ل 19-11-2014 ز سعه‌ت 11. 50 سپێدێ ته‌قینه‌ك ل هه‌ولێرێ پێكهات د ئه‌نجامده پێنچ كه‌س شه‌هید كه‌فتن و 29 وه‌لاتی بریندار بوون. تێزانین د شه‌ڕێ ل دژی تێرۆرستا داعشێ دا ته‌نێ كورد رۆژ ب رۆژ پێشڤه‌دچن و ناڤێ شه‌ڕڤان و پێشمه‌رگێن كوردستانێ ل سه‌رانسه‌ری جیهانێ به‌لاڤه دبه، مینا پارازڤانێن شارستانی و ژیانێ.
داعش ل سه‌رانسه‌ری به‌ره‌یێن شه‌ری ب كوردانره ژ كوبابی هه‌تا ب خه‌رابروتێ بێ هێز و لاواز بوویه، ل كوبانی رۆژ ب رۆژ و ب ئێك ده‌ستی هه‌موو هه‌زێن كوردان د ئێك سه‌نگه‌رێ شه‌ری دا نه و پتر ژ 80% ژ باژێران ئیرۆ كونترۆل دكه‌ن.
هه‌ر وه‌سا پێشمه‌رگه ل ده‌ردۆرا شه‌نگالێ و كه‌ركووكێ كارێ پاقژكرنا وان ده‌ڤه‌ران ژ چه‌ته و كۆله‌یێن داعش دكه‌ت و وان ژ ناڤ ئاخێ دهێنه ده‌ر دا وێ خاكا پیرۆز ژ ڤێ پیسیێ خاون بكن. ژ به‌ر ڤان سه‌ده‌مان و پاشی كو داعش رۆژانه ل سه‌ر زه‌مینێ تێكچوونێ بده‌ستدخه و ل ئالیه‌كێ دن ناڤێن گه‌له‌ك كه‌سان یێن كو تێكهه‌لی و بازرگانی ب داعش را كربوون هاتن بن چاڤكرن و هنه‌ك ژ وان ژ ئالیێ ئاسیشا كوردستانێ ڤه هاتن گرت نژی، ئێدی ژ به‌ر ڤان سه‌ده‌مان دیاردبه كو سه‌ركه‌فتن پارا پێشمه‌رگه و كوردستانێ یه، له‌وما داعش و پشگریێن وێ دخوازن چاڤان ژ خوه دووربێخن و سه‌قامگه‌ری، ئاساییشا كوردستانێ، ژیانا كه‌سێن سڤیل و نموونه‌یا سه‌ركه‌فتی د وارێ پێكڤه‌ژیانێ دا ل هه‌رێما كوردستانێ تێكببن.
ب ڤان كریاران دوژمنێن كوردان دخوازن مۆرالێ پێشمه‌رگان ل سه‌نگه‌رێن شه‌ڕ دا بشكینن، لێ هه‌ر ده‌مێ ئه‌و ژ بیردكه‌ن كو نه ب قاسی كه‌لا هه‌ولێرن، ئه‌و كه‌لا كو ئه‌ڤرۆ وه‌ك به‌رێ بوویه نیشانا ئازادی و دیمۆكراسیێ و هه‌كه گه‌لێ كوردستانێ شارستانی، ئازادی و پێكڤه‌ژیان كربه ئارمانجا خوه، وێ چه‌ند داعشه‌كی كه‌ڤنه‌په‌رست و هۆڤ نكاربن ئیراده‌یا وێ بشكینن.
