌شكری یان سوپایه‌ك هه‌بیت .
پێدڤی یه كورد ل گه‌ل گوهۆرینان بیت
شتراتیژیا سه‌ركه‌فتی یا سه‌ركرده‌یا سیاسی یا كوردستانێ یا دیاره خوه ب خودان به‌رژه‌وه‌ندی دزانیت ژ هه‌مو روویه‌كی ڤه، د ناڤ ڤان قه‌یران و گوهۆرینان دا كو چاڤه‌ریێ یه دێ هێنه روودان ل سه‌ر سه‌ر نه‌خشه‌یێ سیاسی یێ ده‌ڤه‌را رۆژهه‌لاتا ناڤه‌راست دا، ئه‌ڤرۆ د ڤی قووناغا هه‌ستیار دا كو وه‌لاتێ مه یێ كه‌فتیه به‌ر هێرشێن درنده‌ترین رێكخراوا تیرۆرستیا جیهانی ب ناڤێ(داعش) یا گرنك ئه‌وه كورد ل ڤێ قووناغێ ژ هه‌می قووناغێن دی یێن خه‌بات و به‌رخودانێ پتر پێدڤی ب ئێكگرتن و ئێك مه‌رجعیه‌تا سیاسی هه‌بیت، داكو بشێت هێزه‌كا سیاسی یا كاریگه‌را هه‌موو لایه‌نێن سیاسی د كوردستانی دا خڕڤه بكه‌ت كو ئه‌ڤێ هێزێ ئاراسته بكه‌ت ژبۆ پێشڤه‌برن و ئێكخستن و گۆتارا سیاسی یا كوردستانی د چاڤێ جێهانێ دا.
چونكو بۆ ده‌وله‌تێن هه‌ڤپه‌یمان تایبه‌ت ئه‌مریكا بۆ وان كوردستانه‌كا مه‌رجعیه‌ته‌كا ئێك گۆتارا و ئێك ده‌نگ هه‌بیت ب سانه‌هیتره و كو دێ هزره‌كێ بۆ كه‌ن، كو كورد دێ ب هێز ئاگه‌هداری و ئاماده‌یا هه‌ر دانوستانده‌كێ بن، زێده‌باری ئه‌ڤ هێرش و گه‌فێن مه‌زنێن ل سه‌ر هنده‌ك پارچێن كوردستانێ كو یا دیاره پالنه‌كا دارێتی یه هزر بۆ پیلان بۆ كرینه ژ لایێ هنده‌ك گرۆپ و ده‌سته‌هه‌لاتێن هه‌رێمی یێن ده‌وروبه‌ر ڤه ئارمانجا وان ژی بۆ لاوازكرنا یان نه‌هێلانا پرۆژێ سه‌ركرده‌یا هه‌رێما كوردستانێ بوو كو ئه‌و ژی گشت پرسی و پاشی دانا پرۆژێ به‌ری بنیاتێ ئاڤاكرنا ده‌وله‌تا كوردی و كو ئه‌ڤ پرۆژ ژی ده‌ستپێشخه‌ریا ئه‌ندازیارێ ئاڤاكرنا ده‌وله‌تێ یێ سه‌رۆكێ هه‌رێمێ یه.
سه‌ره‌رایی ڤێ بانگه‌وازیێ دوژمنێن مه تووشی شوك و گێژه‌ڤانكیێ كرن كو ژبه‌ر ڤێ چه‌ندێ ژی ئاراسته‌یا هێرشێن تیرۆرستا ژ به‌غدا ڤه‌گۆهاست بو سنۆرێن هه‌رێما كوردستانێ، چونكو هه‌لبه‌ت هه‌ر گۆهۆرینه‌كا ل سه‌ر چوپولیتیكا نه‌خشێ ده‌ڤه‌رێ بهێته ئه‌نجامدان كو ژ لایێ رۆخسارێ یان ناڤه‌رۆكێ ڤه بیت به‌ری هه‌ر لایه‌نه‌كی د به‌رژه‌وه‌ندیا بلندا ملله‌تێ كوردستانێ دایه ب دلێ هه‌ر تاكه‌كێ كورده كو ئه‌ڤ گۆهۆرینه دێ بیته ئه‌گه‌رێ په‌یدابوونا ئومیده‌كا مه‌زن ل ده‌ڤ خه‌لكێ كوردستانێ كو دێ بیته پالده‌ره‌ك بۆ نێزیك گه‌هشتنا وێ ئارمانجا ب سه‌ده‌هان ساله كورد قوربانیێ بۆ دده‌ن، ژبه‌ر وه‌كو دهێته دیتن كو د مێژویا كه‌ڤن و هه‌ڤچه‌رخا خه‌باتا رزگاریخوازیا كوردستانێ دا كو ئه‌ڤه جارا ئێكێ یه كورد سه‌ركه‌فتنه‌كا ب ڤی ره‌نگی هنده مه‌زن ب ده‌ستخوه‌ڤه دئینن ل سه‌ر ئاستێ هه‌رێمی و ناڤ ده‌وله‌تی ژ رۆیێ دیپلۆماسی و سیاسی ڤه.
