ئەڤرۆ:
ل دووڤ راپۆرتەکا وەزارەتا سامانێن سروشتی یا حوکمەتا ھەرێما کوردستانێ نوکە 26 کۆمپانیێن بیانی یێن پترۆلێ ل ھەرێما کوردستانێ کاردکەن، ل ڤان کۆمپانییان 1693 کارمەندێن بیانی کاردکەن و ھەلگرێن باوەرنامێن تایبەتن ب زانستێ پترۆلێ و ئاشکراکرن و دەرخستنا وێ، ژ وان پێنج کۆمپانییان کو پتریا کارمەندان لێ ھەنە ئەوژی، دی ئێن ئۆ، تی تی ئۆپکۆ، شیڤرۆن، دانە غاز، ئێم ئۆ ئێل، د راپۆرتێ دا دیاربوویە 60% ژ کرێکارێن کۆمپانیێن د بیاڤێ پترۆلێ دا کاردکەن خەلکێ کوردستانێ نە.
ئەڤرۆ:
رێڤەبەرێ تۆمارا گشتی یا زانکۆیا دھۆک د. سەعید خودێدا بۆ رۆژناما ئەڤرۆ دیارکر کو ل پارێزگەھا دھۆکێ 5219 قوتابیان فۆرما زانکۆلاین یا پێشکێش کرنا زانکۆ و پەیمانگەھێن ھەرێمێ نەداگرتیە.
د. سەعید خودێدا ئەو ژی دیارکر کو ل پارێزگەھا دھۆکێ 18594 قوتابیان ماف ھەبوو پێشکێشی زانکۆلاینێ بکەن، 13375 قوتابیان یا پێشکێش کری و یێن دی پێشکێش نەکریە، ئاشکرا ژی کر کو ل ھەرێمێ 18531 قوتابیان پێشکێش نەکریە کو 17746 قوتابیان مافێ پێشکێش کرنێ ھەبوو.
پێشکێشکرنا زانکۆلاین ژ 8\11\2014 دەست پێکر و ھەتا 24\11\2014 یا بەردەوام بوو.
ئه‌ڤرۆ نيوز:
رێڤه‌به‌ريا گشتيا كه‌شناسيێ ل هه‌رێما كوردستانێ راگه‌هاند كو سوبه‌هى ئه‌سمانێ دهۆكێ دێ ب ته‌مامى ئه‌ور بيت ل گه‌ل بارانا بارينێ ل هنده‌ك ده‌مان ب تايبه‌ت دانێ ئێڤارى.
پشكا پێشبينيان ل رێڤه‌به‌ريا گشتيا كه‌شنايا هه‌رێمێ راگه‌هاند كو ژ ئه‌نجامێ مانا وان پاله‌په‌ستۆيێن نزمێن ده‌ريا ناڤه‌راست بۆ سه‌ر هه‌رێما كوردستانێ پێشبينى دهێته كرن ل دهۆكێ ئه‌سمان ئه‌ور بيت و ب تايبه‌ت ل دانێ ئێڤارى ل گه‌ل بارانا بارينێ.
رێڤه‌به‌ريا گشتيا كه‌شناسيێ ل هه‌رێما كوردستانێ ئاشكه‌را ژى كريه كو پلا گه‌رماتيێ ژى دێ ب دو سێ پلان نزمتر بيت وه‌كو ژ رۆژێن بۆرى ب ره‌نگه‌كى د ناڤبه‌را پێنج هه‌تا 15 پلان دا.
ل دۆر پێشبينيا رێژا هه‌وايى و مه‌ودايێ ديتنێ ژى دايه زانين كو ل رێژا بايى دێ ل سه‌ر خوه بيت ب پێنج بۆ 10 كليۆمه‌تر د ده‌مژمێره‌كێ دا به‌لێ ل ده‌مێ باران دێ زێده‌ت بيت، د ناڤبه‌را 20 هه‌تا 25 كيلۆمه‌تران د ده‌مژمێره‌كێ دا و مه‌ودايێ ديتنێ ژى دێ هه‌شت هه‌تا 10 مه‌تران بيت.
