ئه‌ڤرۆ نيوز:
ئاهه‌نگا به‌لاڤكرنا دياريێن ميوزكى ل ئه‌مريكا ژبلى وێ هه‌لكه‌فتنێ ببوو جهێ نيشادانا جلكان كو ئه‌ڤ هۆنه‌رمه‌نده ب جلێن نوو و گه‌له‌ك سه‌رنجراكێش ئاماده ببوون و يێن گه‌يه‌ك ديار نه ژى ب وان جلكان گه‌له‌ك به‌رچاڤ ببوون.
ژ وان ستێرێن ناڤدارێن پشكدار بووين جنيفێر لۆپێز و هه‌موو ئه‌ندامێن تيپا وان دايرێكشن و سيرينا ويليه‌مز و گه‌له‌ك ستێرێن دى.
ئه‌ڤرۆ نيوز:
رێڤه‌به‌ريا گشتيا كه‌شناسيێ و بيڤه‌له‌رزێ ل هه‌رێما كوردستانێ راگه‌هاند كو د ماوێ 24 ده‌مژمێرێن بۆرى دا ل هه‌رێما كوردستانێ ژ ئه‌نجامێ كه‌فتنه به‌ر شه‌پۆلێن بلند و نزم يێن باران بارينێ رێژه‌كا زێده يا بارانێ ل هنده‌ك ده‌ڤه‌ران باريه، ب ڤى ره‌نگێ ل خوارێ زێده‌تر رۆهن دبيت:
رێژێن باران بارينێ ل هه‌رێمێ ب ڤى ره‌نگى نه:
دهۆك 0.2 ملم، رێژا گشتى 198 ملم.
زاخۆ 3.3 ملم، رێژا گشتى 209.3 ملم.
ئاكرێ نه‌هاتيه تۆماركرن، رێژا گشتى 260.4 ملم.
مانگێشك 0.4 ملم، رێژا گشتى 243.8 ملم.
بامه‌رنێ 0.4 ملم، رێژا گشتى 288.8 ملم.
هه‌ولێر 0.3 ملم، رێژا گشتى 110.3 ملم.
پيرمام چپ چپ يا بارى، رێژا گشتى 253.3 ملم.
سۆران نه‌هاتيه تۆماركرن، رێژا گشتى 300.4 ملم.
خه‌بات 0.2 ملم، رێژا گشتى 123 ملم.
سلێمانيێ نه‌هاتيه تۆماركرن، رێژا گشتى 175 پله.
هه‌له‌بچه نه‌هاتيه تۆماركرن، رێژا گشتى 188.2 پله.
كه‌ركووك نه‌هاتيه تۆماركرن، رێژا گشتى 87.9 پله.
ئەڤرۆ
دیندار نەجمان دوسکی ئەندامێ سەرکردایەتیا ئێکگرتوویا ئیسلامیا کوردستانێ و ئێک ژ دامەزرێنەرێن وێ پارتیێ بۆ رۆژناما ئه‌ڤرۆ دیار کر کو کێشە د ناڤخویا ئێکگرتوو دا یێن ھەین ب تایبەتی ژی پشتی پشکداریکرنا د حکوومەتێ دا و ھەروەسا ل دور ھندەک ستراتیژیەتێن ئێکگرتوو و گۆت: “تێبینیێن مە وەکو ئێکگرتوویێن دەڤەرا بەھدینان بتنێ ل سەر چاوانیا پارڤەکرنا پۆستان نینە، ھەرچەندە د پارڤەکرنا پۆستان دا غەدرەکا مەزن یا ل دەڤەرا بەھدینان و ھەولێرێ ھاتیە کرن، ھەکە ئەم بکەینە زونا زەر و زونا کەسک مە وەکو بەھدینان و ھەولێری ھەستێ ب مەغدوریەتێ کری، لێ ژ بەر ئێکرێزیا حزبێ و کاودانێن کوردستانێ و عیراقێ مە خو لێ بێدەنگ کریە”.
