ئه‌ڤرۆ نیۆز:
پارتا ئێكه‌تیا دیموكراتى یا كوردێن سورى كو نها شه‌رڤانێن وێ ل موبانێ دژى اعشێ شه‌رى دكه‌ن، دحواز ژ وه‌لاتێ فه‌ره‌نسا كریه گڤاشتنا ل سه‌ر سه‌رۆكێ توركیا ره‌جه‌ب ته‌یب ئه‌ردوگانى د ده‌مێ سه‌ره‌دانا وێ دا بۆ پاریس بكه‌ن، داكو رێ بده‌ت هاریكاریێن پێدڤێ بۆ باژێرێ كوبانێ بهێنه هنارتن.
ننونه‌رێ پارتا ناڤبرى ل فه‌ره‌نسا خالد عیساى گۆت: هێرشێن ئه‌سمانى یێن هێزێن هه‌ڤپه‌یمانان شه‌ر ل سه‌ر مه سڤككرن، به‌لێ چاره ئه‌و چه‌ك بگه‌هێته ده‌ستێن شه‌رڤانان بۆ به‌ره‌ڤانیكرنێ ژ كوبانێ، خالد عیساى هه‌روه‌سا وه‌لاتێ توركیا تومه‌تبار كر، كو توركیا رێگره هه‌مبه‌رى گه‌هشاتنا هاریكاریان بۆ كوبانێ و پشته‌ڤانیا چه‌كدارێن داعشێ ب نهێنى دكه‌ت.
هه‌روه‌سا گۆت: پشته‌ڤانیا مه ب لیمه‌تیا سه‌رۆك هولاند هه‌یه بۆ رازیكرنا ئه‌ردوگان كو په‌یوه‌ندیێن خوه ل گه‌ل تیرورستان نه‌هێلیت و رێگر نه‌بیت هه‌مبه‌رى هنارتنا هاریكاریان بۆ كوبانێ .
نووترين نووچه
- هیڤیدارین ئەنجامێن هەلبژارتنان د خزمەتا ڤەژاندنا هەرێمێ دا بن
- پێدڤییە وەلاتی ژ ململانێیا هەرێمی دووربێخین
- كۆمبوونا مەسرور بارزانی و سۆدانی دێ ئەنجامێن باش هەبن
- سەرۆكێ هەرێما كوردستانێ و قونسلێ ئەلمانیا پێكئینانا حوكمەتا هەرێمێ گەنگەشەكر
- نێچیرڤان بارزانی پێشوازی ل قونسلێ مسرێ كر
- مەسرور بارزانی بۆ سۆدانی: پێدڤییە مووچە ژ ناكۆكییا سیاسی بهێتە دوورئێخستن
- گۆتن و کریارێن دەستهەلاتێ ل دۆر پرسا کوردی گەلەک ژێک دوورن
- سەرۆك بارزانی: دانیێل میتێران رۆلەكێ گەلەك مەزن د بەرگریكرنێ ژ دۆزا گەلێ كورد دا هەبوو
- نێچیرڤان بارزانی: پێکڤە دێ شێین روو ب روویێ گوهۆڕینا سەقای بین
- پێدڤییە سەرژمێری بۆ مەبەستێن سیاسی نەهێتە بكارئینان
سه‌ره‌كى Twitter
جڤاتا پارێزگه‌ها نینه‌وا 7 داخوازى ژ محه‌مه‌د ئه‌لغبان كرن
ئه‌ڤرۆ نیۆز:
پشتى جڤاتا پارێزگه‌ها نه‌ینه‌وا ل گه‌ل وه‌زیرێ ناڤخوه‌یا عیراقێ محه‌مه‌د ئه‌لغبان كۆمبوون، وه‌كى به‌ره‌ڤانیكرنه‌ك ژ مافێن خه‌لكێ پارێزگه‌ها ناڤبرى یێنئ ئاوه‌ره حه‌فت دخاوازى ژ وه‌زیرى ناڤخوه‌یێ عیراقێ هاتن كرن، كو بڤى ره‌نگێ خوارێ بوون.
