ئه‌ڤرۆ:
حوکمەتا ھەرێما کوردستانێ بڕیار دایە، ھەموو نڤیسینگەھێن راھێنانا شوفێریێ ل سەرانسەری ھەرێما کوردستانێ دێ ھێنە گرتن و کۆمپانیەکا کەرتێ تایبەت دێ کارێ راھێنانێ ل ھەرێما کوردستانێ کەت، رێڤەبەرێن نڤیسینگەھان ژی بەرامبەر گرتنا نڤیسینگەھێن ھاتن و چوونێ، گەفا ل حوکمەتێ دکەن و ئاماژە ب ڤێ چەندێ دکەن، ئەگەر نڤیسینگەھێن وان بھێنە گرتن ئەڤە دێ کارڤەدانێن خراپ لێ پەیدابن و د رازی نینن کارێ چەند سالا دکەن دەستا ژێ بەردەن. پەیڤدارێ رێڤەبەریا ھاتن و چوونا دھۆکێ ژی دبێژیت: ھێشتا ب فەرمی چو بڕیارەکا وەسا نەگەھشتیە دەستێ مە.
رەشید خدر، خودانێ نڤیسینگەھا شێخانی بۆ راھێنانا شوفێریێ گۆت “ئەڤە چەندین سالە مە نڤیسینگەھێن راھێنانا شوفێریێ ڤەکرینە و خەلکی فێری شوفێریێ دکەین، بەلێ نوکە حوکمەتێ بڕیاردایە نڤیسینگەھێن مە دائێخیت و کارێ راھێنانێ دایە کۆمپانیەکا کەرتێ تایبەت، حوکمەتێ گۆتیە مە نڤیسینگەھێن خوە بگرن و وەکی کرێدار ل ئەڤێ کۆمپانیا کەرتێ تایبەت کار بکەن، مە گومان ھەیە ئەف کۆمپانیا ھەیڤەکێ کاری ب مە بکەن و پشتی ھینگی نەھێلیت کاری دگەل بکەین، زۆر کۆمپانیا ھەبووینە و کارێ وەسا کریە و ل دووماھیێ نەھێلایە خەلک کاری ل گەل بکەت، بەری نوکە مە نڤیسینگەە ھەبوون، ل گۆرەی بڕیارا حوکمەتێ ئەم بووینە شوفێر، حوکمەت گازندا ڤێ چەندێ ل مە دکەن، ئەگەرێن بوویەرێن ھاتن و چوونێ ئەمین و خەلکی باش فێری شوفێریێ ناکەین، خەلک دێ ھێتە نڤیسینگەھێ و فەرمانبەرە دێ راھێنانێ کەت، دێ بێژینێ تە پێدڤی ب خۆلەکا دی ھەیە و باش فێری شوفێریێ نەبووی، دێ بێژیت: ب تنێ من ٢٠٠ ھزار دینار ھەنە و شیانێن ماددی نینن بۆ دووبارەکرنێ”.
رەشید گۆت ژی” کارەکێ دی یێ نڤیسینگەھێن راھێنانا شوفێریێ دکەن، گۆتنا وانەیانە و بۆ ھەر نڤیسینگەھەکێ ھژمارەکا ئەفسەران ھاتینە دیارکرن و رۆژانە وانەیێن ھاتن و چوونێ دبێژنە وان کەسێن دخوازن مۆلەتا شوفێریێ بدەستڤە بینن، ھەموو کارێن وانە گۆتنێ ب باشی رێڤەدچن و ب تنێ ھندەک نڤیسینگەھێن کێم ھەنە پارەی ژ وەلاتیان وەردگرن ھەمبەر نەچوونا وەلاتیان بۆ وانەیان، لەوڕا ئەگەر نڤیسینگەھێن مە بھێنە گرتن، ئەڤە دێ کارڤەدانێن خراپ ھەبن و دێ ھەموو رێیەکا مەدەنی گرینەبەر بۆ نیشاندانا نەڕازیبوونا خوە”.