پشكا پێشبينيان ل رێڤه‌به‌ريا گشتيا كه‌شنايا هه‌رێمێ بۆ سوبه‌هى رێكه‌فتى 26\11\2014 ل دهۆكێ پێشبينا هاتنا رێژا پێنج بۆ حه‌فت ملم بارانێ دكه‌ت.
ئەڤرۆ نیوز، ھەیفا دوسکی:
پتریا خێزانان ل دھۆکێ حەز دکەن ژنێن ناڤخۆیی ل ناڤ مالێن وان کار بکەن ل شوونا یێن بیانی ژ بەر باوەریێ.
خودانا دو کۆمپانیێن ئینانا کرێکارێن بیانی بۆ ئەڤرۆ نیوز گۆت: “ئەم دمینینە ھەلاویستی و نزانین دێ چ کەین”.
بەیان نائیف خودانا دو کۆمپانیێن ئینانا کرێکارێن بیانی و ناڤخویی دبێژیت: “خەلکێ مە گەلەک جاران پێدڤی ب کرێکارێن ناڤخویی دبن، باوەریا وان پتر ب خەلکێ دھۆکێ دھێن”.
زێدەتر گۆت: “گەلەک جاران وەلاتی ھاتینە دەف مە و خواستیە کو کرێکارێن ناڤخۆیی ببەنە ناڤ مالێن خوە، ل گەل ھندێ گەلەک جاران گازندە بۆ ھاتینە چونکو ل دەمێ چوونا وان ژی ھەموو کاران ناکەن”.
ئێکەتیا ئافرەتێن کوردستانێ ژی د راگەھاندنەکێ دا بەلاڤ کریە کو خەلکێ دھۆکێ دخوازیت کرێکارێن ناڤخۆیی ببەتە ناڤ مالێن خوە ژ بەر مەرەمێن دلۆڤانیێ.
ئه‌ڤرۆ نيوز:
ب گۆره‌ى رێنمايه‌كا وه‌زاره‌تا دارايى و ئابوورى ل حوكمه‌تا هه‌رێما كوردستانێ، بڕيار هاتيه دان كو نابيت فه‌رمانگه‌هێن سه‌ر ب رێڤه‌به‌رێن گشتى دو جێگر هه‌بن و پێدڤيه هه‌ر ب تنێ ئێك جێگر هه‌بيت.
ب نڤيسارا هژمار 8451 يا 26\11 وه‌زاره‌تا دارايى و ئابوورى ل حوكمه‌تا هه‌رێما كوردستانێ كو ئيمزا وه‌زيرێ دارايى رێباز محه‌مه‌د حه‌ملان ل سه‌ره و ب ده‌ست ئه‌ڤرۆ نيوز كه‌فتيه هاتيه: “ب مه‌ره‌ما رێكخستنا كارێ په‌يكه‌رى يێ هه‌موو فه‌رمانگه‌هێن سه‌ر ب رێڤه‌به‌ريێن گشتى رادگه‌هينين كو پێدڤيه فه‌رمانگه‌هێن سه‌ر ب رێڤه‌به‌ريێن گشتى ب تنێ ئێك جێگر هه‌بيت و ژ به‌ر هندێ هه‌ر فه‌رمانگه‌هه‌كا دو جێگر هه‌بن بۆ مه بهنێرن ب مه‌ره‌ما ژ ناڤبرنا فه‌رمانا وان”.
ئه‌ڤرۆ نيوز، بارزان سلێمان مزووری:
ئه‌ندامه‌كێ راگەھاندنا فەرماندەیا دھۆک بۆ ئەڤرۆ نیوز ديارکر کو شڤێدی چەکدارێن تیرورستێن داعش دڤیا ھێرشێ بکەنە سەر ھێزێن پێشمەرگەی د ناڤبەرا میحوەرێ بەنداڤا مووسل و زۆمار دا و پێشمەرگەی ھێرشێن وان شکاندن 80 تەرمێن وان کەفتینە دەستێن پێشمەرگەی ل گەل دو ئێخسيران و ترۆمبێلەکا پیکاب ب دوشک ڤە و هژمارەکا زۆر یا ترومبێلێن وان یێن ھاتینە سوتن تێک شکاندن.
