ئه‌ڤرۆ نيوز:
سكرتێرێ يانا زاخۆ يا وه‌رزشى راگه‌هاند كو نوكه ئه‌و كار ل سه‌ر چار راهێنه‌ران دكه‌ن بۆ وه‌رگرتنا ئه‌ركێ راهێنه‌ريا تيمێ ئه‌وا پشكدار دخولا نايابا عيراقێ دا.
خه‌ليل ئه‌حمه‌د سكرتێرێ يانا زاخۆ يا وه‌رزشى د داخۆيانيه‌كێ دا راگه‌هاند كو نوكه ئه‌و كار ل ئه‌ر ئينانا ئێك ژ چار راهێنه‌ران دكه‌ن كو سێ ژ وان عيراقى نه و ئێك ژى به‌رازيلى يه.
پشتى ئه‌نجامێن لاوازێن تيمێ، كارگێريا يانا زاخۆ يا وه‌رزشى راهێنه‌رێ خوه يێ سورى محه‌مه‌د قوه‌يز ژ سه‌ر كارى لادابوو.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا پۆليسێن پارێزگه‌ها دهۆكێ راگه‌هاند كو ل كۆمه‌لگه‌ها خانكێ كوڕه‌كى كچه‌ك دايه به‌ر ساتۆران و زه‌لامه‌كێ 40 سالى ژى خوه خه‌ندقانديه.
هێمن سلێمان به‌رپرسێ راگه‌هاندنێ ل رێڤه‌به‌ريا پۆليسێن پارێزگه‌ها دهۆك راگه‌هاند كو ل كۆمه‌لگه‌ها خانكێ سه‌ر ب قه‌زا سێمێل ڤه كۆڕه‌كێ 16 سالى كچه‌كا 17 سالى دايه به‌ر ساتۆران، خۆشبه‌ختانه گيانێ خوه ژ ده‌ست نه‌دايه و هاتيه ڤه‌گوهاستن بۆ نه‌خۆشخانا ته‌نگاڤيان ل دهۆكێ.
ئاشكه‌را ژى كر كو پشتى ئاماده‌بوونا پۆليێن قه‌زا سێمێل ل جهێ روودانێ، تاوانبار هاتيه ده‌سته‌سه‌ركرن و دانپێدان ب تاوانا كريه.
هێمن سلێمان گۆتژى: “زه‌لامه‌كێ 40 سالى ژى ل شوقێن دابين 2 دووماهى ب ژيانا خوه ئينايه”.
ئاشكه‌را ژى كر كو ل دووڤ ڤه‌كۆلينێن ده‌ستپێكى هه‌ردو كێشه ژ ئه‌گه‌رێ كێشێن جڤاكى نه.
ئه‌ڤرۆ نيوز، ناجی به‌ده‌ل:
وه‌زاره‌تا خواندنا بلند و ڤه‌كولینێن زانستی یا حوكمه‌تا هه‌ریما كوردستانێ راگه‌هاند چه‌ند پوسته‌ك ڤالانه و هه‌ر كه‌سێ مه‌رج ژێ بگرن و حه‌زا وى پۆستى هه‌بيت، دشێت سيڤيێن خوه پێشكێش بكه‌ت.
د. لوقمان محه‌مه‌د هاریكارێ سه‌رۆكێ زانكویا دهۆكێ بۆ ئه‌ڤرۆ نیوز گۆت: “ل گوری بڕیارا وه‌زاره‌تێ هه‌ر كه‌سێ چار سالان ل پوستی خوه دا بۆ دڤێت بهێته گوهورین چ ئه‌و خوه جاره‌كا دی خوه به‌ربژار بكه‌ت یان كه‌سه‌كێ دی بهێته به‌ربژاركرن بو ئه‌وی پوستێن دیاریكری”.
گۆتژی: “هه‌ر كه‌سه‌ك ب تنێ بۆ دو خولان دشێن د ئێك پۆست دابمينيت و پشتى هه‌شت سال ب دووماهى دهێن نه‌شێت خوه به‌ربژێر بكه‌ته‌ڤه”.
