كۆبانێ ئه‌و باژێرێ بریندار، ئه‌و باژێرێ به‌رخودان و تێكۆشینێ دژی چه‌تێن داعشێ دكه‌ت، ئه‌و باژێرێ بوویه گۆرستانا تیرورێ، ئه‌و باژێرێ هاتیه نیاسین ل هه‌می جیهانێ باژێرێ مێرخاس و عه‌گید و جاڤنه‌ترسان دژی هزرا تیرۆرێ و داعشێ و ئالایێ ره‌ش، ئه‌و باژێرێ پتره ژ چل رۆژان ژ هه‌ر سێ لایه‌نان ڤه ل بن دۆرپێچێ دایه و به‌ره‌ڤانیێ ژ نفش و شه‌ره‌ف و ئاخا كوردان دكه‌ت، د ڤی شه‌ڕی دا گه‌له‌ك نهێنی دیار بوون و دێ دیاربن، دێ دوست و دوژمنێن مه دیاربن، پشته‌ڤان و هه‌ڤالێن كوردان و نه‌حه‌زێن وان ژێك هاتنه جوداكرن، رۆن و ئاشكه‌را بۆ كینه د خه‌ما كۆبانێ رۆندكان درێژن و كینه ل هیڤیا كه‌تنا كۆبانێ نه و تلیلیان رادهێلن و شه‌هیانا دشارینن.
ژ ئه‌نجامێ ڤێ دۆرپێچێ ل سه‌ر كۆبانێ ژ لایێ چه‌ته‌یێن داعشێ ڤه په‌رله‌مانێ هه‌رێما كوردستانێ بریاره‌كا مێژووی و وێره‌كانه دا ب چوونا پێشمه‌رگه‌ی ب چه‌كه‌كێ گران بۆ كۆبانێ ژبۆ هاریكاریا برایێن خوه شه‌رڤانێن (یه‌كینه‌كانی پاراستنی گه‌ل) دوور ژ رازیكرنا به‌غدا و دیمه‌شقێ و وه‌ك ده‌وله‌ته‌كا سه‌ربه‌خوه بریار دا، ئه‌و تشتێ بوویه جهێ سه‌رنجراكێشێ ل هه‌می میدیایێن جیهانی ئه‌و بوو هه‌ر ژ هه‌ولێرا پایته‌خت و به‌ر ب دهۆك و زاخۆ و كوردستانا توركیا خه‌لك رژیانه سه‌ر جادان بۆ پێشوازیكرنێ ل ڤێ پانۆرامایێ ل ڤێ داستانێ ل ڤێ حنێرێ و ب گول ئالایێن كوردستانێ و ستران و تلیلی و هۆزانان و ده‌ست قوتانان و ڤه‌كرنا له‌وندیا پێشوازی ل ڤان چاڤنه‌ترسان ل ڤان پێشمه‌رگه و عه‌گیدان دكر و خه‌ونا وانه ئێدی كور دچه‌په‌ره‌كی دابیت و ب ده‌ڤه‌كی و ب دله‌كی كاركه‌ت و كوردستانێ رزگار بكه‌ت، وه‌كر ئێدی هه‌ر كه‌سه‌ك نه‌شیان رۆندكێن خوه راگریت و راوه‌ستینیت و به‌رده‌وام پشته‌ڤانی دكر و خه‌لك زۆر ب كه‌یڤ بوو ژ ڤان دیمه‌ن و داستانان، له‌وما دێ بێژین چوونا پێشمه‌رگه‌ی بۆكوبانێ هیڤیه‌كا مه‌زنه بۆ هه‌می كوردان داكو باژێركێ كۆبانێ نه ئێته پیسكرن ب ببێهن و شوونپێن داعشێ و ئه‌ڤ پێنگاڤه گه‌له‌ك په‌نجه‌ران ل به‌ر كوردان ڤه‌دكه‌ت، چونكی ئه‌ڤ بریاره پتر ئێگرتنا كوردان نێزیكی ئێك دكه‌ت و دكه‌ته هێڤێنه‌ك بۆ ئێگرتنا هه‌می هێزێن كوردی، هه‌روه‌سا ئه پێنگاڤه هشیاریه‌كێ د هزرا نه‌ته‌وه‌یا كوردی دا بلند دكه‌ت چونكی ب چوونا پێشمه‌رگه‌ی ل ناڤ باژێركێن كوردی، تایبه‌ت ل كوردستانا تركیا و پێشوازیا خه‌لكی هزرا وان یا كوردینێ دفیریێت و بلند دكه‌ت دگه‌هینته به‌ر په‌ڕێن ئه‌سمانی و شاخێن كوردان و پیێن وان دخورینیت بۆ خه‌بات و تێكۆشانێ ژ بۆ ئازادیا كوردستانا مه‌زن، خه‌ونا هه‌ر كورده‌كی یه ل سه‌رانسه‌ری جیهانێ ببینیت هێزێن كوردان یێ پێكڤه كوردستانێ دپارێزن و پێگڤه یێ پاپۆرا كوردستانێ دهاژوون و ئه‌ڤ پێنگاڤه شكاندنا پایته‌ختێن ده‌وله‌تانه، شكاندنا قه‌ید و سنۆرانه ئه‌و سنۆرێن بێی رازیبوونا كوردان ل رێكه‌فتنا سایكس پیكۆت ل سه‌ر كوردان هاتیه سه‌پاندن، دڤێت ئێدی كورد ئێك ده‌نگ بن و ده‌ستان بكه‌نه تێكدا چونكی ئه‌ڤ ده‌رفه‌تا بۆ كوردان رۆخسای چ جاران ب ڤی شێوه‌ی ناهێت و پاشی دیرۆك ره‌حمێ بكه‌سێ نابه‌ت یێ كوردان بفرۆشیت.