• بنگه‌هێ مه‌شق و راهێنانا هێزا ئازادكرنا باژێرى مووسل بهێته پڕچه‌ك كرن.
• بودجه‌كا تایبه‌ت بوچ بنگه‌هێ ناڤبرى بهێته دانان.
• هنده‌ك بنگه‌هێن دى ژى ب هه‌مان مه‌ره‌م ل ده‌ڤه‌رێن بهێنه ڤه‌كرن؟
• هه‌موو كارمه‌ندێن فرقا 3 یا پۆلیسێن فیدرالى یێن خه‌لكێ پارێزگه‌ها نه‌ینه‌وا بۆ بنگه‌هێ ناڤبرى بهێنه ڤه‌گوهاستن بۆ پڕكرنا ڤالاهیا ل مووسل.
• ڤه‌كرنا لقه‌كا فه‌رمانگه‌ها ره‌گه‌زناما و باره‌ێ كه‌سایه‌تێ ل ده‌ڤه‌رێن ته‌نا بۆ برێڤه‌برنا كاروبارێن ئاوه‌ریان.
• لقه‌كا پاسپۆرتان ل ئێگ قه‌زایێن دهوكێ بۆ خه‌لكێ نه‌ینه‌وا بهێته ڤه‌كرن.
• مووچێن هه‌موو كارمه‌ندێن پۆلیس و هه‌موو كارمه‌ندێن دى یێن حوكمه‌تێ بهێنه مه‌زخاتن.
• پێداچوون ل سه‌ر برَیارا خانه‌نشینكرنا 103 ئه‌فسه‌رێن خه‌لكێ نه‌ینه‌وا بهێته كرن.
ژئالیێ خوه‌ڤه وه‌زیرێ ناڤخوه‌یا عیراقێ محه‌مه‌د ئه‌لغبان خوه‌شحالیا خوه بۆ ئاماده‌بوونا هه‌موو ئه‌ندامێن جڤاتا پارێزگه‌ها نه‌ینه‌وا بۆ به‌رڤانیكرن و ئازدیا باژیرێ مووسل دیاركر، و سۆز دت هه‌موو داخوازیێن وان بهێنه بجهئینان.
25 قوتابیێن باژێرێ كوبانێ هاتن ئازادكرن
ئه‌ڤرۆ نیۆز:
چه‌كدارێن تیرۆرست تێن داعشێ 25 قوتابیێن باژێرێ مه‌نبج كو ژیێن وان د ناڤبه‌را 12 هه‌تا 15 سالیێ دانه هاتن ئازادكرن، قوتابیێن به‌رى نها ل رێككه‌فتى 29/ 5/ 2014 ل گه‌ل 148 قوتابیێن دى ب رێیا ڤه‌گه‌ریانا وان ژ باژێرێ حه‌له‌بێ بۆ ئه‌نجامدانا ئه‌زمونێن خواندنا بنه‌ره‌تى هاتبوون ده‌سته‌سه‌كرن.
هه‌روه‌سا هاته راگه‌هاندن، چه‌كدارێن داعشێ ئه‌و 25 قوتابیێن مایى ژ هژمارا 148 هه‌موو ئازادكرن، لێ پشتى ئه‌و قوتابى خستینه دناڤ خوله‌كا تایبه‌ت ب ئاموژگاریێن جیهادى و شوشتنا مه‌ژى قوتابیان و هندانا وانا ل سه‌ر كریارێن تیرۆرى و شه‌رێ دژى موته‌دان وه‌كى ئه‌و دبێژن. هه‌ژ كۆتنێ یه هێشتا چه‌كدارێن داعشێ 400 وه‌لاتیێن سڤیل یێن كوردێن سورى دده‌ستان دا ماینه كو به‌رى ساله‌كێ ل سه‌ر ریێن سه‌ره‌كى یێن هاتن و چونى هاتینه گرتن.