هاریكارێ سه‌رۆكێ زانكویێ دازانین ئه‌و پوستێن ل سه‌ر زانكویا دهۆك ڤالان ئه‌ڤێن خواری نه:
1- هاریكارێ سه‌رۆكێ زانكویێ بۆ كارۆبارێن كارگێری
2- راگرێ كولیژا چاندنێ
3-راگرێ كولیژا زانست
4-راگرێ كولیژا نوشداری ڤیته‌رنه‌ری
5-راگرێ كولیژا زانستێن په‌روه‌رده‌یی
6-راگرێ كولیژا نوژداری
7-راگری كولیژا زانستێن مرۆڤایه‌تی
8-راگرێ كولیژا په‌روه‌ردا وه‌رزشی
9-راگرێ كولیژا ئه‌نداریاری و زانستێن كاره‌كی
10-راگری كولیژا په‌رستاری
د. لوقمان دیاركر ل گوری رێنمایان و چاڤپێكه‌تن ل گه‌ل هێته كرن كو دڤێت هه‌لگرێ باوه‌رناما دكتورا بیت دبیاڤێ په‌یوه‌ندیدار دا و پله‌یا زانستی ژ پرۆفیسورێ یاریده‌ر كێمتر نه‌بیت بو یاریده‌رێ سه‌رۆكێ زانكویێ و راگرێن كولیژان.
گۆتژى: “پله‌یا زانستی ژ ماموستا كێمتر نه‌بیت بو راگرێن په‌یمانگه‌هان و خزمه‌تا زانكویێ ژ 10 سالان كێمتر نه‌بیت و شاره‌زایه‌كا باش ل زمانێ ئینگلیزی و عه‌ره‌بی دا هه‌بیت و و كه‌سایه‌تیه‌كا بهێز و شیانێن برێڤه‌برنێ ل ئاسته‌كێ بالا دا هه‌بن”.
ل گوری راگه‌هاندنا وه‌زاره‌تا خواندنا بلند یا هه‌ریمێ هه‌ر كه‌سێ بڤێت به‌شداریی بكه‌ت دشێن سیڤی یین خو بهنێرن بو ئیمه‌یلا jobs@mhe-krg.org دووماهى ژڤان 16\11\2014 یه.
ئه‌ڤرۆ نيوز:
شيره‌تكارێ جڤاتا ئاسايشا هه‌رێما كوردستانێ راگه‌هاند كو ل ده‌ڤه‌رێن شه‌ر لێ هه‌يى، كاودان د باشن پێشمه‌رگه يێن شياين پتريا ده‌ڤه‌رێن ژێر ده‌ستێ داعش بيننه ده‌ر و شياينه گه‌له‌ك ژ كێشێن ده‌سپێكێ چاره بكه‌ين.
مه‌سرۆر بارزانى، شيره‌تكارێ جڤاتا ئاسايشا هه‌رێما كوردستانێ، د ديداره‌كێ دا ل گه‌ل شه‌رقولئه‌وسه‌ت گۆت: “هه‌بوونا مه‌سعود بارزانى سه‌رۆكێ هه‌رێما كوردستانێ ل به‌روكێن شه‌رى، رامانا پشته‌ڤانيا ته‌ماما سه‌رۆكى يه بۆ پێشمه‌رگه‌ى و رۆله‌كێ ئێكجار بلند د وه‌ره‌يا پێشمه‌رگه‌ى دا دكه‌ت د دانانا پلان و سه‌رپه‌رشتيكرنا به‌ره‌يێن شه‌رى و سه‌ره‌دانكرنا پێشمه‌رگه‌ى.