نووترين نووچه
- نەخوەشخانەیا پەنجەشێرێ ب ئاست و كوالێتییەكا بلند دێ كەڤیتە د خزمەتا وەلاتییاندا
- پەرلەمانتارەك: ئەمریكا و ئۆپێك فشارێن ل ئیراقێ دكەن بۆ هنارتنا پەترۆلا هەرێما كوردستانێ
- ل نێزیك پارتی دێ بارەگەهێ مەكتەبا رێكخستنێ ل كەركووكێ ڤەكەت
- دەلیڤەیا سەختەكاریێ ب رێكا تەكنەلۆژیایێ یا هاتیە كێمكرن و دەنگ ب دەستی ژی دێ هێنە هەژمارتن
- پێدڤییە نیازپاكی و ئیرادەیەكا راستەقینە بۆ چارەسەركرنا كێشەیان هەبیت
- پێدڤییە هەوا هەلبژارتنان د سەقایەكێ ئازاد دا و دوور ژ گرژیێ بهێنە ئەنجامدان
- مەسرور بارزانی: ب هێزبوونا پارتی ب هێزبوونا كوردستانێیە
- گرنگە پڕۆژەیێ (هەژمارا من) بەردەوام بیت
- سەرۆكێ حوكمەتا هەرێمێ بۆ گوپیتكا جیهانییا سەقای هاتە ڤەخواندن
- پترییا كێشەیان دێ هێنە چارەسەركرن
سهرهكى Twitter
ده‌ستێن خوه ب نه‌مرۆڤان پیس نه‌كه‌ن
ب مخابنیڤه ئه‌ڤ جه‌نگێ ل سه‌ر مه هاتیه سه‌پاندن كو تێدا ب درنده‌ترین شێوه دوور ژ رێسا و یاسایێن جه‌نگا مرۆڤ دهێنه كرێتكرن و سه‌رژێكرن و سۆتن و.. . هتد و ئه‌ڤ دیمه‌نێن هه‌نێ دهێنه به‌لاڤكرن و دیتن ب ساناهیترین و له‌زترین شێوه و ته‌ماشاچیێن ڤان كارێن هۆڤانه‌نه ب تنێ مرۆڤێن فامانه، به‌لكو گه‌نج و زارۆ ژی ته‌ماشا كه‌رێن ڤان دیمه‌نانه. ئه‌ڤه ژی دبیته ئه‌گه‌رێ كارتێكرنا نه‌رێنی ل سه‌ر دیده‌ڤانێن ڤان دیمه‌نان، ژ به‌ر ڤێ چه‌ندێ ده‌مێ ئه‌م دبینین ئه‌ڤ گرۆپێن توندره‌و و هۆڤ و دوور ژ ره‌وشتێن مرۆڤاتیێ ڤان كریارا ئه‌نجامدده‌ن كه‌سێن بێ هه‌ست و نه‌سلن، لێ بۆ ڤان كو ئه‌م دبینین ب مخابنیڤه خه‌باتكه‌رێن مه دلسۆزێن وه‌لاتی پێشمه‌رگه و شۆره‌شڤانێن مه هه‌ول دده‌ن تۆلڤه‌كرنا خوه هه‌ر ب شێوێ دوژمنێن مه كو دوورن ژ ره‌وشتێ مرۆڤاتیێ، ناڤوده‌نگی و ره‌وشتێ ملله‌تی به‌نه ل بن پرسیارێ. نابیت كریارێن وان یێن هۆڤانه ئه‌م لاسایی بكه‌ین، چونكو ئه‌مین یێن كو مه دڤێن وه‌لاتێ خوه ل سه‌ر ده‌ستێ مرۆڤاتیێ ئاڤا بكه‌ین و ده‌ستێن خوه ب پیسان پیس نه‌كه‌ین. هه‌ر چاوا بیت نابیت كرێتكرنا مرۆڤان بهێته وێنه‌كرن و به‌لاڤكرن چونكو چاڤ یێ ل سه‌ر مه و حساب ل سه‌ر مه هه‌یه. بلا چاڤێ دونیایێ ره‌فتارێن مه وان تێكهه‌ل نه‌كه‌ن و ره‌وشتێ ملله‌تێ كورد كرێت نه‌كه‌ن، چونكو سوباهی دێ د سه‌رێ گه‌نجێن مه دا ژی ئه‌ڤ كریاره ب ره‌وا هێنه زانین و دێ بیته كلتوور د تولڤه‌كرنێدا د ناڤ مه‌دا.