د بەردەوامیا ئاخفتنێن خو دا دیندار نەجمان گۆت: “مەعقول نینە تو ل دھۆکێ ٣٠ ھزار دەنگان زێدەکەی و ل سلێمانیێ ٣٠ ھزار ھاتبنە کێمکرن یان ل ھەولێرێ ٢٠ ھزار ھاتبنە کێمکرن و ئەو بچن ببنە وەزیر. ئەڤە یا بوویە کێشەیەک و ھژیانەک یا کەفتیە د ناڤ حزبێ دا. مەعقول نینە ھەتا نوکە ١٠ وەزیر ل وێرێ ھاتبنە دانان و ئێک بتنێ ل دەڤەرا بەھدینان”.
د پشکەکا دی یا ئاخفتنێن خو دا دیندار نەجمان گۆت: “ب نێرینا مە وەکو سەرکردێن دەڤەرا بەھدینان و ھەتا رادەیەکی برادەرێن ھەولێرێ ژی ل گەل مەنە کو د سیاسەتێن ئێکگرتوو دا پتر دەڤەرا کەسک یا ل بەر چاڤ ھاتیە وەرگرتن و پتر رەوشا سیاسیا ل سلێمانیێ بەرچاڤ دھێتە گرتن و ل سەر وی بنەمایی سیاسەتێن ئێکگرتوو دھێنە دارشتن و ئەم ب ڤێ چەندێ د رازی نینین و ئێکگرتوویێن بەھدینان باجا ڤان شاشیان یا دای. لەوما پێدڤیە دەمێ سیاسەتێن حزبێ دھێنە دانان دو دەڤەریا کوردستانێ ل بەرچاڤ بھێتە وەرگرتن ژ بەر کو ھەتا نوکە ژی ژلایێ واقعی ڤە ئیدارا زەر و کەسک یا ھەی”.
ل دور چاوانیا ئازراندنا ڤی بابەتی دیندار نەجمان گۆت: “دەمێ ئەز بوویمە وەزیر د کابینا بۆریا حکوومەتا عیراقێ دا ئەڤ بابەتە ھاتە ئازراندن و د وی دەمی دا ٧ پۆستێن وەزارەتان بۆ دەڤەرا سلێمانیێ چ بوون و شنی ئێک دا بۆ بەھدینان بیت کرە کێشە و ئەم گونەھبار کرین کو ئەم یێ دەڤەرگێریێ دکەین، لێ مە د گۆت کو پێدڤیە حزبێ ھندەک پیڤەر ھەبن بۆ پارڤەکرنا پۆستان، لێ برادەرێن دی د رازی نەبوون ل سەر ڤێ چەندێ و دەمێ د بوو دەنگدان ژی ھەر وان دەنگێن پتر دبرن. بەری کونگرێ شەشێ سەرکردایەتیا دەڤەرا بەھدینان پێشنیاز کر کو سەرکردایەتیێن دەڤەرا بھێنە دروستکرن ژ بۆ کو لامەرکەزیەتەک دروست ب بیت و پتر ژی ژ بۆ ھندێ بوو کو ئەم وەکو دەڤەرا بەھدینان ھەست بکەین کو مە ژی رۆل د دروستکرنا بریارێ دا یێ ھەی، ئەم د ڤێ چەندێ دا د سەرکەفتی بووین و ئەم شیاین وێ چەندێ پەسەند بکەین کو بریارێن د ناڤ ئێکگرتوو دا دھێنە دان پێدڤیە ٢/٣ یا ئەندامێن سەرکردایەتیێ دەنگی ل سەر بدەن و ئەڤە بۆ وێ چەندێ بوو کو ئەم بشێین رێژەیەکا کاریگەر دروست بکەین و کاریگەریێ ل سەر بریارێن ستراتیژی دروست بکەین”.