شيره‌تكارێ جڤاتا ئاسايشا هه‌رێما كوردستانێ ته‌كست ل سه‌ر وێ چه‌ندێ كر كو هێزێن پێشمه‌رگه‌ى پێدڤى ب چه‌كێ گران هه‌يه وه‌كو تانك و زريپۆش و تۆپێن گران و فرۆكه و هه‌ليكۆپته‌ران و ئاميرێن ژناڤبرنا بۆمبه و مووشه‌كان.
زێده‌تر گۆت: “ل گه‌ل هندێ كو حوكمه‌تا ناڤه‌ندى بودجه ژى يێ برى، به‌لێ پێشمه‌رگه ل گه‌ل ڤان كاودانان يێ به‌ره‌ڤانيێ ژ خوه دكه‌ت، به‌غدا به‌رپرسه ژ ڤى كاودانێ نوكه هه‌يى، پێدڤيه به‌غدا بودجه‌ى بهنێريت دا خه‌لكى پشت راست كه‌ت و نوكه وه‌رزێ زڤستانێ نێزيك بوويه و هێزێن پێشمه‌گه‌ى پتر پێدڤى ب جلكێن زڤستانێ و پێدڤيێن ژ وى ره‌نگى هه‌يه”.
ده‌رباره‌ى هنارتنا چه‌كى ژ لايێ هێزێن هه‌ڤپه‌يمانان ڤه، مه‌سرۆر بارزانى گۆت: “به‌رده‌وام داخوازێ ژ هه‌ڤپه‌يمانان دكه‌ين كو چه‌كێ گران بده‌نه پێشمه‌رگه‌ى دا كو ب زووترين ده‌م دوژمنى بشكێنين، ئه‌ڤێ دده‌ستێ پێشمه‌رگه‌ى دا چه‌كێ كه‌ڤنه و ئه‌وێ هاتى ژى چه‌كه‌كێ ناڤنجى يه و ته‌قه‌مه‌نينه، ئه‌لمانيا هنده‌ك مووشه‌كێن دژى تانك و زريپۆشان يێن پێشكێشى هه‌رێمێ كرين كو چه‌كێ پێشكه‌فتى نه”.
ده‌رباره‌ى رۆلێ توركيا و په‌يوه‌نديێن هه‌رێما كوردستانێ ل گه‌ل ڤى وه‌لاتى، شيره‌تكارێ جڤاتا ئاسايشا هه‌رێما كوردستانێ خۆيا كر كو توركيا وه‌لاته‌كێ هه‌ڤسۆيێ هه‌رێما كوردستانێ و رۆل هه‌بوويه د پێشخستنا ئابوورا كوردستانێ دا و گۆت: “مه چو كێشه ل گه‌ل توركيا نينه و په‌يوه‌نديێن مه ب باشى ل گه‌ل ب رێڤه دچن”.
سه‌باره‌ت ب هژمارا ئه‌و وه‌لاتيێن كورد يێن ناڤ رێزێن داعش، مه‌سرۆر بارزانى گۆت: “ئه‌م وان هه‌موو كه‌سان دنياسين و هژمارا وان نێزێكى 200 كه‌سايه و هنده‌ك ژى ژ لايێ پێشمه‌رگه‌ى ڤه ل شه‌رى يێن هاتينه كوشتن و هنده‌ك ژى يێن ماين و ئه‌وان خيانه‌ت يا ل گه‌ل و وه‌لات و ئايينێ خوه كرى، ئه‌م ژ خێزانێن وان پتر گرنگيێ ب وان كه‌سان دده‌ين، چونكو چوونه ناڤ داعش ئانكو به‌رزه بوون”.
ده‌رباره‌ى ئازادكرنا ئه‌و ده‌ڤه‌رێن هه‌تا نوكه نه‌هاتينه ئازادكرن ژى وه‌كو شنگال و ده‌شتا نه‌ينه‌وا و تله‌عفه‌ر، مه‌سرۆر بارزانى گۆت: “ئه‌ڤه دێ هێته پێش و ب تنێ ئازادكرنا ڤان ده‌ڤه‌ران نينه، به‌لكو ئامانجا مه ڤه‌گه‌راندنا خه‌لكى يه ژى بۆ وان ده‌ڤه‌ران”.