ئه‌ڤ سه‌ركه‌فتنه ژی هاته ده‌ست ب ئێگرتنا هێزێن سیاسی یێن كوردستانێ ب خو ۆاگۆیا پێشمه‌رگه‌یێ، قه‌هره‌مان ل برۆكێن شه‌ری دژی تیرۆرستێن (داعش) و ب په‌یره‌وركا هێزا نه‌رم و سیاسه‌تا حه‌كیمانه‌یا سه‌رۆكێ هه‌رێما كوردستانێ كو شیایه ب ڤێ هێزێ هه‌می جیهانێ ب دووڤ بانگه‌وزازیا خوه بینیت كو هه‌ڤلێرێ بكه‌ته ناڤه‌نده‌ك و بنگه‌هه‌كێ ژۆرا ئوپه‌راسیۆنێن ده‌وله‌تێن هه‌ڤپه‌یمان كو نێزیكی (60) ده‌وله‌تان پێكدهێن كو هه‌روه‌سا شیایه به‌رژه‌وه‌دیێن كوردان تێكه‌ل بكه‌ت كو هه‌ڤپشك بكه‌ت ل گه‌ل به‌رژه‌وه‌ندیێن ده‌وله‌تێن زلهێزێن جیران و شیایه باوه‌ریێ بۆ وان هه‌ڤپه‌یمان چێكه‌ت داكو هاریكار و چه‌ك و ته‌قه‌مه‌نیان بۆ پێشمه‌رگه‌ی بهێن.
ئه‌ڤرۆ چه‌ند رۆژ دبوورن و د به‌رده‌وامیا روودانێن ب له‌ز دا پێگه‌هێ كوردان وه‌كو كاریكه‌ته‌ره‌كێ كاریگه‌ر و به‌رچاڤ بهێزتر ده‌ردكه‌ڤیت ل سه‌ر ئاستێ هه‌رێمی و جیهانی ڤه، هه‌كه ل سه‌د سالیا بیستێ سه‌رده‌مێ ململانا كولونیالیزم و پێكه‌فتنا شۆره‌شا پێشه‌سازی و درۆستكرنا سنۆرێن ده‌وله‌تان بیت ل سه‌ر بنیاتێ ناسیونالیزمی نه‌ته‌وه‌یی بیت. له‌ورا ژی ئه‌وا ئه‌ڤ سه‌رده‌مه سه‌دێ بیست و ئیكێ یه و قووناغا به‌رژه‌وه‌ندیێن هه‌ڤپشكه و راكرنا سنۆرێن ده‌ستكرده و قووناغا پاراستنا مافێ مرۆڤی یه و پێكڤه‌ژیانا ئاین و ئول و ئاینا و مه‌زهه‌بانه، تازه جیهان یا دابه‌ش بوویه ب سه‌ر دو به‌ره‌یان دا كو به‌ره‌یێ سه‌رمایه‌داریا رۆژئاڤا و كومونیزما رۆژهه‌لات، به‌ره‌یێ سه‌رمایه‌ده‌ریا رۆژئاڤا خودانێ ئاڤاكرنا پرۆژێ دیمۆكراسیێ و ماڤێ مرۆڤی رێزگرتنا به‌رانبه‌ره، ئانكوئه‌م وه‌كو ملله‌تێ كورد ل ڤێ ده‌ڤه‌رێ مفادارین ژ ڤی پرۆژه‌یی پێدڤی خوه ب گۆنجینین ل گه‌ل ئاراسته‌یا ته‌وژما گوهۆرینان جیولوتیكا ڤێ ده‌ڤه‌ری دا.
