ئەڤرۆ:

پشتی وێ خوسارەتیا مەزن د یاریا کلاسیکو دا بەرامبەر یانا جەویە ب چار گولان بێ بەرامبەر، راھێنەرێ تیما تەپا پێ یا زەورا عیماد محەمەد دکومبوونەکێ دا ل گەل سەروکێ یانێ و داخوازا حەفت یاریکەرێن نوو کریە ل ڤەگوھاستنێن زڤستنانی کو ھەڤبەست ل گەل بھێتە ئیمزاکرن.

ژێدەرەکی ژ یانا زەورا بۆ رۆژناما ئەڤرۆ دیارکر ژ وان حەفت یاریکەرێن ژلایێ دەستەیا راھێنەریا تیمێ ھاتینە داخوازکرن سێ ژ وان یاریکەران یێن یانا دھۆکێ نە .

ناڤبری ئەو چەندە ژی دیارکر پەیوەندی ب سێ یاریکەرێن تیما دھۆکێ کریە ئەوژی ھەر ئێک ژ سالح سەدیر، عەلی سەعد و پیشەکارێ سوری ئەحمەد دونی و ڤان یاریکەران دیارکری یە ھەکە رەوشا دارایا یانا دھۆک ھەتا ڤەگوھاستنێن زڤستانی دروست نەبیت ئەو دێ ھەڤبەستا زەورا ئیمزا کەن.

ئەڤرۆ:
سەروکێ یانا ھەولێر د. عەبدوللا مەجید د داخویانیەکێ دا بۆ رۆژناما ئەڤرۆ دیارکر قەیرانا ھەرێم نوکە تێدا دبوریت ژ یانا ھەولێرێ ژی گرتیە و ماوەکێ درێژە ئەو گەل ڤێ قەیرانی دژین و رەوشا یانا ھەولێرێ ژ ھەموو یانێن دی یێن ھەرێمێ لاوازترە ژبەرکو ھەتا نوکە یاریکەران ھەڤبەستێن خوە یێن سالا بوری وەرنەگرتی نە، ھەر چەندە پشکداری د قارەمانیا ئاسیا دا ژی کر بوو.
ل دور وی دەنگوباسێ کو چەند یاریکەرێن تیمێ داخوازیا دەست بەردانا خوە کریە ناڤبری دیارکر ب مافێ یاریکەران دبینت کو داخوازیا دەست بەردانا خوە بکەن ژبەرکو ھەتا نوکە ھەڤبەستێن خوە یێن وەرزی بوری وەرنەگرتی نە و ل حەفتیا بوری چەند یاریکەران داخوازیا دەست بەردانا خوە کریە و ھەکە رەوش یا ب ڤی رەنگی بیت دبیت ل ماوێ بھێت پشکداری دخولا عیراقێ دا ناکەن.
سەروکێ یانا ھەولێرێ ئاماژە ب وێ چەندی ژی کر ھندک پروژەیێن وەبەرھێنانێ یێن ھەین کو موچیێن یاریکەران ژێ دابین دکەن، لێ تێرا وێ چەندێ ناکەن یانێ ژ قەیرانا نوکە تێدا دبوریت قورتال بکەن.
ل دووماھیێ ناڤبری ئەو چەندە ژی دیارکر کو دزانین دێ چارەسەری یا ب زحمەت بیت ژبەرکو رەوشا نوکە یا ھەرێم تێدا بوریت نە یا ھاریکارە.