پێشمه‌رگه و شه‌رڤانێن كوبانێ ژۆره‌كا كریارى یا هه‌ڤپشك دورستكرن
ئه‌ڤرۆ نیۆز:
ژ بۆ هه‌ماهنگیا د ناڤبه‌را هه‌ردو ئالیان، پێشمه‌رگێ هه‌رێمار كوردستانێ و هێزێن یه‌كینه‌یا پاراستنا گه‌ل مژوولێ دورستكرنا ژۆره‌كا كریارێن له‌شكرى یێن هه‌ڤپشك دانه دژى چه‌كدارێن داعشێ.
ژێده‌رێ چاڤدێریا مافێن مرۆڤى ل سوریا به‌لاڤكر، بۆ ئه‌نجامدانا كاره‌كێ هه‌ڤپشك د پرۆسا شه‌رێ دژى چه‌كدراێن داعشێ هه‌ردو هێزێن پێشمه‌رگه و یه‌كینه‌یا پاراستنا گه‌ل به‌رهه‌ڤیێن خوه دكه‌ن كو هه‌تا نها ب تنێ 10 پێشمه‌رگێن هه‌رێما كوردستانێ چووینه دناڤا كوبانێ دا ب رێیا ده‌رگه‌هێ سنورى یێ ئالیێ توركیا، هه‌روه‌سا خوه‌یاكر ئه‌ڤه به‌رهه‌ڤیه بۆ ده‌ربازكرنا هه‌موو پێشمه‌رگێن مایى ل سه‌ر سنورى ل گه‌ل هه‌موو چه‌كێ پێشمه‌رگه‌ى.
ژ ئالیه‌َكێ دیڤه راگه‌هاندن، پشتى شه‌رۆپێكدادانێن دژوار ل كوبانێ چه‌كارێن داعشێ نه‌شیان تاخێ گومركا ل باژێرێ كوبانێ كونترۆل بكه‌ن و ب ده‌هان چه‌كدراێن داعشێ دوى شه‌رى دا هاتینه كوشتن، هێزێن یه‌كینه‌یا پاراستنا گه‌ل شیان هه‌موو ته‌رمێن چه‌كدارێن داعشێ ب ئالیێ خوه دا بكێشن.
150 ته‌رمێن هۆزه‌كا سونى یا به‌رهنگارى داعشێ هاتنه دیتن
ئه‌ڤرۆ نیۆز:
به‌رپرسه‌كێ ئێمناهیا عیراقێ راگه‌هاند، ئه‌ڤرۆ ته‌رمێن 150 كه‌سێن ژ هۆزه‌كا عه‌ربى یا سنورى كو به‌رهنگارى چه‌كدارێن داعشێ ببون هاتینه دیتن كو دناڤ زیاره‌تێن ب كوم هاتبوون ڤه‌شارتن.
به‌رپرسێ بنگه‌هێ پرۆرسا پۆلیسیان و به‌رپرسه‌كێ ئێمناهیێ ژى بۆ ئاژانسا رۆیته‌رز گۆتن: تیرۆرستێن داعشێ 150 زه‌لامێن گوندێن وان یێن ده‌وروبه‌ێن باژێرێ رومادى دسته‌سه‌ركرینه و بۆ جهه‌كێ نه‌دیار هاتینه ڤه‌گوهاستن، پاشێ ته‌رمێن وانا ب ڤه‌شارتى هاتینه دیتن.
جه‌نه‌رال ئالن: پێشمه‌رگه ناهێلیت كوبانێ ب كه‌فیت
ئه‌ڤرۆ نیۆز:
جه‌نه‌رالێ ئه‌مریكى یێ خانه‌نشینكرى جون ئالن رێكخه‌رێ بزاڤا نێڤده‌ولى دژى رێكخستنا داعشێ راگه‌هاند، هێزا پێشمه‌رگه‌ى دێ رێگربیت هه‌مبه‌رى كه‌فتنا باژێرێ كوبانێ یا سنۆرى دده‌ستێن داعشێ دا.
