شەرێ ل کۆبانێ ب دژواری بەردەوام دکەت و ھێزێن کوردی د ناڤ ھەفتیەکی دا شیانە باژێر ژ تیرۆرستێن داعشێ پاقژ بکەن و ژ رەوشا پاراستنێ کەڤتنە قۆناغا ھێرشێ و رزگارکرنا ھەموو گۆند و دەڤەرێن کۆبانێ و ل کانتۆنا عەفرینێ ژی رێکخستنا تیرۆرست یا ب ناڤێ الجبهة النصرة بەرھەڤیێ بۆ ھێرشەکا بەرفرەە ل سەر عەفرینێ دکەت.

ئەڤرۆ، سەرجان مەحمود:

پشتی ٥٥ رۆژێن شەری ل کۆبانێ د رەوشا نھا دا ھیڤیا سەرکەڤتنا کوردان زێدە بوویە و ب تایبەت ژی پشتی ھاتنا ھێزێن پێشمەرگە و ئینانا چەکێن گران، گورزێن مەزن ل تیرۆرستان دکەڤیت و ناڤەندا باژێر ٩٥ % ھاتیە رزگارکرن و ل ھەر سێ ئالیێن کۆبانێ ھێزێن پێشمەرگە ب چەکێن گران ل سەنگەرێن تیرۆرستان ددەن و شەرڤانێن کورد ژی ژ ئەردی ڤە ھێرشێن دژوار دکەنە سەر تیرۆرستان و د رەوشا نھا دا تیرۆرستێن داعشێ بەر ب شکەستنەکا مەزن ڤە دچن.

ل ئالیێ دی ھیڤی مستەفا سەرۆک وەزیرا کانتۆنا عەفرینێ د سەرەدانا خوە یا باکورێ کوردستانێ دا راگەھاند کو پرانیا کۆمێن چەکدارێن سەر ب لەشکرێ ئازاد ل یدلیب و باژێرکێن دەڤروبەرێن وێ بێی شەر خوە رادەستی رێکخستنا تیرۆرست یا ب ناڤێ الجبهة النصرة یا سەر ب قاعیدە دکەن و گۆت: (ئەڤە دەمەکە زانیاریێن باوەرپێکری کەڤتنە دەستێن مە کو چەتەیێن ئەل نوسرە ل گەل ھژمارەک کۆمێن چەکدارێن سەر ب لەشکرێ ئازاد ڤە بەرھەڤیان بۆ ھێرشکرنا سەر عەفرینێ دکەن و ئەم ژی د ھەر واری دا بەرھەڤیان بۆ شکاندنا تیرۆرستان و ژناڤبرنا وان دکەین و داخواز ژ ھەڤپەیمانیا نێڤدەولەتی دکەم کو ژ نھا ڤە دەست ب ھاریکاریا بۆ کانتۆنا عەفرینێ بکەن دا کو ھێزێن مە بشێن تیرۆرستان ژ ھەموو دەڤەرێن سووریێ و نێزیکی رۆژئاڤا دەرخینن).

ھیڤی موستەفا سەرۆک وەزیرا کانتۆنا عەفرینێ ھەروەسا دیار ژی کر کو کانتۆنا عەفرینێ ھەم د وارێ سیاسی و ھەم ژی د وارێ سەربازی دا دشێت خوە ب پارێزیت لێ دڤێت تورکیا سنۆرێن خوە بۆ کار و بارێن بازرگانی و کەل و پەلێن خوارنێ و پێدڤیێن مرۆڤی ڤەکەت و گۆت: (نھا ل گەل پەنابەرێن کو ژ حەلەب و دەڤروبەرێن وێ ھاتنە ھژمارا نیشتەجیێن کانتۆنا عەفرینێ ژ ملیۆنەک زێدەتر بوویە و نھا پێدڤیا مە ب تنێ بۆ ڤەکرنا دەریێ سنۆری ھەیە دا کو خەلک بشێت ب ئاسایی ژیانا رۆژانە برێڤە ببەت، ھەکە دەری بھێتە ڤەکرن و ھەڤپەیمانا نێڤدەولەتی ژ نھا ڤە دەست ب ھەڤکاریا مە بکەت ئەز ب رحەتی دشێم بێژم کو ل ھەمبەر ھەر ھێرشەکی ئەم دشێین خوە ب پارێزین و تیرۆرستان ژناڤ ببەین).

ل سەر پەیوەندیێن د ناڤبەرا کانتۆنێن رۆژئاڤا ل گەل رژێما سووریێ ژی سەرۆک وەزیرا کانتۆنا عەفرینێ راگەھاند کو رەوشا مە ل بەر چاڤە و ئەم ب چو رەنگەکێ رژێما ئەسەدی قەبوول ناکەین و یێن دبێژن پەیوەندیێن کانتۆنێن رۆژئاڤا ل گەل رژیمێ ھەیە، راست نابێژن و مەرەمێن وان رەشکرنا دەستکەڤتێن گەلێ کوردە و گۆت: (ئەم ب سەربلندی دبێژین کو ئەم نە ب تنێ بۆ ئازادیا رۆژئاڤا لێ بۆ ئازادیا ھەموو سووریێ خەبات دکەین و ب سایا خوینا شەھیدێن مە یێن قارەمان ئەڤرۆ باژێر و باژێرکێن رۆژئاڤا د ناڤ ئازادیێ دا ژیان دکەن و دێ ھەتا ھەتای ژی ڤێ ئازادیێ ب پارێزین و دۆژمن و دلرەش نەشێن دەسکەڤتێن مە ژناڤ ببەن).

ل سەر ھەڤالبەندیا ھێزێن پێشمەرگە و شەرڤانێن رۆژئاڤا ژی سەرۆک وەزیرا کانتۆنا عەفرینێ دیار کر ھاتنا ھێزێن پێشمەرگە بۆ ھەڤکاریا کۆبانێ جھێ شانازیێیە و گۆت: (ئەڤرۆ لاوێن کورد ژ باکور ھەتا باشور و ژ رۆژئاڤا ھەتا رۆژھەلات د ناڤ یەکرێزیەکا مەزنا نەتەوی دا بۆ پاراستنا دەستکەڤتێن نەتەوی پێکڤە کار دکەن و ئەڤ پێنگاڤەکا ھەری پیرۆزە و یەکگرتنا مە سەرکەڤتنا مە و پاراستنا دەستکەڤتێن گەلێ مەیە).