نووترين نووچه
- هیڤیدارین ئەنجامێن هەلبژارتنان د خزمەتا ڤەژاندنا هەرێمێ دا بن
- پێدڤییە وەلاتی ژ ململانێیا هەرێمی دووربێخین
- كۆمبوونا مەسرور بارزانی و سۆدانی دێ ئەنجامێن باش هەبن
- سەرۆكێ هەرێما كوردستانێ و قونسلێ ئەلمانیا پێكئینانا حوكمەتا هەرێمێ گەنگەشەكر
- نێچیرڤان بارزانی پێشوازی ل قونسلێ مسرێ كر
- مەسرور بارزانی بۆ سۆدانی: پێدڤییە مووچە ژ ناكۆكییا سیاسی بهێتە دوورئێخستن
- گۆتن و کریارێن دەستهەلاتێ ل دۆر پرسا کوردی گەلەک ژێک دوورن
- سەرۆك بارزانی: دانیێل میتێران رۆلەكێ گەلەك مەزن د بەرگریكرنێ ژ دۆزا گەلێ كورد دا هەبوو
- نێچیرڤان بارزانی: پێکڤە دێ شێین روو ب روویێ گوهۆڕینا سەقای بین
- پێدڤییە سەرژمێری بۆ مەبەستێن سیاسی نەهێتە بكارئینان
سهرهكى Twitter
شێخێ ئه‌زهه‌ر دێ سه‌ره‌دانا هه‌رێمێ كه‌ت
ئه‌ڤرۆ نيوز:
قونسلێ نوو يێ مسرێ گه‌هشته هه‌رێما كوردستانێ و ديدارا ئێكێ ل ئاڤاهيێ پارێزگه‌ها هه‌ولێر ل گه‌ل پارێزگارى ئه‌نجام دا.
د وێ سه‌ره‌دانێ دا، قونسلێ نوو يێ مسرێ ئيدانا ته‌قينا رۆژا چارشه‌مبى يا به‌ر ده‌رگه‌هێ ئاڤاهيێ پارێزگه‌ها هه‌ولێر كر و ب زاڤه‌كا ترسينوكانه وه‌سفكر.
باسم سابر قونسلێ نوو يێ مسرێ ل گه‌ل نه‌وزاد هادى پارێزگارێ هه‌ولێرێ كۆمبوو و د وێ كۆمبوونێ دا راگه‌هاند كو ب ڤان نێزيكان شێخ ئه‌حمه‌د ته‌يب شێخێ ئه‌زهه‌رێ دێ سه‌ره‌دانا هه‌رێما كوردستانێ كوت و به‌رپرسێن هه‌رێمێ ژى ل چاڤه‌رێ سه‌ره‌دانا وى نه.
قونسلێ مسرێ به‌حس ل قه‌هره‌ه‌مانيا گه‌لێ كورد د رووى ب رووى بوونا داعش ژى كر.
زیندانیێن سیاسیێن عیراقێ موچەی وەردگرن و یێن ھەرێمێ وەرناگرن
ئه‌ڤرۆ:
سەرۆکێ فیدڕاسیۆنا زیندانیێن سیاسی ل ھەرێما کوردستانێ راگەھاند ھاریکاریێن حوکمەتا ھەرێما کوردستانێ بۆ زیندانیێن سیاسی زۆر جودانە ژ یێن بەغدا و زیندانیێن سیاسی ل ھەرێما کوردستانێ ژلایێ دارایی ڤە زۆر ھاتینە پشتگوھخستن و گۆت “کار بۆ مافێن زیندانیێن سیاسیێن ھەرچار پارچێن کوردستانێ دکەن”.
فوئاد زیندانی سەرۆکێ فیدراسیۆنا زیندانیێن سیاسیێن کوردستانێ بۆ رۆژناما ئەڤرۆ دیار کر کو ل ھەرێما کوردستانێ تنێ زیندانیێن سیاسیێن سەردەمێ رژێما بەعس ھەنە و گۆت “ئێک ژ وان خەمساریێن حوکمەتا ھەرێمێ ئەڤەیە کو ھەتا نوکە پارەیێ ھەیڤانە بۆ زیندانیێن سیاسی ھاتیە مەزاختن مینحەیە نەکو مووچەیە و گۆت “ل گۆر قانوونێ ژی مینحە تشتەکێ فەرمی نینە و ھەر دەمێ بھێتە بڕین دێ ھێتە بڕین، ھەروەسا زیندانیێن سیاسیێن ھەرێمێ ناھێنە خانەنشینکرن”.
فوئاد زیندانی ئاشکرا ژی کر کو حوکمەتا بەغدا پشتی پشتڕاستکرنا فایلا زیندانیکرنا ھەر زیندانیەکێ سیاسی ژ بلی مووچەیەکێ ھەیڤانە، مینحەیەکا ٣٠ ملیۆن دیناری بێ بەرامبەر بۆ ھەر زیندانیەکی دھێتە مەزاختن و گۆت “مە چەندین جارا ب رێکێن جودا داخوازا ئەڤان ئیمتیازاتا ژ حوکمەتێ کریە، لێ چ بۆ مە نەھاتیەکرن”.