گه‌نج و وه‌رگرتنا پله و پۆستان
مه‌زنێن مه كوردان گۆتینه (هه‌تاكو نیڤا ده‌ستی ره‌ش نه‌بیت تاما ده‌ڤی خۆش نابیت) یان (یێ نه‌كه‌ت ناخۆت) هه‌ر په‌یڤه‌كا مه‌زنێن مه گۆتین حیكمه‌ته‌ك تێدا هه‌یه. باشه هه‌كه گه‌نج پله و پۆستان و به‌رپرسیاریان وه‌رگرن و بشێن داهێنانێ د تایبه‌تمه‌ندیا خوه دا بكه‌ن، دێ بیته هانده‌ره‌ك و داهێنان و شیان دێ هێنه دیاركرن، لێ سه‌ربۆر و ژیی و شێوه و رابردوو زۆر د پێدڤینه د وه‌رگرتنا هه‌ر پۆسته‌ك و به‌رپرسیاریه‌كێ دا. مه‌ره‌م ژ ڤی مانشێتی ئه‌وه كو نه‌یا دروسته هه‌ر كه‌سه‌ك زوو بێ خزمه‌ت یان شاره‌زایا كاری یان بێ سه‌ربۆڕ بهێته پێش و ببیته مه‌زن و عه‌قلدارێ هۆزه‌كێ یان رێڤه‌به‌ر و سه‌رۆكێ ده‌زگه‌هه‌كی یان پله و پۆسته‌كی وه‌رگریت. هه‌ر رێیه‌كا پڕه ژ ژێهه‌لی ونشیڤیان و ده‌مێ دچیه رێیه‌كێ بێگومان دێ زۆر ماندی بیت و شوونوارێن وه‌ستانێ پێڤه دیار بن. ژیان ژی یا پڕه ژ ئاسته‌نگان و ل گه‌ل بۆرینا ژیانێ دێ ماندی بین هه‌تا ئارمانج بده‌ستڤه‌دهێن. هه‌كه‌ك لێنێرینه‌كا كورت ل باب و باپیرێن خوه بكه‌ین، دێ بینین كو زۆر ماندو بووینه و ب كێمێ رازی بووینه و زوی ب زوی و ب ساناهی پله و پایه و به‌رپرسیاره‌تی نه وه‌رگرتینه هه‌تا كو ژیێ وان نه‌یێ گونجای بایه، نموونه ژی ل زۆر وه‌لاتێن بیانیان و ب تایبه‌ت ئه‌مریكا هه‌تا ژیێ كاندیدێن سه‌رۆكاتیێ نه‌گه‌هیته (50) پێنجی سالان نابیت بهێته به‌ربژاركرن بۆ پۆستێ ناڤئینای، نهێنیا ڤێ چه‌ندێ ژی ئه‌وه كو د ژیانێ دا دڤێت هه‌ر كه‌سه‌كی سه‌ربۆر و سه‌رهاتی هه‌بن و ژ هه‌می ئاسته‌نگان ده‌ربازببن. لێ نوكه ل رۆژهه‌لاتا ناڤه‌راست و ل ناڤ جڤاكێ كورده‌واری پتریا خه‌لكی زوو پۆسته و به‌رپرسیاره‌تیێن مه‌زن و گران وه‌ردگرن و بێ كو خزمه‌ت و خه‌بات هه‌بیت و سه‌ربۆرا كاركرن و به‌رپرساتیێ هه‌بیت و سیسته‌مێ كاركرن و ئیداره‌كرنێ بزانیت و هه‌كه كه‌سه‌ك ل جهه‌كی بهێته داناندن زۆر فه‌ره مه‌رج و خالێن پێدڤی هه‌بن یێن وه‌رگرتنا هه‌ر پۆسته‌كی و نه ب هنده‌ك رێیێن نه سروشتی و نه دادپه‌روه‌رانه بهێنه داناندن و ژ به‌ر هه‌ر ئه‌گه‌ره‌كی بهێته پێشنیازكرن چ ئه‌گه‌رێن هۆزاتیێ یان مرۆڤكانێ یان كوتله‌وكۆمانێ یان ل سه‌ر بنه‌مایێن مه‌لاقی و له‌گله‌گیێ ل ڤی ده‌می مافێن كه‌سانێن خودان شیان و خه‌باتكه‌ر و یێن خزمه‌ت هه‌ی دچه‌وسینن وبوارێ خزمه‌ت كرن و پێشڤه‌چوون و كاركرنێ ب ئێكجاری دهێته پێشیلكرن، به‌لكو هه‌ر هه‌بوون بۆ وارێ ناڤبری نابیت. ئه‌ڤه لایه‌نه‌كێ نه‌رێنی یێ وه‌رگرتنا پۆستان بوو و لایه‌نێ خرابتر ئه‌وه ده‌مێ ل ژیه‌كێ زوو و ب له‌ز پله و پۆسته وه‌رگرتن، دێ د ناخێ خوه دا خوه ژ هه‌ر كه‌سه‌كێ باشتر بینیت ژ بۆ وه‌رگرتنا پۆسته‌كێ مه‌زنتر و دێ خه‌مساریێ د كار و پۆستێ خوه دا كه‌ت، ب تنێ دێ بۆ كاروپۆستێ مه‌زنتر كاركه‌ت، ئه‌ڤه دێ بیته ئه‌گه‌ر كو سستیه‌ك كه‌ڤیته د كارێ وی یێ ئیداری دا، چونكو بێ ماندیبوون كه‌س نا گه‌هته مه‌ره‌مێ و هه‌كه گه‌هه‌شتنێ ژی، دێ ئه‌و پۆسته یێ تژی بیت ژخرابكاری و كێماسی و شاشیان. بلا ماندی ببین و خزمه‌تێ بكه‌ین هه‌تا كو بهایێ وی پله و پۆست و كورسیێ بزانین و ب درستاهی مافێ كورسیێ بده‌ینێ و كه‌سانێن ژ هه‌ژی ل جهێن هه ژی بن و ب تنێ خزمه‌تا ملله‌ت و وه‌لاتێ خوه بكه‌ت.
