ئه‌ڤرۆ نیوز:
ل گۆڕ ده‌نگۆباسێ تۆڕا وه‌لاتى هێزێت پێشمه‌رگه‌ى ل كوبانێ كاروانه‌كێ نوو یێ چه‌ك و ته‌قه‌مه‌نیان ب رێیا سنۆرى وه‌لاتێ توركیا پێ گه‌هشت، هه‌ڤده‌م خوه‌یاكر شه‌ش ترۆمبێلێن بارهلگر یێن له‌شكرى ب هه‌موو جورێن چه‌ك و ته‌قه‌مه‌نیان گه‌هاندن كوبانێ كو ژ ئالیێ هه‌رێما كوردستانێ ڤه‌ هاتینه‌ ره‌وانه‌كرن.
د هه‌مان بیاڤ دا فه‌رماندێ پێشمه‌رگه‌ى ل كوبانێ لیوا عه‌بدلقه‌هار مه‌جید حاجى ئه‌و داخوه‌یانیا چه‌ك و ته‌قه‌مه‌نیان دوپاتكر و گۆت: كاروانێ دوێ یێ چه‌ك و ته‌قه‌مه‌نیان گه‌هشته‌ باژێرێ كوبانێ و ئه‌و ده‌نگۆباس هه‌موو ره‌تركن كو دبێژن وه‌لاتێ توركیا نه‌هێلایه‌ چه‌ك ب گه‌هیته‌ پێشمه‌رگه‌ى ل كوبانێ.
هه‌روه‌سا فه‌رماندێ پێشمه‌رگه‌ى راگه‌هاند، هێزێن هه‌ڤپشكێن كوردان شیان پێشڤه‌چوونه‌كا باش ل سه‌ر چه‌كدارێن داعشێ تۆمار بكه‌ن و وره‌یێن پێشمه‌رگه‌ى د بلندن و هێزێن پێشمه‌رگه‌ى به‌رده‌وام بنگه‌هێن داعشێ توپباران دكه‌ن و زیانێن هه‌ره‌ مه‌زن ب رێزێن چه‌كدارێن داعشێ گه‌هاندینه‌.

ئه‌ڤرۆ نیۆز:
ددرێژاهیا دیرۆكا عیراقێ و كوردستانێ دا بۆ جارا ئێكێ یه‌، قوتابیه‌كێ كورد كو خه‌لكێ قه‌زا كه‌لاره‌ یا سه‌ر ب پارێزگه‌ها سلێمانیێ ڤه‌، پلا ئێكێ بده‌ستخوه‌ ئینا ل كۆلیژا فرۆكڤانیا شاهانه‌یا به‌ریتانى یا هێزا ئه‌سمانى، سه‌ره‌راى كو حوكمه‌تا عیراقێ هه‌تا نها پاداشتێن وى وه‌ك قوتابى یێن سالانه‌ بۆ زانكویا وى نه‌ هنارتینه‌ یا سالا خواندنا دووماهیێ، ب هێجه‌تا هه‌بوونا ناكۆكیێن دارایى د ناڤبه‌را حوكمه‌تا عیراقێ و حوكمه‌تا هه‌ولێرێ دا، و گۆتیه‌ حوكمه‌تا عیراقێ نه‌یا پێگیره‌ ب دانا قستێن خوندنا وى قوتابى ل زانكویا ناڤبرى.
قوتابیێ فرۆكه‌ڤانێ كورد دلشاد ستار كو ژیێ وى 23 سالن، د هه‌ڤدیتنه‌كا تایبه‌تدا ل گه‌ل باس نیۆز گۆت: ل سالا 2012 من پلا ئێكێ ل سه‌ر ئاستێ عیراقێ ب ده‌ستخوڤه‌ ئینایه‌، وه‌ك ئه‌فسه‌ره‌كێ هێزێن ئه‌سمانیا عیراقێ و پاشى ئه‌ز هاتیمه‌ ره‌وانه‌كرن بۆ وه‌لاتێ به‌ریتانیا ژ ئالیێ هێزێن ئه‌سمانیا عیراقێ ڤه‌ ب مه‌ره‌ما ته‌مامكرنا خواندنێ و ئاستێ زانستى ل كولیژا شاهانه‌یا به‌ریتانى، ل هه‌مان كولیژ من پلا ئێكێ وه‌رگرتیه‌ ل سه‌ر ئاستێ كولیژێ كو قوتابیێن 25 وه‌لاتان تێدا هه‌نه‌.