سزایێ سێدارەدانێ بۆ پەرلەمانتارەکێ عیراقێ دەرکەفت
ئه‌ڤرۆ:
عەبدولستار بەیرەقدار پەیڤدارێ جڤاتا بلندا دادوەریێ ل عیراقێ د داخویانیەکا رۆژنامەڤانی دا راگەھاند، کو دادگەھا ناڤەندیا تاوانێن عیراقێ ل دووڤ ماددێ ٤٠٦ یێ قانوونا سزادانێن عیراقی سزایێ سێدارەدانێ بۆ پەرلەمانتارێ بەرێ یێ سننی ئەحمەد عەلوانی دەرێخست، لێ دشیاندایە ل دادگەھا تەمیز ئەو تانێ ل ڤێ بریارێ بدەت.
ئەڤ بریارا دادگەھێ د دەمەکێ دایە پشتی دادگەھا ناڤەندیا تاوانێن عیراقی ل ١٩ی کانوونا دووێ یا ٢٠١٤، ب فەرمی ئەحمەد عەلوانی ب تیرورێ گونەھبار کری پشتی کو زێرەڤانێن وی ل رومادی بەرھنگاری ھێزەکا تایبەت یا نڤیسینگەھا مالکی بووین.
گەفا خوەنیشادانێ دکەن
ئەڤرۆ:
کاندیدێن بەرنامێ تواناسازی یێن دچنە ژ دەرڤە خواندنا بلند دخوینن د نڤیسارەکێ دا بۆ ھەرسێ سەرۆکاتیێن ھەرێمێ گەفان دکەن داخوازیێن وان بھێنە بجە ئینان، ھەکە نە دێ دەست ب خوەنیشادانێ کەن.
د نڤیسارا خوە دا سێ خالان دیار دکەن کو گرێدایی مافێن وان یێن دارایی نە و دخوازن کو ھەکە حوکمەت پارێن وان ب کاش ژی نەدەت، چەکێن بانکی بۆ کاندیدێن خواندنێ بھێنە چێکرن، ھەر دەمێ پارە ھەبوو بخو بینن داکو ژ پارێ خوە پشت راست ببن، یان ھەر ھەیڤێ ل گەل مووچەی ھندەک پارە بھێتە دان.
کاندیدێن تواناسازی ھەروەسا ماوێ حەفتیەکێ مۆلەت دایە حوکمەتێ کو داخوزایێن وان بجە بینیت، بەروڤاژی د بەیانناما خوە دا دیار دکەن کو دێ ھەموو رێیێن شارستانی گرنە بەر ھەر ژ خوەنیشادان و مانگرتنان.
سەرۆکێ باژێرڤانیا سێمێلێ: بۆ خزمەتگۆزاریان سەرەدەریا قەزایێ ل گەل مە ناھێتە کرن
ئه‌ڤرۆ نيوز:
خەلکێ قەزا سێمێلێ گازندا وێ یەکێ دکەن کو خزمەتگوزاری ل باژێرێ سێمێلێ، نە وەکو قەزایێن دینە و کێمتر خزمەت بۆ ڤێ قەزایێ دھێنەکرن، رێڤەبەرێ باژێرڤانیا سێمێلێ ژی دبێژیت: بودجێ ئاڤاھیێ باژێرڤانیێ بۆ جادە و کولانێن سێمێلێ دھێتە مەزاختن و مە ئاڤاھیێ رێڤەبەریێ چێنەکر سەخمەراتی خزمەتێن قەزایێ.
