ئه‌ڤرۆ نيوز:

به‌رى ده‌مه‌كێ كێم كۆنگرێ رۆژنامه‌ڤانى يێ مه‌سعود بارزانى سه‌رۆكێ هه‌رێما كوردستانێ و ئه‌حمه‌د داود ئوغلۆ سه‌رۆك وه‌زيرێن توركيا هاته‌ گرێدان و تێدا ته‌كست ل سه‌ر وێ چه‌ندێ هاته‌ كرن كو مه‌ره‌م ژ سه‌ره‌دانا وى وارێ مرۆڤى و ئه‌منى و ئابوورى و خۆشكرنا په‌يوه‌نديان بوويه‌ ل گه‌ل عيراقێ.

ل ده‌سپێكێ سه‌رۆك بارزانى پشتى بخێرهاتنا سه‌رۆك وه‌زيرێن توركيا كرى، ئاماژه‌ ب وێ چه‌ندێ كر جارا ئێكێ يه‌ ئه‌حمه‌د داود ئوغلۆ وه‌كو سه‌رۆكێ وه‌زيران سه‌ره‌دانا هه‌رێمێ دكه‌ت و گۆت: “ده‌ليڤه‌كا باش بوو، د گه‌له‌ك لايان دامه‌ دانوستاندن كر و گه‌له‌ك ل جهان دا لێك د نێزيكين و دێ پێكڤه‌ ل شه‌رێ دژى تيرۆرێ هاريكاريا ئێكدو كه‌ين”.

ژ لايێ خوه‌ ڤه‌ سه‌رۆك وه‌زيرێ توركيا سۆپاسيا مه‌سعود بارزانى سه‌رۆكێ هه‌رێمێ كر و ب هه‌ڤالێ خوه‌ يێ خۆشتڤى ناڤكر و گۆت: “سه‌ره‌خۆشيێ ل وان شه‌هيدان دكه‌م يێن د كريارا تيرۆرستى يا به‌رده‌رێ پارێزگه‌ها هه‌ولێر گيانێ خوه‌ ژى ده‌ست داين و سلامه‌تيێ بۆ برينداران دخوازم”.

ده‌رباره‌ى مه‌ره‌مێ ژ سه‌ره‌دانا خوه‌ بۆ عيراقێ و كوردستانێ سه‌رۆك وه‌زيرێن توركيا گۆت: “سه‌ره‌دانا مه‌ ل سه‌ر چار بابه‌تان بوويه‌ ئێك يا مرۆڤايه‌تى ژ به‌ر داعش دو مليۆن كه‌س ئاواره‌ بووينه‌ و پتر كه‌س هاتينه‌ هه‌رێمێ و هنده‌ك ژى مێڤانێن مه‌ نه‌ ل توركيا و به‌رى نوكه‌ ل ده‌مێ پێدڤياتيێ ل گه‌ل برايێن خوه‌ بووينه‌ ل دهۆكێ مه‌ چه‌ند كه‌مپ دروست كرينه‌”.

زێده‌تر گۆت: “ژ به‌ر لايه‌نێ ئه‌منى ژى ئه‌م ل ڤێره‌ينه‌، مه‌ زۆر ب هوورى و تێروته‌سه‌لى به‌حس ل سه‌ر هێرشێن داعش ل سه‌ر ده‌ڤه‌رێ كر و ئه‌م وه‌سا دبينين ئاسايشا عيراقێ بۆ توركيا گه‌له‌ك يا گرنگه‌ و توركيا گرنگيێ دده‌تێ چ باشه‌ ژى دێ كه‌ين”.

گۆتژى: “ل سه‌ر بابه‌تێ نوكه‌ يێ عيراقێ مه‌ سه‌ره‌دانا به‌غدا كر و ل گه‌ل به‌رپرسێن سياسى يێن عيراقێ كۆمبووين و ل ڤێرێ ژى ب هه‌مان مه‌ره‌م ب مه‌ره‌ما پێشڤه‌چوونا په‌يوه‌نديان و بابه‌تێ چارێ ژى گرێدايى ئابوورێ يه‌ كو نوكه‌ ب كۆژمێ 12 مليار دولاران مه‌ په‌يوه‌نديێن ئابوورى ل گه‌ل عيراقێ هه‌نه‌ و كۆژمێ هه‌شت ملياران ژى ل گه‌ل هه‌ولێرێ يه‌ و نێزيكى 1500 كۆمپانيانيێن توركى د تۆمار كرينه‌ و هزار كه‌س ژى ل ڤێره‌ كار دكه‌ن و د ئاماده‌ينه‌ زێده‌تر ژى لێ بكه‌ين”.

ل دۆر هاريكاريا مه‌شقكرنا پێشمه‌رگه‌ى ژى داود ئوغلۆ گۆت: “هه‌ر كاره‌كێ پێدڤى بيت دێ هاريكاريا هه‌رێمێ كه‌ين مه‌ يا به‌حسكرى و ل پاشه‌رۆژێ دێ ده‌ست پێكه‌ين و زێده‌ كه‌ين. هاريكاريا كۆبانێ ژى هه‌ڤكارى و هه‌ماهه‌نگيا مه‌ و هه‌رێما كوردستانێ نيشان دده‌ت”.

ل دۆر وێ چه‌ندێ كا هه‌رێم دێ هێشتا پێشمه‌رگه‌ى هنێريته‌ كۆبانێ ژى سه‌رۆك بارزانى گۆت: “كاودانێن ئه‌منى بڕيارێ دده‌ن”.

ده‌رباره‌ى كێشا په‌ترۆلا هه‌رێمێ و عيراقێ ژى سه‌رۆك وه‌زيرێن توركيا گۆت: “كێشا په‌ترۆلێ گه‌له‌ك يا حه‌ساسه‌ و هه‌كه‌ هه‌ردو لا بگه‌هنه‌ ئه‌نجامه‌كى دێ پێشوازيێ لێ كه‌ين، توركيا ژى پێدڤى ب وزێ ل ده‌ڤه‌رێ هه‌يه‌”.