ئه‌رێ دروسته رۆژنامه‌ڤان بۆ دراڤی بكه‌ت؟
رۆژنامه‌ڤانی پیشه‌یه‌كا ئه‌خلاقی و مرۆڤی یه، ئه‌ركێ وێ كۆمكرن و لیكۆلینێن ل سه‌ر راستیا ده‌نگ و باسان و د رێا سازییه‌كا راگه‌هاندنێ را بگه‌هینته وه‌لاتیان. پتریا جاران ژی گرێدایی روودانێن رۆژانه‌یه، دیسا پره‌كا په‌یوه‌ندیانه دنێڤبه‌را خه‌لكی و ده‌ستهه‌لاتێ دا و ب هه‌می ئالیێن خۆڤه و د سیسته‌مێ برێڤه‌برنا ده‌ستهه‌لاتا دیمۆكراسی دا ده‌ستهه‌لاتا چارێ یه ل حوكمرانیا ده‌وله‌تێ، له‌وما فه‌ره مرۆڤێ رۆژنامه‌ڤان، نه‌مازه هه‌كه گرێدایی سازیه‌كا راگه‌هاندنێ بیت (رۆژنامه و كۆڤار) وه‌كو په‌یامنێر ڤی پیشه‌یا ئه‌خلاقی ب ئه‌مانه‌تڤه بگه‌هینیت و نه‌ك ب تنێ ئارمانجا وی ره‌شكرنا به‌رپه‌رێ رۆژنامێ ب چه‌ند دێركه‌كانه و ب مانشێته‌كێ مه‌زن و ئارمانج ل به‌خشینا سه‌رێ هه‌یڤێ بیت، كو ب هزرا من ئه‌ڤ جۆره رۆژنامه‌ڤانه هه‌كه د هه‌می ژیانا خۆ دا د ڤی ئه‌ركی دا بیت، نابیته رۆژنامه‌ڤان و نڤیسكاره‌ك و نكاریت ب دروستی خزمه‌تا په‌یڤا ره‌سه‌نا كوردی و خزمه‌تا گه‌لێ خوه بكه‌ت و وی پیشه‌یێ ئه‌خلاقی و مرۆڤایه‌تی ژی بگه‌هینیت، چونكو سه‌ره‌ده‌ریكرنا ڤان كه‌سێن هه وه‌كو كارگه‌ره‌ك ل گه‌ل سازیه‌كێ دایه نه‌ك وه‌كو راگه‌هاندكاره‌كێ خودان شیان كو ئارمانج ئه‌و بیت ببیته راگه‌هاندكار و رۆژنامه‌ڤانه‌كێ سه‌ركه‌فتی، ره‌نگه خه‌لكه‌ك پرسیار بكه‌ت و بێژیت هه‌ر كاره‌ك ل گه‌ل هه‌ر داموده‌زگه‌هه‌كێ بهێته‌كرن ب به‌رامبه‌ره؟ ئه‌ڤه راسته مافه‌كێ هه‌ر تاكه كه‌سه‌كێ یه كو هه‌مبه‌ری وی كارێ دكه‌ت ل به‌رامبه‌ر ژی هه‌بیت، چونكو ژێده‌ره‌كێ برێڤه‌برنا ژیانا وی یه، لێ یا گرنگ ئه‌وه كو هه‌رده‌م ب چاڤه‌كێ بلند به‌رێ خوه بده‌ته ڤێ پیشه‌یی و هه‌رده‌م هه‌ول بده‌ت ئارمانجا گشتی و خزمه‌تكرنا گه‌ل و وه‌لاتێ خوه ل پێشیا خزمه‌تا كه‌سایه‌تیا خوه دابنێت، دیسا فه‌ره مرۆڤێ رۆژنامه‌ڤان كه‌سانه‌كێ ب وێره‌ك بیت و هه‌رده‌م هه‌ول بده‌ت ل راستیان بگه‌رهێن و دژی كارێن گه‌نده‌لڤان و گه‌نده‌لكاران بیت و هه‌ر كێموكاسیه‌ك ژی ل هه‌ر سازیه‌كێ ببینیت و هه‌ول بده‌ت به‌لگه‌یێن راست و دروست ل سه‌ر كۆم بكه‌ت و بگه‌هینته سازیێن په‌یوه‌ندیدار، چونكو مه بڤێت یان نه‌ڤێت راگه‌هاندن دڤیا ببیته چاڤدێر ل سه‌ر كاروپرۆژێن سازیێن حوكمه‌تێ هه‌تاكو بكاریت وی ئه‌مانه‌تی ب ئه‌مانه‌تڤه بگه‌هینیت و پتر خزمه‌تا گه‌ل و وه‌لاتێ خوه بكه‌ت، ل ڤێره چه‌ند پرسیار دهێنه پێش، ئه‌رێ ئه‌ڤ جۆره كه‌سه ب تنێ ئه‌و به‌رپرسیارن ل ڤی ئه‌ركی یان ئه‌و سازیا راگه‌هاندنا ئه‌و ب سه‌رڤه هنده‌ك به‌رپرسیاره‌تی دكه‌ڤیته ستوویێ وان؟ باشه بۆچی هه‌تا نوكه رۆژنامه‌ڤانه‌كێ ده‌ڤه‌را به‌هدینان نه‌شیاینه ئێك گه‌نده‌لڤانان ئاشكرا بكه‌ن و نه‌مازه ل سنۆرێ ده‌ڤه‌را به‌هدینان؟ ب هزرا من ب تنێ ئه‌ڤ رۆژنامه‌ڤانه به‌رپرسیار نینه به‌لكو ئه‌و سازیێن ئه‌و ب سه‌رڤه، ئه‌و ژی به‌رپرسیارن ژ به‌ركو فه‌ره هنده‌ك جاران ئه‌و ژی ل گه‌ل په‌یامنێرێ خوه ڤێ داخوازیێ لێ بكه‌ن و هه‌كه دیت و ب درێژاهیا وی ده‌مێ ل گه‌ل كار دكه‌تن، ب تنێ ئارمانجا وی كۆمكرنا دراڤی یه بگه‌هنه قه‌ناعه‌تێ كو ئه‌ڤ كه‌سه هه‌ژی وی پیشه‌یی نینه، چونكو مه گۆت پێدڤی یه مرۆڤێ رۆژنامه‌ڤان و راگه‌یاندكار دڤیا یێ وێره‌ك بیت و ل چه‌وانیا نه‌ره‌ڤیت و به‌رگریێ ل مافێن گشتی یێن ڤی ملله‌تی بكه‌ت و خوه ب خودانێ راستی و سه‌روه‌ت و سامانێ ئه‌ڤی ملله‌تی بزانیت ئه‌وێن خه‌لكه‌ك ب غه‌در و خیانه‌ت بۆ خوه حه‌لالكری، لێ ب مخابینڤه دبێژم كو هه‌تا نوكه مه ئه‌ڤ جۆره رۆژنامه‌ڤانه ل ده‌ڤه‌را به‌هدینان نه‌دیتینه و هه‌كه هه‌بن ژی زۆر دكێمن و هه‌كه نه بێژین هه‌ر نینه، هه‌ر چه‌نده چو ده‌مه‌كێ ئه‌ز ل گه‌ل هندێ نینم و نه‌بوویمه كو رۆژنامه‌ڤان رابیت ب ناڤزراندنێ یان ل ئاسایشا نه‌ته‌وی بده‌ت، لێ فه‌ره یێ هشیار بیت و په‌یوه‌ندیێن وی ل گه‌ل هه‌می سازیه‌كێ د موكم بن و ل دووڤ راستیان بگه‌ریێت، له‌وما جاره‌كا دی دبێژم ئه‌و رۆژنامه‌ڤانێ ب تنێ ئارمانج كۆمكرنا دراڤی بیت نه دبیته رۆژنامه‌ڤان و نه دكاریت خزمه‌تا گه‌ل و وه‌لاتێ خوه بكه‌ت و یادی ژی بلا به‌رسڤ بۆ خوینده‌ڤانان بیت.
كوڕێ من پێشمه‌رگاتی بوو كارێ من!!
پێشمه‌رگه ئه‌و ناڤێ پیرۆز ل سه‌رده‌مه‌كی وه‌لێهاتبوو ئێدی پێشمه‌رگه‌ی شه‌رم دكر ل جهه‌كێ ده‌ما پرسیار ژێ دهاته كرن، كارێ ته چیه، یان تو چ كار دكه‌ی؟، شه‌رم دكر بێژیت: ئه‌ز پێشمه‌رگه‌مه!، چونكو پرانیا گه‌نجان و نفشێ نوو ب چاڤه‌كێ كێم به‌رێ خوه ددانه كه‌سێ پێشمه‌رگه و نه هه‌ر ب تنێ ئه‌ڤه ژی به‌لكو هه‌تا گه‌هشتیه ڕاده‌كێ پێشمه‌رگه ب كێر (كه‌فاله‌تێ) نه دهات و دیسا كه‌سه‌كی تشته‌ك ب(قست) نه ددایێ و هه‌تا گه‌هشتیه وێ ڕادێ ل ده‌مێ كه‌سه‌كێ پێشمه‌رگه چووبایه ماركێته‌كێ یان دوكانه‌كێ و گۆتبا هه‌تا سه‌رێ هه‌یڤێ خۆه ل من بگره، خودانێ دوكانێ دگۆتێ كارێ ته چیه؟ ل ده‌مێ دگۆت، ئه‌ز پێشمه‌رگه‌مه، خودانێ ماركێتێ یان دوكانێ تشت ب قه‌ر نه ددانێ، واته ب ڕاشكاوانه پێشمه‌رگه كه‌سه‌كێ نه‌حه‌ز ژێ كری بوو ل جه‌م گه‌له‌ك كه‌س و ده‌زگه‌هان، ئه‌ڤێ ژی بێزاریه‌ك ل جه‌م پێشمه‌رگه‌ی په‌یدا كربوو و ژ خوه ژیانا خوه بێزا ببوون، ببوونه پێتڕانكێن گه‌له‌ك كه‌سێن كو چ ژ بهایێ پێشمه‌رگه‌ی نه‌دزانی.
به‌ری په‌یدابوونا (داعشێ)، ئه‌ڤه بوو دۆخێ پێشمه‌ری، دبیت گه‌له‌ك بابان ب شانازی ڤه به‌حسێ شۆره‌ش و خه‌بات و چاڤنه‌ترسیا خوه و هه‌ڤالێن خوه یێن پێشمه‌رگه بۆ زارۆیێن خۆه كربیت، لێ زارۆیێن وان هه‌ر نه‌دزانی پێشمه‌رگه چیه و رێز ل خه‌باتا وی نه‌دگرت، چونكو ئه‌و نه‌خۆشیێن بابوباپیرێن وی تێدا بۆرین ئه‌و تێدا نه بووریه و وی خه‌بات و به‌رخودانا پێشمه‌رگه‌ی نه دیتبوو، نه‌دزانی پێشمه‌رگه بۆ چ خه‌بات و تێكۆشینێ دكه‌ت، نزانیت چ به‌رخودان و مالوێرانی و ده‌ربه‌ده‌ری باب و باپیرێن وی دیتیه هه‌تا ئه‌ڤرۆ ئه‌و سه‌ربه‌ست و ئازاد بژیت، چونكو ئه‌و هاتیه ل سه‌ر (سفره‌كا) به‌رهه‌ڤكری و نزانیت ب چ ره‌نج و زه‌حمه‌ت ئه‌و (سفره) هاتیه به‌رهه‌ڤكرن.