یا دیاره ئه‌مریكا یا ل هه‌ڤپه‌یمانێ، تازه دۆرین ل ڤێ ده‌ڤه‌رێ ژبه‌ر كو بۆ كوردان ژی ده‌رفه‌ته به‌رژوه‌ندیێن خوه ئابووری و سیاسی و ئاسایشێ تێكه‌ل بكه‌ت، چونكو ململانا ڤا هه‌ردو به‌ره‌یان سه‌ر ب هێزكرن و بلندكرنا ئاستێ ئابوورێ ناڤخویا ده‌وله‌تێن خوه یه ژبه‌ر كورد ژی خودانێ پرۆژێ خوه یێ نه‌ته‌وه‌یی و نشتیمانی و خودانێ ئابووره‌كێ ب هێزه و زه‌نگینه ل ڤی سه‌رده‌می كورد یێ بوویه یاریكه‌ره‌كێ سه‌ره‌كی و خودان زه‌فه‌لك ل گۆره‌پانا ئابووریا رۆژهه‌لاتا ناڤه‌راست دا و ژ ئه‌ڤرۆ پێڤه كورد نابیته یاریپێكه‌رێ ده‌ستهه‌لاتدارێن به‌ه‌غدا و ده‌ڤه‌رێ و درنده‌یێن وه‌كو داعش داگیركه‌رێن كوردستانێ.
په‌یڤینا شیخ سه‌عید پیرانی زێندی بوو!!
پشتی كوَ رێكخراوا تیرۆریستیا ب ناڤێ داعش چه‌ند ده‌ڤه‌رێن كوردستانا روَژ ئاڤا داگیركری هه‌ول و بزاڤ كرین كو ده‌ست ب سه‌ر باژێركێ كوبانێ ژی دا بگرن و ملله‌تێ كورد ل وێ پارچا كوردستانێ جینۆساید بكه‌ن كو ئه‌ڤ كارێن هۆڤانه و دوور ژ هه‌می پره‌نسیپێن ئه‌خلاقی و ئولی و نه‌ته‌وی و مرۆڤایه‌تی خوه ب خوه ئه‌ركێ ئه‌ڤێ رێكخراوا تیرۆریستیا داعشه و ل ژێر په‌رده‌یا ئایینێ ئیسلامێ ئه‌ڤان كارێن درندانه ئه‌نجام دده‌ن كو ئه‌م دپشت راستین ئایینێ ئیسلامێ ل ڤان كریارا یا دووره، سه‌ره‌رای كو هێزێن پێشمه‌رگه‌هێن كوردستانێ ل باشۆرێ كوردستانێ ب درێژه‌هیا زێده‌تر ل (1050)كیلۆمه‌تران د به‌رگریكرنێ دا یه ل دژی ئه‌ڤێ رێكخراوا تیروریستی یا داعش و شیان سه‌ركه‌فتن ل دووڤ سه‌ركه‌فتنێ لسه‌ر رێكخراوا تیرۆرستی تومار بكه‌ن وزوربه‌ی ده‌وله‌تێن جیهانێ ژی دان ب ڤان سه‌ركه‌فتنان دایه و سه‌ره‌رای كو ئه‌ڤروَ داعش خودان چه‌كه‌كێ مه‌زنه و مروَڤ دكاریت بێژیت چه‌كێن دو ده‌وله‌تێن مه‌زن كه‌فتینه د ده‌ستی دا.