عه‌قيد شێرزاد نائيف ژ راگه‌هاندنا فه‌رماندا دهۆك يا پێشمه‌رگێ كوردستانێ زێده‌تر گۆت: “ئه‌ڤ كه‌سێن هاتينه كوشتن ژ ره‌زگه‌نامێن جودا بوون كو گه‌له‌ك ژ وان خودان ره‌گه‌زنامێن بيانى بوون”.
ئاشكه‌را ژى كو ل ده‌مێ ئه‌و ره‌ڤين و شكه‌ستن ژى خوارى، فرۆكێن شه‌رى يێن هێزێن هه‌ڤپه‌يمانان تۆپبارانكرن و زيانێن گه‌له‌ك مه‌زن گه‌هشتنێ و گۆت: “پێشمه‌رگه‌ى چو زيانێن گيانى نه‌بوون”.
ئه‌ڤرۆ نيوز، ره‌زوان رۆژبه‌يانى، بارزان مزوورى:
دوهى ب شه‌ڤ شه‌ر د ناڤبه‌را هێزێن پێشمه‌رگه‌ى و چه‌كدارێن داعش دا ل ميحوه‌رێ خازر روودا و د ئه‌نجام دا شه‌ر ب سه‌ركه‌فتنا پێشمه‌رگه‌ى ب دووماهى هات.
دوهى 26\11\2014 ل ده‌مژمێر 10:40 د ئه‌نجامێ وى شه‌رێ د ناڤبه‌را پێشمه‌رگه‌ى و چه‌كدارێن داعش دا، گۆله‌كا كاتيوشا يا چه‌كدارێن داعش ب ئێك ژ مالێن ناحيا كه‌له‌ك يا عوسمان ئه‌حمه‌د عوسمان كه‌فتيه و د ئه‌جام دا دو ژن ژ وێ خێزانێ بريندار بووينه.
بيلال ئه‌حمه‌د كوڕێ عوسمانه بۆ ئه‌ڤرۆ نيوز گۆت: “شڤێدى ژ ئه‌نجامێ وێ هێرشێ گۆله‌ك ب مالا مه كه‌فت و دو ژن ژ خێزانا مه بريندار بوون و ترۆمبێلا مه ژى يا ژ جۆرێ ئۆپل هاته تێكشاندن”.
ئه‌ڤى كه‌سى زێده‌تر گۆت: “ئه‌ڤ هه‌ردو ژنه بۆ نه‌خۆشخانا ته‌نگاڤيان ل هه‌ولێر هاتينه ره‌وانه‌كرن و بڕياره د ماوێ داهاتى دا نشته‌رگه‌رى بۆ بهێنه ئه‌نجام دان”.
ئه‌ڤرۆ:
چالاكڤانه‌كێ كورد راگه‌هاند كو ئه‌ڤه چه‌ند رۆژه‌كه گه‌ميه‌كا كۆچبه‌رێن نه‌شه‌رعى ل توركيا هه‌لگرتبوون و دا به‌ر ب ئيتاليا چن ديار نينه و حوكمه‌تێن وان وه‌لاتان دووڤچوونا بابه‌تى ناكه‌ت و خواست هه‌رێما كوردستانێ ل ته‌وارێ بچيت.
سه‌عيد شنگالى، چالاكڤانێ كۆمه‌لا جوانێن ره‌سه‌ن ل وه‌لاتێ ئه‌لمانيا بۆ ئه‌ڤرۆ گۆت: “ئه‌ڤه نێزيكى هه‌شت رۆژايه، گه‌ميه‌كا كۆچبه‌رێن نه‌شه‌رعى ژ توركيا ده‌ركه‌فتيه و به‌ر ب وه‌لاتێ ئيتاليا چوويه و ل ناڤا ده‌ريايێ به‌رزه بوويه”.
زێده‌تر گۆت: “ئه‌ڤێ گه‌ميێ نێزيكى 700 كه‌سا هه‌لگرتينه و ژوان ژى نێزيكى 500 كه‌سان كوردن”، ئاشكه‌را ژى كر كو ئه‌و په‌يوه‌نديێ ژى ب وان دكه‌ن، ب سلامه‌تن، به‌لێ نوزانن ل كيرێ نه و ئاسێ بووينه.