ل لایه‌كێ دیتر گه‌له‌ك لایه‌ن و نفشێ نوو هه‌بوون دگۆت: هه‌بوونا پێشمه‌رگه‌ی بارگرانیه بۆ حوكمه‌تێ و بزاڤ دكرن وێ هێزا نیشتیمانی ژناڤببه‌ن، رۆژانه ب ده‌هان نڤێسه‌ر و هه‌تا په‌رله‌مانتاران ژی نه‌رازیبوون دیاركرن ل سه‌ر هه‌بوونا پێشمه‌رگه‌ی و بزاڤا لاوازكرنا وان د دا ژ هه‌می لایه‌كی ڤه و بێی دلۆڤانی ب تمتمكا پێشمه‌رگه‌ی دا دا، ل سه‌ره‌رای كو مه‌هانه‌یێن پێشمه‌رگه‌ی ژ یێن هه‌می فه‌رمانبه‌رێن حوكمه‌تێ كێمتربوون، جاران ژی چه‌ند هه‌یڤان جاره‌كێ مهانه وه‌ردگرت، لێ پێشمه‌رگێن قاره‌مان هه‌ر بێ ئومێد نه‌بوون رۆژ ب رۆژ ب هێزتر و خورتر به‌ر ب ئه‌ركێن خوه دچوون، ژ لایه‌كێ دیڤه رژدی و به‌ره‌ڤانیا سه‌رۆك بارزانی و گۆتنا وی یا پیرۆز ئه‌ز پێشمه‌رگه‌مه ببوو رێگر د رێیا وان هه‌می نه‌حه‌زێن بزاڤ دكرن پێشمه‌رگه‌ی ژ ناڤ ببه‌ن و بێ نرخ بكه‌ن، چونكو دیتن و نێڕین و دووربینیا بارزانی، سه‌نگ و رێز و هه‌بوونا پێشمه‌رگه‌ی دزانی و دزانی ل هه‌ر ده‌ما پێشمه‌رگه هاته لاواز كرن و ژنافبرن، كوردستان دێ بیته پاریه‌كێ ب ساناهی بۆ دۆژمن و نه‌حه‌زێن نه‌ته‌وا كورد، له‌وما سه‌رۆك بارزانی ب هه‌می شیانێن خوه به‌ره‌ڤانی ژ مانا پێشمه‌رگه‌ی دكر، هه‌ر چه‌نده هێزا پێشمه‌رگه‌ی و پرچه‌كرنا وان نه د ئاستێ پێدڤی دابوو، به‌لێ هه‌ر خوه ل سه‌ر پێن خۆه گرت.
ئه‌ڤرۆ و پشتی په‌یدابوونا تیرۆرستێن داعشێ، ژنوو وان كه‌سان و هه‌تا نفشێ نوو ژی گرنگیا پێشمه‌رگه‌ی زانی و زانی و هه‌كه پێشمه‌رگه نه‌بایه، ئه‌ڤرۆ سه‌رێن مه ژی دا دبری بن و ژنێن مه دا (ساریه) بن و ل بازارێن سووری و عێراقێ و گه‌له‌ك وه‌لاتێن دیتر دا هێنه فرۆتن و زارۆیێن مه دا د ناڤ ده‌ستێن تیرۆرستێن داعشێ دا بنه كۆله، و مال و سامانێ مه ژی دایێ (ئه‌نفال) كری بیت و بیته پیره بۆ دۆژمنێن مه، لێ ب زه‌ند و باسكێن پێشمه‌رگه‌ی وگۆریكرنا وان ل به‌رۆكێن شه‌ڕی ئه‌ڤ مه‌ترسیه ل سه‌ر مه هاته لادان و ژ نوو زارۆیێن مه كارێ بابوباپیرێن خوه زانی چه‌ندێ پیرۆز و ژ هه‌ژی بوو، ژنوو زانی ل ده‌مێ بابێ وان دگۆت ئه‌ز پێشمه‌رگه‌مه، چه‌ند ئه‌و ناڤ ل به‌ر وان یێ شرین بوو، له‌وما نوكه زارۆیێن هه‌ر پێشمه‌رگه‌كێ قاره‌مان ل دۆر خڕڤه دبن و دبێژنێ باب بۆ مه به‌حسێ خوه و پێشمه‌رگاتیا خوه و داستان و قاره‌مانێن پێشمه‌رگه‌ی بكه، ئه‌ڤرۆ نه دادوه‌ر و نه خودانێ ماركێتی و نه پۆلیس و نه‌رێڤه‌به‌رێن حوكمه‌تێ، نابێژنه كه‌سێ پێشمه‌رگه تو ب كێر ڤی كاری ناهیێ یان ژی ئه‌م تشتان ب قه‌رز ناده‌ینه ته، ئه‌ڤرۆ هه‌می هیڤیخوازن كه‌سه‌كێ پێشمه‌رگه سه‌ره‌دانا وی و ئۆفیسا وی و ماركێتا وی بكه‌ت، چونكو ئه‌و ناڤێ پتر ژ نیڤ چه‌رخی ب پیرۆزی هاتیه راگرتن دێ هه‌ر رۆژ هه‌ر یێ پیرۆز و پربها بیت، ئه‌ڤرۆ باب دشێت ب سه‌ربلندی بێژیته كوڕێ خوه، كوڕێ من ئه‌ز پێشمه‌رگه‌مه و كاڕێ من یێ به‌رێ ژی هه‌ر پێشمه‌رگاتی بوو، بێی كو هه‌ست ب كێماسیه‌كێ بكه‌ت، به‌لكو كوڕ ژی یێ سه‌رفرازه كو بابێ وی پێشمه‌رگه‌یه.