ئەندازیار ئەکرەم یەحیا، سەرۆکێ باژێرڤانیا سێمێلێ بۆ ئەڤرۆ دیار کر، ژ لایێ پاقژیێ ڤە سێمێلێ گەلەک ئەگەر ھەنە، مە نوکە دایە کۆمپانیەکێ بەری چار سالان مە پاقژ دکر و مە کونترولەک باش ل سەر دکر، لێ نوکە باژێر مەزن بوویە و بەردەوام مەزن دبیت، یا گرنک ئەوە خەلکێ مە ژی ھاریکاربیت و گۆت: مە گرێبەست ل گەل کۆمپانیێ ھەیە ھەر جھێ ئەم ل سەر ئاگەھداربین کو گلێش یێ کەتیە سەرێک، لژنێن مە دووڤچوونێ ل سەر دکەن، ئەم وێ کۆمپانیێ سزا ددەین وەک پارە و گەلەک جاران ھاتینە سزادان، دڤێت رۆژانە کۆمپانی ناڤا بازاری پاقژ بکەت و زێدەباری کولانان، لێ ژ بەر ڤێ پێلا ئاواران، بارێ کۆمپانیێ ژی گران بوویە.
دەربارەی وان جادە و کولانێن تا نھو دروست نەکرین ئەندازیاری گۆت: ئەو پارێ بۆ باژێرڤانیا مە دھێت ل دووڤ ئاکنجیێن ڤی باژێری دھێت نە وەک قەزایەک مەزن بۆ مە دھێت، باژێرڤانیا مە نمرە دوویە ئەم نەشێن خوە وەک قەزایەک وەک زاخۆ مەزن ببینن، مە گەلەک جاران داخاز کریە وەک قەزا کار ل گەل مە بکەن نە وەک ھژمارا ئاکنجیان، مافێ خەلکی یە گازندێ ژ مە بکەن، چونکو ئەڤ پارچە زەڤیە ھاتینە ئاڤاکرن پێدڤی ب خزمەتگوزاریا ھەیە، لێ ل دووڤ شیانێن باژێرڤانیێ و ئەو بودجا بۆ مە دھێت ئەم کارێ خوە پێ برێڤەدبین، نوکە ئاڤرێژێن تاخەکی مە دروست کرینە ب کوژمێ ٣١ ملیون دینارا ژ پێشینا باژێرڤانیێ، ئەم یێ تێکەلە دکەین ب ئامیرێن باژێرڤانیێ، مە پلانا پێنج سالی تاخ ب تاخ دانا و ل دووڤ وی کوژمەی ئەم نەشێین زێدەتری پێنج ملیاران سالانە چێکەین.
خویاژی کر، ل سالا ٢٠١١ و ٢٠١٢ بودجەک بۆ مە ھات، بەشەک ژێ بۆ ئاڤاکرنا ئاڤاھیێ رێڤەبەریێ بوو، لێ مە دیت خەلکێ مە پتر پێدڤی ب خزمەتێ ھەیە، وەک جڤاتا باژێرڤانیێ مە بریار دا ئەم تاخەکێ مەزن ژ سێمێلێ ب وی پارەی ژ تەقنێ و توزێ قورتالکەین ب درێژیا٢٣کم ژ جادەیان، ژ بەر کو بابەتێ پارچە زەڤیان ل سێمێلێ مایە ھەلاویستی.
رێڤەبەرێ باژێرڤانیێ ئەو ژی خویاکر، بابەتێ پارچە ئەردان نە ب تنێ خودانێن ھژمارێن ئەردا، بەلکو گازندێن خودانێن عەردان ژی مە ھەنە، چونکی مە عەردێ وی بریە بۆ نموونە ئەردێ فرۆکخانێ، ئەم یێ کار لێ دکەین و ھێشتا قەرەبوو نەکرینە، لێ ل ڤان رۆژێن بوری سەرەدانا وەزیرێ چاندنێ بوو دەڤەرێ و پارێزگارێ دھۆکێ و قائیمقامیا سێمێلێ ئەڤ ئاریشە ژی چارە کرینە و ب زووترین دەم دێ ب دووماھی ھێت.
ل دور پلانا باژێرڤانیێ بۆ نەھێلانا زێدەگاڤیان ل ناڤا بازاری گۆت ژی: د پلانا مە یا نوو دایە ئەو شوستێن ناڤا بازاری ھندەک دوکانداران زێدەگاڤی کرینە سەر، پلانا مە نێزیکی ٣کم ئەم شتایگەرەکی دانین ل وی دەمی یێ ب کاشی بەر دەرێ دوکانا خوە مەزن کربیت نامینیت، یێ ئەلەمنیوم کری نامینیت، دێ ھەموو ھێنە راکرن و ئەم یێ ل ھیڤیا بودجا خوە بۆ مە بھێت دێ ڤی کاری ئەنجام دەین، زێدەباری ھندەک ژ تاخێن بازاری کو ترومبێل ھاتن و چوونێ لێ نەکەن، ب تنێ ببیتە پەیادە بۆ جوانکرنا باژێری ژ دەرڤەی قەزایێ.