ل دۆر رۆلێ به‌غدا ژى د هه‌ڤكاريكرنا هه‌رێما كوردستانێ دا د ڤى شه‌رى دا، شيره‌تكارێ جڤاتا ئاسايشا هه‌رێما كوردستانێ، راگه‌هاند: “مخابن ب راستى هه‌تا نوكه مه چو تشت نه‌ديتيه، پێدڤى بوو به‌غدا هاريكاريا هه‌رێمێ د هنارتنا بودجه‌ى دا بكه‌ت، پێدڤى بوو بۆ پێشمه‌رگه‌ى چه‌ك و ته‌قه‌مه‌نيان بهنێريت، به‌لێ چو تشتێ ژ ڤى ره‌نگى مه نه‌ديتيه”.
ئەڤرۆ نیوز، سالار دۆسگی
فلمێ سینەمایی کوردی(بیرەوەریێن سەر بەری) کو ژ دەرھێنانا سینەماکارێ کورد (شەوکەت ئەمین کورکی) خەلاتێ مرواریی رەش کو باشترین فلمێ جیھانا عەرەبی پشکا ھەڤرکیێن سەرەکی ل ھەشتەمین فیستەڤالا نیڤ دەولەتی یا فلمێن ئەبوزەبی وەرگرت و دەمێ وەرگرتنا خەلاتی دا دەرھێنەرێ ناڤبری خەلاتێ خوە پێشکێشی زارۆ و قوربانیێن شەرێ دژی تیرۆرێ دژی چەکدارێن داعش کر کو بووینە قۆربانی.
جھێ ئاماژەکرنێ یە فلمێ ناڤبری بەرھەمێ رێڤەبەریا ھونەرێ سینەمایێ ل دھۆکێ، سەر ب رێڤەبەریا گشتی یا رەوشەنبیری و ھونەری ڤە، ب نوونەراتیا ھەرێما کوردستانێ و ب بەرھەڤبوونا سیناماکارێ کورد (مەمەد ئەکتاش) بەرھەم ھێنەر وسیناریو نڤێسيه.
شەوکەت ئەمین دەرھێنەرێ فلمێ ناڤبری پشتی وەرگرتنا خەلاتی بۆ سازیێن رگەھاندنێ گۆت: “خەلاتێ خوە پێشکێشی زارۆیێن بووینە قوربانی کارەساتێن دژی تیرورستێن داعش دکەم، دیسا خوراگریا خەلکێ کوردستانێ دژی ئەڤان تیرۆرستان”.
ھەڤدەم ئەندامێن لیژنا دادوەر دفیستەڤالا ناڤبری دا پێک ھاتبوون، ژئەکتەرێ ب ناڤ و دەنگێ ھندستانێ (عرفان خان) کو سەرۆکێ لیژنێ بوو، (کینی لریدح) نڤێسەر کەنالێ ئەلجزیرە، (ئێستیۆن شاینێبێرگ) بەرھەم ھێنەر و دەرھێنەر بریتانیا، (کت شۆرتلەند) نڤێسەر و دەرھێنەر ئوسترالیا، (عەلی سلێمان) ئەکتەر ژ فەلەسیتنێ.
فیستەڤالا ئەبوزەبی 197 فلم نیشادان کو ژ 61 وەلاتان پشکداری تێدا کربوو، 23\10٠ دەست پێکربوو و ھەتا 1\11\2014 یا بەردەوام بوو.
ناجی به‌ده‌ل
وه‌زیرێ به‌ره‌ڤانیا عیراقێ ل گه‌ل شانده‌كێ بلندێ وه‌زاره‌تێ گه‌هشته هه‌ولێرا پایته‌خت و بڕياره ل دۆرا چاوانيا روو ب روون و به‌رهنگاربوونا تيرۆرێ ل كوردستانێ و عيراقێ كۆم ببن.
