ھەولێر، قائید میرۆ
بابەکر دڕەیی، ئەندامێ جڤاتا نیشتیمانیا گۆڕان د ھەڤدیتنەکێ دا ل گەل رۆژناما ئەڤرۆ دبێژیت ھەکە رەوشا کوردستانێ تەنا ببیت و شەڕێ داعش نەمینیت، دێ بزاڤا گۆڕان دەست ب رەخنێن خوە کەت و دبێژیت، ب ئەندازێ پارتی و ئێکەتی گۆڕان ھێز و پێشمەرگە ھەنە ل سەنگەرێن بەرگریێ، گوت ژی ھەکە بەرنامێ گۆڕان نەھاتە بجھئینان و ل دووڤ ئەنجامێن ھەلبژارتنان پۆست ب گۆڕان نەھێنە دان، دێ خوە ژ حوکمەتێ ڤەکێشن و لولیا تۆپخانا راگەھاندنا خوە دێ زڤڕینن.
ئەڤرۆ: پرسا ھەلبژارتنا سەرۆکێ جڤاتا پارێزگەھا سلێمانیێ و دانانا پارێزگەری گەھشتە کیرێ؟
بابەکر دڕەیی: مە دوازدە کۆرسی ھەنە و ئێکەتیێ ژی یازدە کۆرسی ھەنە و کۆرسیەکا حزبا سوشیالستان بۆ زێدەبوویە و نوکە ئەم وەکی ئێکن، ھەر ئێکی دوازدە کۆرسی ھەنە، چو لایەنەک نەگەھشتیە ١٧ کۆرسیان کو ببیتە زۆرینە و ب ڤی شێوەی پرسا جڤاتا پارێزگەھا سلێمانیێ ب ئالۆزی مایە.
ئەڤرۆ: پێشنیارەک ھاتبووکرن ھەردو سالان جارەکێ پارێزگار بۆ لایەنەکی بیت، گۆڕان رازی نەبوو ب دو سالان یان ئێکەتی؟
بابەکر دڕەیی: ئەڤە پێشنیارا لایەنێن ئیسلامی بوو، لێ ئێکەتی رازینەبوو.
ئەڤرۆ: پەیوەندیێن گۆڕان ل گەل پارتی و ئێکەتی د چ ئاستدانە و ئایا راستە پەیوەندیێن ھەوە ل گەل پارتی خوەشترن؟
بابەکر دڕەیی: پەیوەندیێن مە ل گەل ھەموو لایەنان وەکی ئێکن و ھەکە بەحسێ ئێکەتیێ بکەم، بنکێ مە یێ جەماوەری ل گەل ئێکەتیێ زۆر د نێزیکن و ئەز ب خوە دناڤ ئێکەتیێ دا ھاتیمە، ل گەل پارتی ژی مە حوکمەت پێکڤە ھەیە.
ئەڤرۆ: ھوون ھەست ب وێ چەندێ دکەن پشتی پشکداریا ھەوە د حوکمەتێ دا ، پێگەھێ جەماوەریێ گۆڕان وەک بەرێ نەمایە؟
بابەکر دڕەیی: پشکداریا مە د حوکمەتێ دا بێگومان رەنگە خەلکەک ژ مە عاجز ببیت و مە باجا ڤێ چەندێ دایە، لێ بەرژەوەندیا گشتیا مللەتی و ئارامیا جادا کوردستانێ ل سەرڤەی ھەموو بەرژەوەندیێن مەیە، پێشبینی دکەین ھژمارەکا گۆھۆڕینان د حوکمەتێ دا بھێنەکرن، ئەڤ گۆھۆڕین دێ دەزگەھێن بەرگری و مالی و ئیداری ھەتا دووماھیێ ڤەگریت کو ئەم تێدا پشکدارین و لایەنێن دی ژی پشکدارن ،ئاریشەیەکا مەزن ل کوردستانێ ھەیە ئەو ژی داعشە، ھاتنا داعش ھندەک رێگر بوویە ژ چێبوونا گۆھۆڕینان و ھەکە ھات و ئەڤ رەوشە پیچەک بەر ب باشیێ چوو، دێ پتر پێداگیریێ کەین.
ئەڤرۆ: ھەکە داعش نەمینیت و ئاریشێن د ناڤبەرا ھەولێرێ و بەغدا چارەبوون، گۆڕان دێ پتر گڤاشتنان کەتە سەر حوکمەتێ؟
بابەکر دڕەیی: بەلێ ئەم ڤێ رەوشێ بەرچاڤ دگرین، ئەم ب خوە پشکدارین دڤێ رەوشێ دا و برادەرێن مە د سەنگەرێن شەڕیدانە، مە دناڤا ھێزێن پۆلیس و پێشمەرگەی ھندی پارتی و ئێکەتی خەلک ھەیە و دەنگ دایە گۆڕان، ئەڤ ھێزا نوکە بەرگریێ دکەت ھێزا مەیە ژی و دەنگدەرێن گۆڕانن، ھەکە رەوشا کوردستانێ ئاسایی ببیت، راگەھاندنا مەژی دێ باشتر لسەر بابەتان ئاخڤیت و حەقە ژی وەسابیت، مە پلەیا رەخنەیێن خوە ب شێوەیەکی رێکخستیە ل گەل ڤێ رەوشێ بگونجیت، ئەوا بەرێ مە پێشنیارکری بھێتە چارەکرن، نوکە بوویە ئەمڕێ واقع و پێدڤیە سیستەمێ بەرگریێ بھێتە رێکخستن، بەرێ مە دگۆت پێشمەرگە ئێک بگریت نوکە پێدڤیە ئێک بگریت.