ل دووماھیێ ل دور پلانا خوە بۆ نەھێلانا لافاوان ئەکرەم یەحیای گۆت: پشتی ئەڤ جادا د ناڤبەرا سێمێل و تەناھی ھاتیە چێکرن چو بۆچوونا مە ل سەر وەرنەگرت، مە گازندە ژێ کرن ژ لایێ ئاڤرێژێ ڤە ژ لایێ فاملی مول و سێجێ ڤە، بەرێ ئاڤێ کەتە سێمێلێ، براستی ژی ژ شیانێن مە زێدەترە، پرسیارا مە نەکر کو ئایا ئاڤرێژێن وە شیانێن ڤێ ئاڤێ ھەنە یان نە، مە دشیا د دەمی دا چارەسەریا ڤێ کێشێ بکەین و من نڤیسار دایێ ژی کو ئەم دشێن بەرێ ئاڤێ ڤەگوھێزین، لێ بێ مفا بوو، نوکە ژی پارەکێ زور پێ دڤێت ھەتا ئەڤ ئاریشە چارە ببیت.
په‌یمانه‌كا ستراتیژی ل ناڤبه‌را PDK و PKK پێدڤیه‌كا گونجایه
بێگومان قووناغا نوكه یا رۆژهه‌لاتا ناڤین تێدا ده‌رباز دبیت گه‌له‌ك مه‌ترسیێن مه‌زن بسه‌ردا هایتنه، هنده مه‌ترسی ژی ده‌رفه‌ت بۆ كوردان ژی ئافراندیه، ڤه‌گۆهاستنا مه‌ترسیێ بۆ ده‌رفه‌ت و قازانجان به‌رێ هه‌ر تشته‌كێ پێدڤی ب ئێكرێزی و هه‌ڤده‌نگیا فاكته‌رێن سه‌ره‌كی یێن كۆمه‌لگه‌ها كوردستانێ یه. فاكته‌رێن سه‌ره‌كی ژی ژ وان رێخستن و حزبان پێكدهێت كو خودان پێگه‌ها جه‌ماوه‌ری یه، ده‌رفه‌تێن دارایی و كه‌نالێن په‌یوه‌ندیێ ل گه‌ل ده‌ستهه‌لاتدارێن جیهانێ نه.
پارتی دیموكراتی كوردستان و پارتا كاركه‌رێن كوردستانێ دو ژ وان هێزانێن كو هه‌ر ئێك ب شێوازێ تایبه‌تێ خوه، خوه‌دی ئه‌و ده‌رفه‌ت و شیانێن ئاماژه پێكرینه و ب به‌راوه‌ردی ل گه‌ل پارتێن دی یێن كوردستانێ رۆله‌كێ سه‌ره‌كی د سیاسه‌تا كوردی دا دگێرن. ئه‌ڤ دو پارته د گه‌له‌ك مژاران دا ژ هه‌ڤجودانه و بیر و تێگه‌هه‌كێ جودا بۆ چاره‌كرنا پرس و گرفتێن ناڤ كۆمه‌لگه‌ه و بزۆتنه‌یا كوردی نیشان داینه. لێ هه‌ڤده‌م چاره‌نڤێسا هه‌ڤشێوه‌یێ كوردی و ره‌وشا زال ل سه‌ر هه‌رێمێ و دوژمنه‌كێ هه‌ڤپشك وان دگه‌هینیته ئێك و مینا گه‌له‌ك جاران نه‌چارن كو هه‌ڤدو بگرن و د رێزه‌كێ دا هه‌ڤكاریا هه‌ڤدو بكه‌ن.