سه‌باره‌ت ب هنارتنا هێزێن پێشمه‌رگێ كوردستانێ بوَ كوبانێ زوی ب زوی سه‌رۆكێ هه‌رێما كوردستانێ هه‌ست ب مه‌ترسیا ئه‌ڤێ رێكخراوێ كر بوَ سه‌ر باژێرێ كۆبانێ و هه‌ول و بزاڤ دگه‌ل ده‌وله‌تێن هه‌ڤپه‌یمان و كۆمارا توركیا كرن كو ره‌زامه‌ندیێ دیار بكه‌ن بوَ هنارتنا پێشمه‌رگه‌هێن كوردستانی بوَ پالپشتی و به‌رڤانیكرن ل خه‌لكێ بێگونه‌هێ كۆ بانی و پشتی ره‌زامه‌ندی هاتیه وه‌رگرتن نامه‌یه‌ك ئاراسته‌یی په‌رله‌مانێ كوردستانێ ئاراسته‌كر بوَ ره‌زامه‌ندی ل سه‌ر هنارتنا هێزێن پێشمه‌رگه‌ی بوَ كوبانێ كو هاریكار و پالپشت بن دگه‌ل شه‌رڤانێن كورد ل وێ پارچه‌یا كوردستانێ و به‌رگریێ ل وێ ئاخا پیرۆزا كوردستانێ بكه‌ن و ره‌زامه‌ندی ژلایێ په‌رله‌مانێ كوردستانێڤه هاتیه كرن، هێزه‌كا پێشمه‌رگه‌ی ب چه‌ك و ته‌قه‌مه‌نیه‌كا باش به‌ره‌ڤ كۆبانا خۆراگر و به‌رخودان كو ئه‌ڤه هه‌یامه‌كه شه‌رڤانێن وێ پارچه‌یا كوردستانێ د به‌رخودانێ دانه برێكه‌فتن بوَ به‌ره‌ڤانیكرن ل ئاخا پیروَزا وێ پارچه‌یا كوردستانێ كو بریاره‌كا نه‌ته‌وی و نیشتیمانی یه و هه‌ستكرنه‌كا نه‌ته‌وی یه ئه‌ڤه ژی د زڤریته‌ڤه بوَ سیاسه‌تا حه‌كیمانه یا سه‌رۆك بارزانی و ب هزرا من ئه‌ڤ هزر و بیر و كاره نه‌ك یا نوو یه به‌لكوَ دزڤریته بوَ سه‌ره‌تایا سالێن چه‌رخێ بیستێ كوَ بارزانیێ نه‌مر د چ ده‌مه‌كێ باوه‌ری ب ڤان سنۆرێن جوگراڤی یێن ده‌ستكرده یێن كوردستانێ نه‌بوویه و هه‌ر ده‌مێ پارچه‌یه‌كا كوردستانێ تووشی مه‌ترسیێ بوویه د هان و پالپشتی یا وێ پارچا ئاخا كوردستانێ چوویه مینا كوردستانا باكور و روَژهه‌لات وبه‌لگه‌ه ل سه‌ر گۆتنامه ب هانا چوونا شۆره‌شا شیخ سه‌عید پیرانی و كومارا مهاداتێ، دیسا كه‌ره‌مكری و گۆتی((كوردستان ئێك پارچه‌یه و ئه‌ڤ سنورێن هاتینه جوداكرن ده‌ستكرده‌نه)) چو ده‌مه‌كێ ژی بارزانیێ نه‌مر وبابیًَ روحییًَ نه‌ته‌وا كورد مسته‌فا بارزانی باوه‌ری بڤان سنوران نه‌بوویه ورێز ژی لڤان سنورێن ده‌ستكرد نه‌گرتی یه، ئه‌ڤروَ ژی سه‌روكێ هه‌رێما كوردستانێ مه‌سعودبارزانی كو په‌روه‌رده وده‌رچوویێ خاندنگه‌ها بارزانیێ نه‌مره لسه‌ر هه‌مان بیروباوه‌ر سه‌ره‌ده‌ریێ دگه‌ل ئاخا پیروَزا كوردستانێ دكه‌ت وكری یه ژی ، ئه‌ڤ پێنگاڤێن هان فه‌ره هه‌می ملله‌تێ كورد ل هه‌ر كوژیه‌كێ ڤێ گه‌ردوونێ بژیت شانازیێ بڤێ هه‌ستا نه‌ته‌وی نیشتیمانی بكه‌ن كو ئه‌ڤه خوه‌ب خوه ئاماژێ دده‌ته مه كو هه‌ر ده‌مێ ده‌لیڤه بوَ نه‌ته‌وێ كورد هه‌لبكه‌ڤیت ئێك نه‌ته‌وه‌یه وئێك وه‌لات هه‌یه