ئەڤرۆ:
بریارە ئەڤرۆ ھەر دو نوونەرێن پارێزگەھا دھوکێ یانێن سێمێل و گارە ئەوێن پشکدار د خۆلا پلە ئێکا ھەرێما کوردستانێ دا یاریێن خوە یێن گەرا دویێ بەرامبەر یانێن ئالتون کوپری و حەلەپچە ژ دەرڤەیی یاریگەھێن خوە بکەن.
یانا سێمێل دێ یاریا خوە ب گیانەکێ بلند و ب زاخەکا مەزن یاریا خوە کەت تایبەت پشتی د یاریا خوە یا ئێکێ دا سەرکەفتن لسەر یانا سەورە تومارکری لەورا بوڤێ یاریێ دێ ھەمی ھەولێن خوە مەزێخیت بو بەردەوامیدان ب سەرکەفتنا و بھێزکرنا ھەلویستێ خوە د خولێ دا و بوڤێ چەندێ ژی دێ پشت بەستنێ کەتە سەر یاریکەرێ خوە یێ پیشەکار عەبدولقادر بەراک بو تومارکرنا گولا.
لدور ڤێ یاریێ راھێنەرێ سێمێل بەھزاد چاڤشین بو رۆژناما ئەڤرۆ گوت: یاریەکا ب زەحمەتە دێ ژدەرڤەیی یاریگەھا خوە یاریێ کەین لێ مە ھەمی بەھەڤی بو سەرکەفتنێ کرینە.
د یاریەکادی دا ل باژێرێ حەلەپچە و پشتی برینا نەە دەمژمێرێن رێکێ دێ یاریەکا ڤەبر ل گەل یانا حەلەپچە کەت، دڤێ یاریێ دا یانا گارە ھەکە بڤێت ژ ھەڤرکیێ دوورنەکەڤیت پێدڤیە لسەر بسەرکەڤیت و بێ خال ژ حەلەپچە نە زڤریت و بوڤێ یاریێ ژی راھێنەرێ تیمێ چەندین گھورین د پێکھاتێ تیمێ دا کرینە
لدور ڤێ یاریێ یاریکەرێ یانا گارە کاروان جەرجیس بۆ رۆژناما ئەڤرۆ گوت: راستە مە د یاریا ئێکێ دا دو خالێن گرنگ ژ دەست دان لێ ئەڤە نابیتە رێگر بەرامبەر کو دڤێ یاریێ دا بشێین سەرکەفتنێ تومارکەین و مە ھەمی یاریکەرا سوزا دای ب ئەنجامەکێ دلخوشکەر بزڤرین.

ئەڤرۆ:
پشتی دەنگوباسێ نەچوونا شاندێ تیما تەپا پێی یا یانا گارە ئەوا پشکدار د خۆلا پلە ئێکا ھەرێما کوردستانێ بو یاریا خوە بەرامبەر یانا حەلەپچە کو بریارە ئەڤرۆ بھێتەکرن ژبەر نەبوونا مەزاختیێن شاندی سەرۆکێ یانا زاخۆ عەبدولوەھاب محەمەد عیسا ھاتە دەنگ و بریاردا مەزاختیێن ڤێ یاریێ ھەمیێ ب ستویێ خوەڤە بگریت و کوژمەکێ پارەیی بو تیما گارە رەوان کریە و نوکە تیم ل جھێ کرنا یاریێ یە.
لدور ڤێ ھاریکاریێ سەرۆکێ یانا گارە شێروان بشار بۆ رۆژناما ئەڤرۆ گوت:ئەم ژ دل سوپاسیا سەرۆکێ یانا زاخۆ دکەین کو خوە ل تیما مەکریە خودان و مەزاختیێن یاریێ بومە دابینکرین و ھەکە ب ھاریکاریا وی نەبا زورا ب زەحمەت بوو بچینە یاریا خوە ل حەلەپچە کو بەری یاریێ مە گەلەک ھەولدان خوە بگەھینینە پارێزگاری لێ بێ مفابوو.
ژلایەکێ دووڤە سەرۆکێ یانا زاخۆ گوت: خوزی من شیابا ھەتا دووماھیا ڤی وەرزی ھاریکاریا تیما وان بکەم و یا من کری خزمەتەکا بچیکە بو وەرزشا پارێزگەھا دھۆکێ و ئەڤ ھاریکاریا من کری چو پەیوەندی ب یانا زاخۆ ڤە نینە و ژ کیستێ من بوویە.