ئەڤرۆ: گۆڕان چو نیەت ھەنە ھەکە بەرنامێ وێ نەھاتە بجھئینان؟
بابەکر دڕەیی: ھەر دەمێ مە بڤێت و بزانین رێز ل ڤێ قوربانیا مە ناھێتە گرتن، یان ھەکە بزانین ھەڤالێن مە گۆرەی ئەنجامێن ھەلبژارتنان پشکداری پێ ناھێتەکرن د حوکمەتێ دا ، ب نەخشە دێ ھزر تێدا کەین و ددەمێ پێدڤی دا دێ خوە ژ حوکمەتێ ڤەکێشین، مە منەت ب کەسێ نینە و ب مافێ خوە دێ پشکداری حوکمەتێ بین و پێدڤیە برادەرێن بھێنە پشکداریکرن پۆستێن وەزیر و بریکار و قایمقام و رێڤەبەرێن ناحیان وەربگرن.
ئەڤرۆ: ئانکو ھەکە بەرنامێ گۆڕان د حوکمەتێ دا نەھاتە بجھئینان، دێ خوە ڤەکێشن؟
بابەکر دڕەیی: بەرنامێ مە دو پشکە د ئاستێ ستراتیژیدا و یێ دھێتە بجھئینان و کاک مەسعود ژی مژوولی ئێکخستنا ھێزا پێشمەرگەیە، بەلێ ئەم دخوازین برادەرێن مەژی پشکداربن د بجھئینانا ئەڤێ ستراتیژیێ دا، نەکو کەسەکێ دی د حزبەکا دی دا بەرنامێ مە بجھبینیت.
ئەڤرۆ: بزاڤا گۆڕان چو بەرنامە ھەنە بۆ وەرگرتنا پۆستێن پارێزگەھا دھۆکێ؟
بابەکر دڕەیی: ھەر جھەکێ مە ئیستیحقاق ھەبیت، دڤێت وەربگرین و ھەکە وەرنەگرین، دێ بەحسکەین.
ئەڤرۆ: بۆچی ھەموو ئورگانێن بزاڤا گۆڕان ب ھەلبژارتنان ھاتنە دانان، تنێ بۆ پۆستێ رێکخەرێ گشتی ھەلبژارتن نەھاتەکرن؟
بابەکر دڕەیی: گۆرەی دستوورێ گۆڕان، رێکخەرێ گشتی دناڤا جڤاتا نیشتیمانی دا دھێتە ھەلبژارتن، ئەم ناکەینە ھاش و ھوش دناڤا کۆنگرەیەکا بەرفرەھدا وەکی زۆر پارتێن سیاسی، دناڤا دو ھزار کەساندا کەسەک بھێتە ھەلبژارتن، ئەم دناڤا پێنجی کەسێن سەرکردایەتیێ دا، دێ کەسەکی بۆ پۆستێ رێکخەرێ گشتی ھەلبژێرین، مە دناڤا جڤاتا نیشتیمانی دا، کاک نەوشیروان ھەلبژارت وەکی رێکخەرێ گشتی و ئەز ب خوە ئێک ژوان کەسان بووم من دەنگدایە نەوشیروانی.
ئەڤرۆ: دەمێ ویلایەتا سەرۆکێ ھەرێمێ یا بەر ب دووماھیێ ڤە دچیت، گۆڕان ل دۆر ڤێ پرسێ دانوستان دگەل پارتی کرینە و گۆرەی زانیاریێن مە ئێکەتی دبێژیت، گۆڕان ڤێ جارێ یا رازیە بۆ درێژکرنا ویلایەتا سەرۆکێ ھەرێمێ؟
بابەکر دڕەیی: مە چوار رێ ھەنە بۆ دانوستاندنان ل گەل پارتی و ئێکەتیێ، سەید مستەفا سەرۆکێ لیستا مەیە د حوکمەتێ دا و سەرۆکێ پەرلەمانی ژی ئێکە ژ سێ سەرۆکایەتیێن ھەرێمێ و سەرۆکێ فڕاکسیۆنا گۆڕان ل پەرلەمانی ئەوژی یێ دانوستاندنان ل گەل پارتی دکەت، مە شاندەکێ دانوستاندنان ژی ھەیە کو ل گەل حوکمەتێ دانوستاندنان دکەت، ئەڤ چوار دەزگەھێن مە ل گەل پارتی و ئێکەتیێ دانوستاندنان دکەن دەمێ نێزیکبووین وی دەمی دێ ئاخڤتن ل سەر ھێنەکرن.
نيشاندان