دیندار نەجمان بەحسێ وێ یەکێ ژی کر کو وان وەکو سەرکردایەتیا ئێکگرتوو تێبینی ل سەر دیتن و ستراتیژیەتێن حزبێ ژی یێن ھەین و ل دور ڤێ چەندێ گۆت: “مەرجەعیەتا حزبا مە ئیسلامی یە و رەوشا رۆژھەلاتا ناڤەراست کارتێکرن یا ل حزبا مە کری و د بابەتێ گرێدانا دەعوێ و سیاسەتێ پێکڤە مە تێبینی یێن ل سەر ھەین و ئەم دبینین حزب یا د قەیرانەکێ دا و ناکوکیێن مە وەکو دەڤەرا بەھدینان ل گەل سەرکردایەتیا حزبێ ئەوە کو چاکسازیەک د ناڤ حزبێ دا بھێتە کرن و ھەروەسا ل سەر وێ چەندێ ب راوەستن کا بۆچی ٣٠ ھزار دەنگێن ئێکگرتوو ل سلێمانی کێم بووینە و ھەروەسا ل ھەولێرێ ژی کێم بووینە”.
بۆ چارەسەرکرنا ئاریشێن د ناڤ ئێکگرتوو دا سەرکردێن دەڤەرا بەھدینان داخواز کریە کونگرێ ئێکگرتوو زووتر بھێتە گرێدان، ل دور وێ یەکێ کا مەرەم ب گرێدانا کونگرەی گوھارتنا ئەمیندارێ گشتی یە ب تایبەتی ژی کو د تورێن کومەلایەتی دا داخوازا گوھارتنا وی دھاتە کرن، دیندار نەجمان گۆت: “مەبەست ب ئینانە پێشا کونگرێ گوھارتنا ئەمیندارێ گشتی نینە، ھەر چەندە ئێک ژ ئەنجامێن کونگرەی ئەوە کا بھێتە گوھۆرین یان نە و ھەروەسا کا ل کیرێ ئەمیندارێ نوو بھێتە ھەلبژارتن کا ئایا راستەوخو ژلایێ ئەندامێن کونگرەی ڤە بھێتە ھەلبژارتن یان ژی سەرکردایەتیا ئێکگرتوو وی ب ھەلبژێریت و ئەم ل گەل وێ چەندێ ینە کو سەرکردایەتی ئەمینداری ب ھەلبژێریت”.
دیندار نەجمان ئاماژە ب وێ چەندێ کر کو ئێکگرتوویێن دەڤەرا بەھدینان بۆ ماوێ دو حەفتیان ژ حزبێ ھاتبوونە دابران ژ بۆ کو بەرسڤەک بۆ داخوازێن دەڤەرا بەھدینان ھەبیت.
ل دور وێ چەندێ کا دشیاندایە د کومبوونێن بھێت یێن سەرکردایەتیا ئێکگرتوو دا ئەڤ ئاریشە بھێنە چارەسەر کرن، دیندار نەجمان گۆت: “ئەم د گەشبینین کو گەلەک ژ ڤان ئاریشان بھێنە چارەسەرکرن و ھەکە ئەم ھندەک پیڤەرێن قانوونی و دروست بۆ خوە نەدانین کو ئەڤ کێشە پێ بھێنە چارەسەرکرن بۆ پاشەرۆژا ئێکگرتوو خرابە و مەترسی دێ ل سەر ئێک پارچەییا ئێکگرتوویێ دروست بن”.
تە بەحسێ ئێک پارچەییا ئێکگرتوو کر، ئانکو رەنگە ئێکگرتوویێن بەھدینان خو ژ وێ حزبێ جودا کەن، د بەرسڤا ڤێ پرسیارێ دا دیندار نەجمان گۆت: “ئەز ڤێ چەندێ ب دوور نزانم، ژ بەر کو وەختێ ئێکگرتوو دروست ژی بووی ئەم وەکو دەڤەر بەھدینان د ئێک رێز بووین و مە ئێک سەرکردایەتی ھەبوو و ئەم وەکو دەڤەر چووینە د گەل ئێکگرتوو دا و کەس نەھاتیە ڤێرێ ئەم کرینە ئێکگرتوو بەلکو ژ قەنیدلی ھەتا زاخو ئەم ئێک میحوەر بووین و ئەم پێکڤە یێن گەھشتینە ئێکگرتوو”.