خالید عوبه‌یدى وه‌زیرێ به‌ره‌ڤانیا عیراقێ و شانده‌كێ هه‌ڤالبه‌ند كو پێك هاتینه ژ چه‌ند به‌رپرسه‌كێن بلندێن سه‌ربازی، گه‌هشتنه هه‌ولێرێ و ل گوری زانیاریان ئارمانج ژ سه‌ره‌دانا وه‌زیرێ به‌ره‌ڤانیا عیراقێ، كۆمبوونه ل گه‌ل به‌رپرسێن هه‌رێمێ سه‌باره‌ت ره‌وشا نها یا ئه‌منی یا كوعیراق كه‌تیه ناڤ وهه‌ماهه‌نگیكرن ل سه‌ر چاوانیا روو ب روو بوون و به‌رهه‌نگار بوونا تیرۆریستان ل عیراقێ و كوردستانێ.
ئەڤرۆ نیۆز، سالار دۆسکی:
ل دووڤ دانگۆباسەکێ رۆژناما حوریەت یا تورکی دیارکر یە کو سەرەرایی داھاتێ کەرتێ گەشتیاری یێ وی وەلاتی نوکە تورکیا بەر ب جیھانا سینەمایێ دچیت، سالانە داھاتێ دراما تورکیا ئەو بۆ وەلاتێن جیھانێ دھێتە رەوانەکرن 200 ملیۆن دۆلار.
ئاشکراکر ژی کو ھندەک زنجیرێن دراما تورکی ھەنە ھەتا 100 وەلاتان چووینە ب زمانێن جودا دھێنە وەرگێران، ب ڤی رەنگی تورکیا ل پشت وەلاتێ ئەمریکا دهێت ب ھنارتنا بەرھەمێ خوەیێ درامایێ و سینەمایێ بۆ دەرڤە.
نەڤەشارت ژی کو نوکە تورکیا مژوولی بەرھەمینانا بابەتەکێ رەوشەنبیری یە ب کوژمێ دو ملیار دۆلاران ھەتا 2023 دێ ب دووماھی ھێت.
ل دووڤ راگەھاندنێن وی وەلاتی، تورکیا گرنگیەکا تایبەت دەتە پێشەسازیا سینەمایێ و دراما تەلەڤزیۆنێ و ئەڤە دبیتە داھاتەکێ ھەرە گرنگ بۆ وی وەلاتی.
ئەڤرۆ نیۆز، سالار دۆسکی
سەرۆکێ تیپا دھۆکێ یا مۆزیکێ، جەمال محەمەد ئەدیب دیارکر کو سترانا ئەم ھەمی پێشمەرگەینە ، ژ پەیڤ و ئاواز و گۆتنا ھونەرمەندێ مەزن تەحسین تاھای، وەک تیپا دھۆکێ ب دابەشکرنەکا نوو کلیپ کریە و رازیبوونا زاریێن رەحمەتی ھاتیە وەرگرتن، وێنەگرتن و دەرھێنانا عادل ئاکرەیی بوویە.
سەرۆکێ تیپا دھۆکێ گۆتژی: سترانا ئەم ھەمی پێشمەرگەینە ل ھەموو کەنالێن کوردستانێ ھاتیە بەلاڤەکرن، ب رێیا ئەڤرۆ نیۆز سوپاسیا ھەڤالێ ھونەرمەندێ مەزن (تەحسین تاھا)ی کر کو کاک (خورشید پیرۆمەری) کو ھندەک پەیڤێن سترانێ دبەرزەبوون و ب رێیا وی شیان کوم کەن و وەربگرن.
به‌رهه‌ڤكرن، ناجی به‌ده‌ل:
مالپه‌رێ مكسات يێ عه‌ره‌بى د راپۆرته‌كێ دا به‌حس ل نه‌ژادێ هنده‌ك ژ ناڤدارێن جيهانێ به‌لاڤكريه و به‌حس ل كيم كارداشيان كريه كو ئه‌و ب نه‌ژادێ خوه ئه‌رمه‌نيه.