سه‌عيد شنگالى ئه‌و چه‌ند ژى ئاشكه‌را كر كو كوردێن د ناڤ ڤێ گه‌ميێ دا ژ باشوور و رۆژئاڤايێ كوردستانێ نه و خه‌لكێ دهۆك و هه‌ولێر و سلێمانيێ ژى د ناڤ دا هه‌نه”.
ئه‌ڤى ئه‌ندامێ كۆمه‌لا جوانان دا زانين ژى كو ئه‌و گه‌له‌ك په‌يوه‌نديێ ب لايه‌نێن به‌رپرسێن وان وه‌لاتان دكه‌ن، به‌لێ چو ژ وان وه‌لاتان دووڤچوونا بابه‌تى ناكه‌ت و گۆت: “هيڤى دكه‌م هه‌رێما كوردستانێ ب فه‌رمى وان لايه‌نان ئاگه‌هدار بكه‌ت، دا كو د هه‌وارێ بچن”.
ئه‌ڤرۆ:
رێڤەبەرێ گشتیێ کار و دەستەبەرا کۆمەلایەتی ل حوکمەتا ھەرێما کوردستانێ دکتۆر عارف حیتو دیارکر کو د ئەڤ سالە دا چار ھزار کرێکارێن بیانی ھاتینە ھەرێما کوردستانێ و پتریا وان ژی کرێکارێن نافمالیێ بووینە، گۆت ژی ھەتا سەرێ سالا نوو دێ رێنمایێن پتر بۆ ئینانا کرێکارێن بیانی ژ لایێ حوکمەتێ ڤە ھێنە دەرکرن و دەمێ مانا کرێکاران دێ ھێتە دیارکرن.
دکتۆر عارف حیتو گۆت ژی لژنەکا بلند ھاتیە پێکئینان و نوونەرێن وەزارەتا ناڤخۆ و دەستەیا وەبەرھینانێ و وەزارەتا کار و ژۆرا بازرگانی و پیشەسازی تێدانە، داکو ئینانا کرێکاران پتر بھێتە رێکخستن و ئەو ئاریشێن نوکە ھەین نەمینن، ئەو ژی دیارکر کو پشتی راگرتنا پڕۆژان کرێکارێن بیانی کێمتر دھێنە ھەرێمێ و کرێکارێن ناڤخۆیی ژی بێکار بووینە.
ئەڤرۆ:
ئەندامەکێ لیژنا دارایی ل پەرلەمانێ کوردستانێ گەندەلیەکا دی یا وان فەرمانبەرێن دەوامێ نەکەن و مووچەی وەردگرن راگەھاند و دیار کر کو ٢٨٠ فەرمانبەرێن وەزارەتا کارەبێ، ل کەرکووکێ دەوامێ ناکەن و ھەیڤانە ل ھەولێرێ مووچەی وەردگرن.
عەلی حەمە سالح، ئەندامێ لیژنا دارایی ل پەرلەمانێ کوردستانێ د نڤیسینەکێ دا کو ئاراستەی وەزیرێ کارەبێ یێ حوکمەتا ھەرێما کوردستانێ کریە و ل سەر پەیجێ تایبەتێ خوە ل سەر تۆرا جڤاکیا فەیسبۆکی بەلاڤ کریە، ئاشکرا دکەت کو ھەتا نوکە ھژمارەکا زۆر یا کادرێن حزبی ب ناڤێ فەرمانگەھا کارەبا کەرکووکێ ل ھەولێرێ مووچەی وەردگرن و دەوامێ ژی ناکەن، ب تنێ ل دووڤ لیستەکێ ٢٨٠ کەس ب ناڤێ فەرمانگەھا کارەبا کەرکووکێ ژ گەنجینا وی باژێری ل ھەولێرێ مووچەی وەردگرن.
پەرلەمانتارێ ناڤھاتی نڤیسیە: “مووچێ وان فەرمانبەران ل سەر وەزارەتا کارەبێ نینە، بەلکو ل سەر وەزارەتا دارایی یە و مووچەی ژ گەنجینا کەرکووکێ ل ھەولێرێ وەردگرن”.
نيشاندان