ل دور وێ یەکێ ھەکە ئێکگرتوویێن بەھدینان جودا ب بن دێ حزبەکا نوو ئاڤا کەن یان ژی ھەتا نوکە چ ھەلبژارتن ل بەر دەستێ وانە، دیندار نەجمان گۆت: “ئێک ژ ھەلبژارتنان ئەوە کو ھەر وەک ئێکگرتوو ب مینین، یا دی ژی ھێزێن دی یێن ئیسلامی یێن ل دەڤەرێ ھەین و رەنگە ئەم بچین ل گەل وان ھەمئاھەنگیێ بکەین وەکو کومەلێ، یان ژی ببنە حزبەکا جودا و ھندەک بیر و بۆچوون ل دەڤەرا بەھدینان یێن ھەین کو سیاسەتێ کاریگەری یا ل رێکا دەعوێ گرتی و ئەم ببیە جەماعەتەکا دەعوی. ئێک ژ ھەلبژارتنان ئەوە رەنگە ل گەل ھندەک حزبێن نەتەوەی مە ھەڤپشکی ھەبن و بگەھینە ئێک. ل دووماھیێ دی ل سەر سەرکردێن ئێکگرتوو یێن دھۆکێ مینیت کا ئەو ل گەل قاعیدێ دێ گەھنە چ ئەنجامان. د ناڤ سەرکردایەتیا بەھدینان دا دانوستاندن ل سەر ڤان ھەموو بژاران ھاتیە کرن”.
تو ئێک ژ دامەزرێنەرێن ئێکگرتووی ل دھۆکێ، ئایا تو سەرپەرشتیا ڤی بەرەیێ بەھدینان دکەی، د بەرسڤا ڤێ پرسیارێ دا دیندار نەجمان گۆت: “ئەز رە سپیەکێ وامە و ئەز ئێک ژ دامەرێنەرێن ئێکگرتوومە ل دھۆکێ و بەھدینان برادەر ب چاڤێ رێزێ بەرێخودەنە من، لێ بریار ب جەماعی دھێنە دان”.
د پشەکا دی یا ئاخفتنێن خو دا دیندار نەجمان گۆت: “ماموستا سەلاحەدین بەھائەدین ئێک ژ دامەزرێنەرێن ئێکگرتوو بوو لەوما خودان کارێزمایەتیا خو بوو، لێ دەمێ وی خو ڤەکێشای ژ پۆستێ ئەمیندارێ گشتی مە وەسا ھزر کر کو برادەرەکێ دی دێ ھێت و تاکرەوی د ناڤ حزبێ دا نامینیت و دەزگەھێن حزبێ یێن وەکو مەکتەبا سیاسی و سەرکردایەتی دێ ھێنە ئەکتیڤ کرن، لێ مخابن ھەر وەکو بەرێ یە مەکتەبا سیاسی و سەرکردایەتی نەشیاینە رۆلەکێ وەسا ببینن کو ئێکگرتوویێ بکەنە حزبەکا موئەسساتی کو دەزگەە رۆلێ خو ببینن نەک کو بریار ل دووڤ میزاجێ تاکە کەسان بھێنە دان”.
ئێک ژ گازندێن ھندەک ئەندام و لایەنگرێن ئێکگرتوو ئەو بوو کو ئێکگرتوو ل دەمێ دامەزراندنێ پتر بەحسێ دەعوێ و ئیسلاحا کومەلگەھێ دکر، لێ نوکە سەرکردایەتیا حزبێ پتر ب پۆستا ڤە مژیلە و دەعوە و ئیسلاح یێن ژبیرکرین، د بەرسڤا ڤێ چەندێ دا دیندار نەجمان گۆت: “مە ژبیر نەکریە، لێ خەمساریەک و نەسەرکەفتنەک ب لایەنێ پەروەردەی و دەعوێ ڤە یا دیارە، ھەر چەندە مە بزاڤکرن کو ئەم ھەڤسەنگیەکێ د کارێ دەعوێ و سیاسەتێ دا بکەین لێ ئەم سەرنەکفتین ژ بەر کو ئەم گەلەک ب کارێ حزبێ ڤە د مژیلین و رەنگە مە د ھەر دویان دا شکەستن ئینا بیت، ژ بەر کو نە مە ئەو کەسێ سیاسی یێ سەرکەفتی دروستکر نەژی ئەو لیدەرێ دەعوی یێ سەرکەفتی و ئەڤە پێدڤی ب دوڤچوونێ یە”.