ژ بیرا مه نه‌چیت هه‌ڤگرتنا راسته‌قینه‌یا ڤان دو پارتان ب واته‌یا ئێكگرتنا دو پارچه و نیڤا كوردستانێ دهێت و هه‌كه پێنگاڤێن وه‌سا ببنه كریار و راستی، گه‌له‌ك كارتێكرن ل سه‌ر هه‌موو خه‌باتا كورد دكه‌ن و گه‌ره‌نتیه‌كا گرنگ بۆ وان ده‌ستكه‌فتانه كو هه‌تا نوكه ب ده‌ستڤه هاتینه و زه‌مینا گه‌له‌ك ده‌ستكه‌فتێن نوو ژی ئاڤا دكه‌ن.
پشتی هێرشا داعشێ به‌رگریا قه‌هره‌مانیا پێشمه‌رگه‌ی، گه‌ریلا و شه‌ڕڤان ل به‌رامبه‌ر ڤێ هێزا مه‌ترسیدار و وه‌حشی دا، جیهان ب چاڤه‌كێ دی به‌رێ خوه دده‌ته كوردان. واته ب چاڤه‌كێ رێز و خۆشه‌ویستی و لایه‌نگری و پشته‌ڤانی ژ كوردان، هه‌روه‌سا تێگه‌هشتن ژ وان ئێش ئازاران كورد تووشی بووینێ. مه‌زنترین میدیایێن جیهانێ ل سه‌ر ئاستێن هه‌ری بلند یێن رێزگرتنێ به‌حسێ كچێن كۆبانێ دكه‌ن و هۆزانڤان و نڤێسه‌رێن ناڤدرا هه‌لبه‌ست و سروودان ب وان دبێژن. ئه‌ڤ تێگه و نێهراندنه ژ لایێ رێبه‌ر و سه‌رۆكێن وه‌لاتێن بڕیارده‌رێن جیهانێ هه‌تا خه‌لكێن ئاسایی ل سه‌ر شه‌قامێن پتریا وه‌لاتێن جیهانێ هاتینه نیشادان.
ئه‌ڤه ده‌ستكه‌فته‌كێ مه‌زنه بۆ هه‌موو كوردان، پارت و رێبه‌رێن وان. چو كه‌سه‌كی نه‌خاسمه پارتێن مه‌زن نابیت بهێلن ئه‌ڤ ده‌ستكه‌فتا ب نرخ تێك بچیت یانژی ژێ كێم ببیته‌ڤه. به‌روڤاژی پێدڤیه كار بۆ زێده‌كرن و مه‌زنكرنا وی بهێته‌كرن. مه‌زنترین كار ژی ل ڤێ بارێ دا ئێككرنا ده‌نگ و سه‌نگا هێزێن سه‌ره‌كی یێن بزۆتنه‌وه‌یا كوردستانێ یه كو پارتی دیمۆكراتی كوردستان و پارتا كاركه‌رێن كوردستانێ پێشه‌نگیا وان دكه‌ن. پشكه‌كا هه‌ری زێده یێن هێزن كوردی په‌یوه‌ندی و هه‌ڤكاریا وان ل گه‌ل هه‌ڤدو گه‌له‌ك باشه ب تنێ ئه‌ڤ دو لایه‌نه واته (پارتی و پ. ك. ك) ل سه‌ر كۆمه‌كا خالان رێك نه‌كه‌فتینه.
ئه‌ڤ ئێكگرتن و ئێك هه‌لۆیستیه ده‌مه‌كی دگه‌هیته زێرڤه‌یێ كو كۆنگره‌كێ نه‌ته‌وی یێ به‌رفره‌ه بهێته گرێدان، ئه‌رك و كارێن وان بهێنه ده‌ستنیشانكرن و سه‌رۆك و به‌رپرسێن خوه بهێنه هه‌لبژارتن. به‌لێ چو جاران، چو كۆنگره‌ك ناگه‌هیته ئاستێ سه‌ركه‌فتنێ هه‌كه هێزێن مه‌زن و خودان سه‌نگ یێن كوردی د مژارێن پرسێن سه‌ره‌كی و گرنگ دا نه‌گه‌هنه ئێك و مۆرا خوه ل بن رێككه‌فتنه‌كا ستراتیژی لێ نه‌ده‌ن.