كو ئه‌و ژی كوردستانه و چ ده‌مه‌كێ باوه‌ری ب ڤان سنۆران نینه ئه‌وێن ژ لایێن داگیركه‌رێن كوردستانێڤه هاتینه دانان و هه‌روه‌تۆڤ ئاماژێ دده‌ته بلندبوون و پابه‌ندبوون تاكێ كورد ب هه‌ستا نه‌ته‌وی ونیشتیمانی و ئه‌ڤه ژی دێ ل به‌رپه‌ره‌كێ دی یێ دێرین یێ بزاڤا رزگاریخوازیا كوردستانێ هێته توماركرن، دیسان چوونا هێزێن پێشمه‌رگه‌ی بوَ جیهانێ خوه‌یا دكه‌ن كو ئه‌ڤروَ پێشمه‌رگه‌هێن كوردستانێ مه‌زنترین هێزه ل دژی رێكخراوا تیرۆریستی یا داعش د شه‌ره‌كێ دانه بوَ نه‌مانا ئه‌ڤێ رێكخراوا دژی هه‌می پره‌نسیپێن دیموكراسیه‌ت و مافێن مرۆڤی وئه‌م باوه‌رین ژی سه‌ركه‌فتن دێ بوَ ئیرادا گه‌لێ كوردستانێ بیت و مرن و سه‌رشوری ژی دێ بوَ دوژمنێن مرۆڤاتیێ بیت.
هه‌ڤپه‌یمانیا كوردستانی و پرۆژێ بودجا گشتی
هه‌رێم د ڤێ قووناغا نها دا د چه‌ندین بارودۆخێن سه‌خت و ئالۆز دا ده‌رباز دبیت ژ به‌ر وان روودانێن كه‌فتینه سه‌رئێك بۆ هه‌می كاودانێن گشتی و ب تایبه‌تی یێن سیاسی و ئابووری و جڤاكی و ل سه‌رێ لیستێ ره‌وشا مالی (مالی و پرۆژێ بودجا
گشتی) كو گرێدای هه‌رێمێ یه چونكو پشكه‌كه ژ عیراقا ئیكگرتی، ئه‌ڤ كاودانه ل سه‌ر ئه‌ردێ ژیوای پێدڤی ب چاره‌سه‌ریانه و ژێكژێككرنا گرێكێ ب شاره‌زایه‌كا سیاسی ب رێكا كاركرنا رژد بۆ هه‌می ئه‌ندامێن هه‌ڤپه‌یمانیا كوردستانی و كاركرن ب هوشدرای ل په‌رله‌مانێ حوكمه‌تا مه‌ركه‌زی دا كو نه‌كه‌ڤینه د زیانێن كارتێكه‌ر د به‌رژه‌وه‌ندیا هه‌رێمێ دا، بۆ ده‌مێ پێش ژ حوكمه‌تا عه‌بادی، ئه‌ندامێن هه‌ڤیه‌یمانا كوردستانی پێدڤی ب نێرینه‌كا ژدله و سه‌ربۆرێن خه‌باتێ ل سه‌ر ئه‌ردێ ژیواری، له‌ورا پرانیا ڤان حزب و تیمێن سیاسی پشته‌ڤانیا پرۆسا ئاڤه‌دانیا هه‌رێمێ داكریه ب ره‌نگه‌كێ راست پشتی روودانێن سالا 2003 و هه‌تا نها، ئه‌و ژی رۆژ بۆ رۆژ ته‌ڤلی هه‌ڤ دبن دا كو گه‌لێ هه‌رێمێ خۆشیێ ب خێر و ئه‌منیه‌تێ ببه‌ت ل ژێر قووناغا داهاتی یا حوكمه‌تا عه‌بادی. . ئه‌ڤرۆ حوكمه‌تا عه‌بادی ده‌ربازبوو ژ گه‌له‌ك ئاسته‌نگان هه‌ر ژ وه‌رگرتنا سه‌رۆكاتیا وه‌زیران و ل پێشیا هه‌میان ژی ئه‌و سۆزێن عه‌بادی بۆ ئه‌ندامێن هه‌ڤپه‌یمانا كوردستانی پێشكێش كرین پشتی پێدانا سوودانا قانوونی ل ژێر گوپیتكا په‌رله‌مانی و گوهارتنا په‌یڤان بۆ ده‌سكه‌فتێن ئاینده‌یی بۆ خزمه‌تكرنا به‌رژه‌وه‌ندیا گشتی یا حوكمه‌تا هه‌رێمێ، ئه‌ڤرۆ حوكمه‌تا عه‌بادی ل هه‌مبه‌ری بژاره‌یێن حوكمه‌تا هه‌رێمێ راوه‌ستاسه ده‌باره‌ی بودجێ و پرۆژێ بودجا گشتی یا سالا 