ل دور وێ چەندێ کا ژێڤەکرنا پاشگرێ ئیسلامی و جوداکرنا دەعوێ و سیاسەتێ د چارچوڤێ وان پێشنیاران دانە یێن کو وان ب مەرەما چاکسازیێ پێشکێشی سەرکردایەتیێ کرین، دیندار نەجمان گۆت: “ل دەف من ب خو نەمانا پاشگرێ ئیسلامی باشترە ژ مانا وی، ژ بەر کو مللەتێ کورد پرانی موسلمانە و فەتوایێن ھەین کو پاشگرێ ئیسلامی ب حزبان ڤە دروست نینە و سەیدا محسن عەبدولحەمید ژی دبێژیت دروست نینە و د مالپەرێ خو دا بەلاڤکریە، ژ بەر کو ئیسلام وەکو دین یێ ھەر کەسەکی یە و ھەموو کەس بەرەڤانیێ ژ بەھایێن دینی دکەن و مە گەلەک تشت یێن ھەین ھەموو کەس بەرەڤانیێ ژێ دکەن و چێ نابیت ببیتە یێ حزبەکێ بتنێ”.
ل ھەرێما کوردستانێ ھەر سێ حزبێن ئیسلامی “کومەلا ئیسلامی، ئێکگتروو و بزوتنەوێ” پێکڤە ل دەوروبەرێن ١٥% ژ دەنگێن خەلکێ ھەرێمێ دئینن، تو نابینی کو حزبێن ئیسلامی د مەیدانا سیاسیا کوردستانێ نەشیاینە سەرکەفتنێ بینن، ل دور ڤێ چەندێ دیندار نەجمان گۆت: “راستە، ھەر حزبەکا ئایدولوژیەکا تایبەت ھەبیت ئەڤ کێشە یا ھەی، ژ بەر کو حزبێن ڤەکری نینن و خەلکێ دچیتە د ناڤ دا دڤێت د تایبەت بن، لەوما رێژا رەوتا ئیسلامی ژ %١٠ ھەتا ١٥% یە و ھەتا ٢٠ سالێن دی ژی کا دێ بینە ٢٠% یان نە و پێدڤیە ئەم چاڤخشاندنەکێ د ڤێ چەندێ دا بکەین و حزبێن خو پتر ڤەکری بھێلین کو جھێ خەلکێ دی ژی تێدا بیت”.
ئەڤرۆ:
پشتی دیار نەمانا ھەردو قوتابیان “عومەر عەبدولجەبار حەسەن” ژ کۆلیژا کارگێری و ئابووری قووناغا سیێ و “دیار فائق محەمەد ئەحمەد”، ژ کۆلیژا دارایی بانک قووناغا چارێ ل زانکۆیا دھۆک بۆ دەمێ ٩ رۆژان، دھێتە گۆتن کو گەھشتینە چەکدارێن داعش، لێ بابێن ھەردو قوتابیان ئەڤێ چەندی رەت دکەن.
عەبدولجەبار حەسەن ئاکنجیێ قەزا بەردەڕەش، بابێ قوتابی عومەرێ تەمەن 22 سالە بۆ ئەڤرۆ دیار کر کو ل ئێڤاریا رۆژا ئێک شەمبی 16\11\2014 عومەر ژ بەردەڕەش دەرکەفتیە و چوویە دھۆکێ کو ل پشکا ناڤخۆیی ل گەل ھەڤالێ خوە دیاری د ئێک ژوورڤە بوون و ژ وێ رۆژێ وەرە بێ سەروشوونە و گۆت “من ھای ژ بەرزەبوونا کوڕێ خوە نەبوو، ھەتا رۆژا چارشەمبی 19\11 دایکا وی گۆت ئەم تەلەفونێ بۆ عومەری دکەین داخراوەیە. و ھەر ل وێ دەمی من ژی تەلەفون کر داخراوە بوو”.