له‌ورا د ڤێ قووناغا گرنگ و چاره‌نڤێسساز دا شۆره‌شا كوردی دا په‌یمانه‌كا ستراتیژی كو هه‌موو پرسێن زیانبار ل ناڤبه‌را پارتی و په‌كه‌كێ بنئاخ بكه‌ت و بنیاتێ ڤی هه‌لۆیستی ده‌مدرێژ بهێته دارشتن، پێدڤیه‌كا فه‌ره و پێدڤیه هه‌ر دو لایه‌ن پێنگاڤێن رژد بۆ بهاڤێژن.
پرۆژه قانوونا ئه‌مریكى بۆ پڕچه‌ككرنا پێشمه‌رگه‌ى
ئه‌ڤرۆ نیۆز:
رۆیته‌رز: سه‌رۆكێ لیژنا كاروبارێن ده‌رڤه‌یێ جڤاتا نوونه‌رێن ئه‌مریكى ئێدوارد رویس پرۆژه قانوونا پڕچه‌ككرنا كوردێن هه‌رێما كوردستانێ ل جهێ روخسته‌وه‌رگرتنا ژ حوكمه‌تا ناڤه‌ندیا به‌غدا پێشنیازكر.
ئێدوارد رویس دده‌مێ به‌رچاڤكرنا پرۆژێ ناڤبرى دا گۆت: تاكه شریكێن مه د شه‌رێ دژى تیرۆرێ دا (داعش) هه‌ڤسه‌نگیا چه‌كى نینه، به‌لێ سه‌ره‌راى كێماسیا چه‌كێ وانێ كه‌ڤن، هێزێن كوردان (پێشمه‌رگه‌ى) دوپاتكرن ئه‌و هێزا په‌یاده‌یا كاریگه‌ره دناڤ هێزێن دژى داعشێ راوه‌ستیاین.
ئاماژه‌دا هندێ ئه‌و پرۆژه قانوون دێ بیته رێیه‌ك بۆ هێزا 190 هه‌زار پێشمه‌رگه‌ى پێدڤیێن هێزا له‌شكرى ب ده‌ستڤه بهێت كو پێدڤیه‌كا مه‌زن پێ هه‌یه بۆ به‌رسینكگرتنا چه‌كدارێن داعشێ.
ژئالیه‌كێ دیڤه، رێڤه‌به‌رێ په‌یوندیێن رۆژنامه‌ڤانى یا ده‌رڤه‌یا ئه‌مریكى جێف راسكى د كونگره‌كێ رۆژنامه‌ڤانى دا ل واشنتۆن گۆت: هه‌لویستێ كارگێریا ئه‌مریكى دڤى پرۆژه‌ى دا ناهێته گوهۆڕین، هه‌روه‌سا دیاركر، پشته‌ڤانیا مه بۆ هێزێن عیراقێ و هێزێن ئێمناهیا كوردى ژى هه‌نه، راسكى ئاماژه‌دا هندى، حوكمه‌تا عیراقێ بكارێ پشكنینا هه‌موو كه‌لوپه‌لێن دناڤ فرۆكێن چه‌كێ بۆ كورردان هاتینه هنارتن رابوویه، به‌لێ ئه‌م نزانین كا وان ده‌ستكارى تێدا كریه و هنده‌ك ده‌زگه‌هێن پێدڤى ژ كار ئێخست بن یان نه.
راسكى هه‌روه‌سا رونكر، حوكمه‌تا عیراقێ 300 ته‌نێن كه‌لوپه‌لێن هێزا ئاسمانى یا عیراقێ بۆ هه‌رێما كوردستانێ هنارتینه، دوپاتكر وه‌لاتى وى یێ پێگیره هاریكاریا هێزێن ئێمناهیا عیراقێ و هێزێن كوردان بكه‌ت.
زێده‌بارى وێ گۆت: هه‌ڤپه‌یمانێن مه د هه‌ڤالبه‌ندا نێڤده‌ولى دا دژى داعشێ پشته‌ڤانیا هێزێن كوردان دكه‌ن، ئه‌م ژى پلانانان بۆ به‌رده‌وامیا وى پشته‌ڤانیێ بۆ پاشه‌رۆژێ ددانین.
