یاریکەرێ باسکت بۆلا دھۆک جینیرو گورگیس دێ بۆ ماوێ ھەیڤەکێ ژ یاریگەھان دورکەڤیت پشتی د یاریا بوری دا بەرامبەر یانا حلە تووشی ھنگافتنێ بووی.
د داخویانیەکا تایبەت دا یاریکەرێ ناڤبری بۆ ئەڤرۆ نیوز گۆت: د یاریا بەرامبەر حلە ل حەفتیا بوری دا ژ خولا عیراقێ دا ئەوا د چارێکا دویێ دا تووشی ھنگافتنەک د پشتا من دا پەیدا بویە و ماوێ حەفتیەکێ یە نەشیایمە راھێنان ل گەل یانێ ئەنجام بدەم لەورا کارگێریا یانێ دەستوری دایە من ڤەگەرمە وەلاتێ ئەمریکا بۆ وەرگرتنا چارەسەریا خوە یا تایبەت ل وی وەلاتی کو دبیت بۆ ماوێ ھەیڤەکێ ژ راھێنانێن یانێ دور بکەڤم ھەتا ژ ڤێ ھنگافتێ خلاس دبم.
دھێـە زانین جینیرو ئێک ژ یاریکەرێن خودان شیانە ل گەل باسکا دھۆک و بۆ ماوێ شەش سالانە یاریێ دکەت بۆ یانا دھۆک و شیایە چار جاران ناسناڤێ خولا عیراقێ ل گەل یانا دھۆک دەستخوە ڤە بینیت.

ب، زنار زوبێر:

رۆژناما دەیلی ئکسپریس یا بریتانی ئاشکرا کر ستێرا ئەرژەنتینی و یانا بەرشەلونە یا ئسپانی لیونێل مێسی حەوا وێ چەندێ ھەیە یانا خوە یا ئسپانی بجە بھێلیت بەر ب یانا چێلسی یا ئنگلیزی بچیت بەرامبەر 200 ملیۆن جونیە ئسترلینی.

زێدەتر ھەمان ژێدەر ئەو چەندە ژی ئاشکرا کر ئەگەر ھەنە ل دووماھیا وەرزێ ئەڤ سالە مێسی یانا کەتەلونی بجە بھێلیت تایبەت پشتی ل حەفتیا بوری پرسیار ژ یاریکەرێ ناڤبری ھاتیە کرن ل دۆر پاشەرۆژا وی ل گەل یانا بەرشلونە دیارکری کو د ژیانا ھەر یا یکەرەکی دا چەندین گوھۆرین پەیدادبن لێ بەری نوکە وی دیارکریە وی دڤێت ژیانا خوە یا وەرزشی ل گەل بەرشلونە بدووماھی بینم لێ ڤی شێوازێ نوکە دبیت ئەڤ چەندە بجە نەھێت.

پشتی ڤێ چەندێ چەندین یانێن خودان شیان ژ لایێ دارایی ڤە خوە بەرھەڤ کریە بۆ سەرک زێدەکرنێ پێخەمەت دەستڤە ئینانا شیانێن مێسی ژوانا یانێن مانچستەر یونایتد و مانچستەر ستی و ئەرسینال و چێلسی یێن ئنگلیزی ل گەل پاریس سان جێرمان یا فرەنسی و بایرن میونخ یا ئەلمانی کو ئەڤان یانا شیان ھەنە ڤی یاریکەری ب کرن کو دبیت بھایێ ڤەگوھاستنا مێسی ب گەھیتە 200 ملیۆن جونیە ئسترلینی و ملیاردێرێ رۆسی رومان ئەبراموڤێچ خودانێ یانا چێلسی ئەڤ شیانە ھەنە ڤێ یاریکەری بەرامبەر ڤی کوژمی ب کریت.

ئه‌ڤرۆ نيوز:

نەخوشخانەیا ئەلبێرت ئینشتاین ل باژێرێ ساوپاولو دیارکر ستێرا بەرێ یا بەرازیلی پێلێ نوکە د بن یەکا چاڤدێریا چار یا نوژداران دایە پشتی تووشی نەخوشیا پروستاتا بووی.