بابێ عومەری خویا کر ژی کو وی ھزر کر عومەری تەلەفونا خوە یا ل جھەکێ ھێلای، لەورا تەلەفون بۆ دیارێ ھەڤالێ وی کر، لێ تەلەفونا وی ژی داخراوە بوو و ژ نوو ترسیا و تەلەفون بۆ بابێ دیاری کر، ئەوی گۆت “مە چ پەیوەندی ب دیاری نەکریە و مە تەلەفون ژی بۆ نەکریە” و گۆت “بۆ رۆژا 20\11 ئەم ھاتینە دھۆکێ و ل زانکۆیێ ئەز و مامۆستایێن عومەری پێکڤە روونشتین بۆ مە دیار بوو کو ئەوانا ژ رۆژا 16 ھەیڤێ وەرە پەیوەندی ب دەوامێ نەکریە و چ پێزانینێن دی ل سەر وان نەبوون، پاشی ھندەک قوتابیێن ھەڤالێن عومەر و دیاری پەسنا ھەردویان کر کو دو قوتابیێن خودان رەوشت و ئارام بوون”.
عەبدولجەباری دیار کر ژی کو عومەرێ کورێ وی چ ئاریشێن دەروونی نەبوون و رۆژەکێ ژی چ ئاریشە دگەل کەسێ نەبوون و گۆت “تاکە ئاریشا کوڕێ من سالا چوویی ب 3 وانەیان کەفتبوو و ل خولا دویێ ژی ھەر کەفت و ئەو گەلەک بێ تاقەت ببوو”.
بابێ عومەری سەبارەت بەلاڤبوونا چوونا کورێ وی بۆ ناڤ رێزێن داعش گۆت “نابیت کەس ژ دەف خوە تۆمەتان دروست بکەت ب تایبەتی د ناڤ زانکۆیی دا، چونکی زانکۆ جھێ زانست و زانینێ یە و من ب رێیا رۆژناما ئەڤرۆ ھای ژ وی دەنگوباسێ بوو و ئەز داخوازێ ژ ھەمی وەلاتی و سازیێن ئەمنی دکەم ھەکە پێزانین ل سەر کوڕێن مە دیار و عومەری زانین بلا بێژنە مە”.
عەبدوجەباری گۆتژی ئەم وەکی خیزانین وان 2 قوتابیان سوپاسیا ئەوی کەسی دکەین کو پیزانین راست و ب بەلگە بداتە دەستگەھێن ئاسایشی لسەر کوڕێن مە.
فائق محەمەد ئەحمەد بابێ قوتابی دیار بۆ ئەڤرۆ تەکەز ل سەر ھەمان ئاخافتنێن عەبدوجەباری کر و گۆت “مە چ پێزانین ل سەر کورێن خوە نینن و وەک مالبات مە ھایداری سازیێن ئەمنی کریە و ھەتا خالا سنووریا ئیراھیم خەلیل ئەم چووینە ناڤێن وان نینن و بۆ زانین ئەو ھەردو ژی دبێ پاسپۆرتن.
بۆ پتر پێزانینان ل سەر ئەڤێ پرسێ ئەڤرۆ پەیوەندی ب سازیێن ئاسایشێ کر، لێ وانا بێ ئاگەھیا خوە دیار کر ل ھەمبەری بەرزەبوونا وان گەنجان و ھەتا نوکەژی جھێ وان نەدیارە.
ئه‌ڤرۆنیۆز، هه‌رهین محه‌مه‌د:
ئه‌یوب ئه‌حمه‌د عه‌لى وه‌لاتیه‌كێ باژێرێ دهوكێ یه ل تاخێ (خه‌بات)دژیت بۆ ماوێ پازده ساله دیوارێن مالاخوه ب وینه‌و پوسته‌رێن سه‌روك مسعود بارزانى خه‌ملاندینه، هه‌روه‌سا به‌رده‌وام ژكیسێ خوه مه‌دالیان وینێن مسعود بارزانى دكریت ول سه‌رخه‌لكى به‌لاڤ دكه‌ت، ناڤێ كورێ خوه كریه(سیداد) مالا بابێ وه ژبنه‌ماله‌كا كورد په‌روه‌رن ناڤێن براێن وى ژی (مسعود، ادریس ،نێچیرڤان، مسته‌فا) ددیداره‌كێ دا بۆ ئه‌ڤرۆنیۆز دیاركركو كومكرنا وینه‌ێن سه‌روك مسعودبارزانى وه‌ك ئارازویه‌كێ یه بۆمن نه‌شێم ڤى كارى بهێلم وئه‌گه‌ر بزانم وینه‌كێ سه‌روكى یێ نو ل كیش جهى هه‌بیت دێ كرم، گه‌له‌ك جاران زاروێن من وینا درین هه‌ڤژینا من وى وینه‌ى جاره‌كادى له‌سقه دكه‌ته‌یان ژی ئێكێ دى دانته شوینا وى .