جه‌نه‌رالێ ئه‌مریكى د هه‌ڤدیتنه‌كێ دا ل گه‌ل كه‌نالێ (ئه‌لعه‌ره‌بیه) گۆت: ئه‌م باوه‌رناكه‌ین كوبانێ به‌ر ب كه‌فتنێ ڤه بچیت، هه‌روه‌سا دیاركر، چوونا پێشمه‌رگه‌ى دێ رێگریێ ل هه‌مبه‌رى وێ كه‌فتنێ كه‌ت، هه‌ڤده‌م چوونا پێشمه‌رگه‌ى بۆ كوبانێ، به‌رپرسه‌كێ كورد كو نه‌ڤیا ناڤێ خوه ئاشكرا بكه‌ت دوپاتكر، 150 چه‌كدارێن له‌شكرێ ئازادێ سوریا ب رێیا سنورى ب شه‌ڤ چووینه دناڤ كوبانێ دا ل ده‌ربازگه‌ها مورشد بینار یا سنورى.
هه‌رێم و ئه‌مريكا دێ رێگريێ ل ره‌ڤاندنا په‌ترۆلا داعش كه‌ن
ئه‌ڤرۆ نيوز:
به‌رپرسه‌كێ مه‌زنێ ئه‌مريكى راگه‌هاند كو ئه‌مريكا و حوكمه‌تا هه‌رێما كوردستانێ ب رژدى كار ل سه‌ر راوه‌ستاندنا ره‌ڤاندنا په‌ترۆلێ ژ لايێ داعش ڤه دكه‌ن.
چه‌كدارێن داعش پێشوه‌خت ده‌ست ب سه‌ر هنده‌ك بير و پالاوگه‌هێن په‌ترۆلێ ل باكوورێ عيراقێ دا گرتينه و ب رێيا تۆڕێن ره‌ڤاندنا په‌ترۆلێ هنده‌ك ژ ژێده‌رێ خوه ژ وێرێ ب ده‌ست ڤه دئێخيت.
رێكخه‌رێ كاروبارێن ئه‌مريكا بۆ وزێ، ئه‌موس هۆكستاين، د كۆنگرێ په‌ترۆلێ دا بۆ رۆيترز گۆت: “ئه‌م يێ ل گه‌ل حوكمه‌تا هه‌رێما كوردستانێ كار دكه‌ين دا كو ئێدى داعش په‌ترۆلێ نه‌ره‌ڤينيت”.
زێده‌تر گۆت: “بۆ ئه‌مريكا و وه‌لاتێن نێڤده‌وله‌تى و هه‌رێمێ گه‌له‌ك يا گرنگه ئه‌ڤ پشته‌ڤانيا داعش بهێته بنبڕكرن و ژ بوو ڤێ چه‌ندێ بزاڤ بهێنه كرن”، ئاشكه‌ر ژى كر كو حوكمه‌تا عيراقێ هنده‌ك كه‌س ب ڤێ تۆمه‌تێ ده‌سته‌سه‌ر كرينه ژى.
دا زانين ژى كو ئه‌مريكا ل گه‌ل وه‌لاتيێن هه‌ڤسۆيێن عيراقێ و سوريا ژى روونشتيه ب مه‌ره‌ما ژ ناڤبرنا ڤێ هاريكاريێ.
فلمه فيستڤالا دهۆك ئه‌ڤ ساله ناهێته كرن
ئه‌ڤرۆ نيوز، رێوار مزوورى:
رێڤه‌به‌رێ سينه‌مايێ ل پارێزگه‌ها دهۆكێ راگه‌هاند كو ئه‌ڤ ساله فلمه فيستڤالا دهۆك ناهێته كرن.
عادل عه‌بدولره‌حمان رێڤه‌به‌رێ سينه‌مايێ ل پارێزگه‌ها دهۆكێ بۆ ئه‌ڤرۆ نيوز گۆت: “ئه‌ڤ ساله فلمه فيستڤالا دهۆك ناهێته كرن”، ئه‌وا ئه‌ڤه دو سال بوو ل ڤى ماوه‌ى دهاته گێران”.