فرۆكه‌ڤانێ كورد دلشاد ستار ئاماژه‌دا، ئه‌و یێ پێگیره‌ ب ته‌مام كرنا وه‌رزكێ دى یێ خواندنا نوو، به‌لێ حوكمه‌تا عیراقێ دانا قستێن وه‌رزێ نوویێ خواندنێ ره‌تكرن ب بهانه‌یا هه‌بووونا ناكۆكیان د ناڤبه‌را به‌غدا و هه‌رێمێ دا، له‌روا داخواز ژ ئالیێن په‌یوه‌ندیدارێن هه‌رێمێ كر وێ ئاریشێ بۆ چاره‌ بكه‌ن بۆ هندێ ب شێت خواندنا خوه‌ ته‌مام بكه‌ت.
فرۆكه‌ڤانێ كورد هه‌روه‌سا خواست چاڤپێكه‌فتنه‌كێ ل گه‌ل نوونه‌رێ حوكمه‌تا هه‌رێمێ ل به‌ریتانیا بكه‌ت.
هه‌ژى گۆتنێ یه‌ دلشاد ستار ده‌رچوویێ ب پلا میلازمێ فرۆكه‌ڤانى ژ خولا (76) ل كولیژا فرۆكه‌ڤانیا كو 25 قوتابیێن كورد بخوه‌ گرتبوون د هه‌موو بیاڤێن خواندنێ دا، ده‌مێ پێكێشى كولیژا به‌ریتانیا كرى د هه‌موو قوناغێن تاقیكرنێ دا د پلا ئێكێ د هات.

ئه‌ڤرۆ نیۆز:
شاندێ پایه‌ بلندێ هه‌رێما كوردستانێ ب سه‌رۆكاتیا سه‌رۆكێ دیوانا سه‌رۆكاتیا هه‌رێما كوردستانێ دكتور فۆئاد حسێن و به‌رپرسێ فه‌رمانگه‌ها په‌یوه‌ندیێن ده‌رڤه‌یێ حوكمه‌تا هه‌رێما كوردستانێ د به‌رده‌وامن ل سه‌ر كومبوونێن خوه‌ ل گه‌ل مه‌زنه‌ به‌رپرسێن كارگێرى یا ئه‌مریكى ل واشنتۆن، ب مه‌ره‌ما ئاگه‌هاداركرنا حوكمه‌تا ئه‌مریكى و كونگرسێ ل سه‌ر نووترین پێشهاتێن هه‌رێمێ و عیراقێ دهێنه‌ رۆژه‌ڤێ.
شاندێ ناڤبرى ل گه‌ل سیناتۆر كارل لیفین و سیناتۆر مایك لی یێن ئه‌ندامێن لیژنا خزمه‌تا له‌شكرى یا جڤاتا كونگرسێى كومبوون و به‌حسێ نووترین پێشهاتێن شه‌رێ داعشێ و پێدڤیێن چه‌كى یێن پێشمه‌رگه‌ى كرن، سیناتۆرێن ئه‌مریكى گۆت: (هه‌وه‌ هه‌ڤالێن باش و زۆر هه‌نه‌ ل واشنتۆن و ئه‌ز ئێك ژوانم).
ژئالیێ خوه‌ڤه‌ دكتور فۆئاد گۆت: پێشمه‌رگه‌ تاكه‌ هێزا خوه‌دان شیان ل ده‌ڤه‌رێ كو بشێت خوه‌ به‌رانبه‌رى داعشێ بگریت و سه‌ركه‌فتنێ تۆمار بكه‌ت، هه‌كه‌ چه‌كێ گران و كه‌لوپه‌لێن له‌شكرى دده‌ستان دا هه‌بیت، بڤى ره‌نگى پێشمه‌رگه‌ دێ تیرۆرێ ژناڤبه‌رت.