هه‌روه‌سائه‌یوبى گۆتژى: خه‌ونامن ئه‌وه وینه‌كى دگه‌ل سه‌روك بارزانى بگرم وه‌ك بیرهاتن ب ژورا خوه ڤه‌كه‌م گه‌له‌ك گه‌نج ترانا ب من دكه‌ن ودبێژنه‌من هیشتا ته وینه دگه‌ل سه‌روكى نه‌گرتیه كه‌سێ هاشته‌نینه
هه‌روه‌سا گۆت : هه‌تا دورێن (5000) وینه‌ێن سه‌روكى من كوم كرینه هه‌روه‌سا پترژ بیست كاستێن ڤیدیویێ گرێداى ب كاروچالكی وسه‌ره‌دانێن سه‌روك بارزانى توماركرینه وب ده‌ست خوه ڤه ئیناینه، گۆت:گه‌له‌ك كه‌س هه‌نه دهێنه مالامن ب خوه وینه‌یان دگرن مالامن وه‌ك ستودیویه‌كێ لێ هاتیه.
ئه‌ڤرۆ نیوز:زنار توڤى:
هونه‌رمه‌ندا كورد هێلى لوڤ كو بو ماوه‌یه‌كێ كورت شیا ناڤ و ده‌نگیا خوه ل جیهانێ به‌لاڤه بكه‌ت،ب هونه‌ر و لڤینێن خوه شیایه سه‌رنجا گه‌له‌ك ژ خه‌لكێ جیهانێ بو خوه رابكێشیت،ناڤبریێ د په‌یجێ خوه یێ تایبه‌تدا دیاركریه:كو هه‌رده‌م پشته‌ڤانى ل كوردستانێ كریه،هه‌رده‌م ڤیایه وه‌كى شه‌رڤانه‌كا چه‌له‌نگ به‌ره‌ڤانیێ ژێ بكه‌ت،هه‌روه‌سا گه‌له‌ك حه‌ز ئالایێ كوردستانێ دكه‌ت و هیڤیا وێ یه،كو هه‌ر جه و وه‌لاته‌كێ بچیتێ و ئاهه‌نگا لێ بگێریت،ئالایێ كوردستانێ بلند بهه‌ژینیت،دیاردكه‌ت ژى:ئومێدا من ئه‌وه هه‌رده‌م ئه‌ز خزمه‌تا گه‌لێ خوه بكه‌م و هه‌رده‌م كوردستان د دلێ مندا یه،من گه‌له‌ك هاریكاریا ئاواره‌یان كریه و خه‌ما وان ب خه‌ما خوه دزانم.
ئه‌ڤرۆ نیۆز:
بنگه‌هێ رۆژنامه‌ڤانى یێ یه‌كینه‌یا پاراستنا گه‌ل د به‌یاننامه‌كێ گۆت: ئه‌ڤرۆ ژ ئالیێ سنۆرێ عیراقێ ڤه چه‌كدارێن داعشێ هاتنه ده‌ڤه‌را باشورى یا تل كۆچر و هێرشكرنه سه‌ر گوندێ سامریا، و هێرشا وان ژ ئالیێ یه‌كینه‌یا پاراستنا گه‌ل ڤه هاتیه تێكشكاندن، د ئه‌نجامدا تیرۆرسته‌كێ خوه‌كوژ كو بزاڤا خوه په‌قاندێ دكر زێده‌بارى 6 چه‌كدارێن دى هاتنه كوشتن، هه‌روه‌سا رونكر ترۆمبێله‌كا هامڤى كه‌فته دده‌ستێن یه‌كینه‌یا پاراستنا گه‌ل دا.