د سێ رۆژێن بۆرى دا فرۆكان نێزيكى 25 كه‌سان ل تلكێف ژ داعش كوشتن
ئه‌ڤرۆ نيوز، نيوار محه‌مه‌د سه‌ليم:
ژێده‌ره‌كى ژ ناڤا هێزێن زێره‌ڤانى بۆ ئه‌ڤرۆ نيوز راگه‌هاند كو د دو هێرشێن ئه‌سمانى يێن رۆژێن ئێكشه‌مبى و سێشه‌مبى دا، فرۆكێن شه‌ركه‌رێن هه‌ڤپه‌يمانان نێزيكى 25 كه‌سان ژ داعش كوشتينه و باره‌گايه‌كێ داعش ژ ناڤ بريه و شه‌ش ترۆمبێل و دوشكه‌ك ژى ژ ناڤبرينه.
رائيده‌كێ هێزێن پێشمه‌رگه‌يى ل وانكێ گۆت: “ئێڤاريا رۆژا ئێكشه‌مبى 23\11، فرۆكێن شه‌ركه‌رێن هه‌ڤپه‌يمانان دو سێ مۆلگێن داعش ل گۆندێ كه‌رسێ تۆپبارانكرن و تێدا 9 چه‌كدارێن داعش كوشتينه و هژماره‌كا كه‌سان ژى بريندار كرينه و ل گه‌ل ژناڤبرنا سێ ترۆمبێلان كو ئێك ژ وان دوشك ژى ل سه‌ر بوو”.
ئه‌ڤى رائيدى زێده‌تر گۆت: “ئه‌ڤرۆ ژى به‌رى ده‌مه‌كێ كێم فرۆكێن جه‌نگى كه‌ره‌سا رۆژئاڤا ژى يا تۆپبارانكرى و ب گۆره‌ى زانياريێن ده‌سپێكى، 15 كه‌س هاتينه كوشتن و باره‌گايه‌كێ وان ب تمامى ژ ناڤبريه و ل گه‌ل سۆتنا سێ ترۆمبێلان ژى”.
ئاماژه ب وێ چه‌ندێ ژى كر كو ئه‌ڤرۆ فرۆكێن شه‌ركه‌رێن هه‌ڤپه‌يمانان زێده‌ترى هه‌موو رۆژان يێن ل وان ده‌ڤه‌ران هاتنووچوونێ دكه‌ن و ئه‌گه‌رێ وان لڤينێن فرۆكان ژى نه‌زانى كا مه‌ره‌ما وان چيه.
هه‌رێم دێ كه‌ڤيته به‌ر پێله‌كا دى يا باران بارينێ
ئه‌ڤرۆ نيوز:
رێڤه‌به‌ريا گشتيا كه‌شناسيا هه‌رێمێ كوردستانێ راگه‌هاند كو ژ ئه‌نجامێ چوونا پاله‌په‌ستوويێن بلندێن وه‌لاتێ توركيا، هه‌رێم دێ كه‌ڤيته ژێر پاله‌په‌ستويێن ده‌ريا ناڤه‌راست و ب ڤێ چه‌ندێ ژى دهێته پێشبينكرن پێله‌كا باران بارينێ هه‌رێمێ ڤه‌گريت و هه‌تا 28\11\2014 يا به‌رده‌وام بيت.
پشكا پێشبينيا ل رێڤه‌به‌ريا گشتيا كه‌شناسيا هه‌رێمێ كوردستانێ دياركر كو سوبه‌هى رۆژا چارشه‌مبى رێكه‌فتى 26\11\2014 پشتى ڤه‌كێشان و لاوازبوونا پاله‌په‌ستويێن بلندێن وه‌لاتێ توركيا ل سه‌ر هه‌رێما كوردستانێ، هه‌رێم دێ كه‌ڤيته ژێر كارتێكرنا پاله‌په‌ستويێن نزمێن ده‌ريا ناڤه‌راست د ده‌مێ ئێڤارى دا.
پشكا پێشبينا دا زانين ژى كو ژ به‌ر وێ چه‌ندێ پێشبينى دهێته كرن ل هه‌رێما كوردستانێ باران ب باريت و ل ده‌مێ باران بارينێ ژى دێ له‌زاتيا بايى زێده بيت و پلا گه‌رماتيێ ژى دێ نزم بيت.
ل دۆر ماوێ ڤێ پێلێ ژى، پشكا پێشبينيا ل رێڤه‌به‌ريا گشتيا كه‌شناسيا هه‌رێمێ كوردستانێ، ئاشكه‌را كر كو ئه‌ڤ پێله دێ هه‌تا 27 و 28\11\2014 ب ره‌نگه‌كێ لاواز مينيت.
داخۆيانيێن جۆ بايدن بزاڤێن عه‌ره‌بان بۆ ژناڤبرنا داعش سست كرن
ئه‌ڤرۆ نيوز، ناجی به‌ده‌ل:
مامۆستايه‌كێ زانكۆيا دهۆك دياركر كو داخۆيانێن جۆ بايدن بووينه ئه‌گه‌رێ لاوازيا هه‌لويستێ عه‌ره‌بان ل دژى داعش و پشته‌ڤانيكرنا كۆبانێ ژى ژ لايێ كوردان ڤه كو نه وه‌لات نينه و شيانێن وێ گه‌له‌ك ل دژى داعش ب هزێن عه‌ره‌ب نه‌ره‌حه‌ت كرينه.
د. فه‌رسه‌ت مه‌رعی مامۆستایێ زانكۆیا دهۆك بۆ ئه‌ڤرۆ نیوز گۆت: “ده‌وله‌تێن عه‌ره‌بى د ناڤا هه‌ڤپه‌يمانيان نێڤده‌وله‌تى دا وه‌كو سعوديه و ئيمارت هه‌ر ژ ده‌سپێكێ وه‌ره ب فرۆكێن جه‌نگى شه‌ر ل دژى داعش كريه، به‌لێ پشتى داخۆيانيا جۆ بايدن ئه‌وا گۆتى كو وه‌لاتێن عه‌ره‌بى ل گه‌ل توركيا هه‌ڤكاريا داعش دكه‌ن سستيه‌ك خستيه كارێ وان”.