هه‌ژى گۆتنێ یه شاندێ هه‌رێما كوردستانێ هێشتا یێ به‌رده‌وامه ل سه‌ر رازیكرنا به‌رپرسێن واشنتون بۆ پڕچه‌ككرنا هێزێن پێشمه‌رگه‌ى ب چه‌كێ پێدڤى و چه‌كێ گران، به‌لێ بشێوه‌كێ كو ئه‌و چه‌ك نه‌چیته دده‌ستێن حوكمه‌تا ناڤه‌ندیا به‌غدادا به‌رى بهێته ره‌وانه‌كرن بۆ هه‌رێما كوردستانێ.
ئێك ژ دامه‌زرێنه‌رێن داعشێ هاتیه كوشتن
ئه‌ڤرۆ نیۆز:
تیرۆرستێ ب ره‌گه‌ز عه‌ره‌بێ وه‌لاتێ سعودیێ عومه‌ر ئه‌لجریس كو ئێك ژ سه‌ركردێن چه‌كدارێن داعشێ ل عیراقێ بوو، دهێرشه‌كا ئه‌سمانى یا هێزێن هه‌ڤپه‌یمانان دا هاتیه كوشتن و مالباتا وى ل سعودیێ ب كوشتنا وى هاتیه ئاگه‌هداركرن.
ل گۆر رۆژناما (سه‌به‌ق) یا سعودى ژێده‌رێن ئاگه‌هدار دیاركریه جریسى دهێرشه‌كا ئه‌سمانى دا ل چار شه‌مبیا بۆرى ل باژێرێ مووسل هاتیه كوشتن، له‌ورا مالباتا وى هاتیه ئاگه‌هداركرن و تازیا وى ل مالا وى ل ریازێ هاتیه ب رێڤه‌برن، تیرۆرستێ هاتیه كوشتن برایێ پارێزێ به‌رنیاسه ب ناڤێ عه‌بدولره‌حمان ئه‌لجریسى یه كو باده‌كا وان كه‌سێن گرتى د زیندانێن عیراقێ دا ب رێڤه دبه‌ت.
عومه‌ر ئه‌لجریسى ل سالا 2005 ژ ئالیێ هێزێن ئه‌مریكى ڤه ل عیراقێ هاتیه گرتن، پاشى هاتیه ئازادكرن و راده‌ستى وه‌لاتێ سعودیێ كریه كو بۆ ده‌مێ سێ سالان هاتیه ده‌سته‌سه‌ركرن پاشى هاته ئازاد كرن و جاره‌كا ڤه‌گریایه عیراقێ.
ژێده‌رێن ئاگه‌هدار هه‌روه‌سا دیاركرن، ئه‌لجریس ناسناڤێ وێ ب (ئه‌بو ئه‌لحه‌سه‌ن ئه‌لجزراوى) دهاته نیاسین، دهێرشا ده‌ڤه‌را به‌عاجێ دا هاتیه كوشتن پشتى هێرشا ئه‌سمانى ل سه‌ر ترۆمبێلا وى یا تایبه‌ت هاتیه كرن.
ل گۆڕ پێزانینێن رۆژناما سه‌به‌ق كو ئه‌لجریسى ئێك ژ دامه‌زرێنه‌رێن چه‌كدارێن داعشێ بوویه وه‌ك سه‌ركرده‌كێ شه‌رعى پاشى بویه سه‌ركرده‌كێ له‌شكرى و ئه‌منى به‌رى بهێته گرتن ل سالا 2005.
كورده‌ك بوو ئێكه‌مێ پروگرامێ (زى ڤویس) ل وه‌لاتێ دانیمارك
ئه‌ڤرۆ نیوز،زنار توڤى:
پشتى بو ماوه‌یه‌كێ درێژ هه‌ڤركى دپروگرامێ(زى ڤویس) دا كرى،ئه‌لند شێروان سه‌عید برازایێ موزیكژه‌نێ مه‌زنێ كورد دلشاد سه‌عیدى و كورێ باژێرێ دهوكێ شیا ببیته ئێكه‌مێ ڤى پروگرامى ل وه‌لاتێ دانیمارك و شیا خه‌لاتێ ڤى پروگرامى بده‌ست خوڤه بینیت.ئه‌ڤه ئێكه‌م جاره كورده‌ك بشێت ڤى خه‌لاتى بده‌ست خوڤه بینیت
نيشاندان
WP Facebook Auto Publish Powered By : XYZScripts.com