دارا لەتیف، خودانێ نڤیسینگەھا راھێنانا شوفێریێ بۆ رۆژناما ئەڤرۆ گۆت” ئەم پێگیریێ ب رێنمایێن حوکمەتێ دکەین، ئەگەر وەلاتی باش فێری شوفێریێ نەبووینە ل نڤیسینگەھێ، بۆچی حوکمەت مۆلەتا شوفێریێ ددەتە ڤی کەسی، خوە مۆلەت ددەستێ مە دا نینە و حوکمەت مۆلەتێ ددەتە وەلاتیان، ئەم قوتابیا بەرھەڤ دکەین بۆ شوفێریێ و ھەموو وانەیێن پڕاکتیکی و تیۆری تمام دکەن و پاشی دچنە رێڤەبەریا ھاتن و چوونێ و داخوازا مۆلەتێ دکەن، ئێ باشە ئەگەر ئەڤ کەسە چو نزانیت مۆلەتێ نەدەرێ دێ بۆچی نانێ مە ھێتە بڕین و گونەھا مە وەکی نڤیسینگەە چیە، داخواز دکەین حوکمەت د بڕیارا خوە دابچیت و نڤیسینگەھێن راھێنانا شوفێریێ نەھێنەگرتن، چونکو گرتنا نڤیسینگەھا نابیتە چارەسەر”.
یوسف بازیانی، شارەزایێ کەرتێ ھاتن و چوونێ بۆ ئەڤرۆ دیار کر، نڤیسینگەھێن ھاتن و چوونێ رێنمایان بجە نائینن و گۆت “پتریا نڤیسینگەھێن راھێنانا شوفێریێ ل گۆرەی رێنمایێن حوکمەتێ کارناکەن و مە بەلگە ھەنە، ھژمارەکا زۆرا نڤیسینگەھان ل گەل ئەفسەرێن ھاتن و چوونێ و راھێنەران رێکەفتینە کوژمەکێ پارەی ل ڤان کەسان دھێتە وەرگرتن یێن ژ لایێ رێڤەبەریێن ھاتن و چوونێ دھێە ھنارتن بۆ ڤان نڤیسینگەھێن راھێنانێ، ھەتا وانەیێن ھاتن و چوونێ بخوونن، بەلێ دەوامێ ناکەن و نڤیسینگەە ل گەل ئەفسەران رێکەفتینە و فێرخوازێن داخوازا مۆلەتا شوفێریێ دکەن، کو پێدڤیە بۆ دەمێ پتری حەفتیەکێ سەرەدانا نڤیسینگەھان بکەن و وانەیێن ھاتن و چوونێ فێرببن، ب تنێ پارەی ددەن و دەوامێ ناکەن”.
رائیدێ مافپەروەر ئازاد تەھا، پەیڤدارێ رێڤەبەریا ھاتن و چوونا پارێزگەھا دھۆکێ بۆ رۆژناما ئەڤرۆ گۆت” ھێشتا چو بڕیارەک ژ لایێ حوکمەتێ ڤە بۆ گرتنا نڤیسینگەھێن راھێنانا شوفێریێ نەگەھشتینە دەستێ مە و ھەر بڕیارەکا ژ لایێ وەزارەتا نافخۆ دھێتە دەرکرن، راستەوخۆ دێ ژ لایێ رێڤەبەریا گشتیا ھاتن و چوونا دھۆکێ ڤە ھێتە بجھئینان، بەلێ بەری نوکە پێشنیارەک ھاتبوو پەیمانگەھەک بۆ راھێنانا شوفێران ژ لایێ کۆمپانیەکا کەرتێ تایبەت بھێتە ڤەکرن و ب شێوەیەکێ سەردەمیانە و پێشکەفتی، راھێنانێ ب فێرخوازان بکەت، وەکی وەلاتێن پێشکەفتی نوکە دھێتە بجھئینان، ل گەل ڤێ چەندێ ھێشتا بڕیار نەکەفتیە د بیاڤێ بجە ئینانێ دا، بەلێ ئەگەر کۆمپانیا کەرتێ تایبەت ژی ڤی کاری بکەت و نڤیسینگەە بھێنەگرتن، ئەڤە دێ نڤیسینگەھان ژی پشک د ڤێ کۆمپانیێ دا ھەبیت و مافێ وان ژی ناھێتە خوارن”.
نيشاندان