ئه‌ڤرۆ نيوز، هه‌ژار مه‌عرۆف:

سه‌رۆكێ يانا زاخۆ راگه‌هاند كو ژ به‌ر ئه‌نجامێن لاوازێن تيما وان يا ته‌پا پێ ئه‌وا پشكدار دخولا نايابا عيراقێ دا، ئه‌وان گوهۆڕينێن مه‌زن د تيمێ دا كرن و ل حه‌فتيا بهێت دێ راهێنه‌رێ تيمى و هاريكارێ وى ژى هێنه‌ گوهۆڕين.

عه‌بدولوه‌هاب محه‌مه‌د عيسا، سه‌رۆكێ يانا زاخۆ د داخۆيانيه‌كێ دا، بۆ ئه‌ڤرۆ نيوز گۆت: “تيما مه‌ ل وه‌رزێ ئه‌ڤ ساله‌ نه‌يا باشه‌ و ژ سه‌رجه‌مێ شه‌ش ياريان ب تنێ چار خال تۆماركرينه‌ و ژ به‌ر هندێ ژى ئه‌م وه‌كو كارگێريا يانا زاخۆ روونشيت و چه‌ند گوهؤڕينێن به‌رچاڤ د تيمێ دا كرن”.

زێده‌تر گۆت: “ل دووڤ بڕيارا ده‌سته‌يا كارگێرى هه‌ر ئێك ژ پلاڤيۆ و برۆنۆ ل هێلا هێرشبه‌ريێ و فابيۆ ل هێلا به‌ره‌ڤانيێ كو سێ پشه‌كارێن به‌رزايلى نه‌ ل گه‌ل هه‌ڤالێ وان راهێنه‌رێ شيانێن له‌شى ژ تيمێ ده‌رخستن، ژ به‌ر كو نه‌ ل دووڤ داخوازا يانێ بوون، ل جهێ وان ژى دێ سێ پيشه‌كارێن دى يێن خودان ئه‌زمۆن په‌يوه‌نديێ ب يانێ كه‌ن”.

ل دۆر ده‌ست ژ كاركێشانا سه‌په‌رشتێ تيمێ ژى، سه‌رۆكێ يانا زاخۆ گۆت: “ل دووڤ بڕيارا ده‌سته‌يا كارگێرى ده‌ست ژ كاركێشانا سه‌رپه‌رشتێ تيمێ خه‌ليل ئه‌حمه‌د نه‌هاته‌ قه‌بوولكرن و دێ ل سه‌ر كارێ خوه‌ يێ به‌رده‌وام بيت”.

نه‌ڤه‌شارت ژى كو ژ به‌ر ئاستێ ياريكه‌ران يێ لاواز ل ئه‌ڤ ساله‌ ئه‌وان وه‌كو ده‌سته‌يا كارگێرى وه‌كو سزادان بۆ ياريكه‌ران، كۆژمێ 10% ژ گرێبه‌ستا هه‌موو ياريكه‌ران ژ به‌ر بڕى.

ل دووماهيێ ژى عه‌بدولوه‌هان محه‌مه‌د عيسا گۆت: “دهێته‌ چاڤه‌رێكرن د حه‌فتيا بهێت دا، هه‌ر ئێك ژ يێ سورى محه‌مه‌د قوه‌يز راهێنه‌رێ تيمێ و هاريكارێ وى يێ عيراقى حه‌يده‌ر مه‌حمود ژى بهێنه‌ گوهۆڕين”.