2014 یا كو هه‌تا نه‌هاتیه بریارنان و ژیانا گشتی ژكارخستی د هه‌می لایه‌نان دا، چو ده‌رباره‌ی ناڤه‌ندێ بیت یانژی هه‌رێمێ، ئه‌و ژی یان رازیبوون ل سه‌ر پێشنیازێن هه‌ڤپه‌یمانا كوردستانی یانژی بریارانانا بودجی یان نه‌رازیبوون ل سه‌ر و ل دووڤدا هه‌ر سیكه‌كێ بازاره‌ك یا لێ هه‌یی، بێگومان په‌یوه‌ندیێن سیای د ناڤبه‌را حوكمه‌تا ناڤه‌ندی و یا هه‌رێمێ دا گه‌له‌ك زیان لێكه‌فتینه ل ده‌مێ پێش یا حوكمه‌تا مالكی ب ئالۆزی و ئاسته‌نگان كو ببوو ئه‌گه‌رێ تێكچوونا په‌یوه‌ندیێن ناڤخوه‌یی د ناڤبه‌را هه‌ردو حوكمه‌تان دا و به‌لاڤبوونا هه‌می جۆرێن گه‌نده‌لیێ د ناڤ سازیێن ده‌وله‌تێ دا، و ژ كارخستنا ژیانێ ب ره‌نگه‌كێ گشتی بۆ هه‌می وێڤه كو زیانێ بگه‌هینته حوكمه‌تا هه‌رێمێ. گه‌نده‌لی گه‌له‌ك به‌لاڤبوو ل ژێر حوكمه‌تا به‌رێ یا مالكی و گه‌له‌گ ده‌رز كه‌فتنه د ناڤدا، هێزێن سیاسی یێن عیراقا نوو برێڤه دبه‌ن هه‌می له‌نگكرن، كو هه‌ر ئێكی بزاڤ ژ لایێ خوه ڤه دكر بۆ ئێخستنا یێ دیتر ب هنده‌ك به‌هانه و ره‌فتارێن نه‌دبه‌رژه‌وه‌ندیا گشتی دا، هه‌ر پرۆسه‌كا ئاڤه‌دانیێ هه‌بیت، هنده‌ك شاشی و تێكدان دێ هه‌بن ب ره‌نگه‌كێ راسته‌وخوه ل سه‌ر ژیانا سیاسی و ئابووی و جڤاكی چونكو ئه‌و فاكته‌رن یێن باندۆرا وان دكه‌ڤیته سه‌ر ژیانا گشتی یا گه‌لێ عیراقێ و نه‌خاسمه یێ هه‌رێمێ كو هه‌وه‌كا وه‌رار و ئاڤه‌دانیێ د هه‌می واران دا بخوه‌ڤه دگریت، د ڤێ رۆژێ دا كه‌توارێ سیاسی یێ ئاشكرایه بۆ خزمه‌تا هه‌ڤپه‌یمانیا كوردستانی ل گه‌ل حوكمه‌تا ناڤه‌ندێ و ل سه‌ر ئه‌ندامێن وێ ل دۆر هایداركرنا كوڕێن هه‌رێمێ ل دۆر راستیا تشتێ دهێته روودان نه‌خاسمه ئه‌و شه‌رێ دژوارێ نها ل سه‌ر عیراقا فێدارل دهێته كرنل هه‌می باژێرێن عیراقا نوو. له‌ورا فه‌ره ل سه‌ر ئه‌ندامێن هه‌ڤپه‌یمانا كوردستانی كار بكه‌ن ب ره‌نگه‌كێ ئێكگرتی گو بگونجیت ل گه‌ل هه‌می قه‌باران ل نیڤا هه‌رێمێ بۆخزمه‌تكرنا گه‌لێ مه ل سه‌رانسه‌ری هه‌رێمێ و ئاڤاكرنا عیراقه‌كا نوو، ئه‌م هه‌می كار دكه‌ین بۆ ئێك ئارمانج ئه‌و ژی ئاڤاكرنا عیراقه‌كا نوویه و هه‌رێمه‌كا جودا دوور ژ سۆزێن لدۆر زڤرینێ ل ڤێره و ویرا هه‌نێ ده‌رباره‌ی له‌یزاندنێ ب شیانێن هه‌رێمێ و هێزا وێ یا گرێدای بودجا گشتی ب ره‌نگه‌كێ ئێكسه‌ر كو هه‌تا نها نه‌هاتیه بریارانان و ژیانا گشتی ژ كارخستی و پرۆژێن خزمه‌تگوازی هێلاینه برێَڤه، ژ بلی برینا مووچه‌یێن كورێن هه‌رێمێ و ئه‌و ئیفلاسا دره‌وونی یا زیان خستینه ل سه‌ر خێزانان.