رێڤه‌به‌رێ سينه‌مايێ ل پارێزگه‌ها دهۆكێ ل دۆر ئه‌گه‌رێن ئه‌نجام نه‌دانێ گۆت: “هه‌ر ژ به‌ر ره‌وشا نوكه يا كوردستان تێدا دبۆريت نه‌يا هندێ يه كارێن ژ ڤى ره‌نگى بهێنه ئه‌نجام دان و لايه‌نێ ئابوورى ژى نه‌يێ هاريكار بوو بۆ ڤان ره‌نگه كاران”.
بارزانى: د ئاماده‌ينه هێزه‌كا زێده‌تر بهنێرينه كۆبانێ
ئه‌ڤرۆ نيوز:
ل سه‌رچوونا پێشمه‌رگه بۆ كۆبانێ، مه‌سعود بارزانى، سه‌رۆكێ هه‌رێما كوردستانێ په‌يامه‌ك به‌لاڤكر و تێدا ئاشكه‌را كر كو په‌لامارا داعش بۆ سه‌ر هه‌رێما كوردستانێ و رۆژئاڤايێ كوردستانێ ئه‌و دره‌نده‌يى و بێره‌حمى به‌رامبه‌ر گه‌لێ كورد ئه‌نجام دايه و زۆر ب رۆهنى نيشان دده‌ت كو تيرۆرستێن داعش نه ب تنێ ژ لايێ ئاينى ڤه به‌لكو ژ دژى ئاينى و ره‌گه‌زپه‌رستيێ نه.
ده‌قێ په‌ياما سه‌رۆك بارزانى:
ب ناڤێ خودێ مه‌زن و دلۆڤان
هێرشا تيرۆرستى يا داعش بۆ سه‌ر هه‌رێما كوردستانێ و رۆژئاڤايێ كوردستانێ ئه‌و درنده‌يى و بێره‌حميا تيرۆرستان ل به‌رامبه‌ر گه‌لێ كورد ئه‌نجام دا، زۆر ب روونى نيشان دا كو تيرۆرستێن داعش ب تنێ ژ روويێ ئاينى ڤه د تۆندڕه‌و نينن، به‌لكو هه‌لگرێن هه‌ردو تۆندڕه‌ويا ئاينى و ره‌گه‌زپه‌رستيا نه‌ته‌وه‌ينه. هه‌ر ژ به‌ر هندێ ژى هه‌رێما كوردستانێ و رۆژئاڤاهيێ كوردستانێ كره ئارمانج و هێرش كريه سه‌ر گه‌لێ كورد.
جهێ شانازيێ يه نوكه گه‌لێ كوردستانێ ل رۆژئاڤا و هه‌رێما كوردستانێ ب ره‌نگه‌كێ قه‌هره‌مانانه به‌ره‌ڤانيێ ژ خوه دكه‌ن و تيرۆرستێن داعش تووشى شكه‌ستنێ كرينه. د ده‌مه‌كى دا كو كۆبانێ ژ لايێ تيرۆرستان ڤه كه‌فتيه به‌ر هێرشان، گه‌هاندنا هاريكارى و گه‌هاندنا هاريكاريان بۆ خووشك و برايێن مه ئه‌ركه‌كێ نه‌ته‌وه‌ى بوو. به‌لێ ژ ئه‌گه‌رێ دووريا جوگرافى و ئابلۆقه‌دانا كۆبانێ ژ لايێ تيرۆرستان ڤه و گه‌هاندنا هاريكاريان ب ره‌نگه‌كێ ئێكسه‌ر گه‌له‌ك يا ب زه‌حمه‌ت بوو، هه‌ر ژ به‌ر هندێ ژى مه بزاڤ كر ل گه‌ل دوستێن گه‌لێ مه بزاڤێ بكه‌ين كۆبانێ نه‌كه‌ڤيته ده‌ستێ تيرۆرستان.
