ئەڤرۆ نیوز، ئەمیر ئەترووشی:

سەرۆکێ کۆمەلا ھەڤالبەندیا کوردستانی بولگاری ل ھەرێما کوردستانێ راگەھاند، بریار بوو ئەڤ سالە بۆ ئێکەم جار کونسلخانا بولگاری ل ھەرێما کوردستانێ ل ھەولێرێ ھاتبایە ڤەکرن، بەلێ ژ بەر رەوشا ھەرێمێ ئەڤ بریارە نەھاتیە بجھئینان.
ماجد حەمید مزووری تایبەت بۆ ئەڤرۆ نیوز دیار کر، ل دەستپێکا ئەڤ سالە ھندەک پێنگاڤ ھاتبوونە ھاڤێتن بۆ دانانا کونسولخانێ، بەلێ ژ بەر رەوشا عیراقێ و ھەرێمێ نەھاتە دانان و ھاتە پاشخستن و گۆت: بزاڤ یێ دھێنە کرن کو ل دەستپێکا سالا نوو یا 2015 کونسولخانە بھێتە دانان.
مزووری ئاماژە دا وێ چەندێ، ئەڤ دەمەکە شیرەتکارێ بازرگانی یێ بولگاری ل ھەولێرێ یە و پێنگاڤان دھاڤێژیت بۆ ھندێ کونسولخانا بولگاری ل ھەرێمێ بھێتە دانان، بەلێ ھێشتا چو تشتێ فەرمی نەھاتیە کرن.
مزووری کو د ھەمان دەم دا نوونەرێ ژوورا بازرگانیا بولگاری یە ل ھەرێما کوردستان و عیراقێ ئەو یەک ژی دیار کر کو وان گرێبەستەک ل گەل کۆمپانیەکا گەشتیاری یا بولگاری گرێداینە کو خەلکێ بولگاری بیننە ھەرێمێ و یێ ھەرێمی ژی ببەنە بولگاریا دا پتر ھەڤنیاسین د ناڤبەرا وان دا پەیدا بیت و ھەردو لا مفای ژ ئێکدو وەربگرن.
بارەگایێ کۆمەلا ھەڤالبەندیا کوردستانی بولگاری ل پارێزگەھا ھەولێرێ یە، ل 8\1\2012 حوکمەتا ھەرێما کوردستانێ مۆلەتا ڤەکرنا کۆمەلا وان دایە و نھا دەست ب کاربووینە و چەند گرێبەست ژی د بەرژەوەندا ئاکنجیێن ھەرێمێ دا ل گەل حکوومەتا بولگاری گرێداینە.

ئه‌ڤرۆ نيوز:

به‌رى ماوه‌كێ كێم كۆمبوونا د ناڤبه‌را هه‌ر ئێك ژ سه‌رۆكێ هه‌رێما كوردستانێ، مه‌سعود بارزانى، و سه‌رۆكێ په‌رله‌مانێ كوردستانێ، يوسف محه‌مه‌د، ل دۆر پرسا ويلايه‌تا سه‌رۆك بارزانى و كۆنگرێ نه‌ته‌وه‌ى و دستوورى بوو ب دووماهى هات.

يوسف محه‌مه‌د سه‌رۆكێ په‌رله‌مانى د داخۆيانيه‌كێ دى بۆ تله‌ڤزيۆنا رووداو گۆت: “د ڤێ كۆمبوونێ دا به‌حس ل پرۆژێ دستوورى هاتيه‌ كرن كو هنده‌ك لايه‌نێن سياسى دخوازن هنده‌ك پشك ژێ بهێنه‌ راستڤه‌كرن”. ل سه‌ر وێ پرسێ زێده‌تر سه‌رۆكێ په‌رله‌مانى گۆت: ” رێكه‌فتين كو ل ماوه‌كێ نێزيك بكه‌ڤيته‌ به‌ر دانوستاندنا لايه‌نێن سياسى دا كو ته‌وافق ل سه‌ر بهێته‌ كرن”.

ب گۆره‌ى گۆتنێن سه‌رۆكێ په‌رله‌مانى ته‌وه‌ره‌كێ دى يێ كۆمبوونێ به‌حس بوو ل سه‌ر كۆنگرێ نه‌ته‌وه‌ى و گۆت: “مه‌ به‌حس ل سه‌ر ب دووماهى هاتنا ويلايه‌تا سه‌رۆك بارزانى ژى كريه‌”. ده‌مێ ده‌ستنيشانكرى يێ سه‌رۆكێ هه‌رێمێ دێ ل 15\8\2015 ب دووماهى هێت ب گۆره‌ى گۆتنێن سه‌رۆكێ په‌رله‌مانى و گۆت: “دخوازين هه‌ر ژ نوكه‌ بگه‌هينه‌ رێكه‌فتنه‌كێ ل سه‌ر وێ پرسێ”.