و: ئه‌ڤرۆ
ل گەل رێککەفتنا ھەولێر و بەغدا بھایێ پشکێن کۆمپانیێن پترۆلێ بلند بوون
ئه‌ڤرۆ:
پشتی ھەر دوو حکومەتێن بەغدا و ھەولێرێ رێککەفتین، ئێکسەر بھایێ پشکێن کۆمپانیێن پترۆلێ ئەوێن ل ھەرێما کوردستانێ کاردکەن ب رێژا ٧-١٥% ل بازارێن جیھانی بلندبوون، بۆ نموونە بھایێ پشکێن کۆمپانیا گەنەل ئێنرجی ب رێژا ٧% بلنبوو و یێن گولف کیستون ٨% و پشکێن دی ئێن ئۆ ١٠% و پشکێن ئەفرین ١٥%، ل دووف رێککەفتنێ ھەرێما کوردستانێ دێ رۆژانە ٢٥٠ ھزار بەرمیلێن پترۆلێ ب رێیا سۆمۆ فرۆشیت و ٣٠٠ ھزار بەرمیلێن پترۆلا کەرکووکێ ژی ل بن سەرپەرشتیا بەغدا، ل بەرامبەری وێ حوکمەتا بەغدا دێ ١٧% ژ بودجا گشتی یا عیراقێ بۆ ھەرێما کوردستانێ فرێکەت، ھەروەسا کۆژمێ ترلیۆنەک و ٢٠٠ ملیار دیناران ژی ژ بودجا وەزارەتا بەرگریێ بۆ ھێزێن پێشمەرگەی ھنێریت.
مۆلا ھنگاری دێ کارگەھەکا پلاستیکی دانیت و توتالا فرەنسی بیرەکا پترۆل و غازێ ل ھەریرێ دیت
گرۆپێ “مۆل” یێ لێگەریان و دەرخستنا پترۆلێ ل سەرێ سالا نوو دێ ل کوردستانێ پترۆلێ بەرھەمئینیت و ئەڤ سالە ژی پترۆلا کوردستانێ کریە، دیارکر ل سالا نوو ب بھایێ ١٠٠ ملیۆن دۆلاران و ب تەکنولوجیا ژاپۆنی یا نوو دێ کارگەھەکا پلاستیکێ گشتی ل ھەرێمێ دانیت.
ژ لایێ خوە ڤە کۆمپانیا توتال یا فرەنسی بیرا دوویێ یا پترۆلێ ل بلوکێ ھەریرێ ب ناڤێ جسک ئێک راگەھاند، بیرا جسک ئێک ب کووراتیا ١٥ ھزار پێیان ھاتیە کولان و گەھشتیە دەڤەرەکا مەزن یا پترۆلێ، دیارکر ژی وەکو تێست رۆژانە ٦١٠٠ بەرمیلێن پترۆلێ ژ بیرا ناڤبری دەردکەڤن، ھەروەسا ١٠ ھەتا ١٥ ملیۆن پێیێن سێجا ژ غازا سروشتی دەرکەفتینە، کۆمپانیا توتال ل بلوکێ ھەریر خوەدانا ٣٥% ژ پشکایە و حوکمەتا کوردستانێ ژی ٢٠% پشکێن وی بلوکی ھەنە.
نيشاندان
WP Facebook Auto Publish Powered By : XYZScripts.com