ب ده‌نگاهاتنا هه‌ڤپه‌يمانان و وه‌شاندنا دربێن ئه‌سمانى و هه‌روه‌سا گه‌هاندنا هاريكاريێن سه‌ربازيێن هه‌رێمێ ژ لايێ فرۆكێن ئه‌مريكى ڤه، پێنگاڤه‌كا كاريگه‌ر بوو و جهێ سۆپاس و پێزانينان بوو هاريكاريا شه‌رڤانێن كۆبانێ كرى دا هێرشێن داعش بشكێنن.
چوونا هێزا پێشمه‌رگه‌ى ژى بۆ كۆبانێ بێ ره‌زامه‌نديا توريكا و هه‌ڤكاريا ئه‌وان و ئه‌مريكا دشيان دا نه‌بوو، به‌رێز جۆن كێرى وه‌زيرێ ده‌رڤه يێ ئه‌مريكا د په‌يوه‌نديه‌كا تله‌فۆنى دا راگه‌هاند كو ل گه‌ل توركيا نێزێكه دێ رێككه‌ڤن بۆ هنارتنا پێشمه‌رگه‌ى د ناڤ ئه‌ردێ وێ دا، پشتى چه‌ندين كۆمبوونێن دوقولى و سێ قولى د ناڤبه‌را به‌رپرسێن ئه‌مريكا و توركيا و هه‌رێمێ دا، ب فه‌رمى ئاگه‌هدار كرين كو توركيا رازى بوويه و دێ هاريكاريا چوونا هێزا پێشمه‌رگه‌ى بۆ ناڤ كۆبانێ كه‌ت و ئه‌مريكا ژى پشته‌ڤانيا خوه بۆ ڤێ پێنگاڤا ده‌ربڕى، ئه‌ڤ بابه‌ته ل گه‌ل لايه‌نێن سياسى هاته به‌حسكرن و داخواز ل په‌رله‌مانێ كوردستانێ كر كو رێ ب هنارتنا هێزێ بده‌ت و په‌ره‌لمانى ژى ره‌زامه‌ندى ل سه‌ر ده‌ربڕى، چونكو ب گۆره‌ى قانوونى هنارتنا هێزا پێشمه‌رگه‌ى بۆ ده‌رڤه‌ى هه‌رێمێ پێدڤيه ب ره‌زامه‌نديا په‌رله‌مانێ كوردستانێ بيت.
ديسا مه په‌يوه‌ندى ب سه‌ركرداتيا په‌يه‌كێ كر كو ئه‌م د ئاماده‌ينه هێزه‌كا زۆر يا پێشمه‌رگه‌ى بۆ كۆبانێ بهنێرين، ئه‌وان د به‌رسڤا مه دا گۆت مه پێدڤى ب هێزا شه‌ركه‌را پێشمه‌رگه‌ى نينه، به‌لكۆ مه پێدڤياتى ب هێزا پشته‌ڤانيێ يه. ژ به‌ر هندێ ل سه‌ر داخوازا ئه‌وان بڕيار هاته دان هێزه‌كا پێشته‌ڤانيێ يا پێشمه‌رگه‌ى بۆ كۆبانێ بهنێرن.
ئه‌ڤ هێزا نوكه به‌ر ب كۆبانێ ب رێكه‌فتى ب تنێ هێزه‌كا پێشته‌ڤانيێ يه و بۆ دابينكرنا ئاگرى يه. داخوازا سه‌ركه‌فتنێ بۆ وان دكه‌م و هيڤيدارم بشێن هاريكاريا باشا خووشك و برايێن خوه بكه‌ن. هه‌ر ده‌مێ كاودانێن مه‌يدانى پێدڤى بكه‌ن و داخوازا هێزا زێده‌تر ژ مه بكه‌ن و رێ هه‌بيت، دێ هێزێن زێده‌ترێن پێشمه‌رگه‌ى بۆ پاراستنا كۆبانێ و تێكشكاندنا تيرۆرستان ل رۆژئاڤا ره‌وانه كه‌ين.