هه‌روه‌سا به‌یاننامێ راگه‌هاند، ل باشورێ گوندێ سامریا گورپێن چه‌كدارێن داعشێ ل گوندێ هێرشیا بوون كو ئه‌و گوندى هه‌موو هاتیه پاقژكرن، هه‌روه‌سا دیاركر ئێك ژ ئه‌ندامێن یه‌كینه‌یا پاراستنا گه‌ل كو رۆله‌كێ سه‌ره‌كێ د شكه‌ستنا داعشیان دا هه‌بوو گه‌هشته كاروانێ شه‌هیدان.
ئه‌ڤرۆ، ڤه‌گێر سه‌عدوللا:
دیندار نه‌جمان دوسكی ئه‌ندامێ سه‌ركردایه‌تیا ئێكگرتوویا ئیسلامیا كوردستانێ و ئێك ژ دامه‌زرێنه‌رێن وێ پارتیێ دیار كر كو كێشه د ناڤخویا ئێكگرتوو دا یێن هه‌ین و ئاماژه ب وێ یه‌كێ دا كو تێبینیێن وان وه‌كو ئێكگرتوویێن ده‌ڤه‌را به‌هدینان بتنێ ل سه‌ر چاوانیا پارڤه‌كرنا پۆستان نینن و ب دوور نابینیت كو ئێكگرتوویێن به‌هدینان ژ حزبێ جودا ب بن و ل دور ڤێ چه‌ندێ دبێژیت: (ده‌مێ ئێكگرتوو دروست ژی بووی ئه‌م وه‌كو ده‌ڤه‌ر به‌هدینان د ئێك رێز بووین و مه ئێك سه‌ركردایه‌تی هه‌بوو و ئه‌م وه‌كو ده‌ڤه‌ر چووینه د گه‌ل ئێكگرتوو دا و كه‌س نه‌هاتیه ڤێرێ ئه‌م كرینه ئێكگرتوو به‌لكو ژ قه‌نیدلی هه‌تا زاخو ئه‌م ئێك میحوه‌ر بووین و ئه‌م پێكڤه یێن گه‌هشتینه ئێكگرتوو).
ل دور وێ یه‌كێ هه‌كه ئێكگرتوویێن به‌هدینان جودا ب بن دێ حزبه‌كا نوو ئاڤا كه‌ن یان ژى هه‌تا نوكه چ بژارێن دی ل به‌ر ده‌ستێ وانه، دیندار نه‌جمان گۆت: (د ناڤ سه‌ركردایه‌تیا به‌هدینان دا دانوستاندن ل سه‌ر چه‌ند بژاران هاتیه كرن، ئێك ژ وان ئه‌وه كو هه‌ر وه‌ك ئێكگرتوو ب مینین، یا دی ژى هێزێن دی یێن ئیسلامی یێن ل ده‌ڤه‌رێ هه‌ین و ره‌نگه ئه‌م بچین ل گه‌ل وان هه‌مئاهه‌نگیێ بكه‌ین وه‌كو كومه‌لێ، یان ژی ببنه حزبه‌كا جودا و هنده‌ك بیر و بۆچوون ل ده‌ڤه‌را به‌هدینان یێن هه‌ین كو سیاسه‌تێ كاریگه‌رى یا ده‌عوێ كری و ئه‌م ببینه جه‌ماعه‌ته‌كا ده‌عوه‌ى. ئێك ژ بژاران ژی ئه‌وه ره‌نگه ل گه‌ل هنده‌ك حزبێن نه‌ته‌وه‌ی مه هه‌ڤپشكی هه‌بن و بگه‌هینه ئێك. ل دووماهیێ دى ل سه‌ر سه‌ركردێن ئێكگرتوو یێن دهۆكێ مینیت كا ئه‌و ل گه‌ل قاعیدێ دێ گه‌هنه چ ئه‌نجامان).
درێژیا هه‌ڤپه‌یڤینێ د هژمارا سوباهی یا رۆژناما ئه‌ڤرۆ دا بخووینه….
نيشاندان