ئه‌ڤرۆ نیۆز:
سه‌رۆكێ دیوانا سه‌رۆكاتیا هه‌رێما كوردستانێ فۆئاد حسێن دوپاتكر، ده‌رڤه‌هێن دانوستاندان به‌رانبه‌رى به‌غدا د ڤه‌گه‌رى نه‌ و هه‌رێما كوردستانێ چاڤه‌رێ پێنگاڤه‌كا ئه‌رێنى یه‌ ژ ئالیێ به‌غدا بۆ ده‌ستپێكرنا دانوستاندنا ل سه‌ر بابه‌تێن هه‌لاویستى، دیاركر، هه‌رێم یا ئاماده‌یه‌ بۆ هنارتنا زێده‌كرنا هێزێن پێشمه‌رگه‌ى ل كوبانێ.
فۆئاد حسێن بۆ مالپه‌رێ پارتى دیموكراتى كوردستان گۆت: هێزێن یه‌كینه‌یا پاراستنا گه‌ل ل كوبانێ داخوزیا چه‌كى ژ مه‌ كریه‌ و هه‌تا نها ئه‌و د رازینه‌ ل سه‌ر پێشنیازا سه‌رۆك مه‌سعود بارزانى سه‌باره‌ت هنارتنا هێزێن پێشمه‌رگه‌ى ل گه‌ل چه‌كى بۆ هاریكاریا كوبانێ، به‌لێ هه‌تا نها داخوازا زێه‌كرنا هێزێن پێشمه‌رگه‌ى ژ مه‌ نه‌هاتیه‌ كرن و هه‌كه‌ یا پێدڤى بوو ئه‌م د ئاماده‌ینه‌.
فۆئاد حسێن گۆت: به‌رى پێكئینانا حوكمه‌تا به‌غدا گه‌له‌ك سۆز هاتینه‌ دان ژ ئالیێ حوكمه‌تا به‌غدا ڤه‌ و دڤێت ئه‌و سۆز بهێنه‌ بجهئینان، دانوستاندن دێ ده‌ستپێكه‌ن و دێ دبه‌رده‌وامبن و ده‌رگه‌هێن دانوستاندنا د ڤه‌كرینه‌ هه‌مبه‌رى حوكمه‌تا به‌غدا.

ئه‌ڤرۆنیوز، ئه‌میرئه‌ترووشى:
ئه‌ندامه‌كێ لیژنا پێشمه‌رگه‌ ل په‌رله‌مانێ كوردستانێ تایبه‌ت بۆ ئه‌ڤرۆنیوز راگه‌هاند، سوباهى رۆژا دوشه‌مبى لیژنا وان دێ گه‌نگه‌شێ ل سه‌ر وان بازرگانان كه‌ت یێن كار ل گه‌ل داعش دكه‌ن و دووڤچوونه‌كا توند ل سه‌ر ڤێ مه‌سه‌لێ كه‌ن.
هاورامان حه‌مه‌ ره‌شید، ئه‌ندامێ په‌رله‌مانێ كوردستانێ دیار كر، ل ڤێ دوومایێ ده‌نگویێ وێ یه‌كێ گه‌هشتیه‌ په‌رله‌مانى كو هنده‌ك كه‌سان ل ناڤ هه‌رێمێ ب چه‌ند رێیێن قاچاخ بازرگانى ل گه‌ل داعش كریه‌، ژ به‌ر ڤێ مه‌سه‌لێ دێ سوباهى لیژنا مه‌ گه‌نگه‌شێ ل سه‌ر ڤێ خالێ كه‌ت و ل رۆژا پاشتر دێ ل په‌رله‌مانى گه‌نگه‌شه‌ ل سه‌ر هێته‌ كرن و گۆت: پشتى هینگى دى ئه‌نجامێن گه‌نگه‌شێ بۆ رایا گشتى به‌لاڤ كه‌ین.
ناڤبرى دیاركر كو دێ گه‌نگه‌شه‌ پتر ل سه‌ر هندێ بیت كا چاوا هنده‌ك كه‌سان چه‌ك فرۆتیه‌ داعش و بێگومان دێ دووڤچوونه‌كا هوور ژى ل دووڤ را هه‌بیت.

ئه‌ڤرۆ نیۆز،

سه‌رۆكاتیا هه‌رێما كوردستانێ بۆ ئێكه‌م جار به‌سڤا وه‌زیرێ ده‌رڤه‌یێ سوریا وه‌لید موعه‌لیم دده‌ت.
هه‌كه‌ موعه‌لم راست بێژیت بلا ب وێره‌كى دانپێدانێ ب هه‌بوونا كوردان ل سوریا بكه‌ت، ئه‌م نزانین وه‌لید موعلم ب روو باحسێ ئۆجه‌لان دكه‌ت چونكى سوریا پشكدارى د پیلانا گرتنا ئۆجه‌لانى دا هه‌بوو، وه‌لید موعه‌لم نه‌ ئه‌و كه‌سه‌ یێ كارتێن نیشتیمان په‌روه‌ریێ به‌لاڤ دكه‌ت، خه‌لكێ كوبانێ ژ هه‌موو كه‌سان باشتر دزانن كێ هاریكاریا وان كریه‌، ئێكه‌م ته‌عریبكرنا كوردێن سورى ل سه‌ر ده‌ستێن شوفینزمێن وه‌كى موعه‌لم ده‌سپێكریه‌.