ھەر چەندە د ئەڤ سالەدا تا رادەیەکێ سێڤێن بەوراری یا ب بوھا دچن، ئەڤ چەندە ڤەدگەریت ژ ئەگەرێ کێمیا سێڤان دبازاریدا، ژبەرکو ل دەمێ ڤەبونا کولیلکێن سێڤان ھشکە سرەک ب سەر سێڤان دا ھات و کولیلکێن وان خرابکرن و ڤێ چەندێ کارتێکرنەکا خراب کرە سەر بەرھەمێ جۆتیارێن دەڤەرێ، ژبەرکو ئەڤ سالە بەرھەمێ سێڤان ل دەڤەرا بەرواری بالا یێ کێم بوو.

 زنار توڤی، بەرواری بالا:

جۆتیارەک ب ناڤێ عسمەت محەمەد دبێژیت: ھەر سال سێڤێن مە دناڤ زەڤیاندا درزین و مە چ مفا ژێ نە ددیت و کەد و زەحمەتا مەیا سالانە ب ھەروە دچوو، ژبەرکو سێڤێن مە ب بوھایەکێ ئەرزان دھاتنە فروتن، زور جاران کیلویا وان ب ٢٠٠ تا ٣٠٠ دیناران دھاتە فروتن، ئەڤێ چەندێ ژی بۆھایێ کرێیا ترومبێلێ نەدگرت، ئەم دبوینە پالێن پیشی و ب تنێ وەستیان و زەحمەت بومە دما و نەزێدەتر و گوتژی: ئەڤ سالە ل دەمێ ڤەبونا کولیلکێن سێڤان جۆتیارێن دەڤەرێ گەلەک ب کەیف بوون، ژبەرکو گەلەک کولیلکا سێڤێ یا مشە بوو، لێ ژ ئەگەرێ ھاتنا سر و سەرمایەکا بھێز، ل زوربەیا گوندان کولیلکێن سێڤان سرێ برن و ل پتریا گوندێن بەرواری یا سێڤ نینن، لەورا ئەو گوندین سێڤ ھەین، ئەڤ سالە سێڤێن وان ب بوھایەکێ باش دچن و کیلو یا وان دناڤبەرا “٨٠٠_١٠٠٠” دیناران دچیت و ئەڤەژی بۆ جوتیاران گەلەک باشە و دێ مفای ژێ بینن و ڤێ چەندێ ھیڤیەکا دی دا جوتیاران.

سابر یاسین جۆتیارەکێ دییە دبێژیت: پتریا خەلکێ ل سەر گوندان د ھەژارن و سالانە چاڤێ وان یێ ل بەرھەمێ وێ سێڤێ کو ب تشتەکی بچیت داکو بشێن خێزانا خو پێ بخودان بکەن، ئەڤە چەند سال بوون، بوھایێ سێڤا گەلەک نەیێ باش بوو، جۆتیاران چ مفای ژێ نە ددیت و ھەمی دناڤ زەڤیاندا درزین و زەحمەتا مە یا سالانە ب ھەروە دچوو، ھێشتا خویاکر: لڤان سالێن بوری جۆتیار گەلەک بێ ھیڤی ببون، ژبەرکو سێڤێن وان نە دبونە پارە و تارادەیەکێ حکومەتێ ژی خەمساری دکر، چونکی ھاریکاریا جۆتیاری وەکو پێدڤی نەدکر، لەورا سالانە ئەو پارێ ئەم ل کەزاختنێ و رەشاندنێ و پاقژکرنێ دمەزێخین و گەلەک ژوی پترە یێ کو ئەم ب سێڤا وەر دگرین، لێ ئەڤ سالە جارەکا دی سێڤ ب بھا چوون و ڤەژاندنەکا دی دا جۆتیاران ،لێ ژبەر کێمی و نەبوونا سێڤان ئەڤ چەندە پەیدا بویە، ئەگەر سێڤ مشە ھەبان دبیت بوھایێ وان ب ڤی رەنگی نە دبوو.

حەجی شەریف خودانێ قەپانا کومار یا فێقی ل زاخو بۆ ئەڤرۆ خویاکر: ئەڤ سالە ژ ھەمی سالێن دیتر سێڤێن بەرواریا ب بوھایەکێ باشتر دچن و کیلو یا وان دناڤبەرا ٨٠٠ تا ١٠٠٠ دیناران چووینە و ئەڤە ئێکەم سالە سێڤێن بەرواریا ب ڤی بۆھای دچن، چونکی سالا بوری بوھایێ کیلویەکا سێڤێن باش دناڤبەرا ٢٠٠ تا ٣٠٠ دیناران دھاتە فروتن و دیارکر ژی: ھەر چەندە وەکی سالێن بەرێ سێڤ نینن، لەورا ئەڤ سالە ب ڤی بوھای دچن، لێ ئەگەر سێڤێن بیانی نەھێن دێ بوھایێ وان باشتر بیت و دێ باشتر چن.