مامۆستايێ زانكۆيا دهۆك زێده‌تر گۆت: “ئه‌ڤ داعش يا نوكه دروست بوويى، ژ ناڤ عه‌ره‌بان رابوويه و ل گه‌ل وه‌لاتێن عه‌ره‌بى ژى سه‌رهلدايه و نوكه هه‌ر ئێك مژوولى خوه‌يه، ئه‌ڤێن ئاماده هاريكاريێ ژى بكه‌ن، ژ ئه‌گه‌رێ مژووليا وان ب ئاواران ڤه نه‌شياينه وه‌كو پێدڤى هاريكاريا سه‌ريازى پێش كێش بكه‌ن”.
نه‌ڤه‌شارت ژى كو ئێكنه‌بوونا عه‌ره‌بان ب خوه دبيته ئه‌گه‌ره‌كێ دى يێ كو نه‌شێن هاريكاريێن باش د هه‌ڤپه‌يمانيا نێڤده‌وله‌تى دا ل دژى داعش بكه‌ن.
ل دووماهيێ ژى دا زانين كو پشكدارينه‌كرنا عه‌ره‌بان بوويه ئه‌گه‌ر رێ ب فرۆكێن عه‌ره‌بى نه‌هێته دان ل داعش بده‌ن و گۆت: “چوونا پێشمه‌رگه‌ى بۆ كۆبانێ ژى هه‌تا راده‌كى ئه‌و نه‌رحه‌ت كرينه كو هێزه‌كا كاريگه‌ر پتر ژ ده‌وله‌ته‌كێ بشێت به‌رهنگاريا تيرۆرێ بگريت، ئه‌ڤه ژى بۆ ده‌وله‌تێن عه‌ره‌بى يا نه‌خۆشه”.
ئاوارێن كه‌فتينه د ده‌ريايى دا بۆ توركيا هاتنه ڤه‌گه‌راندن
ئه‌ڤرۆ نيوز:
ده‌سته‌لاتا توركيا و قوبرس ده‌ست ب ڤه‌گه‌راندنا ئاوارێن سورى و عيراقى و فه‌لستينى يێن شه‌رعى كر بۆ توركيا كو نێزێكى 300 كه‌سانه ل سه‌ر گه‌ميه‌كێ بوو ل گيرنه يا قوبرسى هاتبوو ده‌ست ب سه‌ر دا گرتن.
ب گۆره‌يى ژێده‌رێن ئێمناهيێ ئه‌ڤ گه‌ميه ل تنزانيا ژ مێرسينێ به‌ر ب ئێك ژ وه‌لاتيێن ئه‌ورۆپى چيت، به‌لێ ژ ئه‌گه‌رێ پێلێن ده‌ريايى كه‌فته به‌ر كنارێن وى ده‌ريايى كو 220 زه‌لام و 40 ژن و 30 زارۆ تێدا بوون و بزاڤ دكرن بگه‌هنه كنارێن ئيتاليا.
ب گۆره‌ى چالاكڤانه‌كێ كو پێشتر بۆ ئه‌ڤرۆ نيوز دياركرى پتريا ئه‌ڤ كه‌سێن د ناڤا ڤێ گه‌ميێ دا كوردێن ئاواره بوون يێ شنگال و رۆژئاڤا كو دڤيا خوه بگه‌هيننه كنارێن ئياليا.
هه‌ر ب گۆره‌يى ڤى ژێده‌رێ ب ناڤێ سه‌عيد شنگالى چالاكڤان ل ئه‌لمانيا كو به‌رى نوكه بۆ ئه‌ڤرۆ نيوز دايه زانين شه‌ش زارۆيێن كورد د ڤێ گه‌ميێ دا ببوونه قوربان.
دێ سزايێن له‌شفرۆشان تۆندتر لێ هێن
ئەڤرۆ:
لژنا کاروبارێن جڤاکی ل پەرلەمانێ کوردستانێ دوھی 24\11\2014 گەنگەشە ل سەر ھەردو وان پرۆژە قانوونان کر یێن بۆ بەرھنگاربوونا لەشفرۆشیێ ل کوردستانێ پێشکێشی پەرلەمانی کرین.
ل دووڤ راگەھاندنەکا مالپەرێ پەرلەمانێ کوردستانێ، لژنا کاروبارێن جڤاکی ناڤەرۆکا وان پرۆژە قانوونان و ئەو کارێ وان د ڤی بیاڤی دا کری وەکو راپۆرت دێ دەنە سەرۆکاتیا پەرلەمانی داکو گەنگەشا پرۆژە قانوونێ بچیتە د ناڤ بەرنامێ کاری دا، ئێک ژ پرۆژان راستڤەکرنا قانوونا کەڤنە و یێ دویێ پرۆژەکێ نوویە.
ل دووڤ پرۆژە قانوونەکێ ژ وان ھەردویان کو ل مالپەرێ پەرلەمانی ھاتیە بەلاڤ کرن ل ھندەک حالەتان سزا دگەھیتە ١٥ سالان زیندان کرن، ل ھندەک حالەتان ژی سزا دگەھیتە پێنج ملیۆن دیناران غرامە کرن، ل دووڤ ڤان پرۆژە قانوونان سزا توند تر لێ ھاتیە ب تایبەت پشتی حالەتێن دەستدرێژیێن سیکسی زێدەبووین.
نيشاندان
WP Facebook Auto Publish Powered By : XYZScripts.com