ئەڤرۆ:

رێڤەبەرێ کونترۆلا کارەبا ھەرێمێ راگەھاند ل دەستپێکا ھەیڤا 11 خواست ل سەر بکارئینانا کارەبێ بۆ چار ھزار میگاواتان زێدەبوویە و ئاستێ بەرھەمئینانا کارەبا نیشتمانی  2700 میگاواتن.

ئومێد محەمەد رێڤەبەرێ کونترۆلا کارەبا ھەرێمێ دیارکر ل دەستپێکا ڤێ ھەیڤێ ژ ئەگەرێ نزمبوونا پلا گەرماتیێ و زێدە بکارئینانا کارەبێ بۆ خوە گەرمکرنێ خواست ل سەر بکارئینانا کارەبێ ب رێژەکا بەرچاڤ بلند بوویە کو گەھشتیە نێزیکی چار ھزار میگاواتان و گۆت نوکە ئاستێ بەرھەمئینانا کارەبێ ژ ئالیێ وەزارەتا کارەبێ یا حوکمەتا ھەرێما کوردستانێ دو ھزار و 700 میگاواتن، ب ڤێ ژی وەزارەتا کارەبێ دشێت ب تنێ 75% ژ کارەبا نشتیمانی بۆ وەلاتیان دابین بکەت و 25% یا دی ژ پێدڤیێن کارەبێ ب رێیا موەلیدێن ئەھلی بۆ وەلاتیان دھێتە دابین کرن.

رێواز فایەق ئەندامێ پەرلەمانێ کوردستانێ راگەھاند کێشا کێمیا نەبوونا کارەبا نیشتمانی د وەرزێ زڤستانێ دا دێ یا بەردەوام بیت و گۆت سالێن بووری ب سەدان گوھۆڕێن کارەبێ د کوگەھێن وەزارەتا کارەبێ دا ھەبوون، کو وەختێ ل تاخەکێ ئێک دسوت د ماوێ دو رۆژان دا دھاتە گوھارتن، بەلێ نوکە ل دووڤ گۆتنێن رێڤەبەریێن کارەبێ چو گوھۆڕ د کوگەھان دا نەماینە.

ئەڤرۆ:

رێڤەبەرا فڕۆکەخانا نێڤدەولەتیا ھەولێرێ راگەھاند کو رۆژانە نێزیکی چار ھزار گەشتیار ب رێیا فڕۆکەخانا ھەولێرێ ھاتن و چوونێ دکەن و دبێژیت ئەسمانێ کوردستانێ ل ژێر کونترۆلا بەغدایە و ھندەک جاران ئاریشە بۆ فڕۆکەخانێن ھەرێمێ دھێنە چێکرن.

تەلار فائق رێڤەبەرا فڕۆکەخانا نێڤدەولەتیا ھەولێرێ بۆ رۆژناما ئەڤرۆ دیارکر نوکە ھەموو وەلات گەشتێن خوە ئەنجام ددەن و ئەو وەلاتێن گەشتێن خوە راگرتی ھاتەچارە کرن و گۆت ئەڤ سالە د ھەیڤا تەباخێ دا ب ئەگەرێ رەوشا ئەمنی ھندەک ئاریشە بۆ ل سەر ھێلێن ڤەگوھاستنێ مە پەیدا ببوون و پشتی حەیفتیەکێ مە رێیا گەشتکرنێ بۆ فڕۆکان گوھۆڕی و ئاریشە ھاتە چارە کرن، نوکە ھاتن و چوون ب رێیا فڕۆکێ ئاسایی بوویە، ژ بەر ڤەگەڕیانا وەلاتیێن عەرەب بۆ بەغدا ل ھەیڤێن بۆری قەرەبالغەکا زۆر ل سەر فڕۆکەخانا ھەولێرێ پەیداکر بوو، رۆژانە ھەشت ھەتا ١٣ گەشت د ناڤبەرا ھەولێر و بەغدا دا دھاتنە ئەنجام دان.

تەلار فائق ھەروەسا گۆت ئێک ژ ئاریشێن ھەرێما کوردستانێ ل گەل بەغدا ئاریشا ئەسمانێ کوردستانێ یە و فڕۆکەخانە ل ژێر دەستھەلاتا ھەرێمێ نە، بەلێ ئەسمانێ کوردستانێ ژ لایێ بەغدا ڤە ھاتیە کونتڕۆل کرن و ئەم سەربخوە نینە، لەوڕا جار جار ئاریشە بۆ مە پەیدا دبن ژ لایێ بەغدا ڤە، خشتێ گەشتکرنێ ھەموو ژ لایێ بەغدا ڤە دھێتە دانان، ئەسمان ھاتیە کونتڕۆل کرن و چو فڕۆکە نەشێن بێ مۆلەت بھێتە ئەسمانێ کودستانێ و ھەموو شەڤەکێ دەمژمێر ١٢ بەغدا خشتێ ھاتنێ فرێدکەت، رۆژانە نێزیکی چار ھزار کەس ب رێیا فڕۆکەخانا نێڤدەولەتیا ھەولێرێ ھاتن و چوونێ دکەن و سال بۆ سالێ ژی رێژا گەشتکرنێ بلند دبیت و سالانە نێزیکی ٣٠% زێدەدبن.