كارداشيان يا 29 سالى كچا پارێزه‌رێ ئه‌رمه‌نى رۆبرت كارداشيانه ئه‌و به‌ره‌ڤانى ژ ياريكه‌ر ئۆ جى سمبسون كر د دادگه‌هه‌كا ناڤدار دا ب تۆمه‌تا كوشتنا هه‌ڤژينا خوه، دايكا وێ ژى يا سكوتله‌ندى يه و ب نه‌ژادێ خوه هۆله‌ندى يه.
به‌ریا نها كیم كارداشیان شانازی ب وێ ئێكێ كریه كو ب ره‌گه‌ز ئه‌رمه‌نی یه و ب تنێ ئاماژه ب وێ چه‌ندێ دایه كو مه‌زناتی و سه‌رنج راكێشیا لاشێ وێ ژ وان وه‌ك میرات بۆ مایه.
به‌لێ ئه‌ڤى مالپه‌رى پێزانينێن زێده‌تر به‌لاڤ نه‌كرينه كا ئايا كوردێ ئه‌رمه‌نه يان ژى نه، به‌لێ مالپه‌رێ خه‌لك ئه‌وێ ژ زارده‌ڤێ هه‌مان مالپه‌ر به‌لاڤكرى، ئاماژه ب وێ چه‌ندێ كريه كو كیم كارداشیان كچا رۆبه‌رت كارداشیانه و كو ب ره‌گه‌ز ئه‌رمه‌نی یه و خه‌لكێ باژێرێ قارس بوو و كو ئه‌وی ده‌مێ به‌شه‌ك بوو ژ ئه‌رمه‌نیا و د ناڤ ئیمپراتوریه‌تا رۆسیدا و نها به‌شه‌كه ژ باكوورێ كوردستانێ.
باژێرێ قارس ئێكه ژ باژێرێن رۆژهه‌لاتا ئه‌نه‌دولی و هژمارا ئاكنجیێن وی زیده‌تره ژ 300 هه‌زار كه‌انه و كو 95% كوردن.
به‌هه‌ڤكرن، ناجی به‌ده‌ل:
یونسكویێ راگه‌هاند كو 700 رۆژنامه‌نڤیس ل ده‌مێ ئه‌نجامدانا كارێن خودا دڤان 10 سالیێن داویێ دا هاتینه كوشتن.
رێكخراوا په‌روه‌رده و زانست و ره‌وشه‌نبیری یا نه‌ته‌وه‌ئێنكگرتی كو ب یونسكو دهێته نیاسین ل رۆژا دووماهیێ ئینان ب ده‌ربازبوونا ئه‌و تاوانبارێن ده‌ست درێژی دكه‌نه سه‌ر رۆژنامه‌نڤیسان كو ئه‌ڤرۆ دوى چريا دويێ دكه‌ت راگه‌هاند: “ژ ئه‌وان تاوانێن هه‌بمه‌ر رۆژنامه‌نڤیسان دئیته‌كرن ژ 90% یا تاوانباران ب ئه‌گه‌رێ نه‌بوونا گرۆڤێن پێدڤی و نه‌بوونا ئیراده‌یا سیاسی رزگار دبن و ناهێنه دادگه‌هیكرن”.
رێكخراوێ رایا ته‌ڤایا جیهانی رادكێشیت بو ئه‌وی بارۆدوخێ نا ساخله‌م یێ رۆژنامه‌نڤیسان و كارێن ئه‌نجام دده‌ن ب تایبه‌تی ل وه‌لاتێن شه‌ر و توندوتیژی تێدانه.
ئه‌ڤرۆ ل دڤێ هه‌لكه‌فتی دا ل سه‌ر ته‌ڤایا جیهانێ كور و سیمینار كومبونێن جودا ل ده‌زگه‌ه و دامه‌زراوێن میدیای دێ هێنه سازكرن.
نيشاندان