نەخوشخانا ناڤبری ئەو چەندە ژی دیارکر کو پێلێ یێ ٧٤ سالی بەری نوکە نشتەگەریەک بۆ راکرنا پروستاتا ھاتیە ب سەرکەفتیانە ھاتیە ئەنجامدان لێ پشتی بورینا ماوەکی ھندەک ئلتیھاب بۆ وی ل ھەمان جە پەیدابوینە لێ پشتی چارەسەریەکا ٢٤ دەمژمێرێ بارێ وی تەندروستی بەر ب باشتر چویە و دبیت بۆ ماوێ حەفتیەکا دی د نەخوشخانێ دا بمینیت تاکو ب تمامی چارەسەریا وی دھێتە کرن.

به‌رهه‌ڤكرن، زنار زۆبێر:

ئه‌ڤرۆ نيوز:

راپورتێن رۆژنامەڤانی ھوسا دیاردکەن ئێکەتیا نیڤدەولەتی فیفا دێ ڤەکولینێ ل گەل ستێرا ئەلمانی فرانز پکنپاوەر سێ ئەندامێن دی یێن لژنەیا بجە ئینانێ یا ئێکەتیا ناڤبری ئەنجامدەت.

رۆژناما دی ڤێلت و فرانکفورتر یێن ئەلمانی د پەیامێن خوە دا ئاشکرا کریە کو چەند ڤەکولەرێن ئێکەتیا فیفایێ دەست ب کارێن خوە کرینە پێخەمەت ئەنجامدانا ڤەکولینێ ل گەل پکنپاوەری ل دۆر رۆلێ وی د دانا مێڤانداریا یاریێن موندیالا ٢٠١٨ و ٢٠٢٢ بۆ ەلاتێن روسیا و قەتەر سەرەرای کو بەری ماوەکێ ئێکەتیا نیڤدەولەتی ھەردو وەلاتێن ناڤبری بێ تاوان دەرخست بون د دانا بەرتیلان دا بۆ مێڤانداریا یاریێن موندیالێ.

ھەمان ژێدەر ئەو چەندە ژی ئاشکرا کر کو ڤەکولین دێ ل گەل سێ ئەندامێن دی یێن لژنا بجە ئینانێ ل فیفایێ ھێتە کرنا کو ژوانا سەروکێ لژنا ھونەری یە یێ چیکی ھارولد نیکولز.

بەرامبەر ڤان ھەردو راپورتان کو دوھی بەلاڤ بوینە ئێکەتیا فیفایێ چو داخویانی د ڤی دەربارەی دا نەداینە دیسان پکنپاوەری ژی چو بەرسڤ ل سەر ڤێ چەندێ بۆ دەزگایێن رۆژنامەڤانی نە داینە.

به‌رهه‌ڤكرن، زنار:

ئەڤرۆ نیوز، زنار زوبێر:
تیما باسکت بۆلا یانا دھۆک سەرەرای ئەوان کاودانێن دارایی یێن ئالوز و گەفێن یاریکەران ئەڤرۆ بەر ب باژێرێ بەغدا چو بۆ ئەنجامدانا یاریا خوە یا گەرا شەشی ژ خولا عیراقێ یا باسکت بۆلێ بۆ یانێن نایاب بەرامبەر یا شورتە ئەوا بریارە سەباھی رۆژا شەمبی ل ھولا گرتیا شورتە ل دەمژمێر چاری ئیڤاری.
ل دۆر ڤێ یاریێ کاپتنێ تیما باسکت بۆلا یانا دھۆک قوتیبە عبدولا بۆ رۆژناما ئەڤرۆ گۆت: ئەڤ یاریە دێ ب زەحمەترین یاری بیت بۆ تیما وان ژ بەرکو تیما شورتە ل ڤی وەرزی باشترین شێوە خوە بەرھەڤ کریە و یاریکەرێن پیشەکارێن خودان شیان بۆ تیما خوە ئیناینە زێدەباری چار یاریکەرێن ھەلبژارتیێ عیراقێ ژی بۆ دکەن لێ بەروڤاژی تیما مە د کاودانێن نە باش دا دەرباز دبیت ژ بەرکو یاریکەرێ تیمێ یێ خودان شیان جینیرو گورگیس ڤێ یاریێ دا ژ ئەگەرێ ھنگافتنێ پشکداریێ ناکەت دیسان یاریکەرێن پیشەکارێن ئەمریکی ژی د بەردەوامن گەفان ل تیمێ دکەن کو یاریێ ناکەن ئەگەر مووچێ خوە وەرنەگرن لێ سەرەرای ڤان ھەمی کاودانان دێ بزاڤێ کەین بەردەوامیێ بدەینە سەرکەفتنێن خوە و سەرکەفتنا شەشێ ل دووڤ ئێک تومار بکەین.