بۆ هه‌رێما كوردستانێ و پێشمه‌رگێ كوردستانێ شانازيه‌كا مه‌زنه بشێن ل هه‌ر جهه‌كى هاريكاريا باژێره‌كى يان گۆنده‌كى يان كه‌سه‌كێ كوردستانى بده‌ن. شنازيه و ل جهێ مرۆڤايه‌تيێ شه‌رێ دڕنده‌ترين رێكخراوا تيرۆرستى بده‌ن.
مسعود بارزانی
سەرۆكی هەرێمی كوردستان
30ـی 10ـی 2014
جوان حاجۆ بۆ ئەڤرۆ : باشوور دەولەتە
ئەڤرۆ، سالار دۆسکی:
ھونەرمەندێ کوردیێ دووری وەلات جوان حاجۆ چەند رۆژە ب سەردانەکێ ل باشوورێ کوردستانێ یە، د ھەڤدیتنەکێ دا دگەل بەرپەرێ ھونەریێ ئەڤرۆ دیارکر کو ھاتنا وی بۆ ھەرێما کوردستانێ بۆ دو مەرەمان بوویە، ئێک چوونا وی بۆ ناڤ پێشمەرگێ کوردستانێ و بەرۆکێن شەری کو سوپاسیا وان بکەت بۆ بەرخودانا وان دژی دوژمنێ مللەتێ کورد، دیسا ھاتنا وی بۆ وێنەکرنا سترانەکێ یە ل سەر پێشمەرگەی کو ژ پەیڤێن (بورھان زێباری) ئاواز مۆزیک(جوان حاجۆ).
جوان گۆتژی: دەنگێ مە دگەل خەلکێ کۆبانێ وقامشلۆیێ و عەفرینێ و عامۆدێ و سەرێ کانیێ یە، دوژمنێ مە شەرێ کوردان دکەت ژ کۆبانێ ھەتا دگەھیتە خانەقینێ، ئەڤرۆ بتنێ ئێکەتیا کوردان پێدڤیە بھێتە ئاڤاکرن، کۆبانێ قارەمانیەکا مەزن دکەن و سەرێ مە پێ بلندە و دیسا پێدڤیە کوردێن رۆژئاڤا پەیوەندیێن خوە دگەل کوردستانا باشوور خورت بکەن، چونکە باشوور دەولەتەکە ھنارتنا پێشمەرگەی بۆ کوبانێ خزمەتەکا نەتەوەیی یە، چەند کورد نێزیکی ھەڤبن دێ باشتربیت.
ل دۆر رێکەفتناما پارێزگەھا دھۆکێ ژی یا کوردێن رۆژئاڤا، جوان حاجۆی سوپاسیێن خوە ئاراستەی سەرۆکێ ھەرێما کوردستانێ مەسعود بارزانی کرن کو ھەردەم ھەلویستێ وی نێزیکرنا کوردانە، خواست ژی جڤینێن پارتێن کوردی ل رۆژئاڤا ئەنجامێن باش ھەبن.
جوان حاجۆی گۆت: سەرکەفتن سەرکەفتنا مللەتێ کوردە ژ کۆبانێ ھەتا مخموورێ و دھۆکێ و کەرکووکێ و سلێمانیێ و ھەر چوار پارچێن کوردستانێ و مللەتێ کورد دێ گەھیتە ئارمانجا خوە و پاشەرۆژەکا گەش ھەیە و ھیڤدارم دەولەتا کوردی کو مافێ مەیە بھێتە ئاڤاکرن.
جوان حاجۆی گۆتژی: شەرەفەکا مەزنە ل کوردستانا باشوور بمینم، براو خووشکێن من ل ڤێرەنە و وەلاتێ منە، ئامادە بھێم و ھیڤدارم چێبێبت ول باشوور بمینم و دگەل خەلکێ خوە بژیم، ھونەرمەند جوان حاجۆ دووماھیێ ئاشکراکر کو ل سالا ١٩٨٠ وەرە ل رۆژئاڤایێ کوردستانێ دەرکەفتی یە و بەر ب وەلاتێ سوید چوویە.
نيشاندان
WP Facebook Auto Publish Powered By : XYZScripts.com